‘⁠Taʻutaʻu Atu le Afioga a le Atua ma le Lototetele’

“Ua faatutumuina foʻi i latou . . . i le agaga paia, ma ua taʻutaʻu atu le afioga paia a le Atua ma le lototetele.”—GALU. 4:31.

1, 2. Aiseā e ao ai ona tatou taumafai ia taulau manuia i la tatou faiva?

I LE tolu o aso a o leʻi maliu o ia, na taʻu atu e Iesu i ona soo e faapea: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga.” A o leʻi afio aʻe o ia i le lagi, na faatonu e Iesu ua toe faatūina ia ona soo, ina ia ‘fai tagata o nuu uma lava ma soo, ia aʻoaʻoina i latou e tausi i mea uma na ia poloaʻi atu ai iā te i latou.’ Na ia folafola atu iā i latou, o le a faatasi o ia ma i latou “i aso uma lava seʻia oo i le taufaaiʻuiʻuga o le faiga o mea a le lalolagi.”—Mata. 24:14; 26:1, 2; 28:19, 20.

² I le avea o ni Molimau a Ieova, ua faia ai so tatou sao maelega i le galuega lea na amataina i le uluaʻi senituri. E leai lava se isi galuega e tutusa lona tāua ma le galuega faasaoola o le talaʻia o le Malo, ma le faia o soo. E tāua tele la ona tatou taulau manuia i la tatou faiva! I le mataupu lenei, o le a tatou iloa ai le auala ua fesoasoani ai le taʻitaʻiga a le agaga paia iā i tatou, e tautatala atu ai ma le lototetele a o auai i le galuega talaʻi. O le a faaalia i mataupu e lua o loo mulimuli mai, le auala e taʻitaʻia ai i tatou e le agaga paia o Ieova, ina ia maua le tomai e aʻoaʻo atu ai ma le atamai, ma ia talaʻi pea.

Tatou te Manaʻomia le Lototele

3. Aiseā e manaʻomia ai le lototele a o auai i le galuega talaʻi o le Malo?

³ O se faaeaga e lē mafaatusalia la tatou galuega mai le Atua, o le folafola atu o le Malo.  Ae peitaʻi, e lē faapea ai e leai ni faafitauli. E ui ina ua talia fiafia e nisi tagata le tala lelei o le Malo o le Atua, ae e toʻatele lava e pei o i latou na ola i aso o Noa. Na fetalai Iesu, e latou te “leʻi ano i ai seʻia oo mai le lolo ma tafiesea ai i latou uma.” (Mata. 24:38, 39) E iai foʻi i latou e tauemu ma tetee mai iā i tatou. (2 Pete. 3:3) E ono tetee mai foʻi taʻitaʻi o malo, o uō i le aʻoga ma galuega, e oo foʻi i tagata o le aiