“Le Aiā a le Tamaitiiti ia Aʻoaʻoina e Uiga i le Atua”

IĀ TESEMA 9, 2008, na faia ai se seminā faapitoa a le Sosaiete i Suetena mo Aiā a le Tamaitiiti, na autū i “Le Aiā a le Tamaitiiti ia Aʻoaʻoina e Uiga i le Atua.” E tele manatu na faaalia e failauga mai le Lotu Suetena ma isi lotu ua taʻua o lotu Kerisiano, le lotu Isalama, ma tagata e faatāua le lelei o isi.

O se tasi o failauga, o se failotu o lē na faapea mai: “E lē lava ni upu e faamatala ai le tāua tele o tala i le Tusi Paia mo le aʻotauina o fanau i mea faaleagaga.” E faapefea ona faamalieina manaʻoga faaleagaga o tamaiti e ala i tala o le Tusi Paia?

O le faamatalaga a se failotu i lana lauga, “E ala i mau ma tala o le Tusi Paia, ua maua ai e fanau mea e mafaufau loloto i ai.” Na ia taʻua “le tala iā Atamu ma Eva, Kaino ma Apelu, Tavita ma Koliata, le fanau mai o Iesu, le tala i le aolafoga o Sakaio, le faataoto i le atalii faamaʻimau ʻoa, le Samaria agalelei.” Ua avea nei tala o “ni faaaʻoaʻoga e avea ma taʻiala i le tamaitiiti i mataupu tāua o le olaga, e pei o le faaʻoleʻole, loto faamagalo, togisala, le ita, amioga leaga, le faia o faaleleiga, ma le alofa faaleuso e lē manatu faapito. O nei faataʻitaʻiga o ni ata e avea ma auala e suia ai le olaga o se tasi tasi, e faatino ma aogā iā te ia.”

E moni, o se mea lelei le faalaeiau e faitau le Tusi Paia. Peitaʻi, faamata e mafai e tamaiti ona “mafaufau loloto” na o i latou i mea ua latou faitau ai i le Tusi Paia ma faia ai ni filifiliga saʻo?

E oo lava i tagata matutua, e manaʻomia ona faamatala atu iā i latou mau o le Tusi Paia. O se faaaʻoaʻoga, ua taʻu mai e le Tusi Paia se tagata na lē mafai ona malamalama i mea faaleagaga, e ala i le “mafaufau loloto” na o ia. O ia lea o se alii maualuga i Aitiope. Sa ia faitau i le valoaga a Isaia ae leʻi malamalama i le uiga. Ae ona o lona fia iloa o le feʻau a le perofeta, na fiafia ai o ia e talia le faamalamalamaga na avatu e Filipo. (Galu. 8:26-40) E lē na o le Aitiope e faapena. O i tatou uma lava, aemaise lava tamaiti, e manaʻomia se faamalamalamaga o mau mai le Tusi Paia.

Ua lapataʻia mai le Tusi Paia: “Ua fusifusia le loto o le tama i le valea.” (Faata. 22:15) E manaʻomia e tamaiti se taʻitaʻiga ma se faasinoga, ma o le matafaioi a mātua le aʻoaʻoina o i latou i le Atua ma tapulaa tau amio e faavae i le Tusi Paia, ma mea ua aʻoaʻoina i le faapotopotoga. E tatau ona maua e tamaiti lenā toleniga. E mai lava a o lāiti, e latou te manaʻomia le fesoasoani ia ati aʻe se faavae lelei faale-Tusi Paia e aʻoaʻoina e uiga i le Atua, ia avea ai ma ‘⁠tagata matutua o ē ua faaaogā o latou mafaufau e iloa le mea saʻo ma le mea sesē ina ua aʻoaʻoina.’—Epe. 5:14.