Po o E Manatu iā Ieova o Sou Tamā?

“LE ALII e, ia e aʻoaʻo mai iā i matou i le tatalo.” Ina ua faia e se tasi o ona soo lenā talosaga, na tali atu Iesu: “Pe a outou tatalo, ia faapea atu, ‘Lo matou Tamā e, ia faapaiaina lou suafa.’” (Luka 11:1, 2) Sa ono taʻua e Iesu Ieova e ala i le faaaogāina o faalupega mataʻina, e pei o “Lē e ona le malosi uma lava,” le “Aʻoaʻo Sili,” ‘Lē na foafoaina mea,’ “Lē e mai anamuā ona aso,” ma “le Tupu o le vavau.” (Kene. 49:25; Isa. 30:20; 40:28; Tani. 7:9; 1 Timo. 1:17) Ae na filifili Iesu e faaaogā le taʻu “Tamā.” Aiseā? Atonu e manaʻo ia tatou faalatalata atu i Lē e silisili i le aoao o mea, i le auala e pei ona faalatalata atu ai se tamaitiiti lotomaulalo i se tamā alofa.

Ae peitaʻi, e faigatā i nisi tagata ona mafaufau i le Atua o so latou Tamā. Ua faapea mai se Kerisiano e igoa iā Atsuko *, “I le tele o tausaga talu ona ou papatiso, sa faigatā iā te aʻu ona mafuta vavalalata atu iā Ieova, ma tatalo atu iā te ia o se Tamā.” I le taʻua o le māfuaaga na faigatā ai, ua ia faapea mai, “Ou te lē manatua se taimi na faaalia mai ai e loʻu tamā moni iā te aʻu le alofa.”

I nei aso faigatā e gata ai, ua matuā leai lava se “lotoaiga” lea e faatalitalia e se tasi mai i se tamā. (2 Timo. 3:1, 3) E lē o se mea fou la le iai i tagata o lagona e pei ona iai iā Atsuko. Peitaʻi, o se faalaeiauga le iloaina, e iai māfuaaga lelei e tatou te manatu ai iā Ieova, o so tatou Tamā alofa.

O Ieova o Lē Agalelei e Saunia Mea

Pe afai e tatou te manatu iā Ieova o lo tatou Tamā, e manaʻomia ona tatou faamasani lelei iā te ia. Na fetalai Iesu: “E leai se tasi e iloa lelei le Atalii, ua na o le Tamā. E leai foʻi se tasi e iloa lelei le Tamā, ua na o le Atalii ma sē ua loto le Atalii e faaali i ai.” (Mata. 11:27) O se auala sili e iloa ai le tulaga o Ieova i le avea o se Tamā, o le mafaufau lea i mea na faailoa mai e Iesu e uiga i le Atua moni. O lea la, o le ā na faailoa mai e Iesu e uiga i le Tamā?

I le faailoaina mai o Ieova o le Puna o lona ola, na fetalai Iesu: “Ua ou ola . . . ona o le Tamā.” (Ioa. 6:57) E faapea foʻi i tatou, ua tatou maua le ola ona o le Tamā. (Sala. 36:9; Galu. 17:28) O le ā na uunaʻia ai Ieova e foaʻi atu le ola i isi? Pe e lē ona o le alofa? Ona o lea meaalofa, e mautinoa la e tatau foʻi ona tatou alolofa atu i lo tatou Tamā i le lagi.

O le faailoaga aupito sili o le alofa o le Atua i tagata, o le saunia lea o le taulaga togiola e ala iā Iesu. O lenā gaoioiga alofa, ua mafai ai ona maua e tagata agasala se faiā ma Ieova e ala i lona Alo pele. (Roma 5:12; 1 Ioa. 4:9, 10) Ma ona o lo tatou Tamā i le lagi o Lē e faataunuuina ana folafolaga, e tatou te mautinoa la, o i latou uma e alolofa ma usiusitaʻi iā te ia, o le a mulimuli ane olioli i “le saʻolotoga mamalu o le fanau a le Atua.”—Roma 8:21.

O lo tatou Tamā i le lagi, e na te “faaoso [foʻi] lona lā” iā i tatou i aso uma. (Mata. 5:45) E lē manaʻomia ona tatou tatalo ia oso aʻe le lā. Ae e tatou te matuā manaʻomia ona olioli i ona ave māfanafana! E lē gata i lea, o lo tatou Tamā o Lē e tutasi i le saunia o mea, e na te silafia o tatou manaʻoga faaletino ae tatou te leʻi ōle atu iā te ia. O lea la, pe e lē tatau ea ona tatou faaalu se taimi e mātauina ai ma manatunatu ma le talisapaia, le auala o loo tausia ai e lo tatou Tamā i le lagi ana foafoaga?—Mata. 6:8, 26.

 Lo Tatou Tamā—O “Lē e Puipui ma le Alofa”

Na faamautinoa atu e le valoaga a Isaia i tagata o le Atua i aso anamua e faapea: “O le a siitia mauga, ma maluelue mea maupuʻepuʻe, ae e lē aveesea loʻu alofa iā te oe pe maluelue foʻi laʻu feagaiga o le filemu, ua fetalai mai ai Ieova o Lē e puipui ma le alofa iā te oe.” (Isa. 54:10, The Bible in Living English) Ina ia faamaonia lenei manatu, ua faaalia i le tatalo a Iesu i le pō mulimuli o lona soifuaga i le lalolagi, e moni o Ieova o “Lē e puipui ma le alofa.” Na tatalo Iesu e faatatau i ona soo e faapea: “O i latou, e i le lalolagi lava i latou, ma ou te alu atu iā te oe. Le Tamā paia e, ia e leoleo iā i latou ona o lou suafa.” (Ioa. 17:11, 14) Na leoleo ma puipuia e Ieova soo o Iesu.

O se tasi o auala ua puipuia ai i tatou e le Atua mai i togafiti a Satani i aso nei, o le saunia lea o meaʻai faaleagaga i le taimi tatau e ala mai i “le pologa faamaoni ma le faautauta.” (Mata. 24:45) E tāua tele ona faaaogāina na meaʻai e faamalosia ai, pe afai e tatou te “oofu i le ofutau atoatoa mai i le Atua.” Seʻi manatu, mo se faaaʻoaʻoga, o “le talita telē o le faatuatua,” lea e tatou te “mafai ai ona . . . tineia ū fanafana mū uma a lē o loo leaga.” (Efe. 6:11, 16) O lo tatou faatuatua e puipuia ai i tatou mai i le afāina faaleagaga, ma o se faamaoniga o le mana o lo tatou Tamā e puipuia ai.

E mafai ona tatou iloa atili e faatatau i le alofa o lo tatou Tamā i le lagi, e ala i le iloilo totoʻa o le auala na gaoioi ai le Alo o le Atua a o iai i le lalolagi. Seʻi mātau le faamatalaga ua taʻua i le Mareko 10:13-16. O i inā o loo taʻua ai le fetalaiga a Iesu i ona soo e faapea: “Tuu ai pea tamaiti e ō mai iā te aʻu.” A o faapotopoto atu na tamaiti iā te ia, sa opo ma le agalelei e Iesu ma faamanuia iā i latou. E mautinoa na matuā fiafia i latou! Ma talu ai na fetalai Iesu: “O lē ua vaai mai iā te aʻu, ua vaai foʻi o ia i le Tamā,” ua tatou iloa ai, e finagalo le Atua moni ia tatou ō atu iā te ia.—Ioa. 14:9.

O Ieova le Atua, o le Puna e lē uma o le alofa. O ia o Lē e tutasi i le saunia o mea, ma Lē e lē mafaatusalia lana puipuiga, e finagalo ia tatou mafuta vavalalata atu iā te ia. (Iako. 4:8) E mautinoa la o Ieova o le Tamā e sili ona lelei!

E Matuā Aogā iā i Tatou!

E tele aogā e tatou te maua pe a tatou faatuatua iā Ieova, o lo tatou Tamā alofa i le lagi. (Faata. 3:5, 6) Na aogā iā Iesu le faatuatua atoatoa i lona Tamā. Na taʻu atu e Keriso i ona soo: “E lē na o aʻu, ae o loo ma faatasi ma le Tamā na auina mai aʻu.” (Ioa. 8:16) Sa mautinoa pea e Iesu le fesoasoani a Ieova. O se faataʻitaʻiga, i lona papatisoga, na ia maua ai le faamautinoaga alofa mai i le Tamā, o lē na fetalai mai: “O loʻu Atalii pele lenā, o lē ua malie i ai loʻu loto.” (Mata. 3:15-17) Ma a o toeitiiti lava maliu o ia, na alaga atu Iesu e faapea: “Loʻu Tamā e, ou te tuuina atu loʻu agaga i ou aao.” (Luka 23:46) Sa mausalī pea le faatuatua o Iesu i lona Tamā.

E mafai foʻi ona faapena i tatou. Pe afai e tatou te ʻau ma Ieova, o le ā se mea e tatou te fefefe ai? (Sala. 118:6) Sa fai ma masani a Atsuko lea na taʻua i le amataga, le faalagolago i lona lava malosi pe a fesagaʻi ma faafitauli. Ae ina ua ia suʻesuʻeina le soifuaga o Iesu ma lana faiva, sa ia taulaʻi patino atu i le faiā māfana a Iesu ma lona Tamā i le lagi. O le ā le iʻuga? Ua faapea mai Atsuko: “Ua ou iloa le uiga o le iai o se Tamā ma faalagolago atu iā te ia.” Ua ia toe faapea mai: “Ua ou tofo i le filemu moni ma le fiafia. O le mea moni, e leai se māfuaaga e tatou te soona popole ai i se mea.”

E faapefea ona tatou maua atili aogā mai i le manatu iā Ieova o lo tatou Tamā? E masani lava ona alolofa tamaiti i o latou mātua ma mananaʻo e faafiafia i latou. Ona o le alofa, na faia ai pea e le Alo o le Atua ‘mea e fiafia i ai le finagalo o lona Tamā.’ (Ioa. 8:29) E faapena foʻi, o le alofa i lo tatou Tamā i le lagi e uunaʻia ai i tatou, e gaoioi ma le atamai ma ‘vivii atu iā te ia i luma o tagata.’—Mata. 11:25; Ioa. 5:19.

 O Loo ‘Uuina lo Tatou Lima Taumatau’ e le Tamā

Ua saunia foʻi e lo tatou Tamā i le lagi se “fesoasoani”—o lona agaga paia. Na fetalai Iesu o le a ‘taʻitaʻia outou i upu moni uma’ e lenā agaga. (Ioa. 14:15-17; 16:12, 13) E mafai e le agaga paia o le Atua ona aumaia iā i tatou se malamalamaga sili e faatatau i lo tatou Tamā. E mafai ona fesoasoani iā i tatou e lepetia ai “mea ua matuā mautū,” o lona uiga o talitonuga ua mauaa, o manatu sesē, po o vaaiga lē saʻo, ma “faatoʻilaloina [ai] manatu uma ina ia usiusitai i le Keriso.” (2 Kori. 10:4, 5) O lea la, seʻi o tatou tatalo iā Ieova mo le “fesoasoani” na folafolaina mai, ma le mautinoa o le a “foaʻi mai e le Tamā o i le lagi le agaga paia iā i latou o ē ōle atu iā te ia.” (Luka 11:13) E talafeagai foʻi ona tatalo ia fesoasoani mai le agaga paia iā i tatou, ina ia atili ai ona mafuta vavalalata atu iā Ieova.

E lagona e se tamaitiiti le malupuipuia, saogalemu, ma le lē fefe pe a savavali e uulima ma lona tamā. Pe afai e te manatu moni iā Ieova o lou Tamā, e mafai ona e mautinoa i upu faamāfanafana nei: “O aʻu o Ieova lou Atua, o loo uuina lou lima taumatau, o Lē e fai atu iā te oe, ‘Aua e te fefe. Ou te fesoasoani iā te oe.’” (Isa. 41:13) E mafai ona e maua le faaeaga matagofie o le “savavali” ma le Atua e faavavau. (Mika 6:8) Ia faia pea lona finagalo, ona e tofo ai lea i le alofa, olioli, ma le lagona saogalemu lea e maua mai i le manatu iā Ieova o lou Tamā.

[Faamatalaga pito i lalo]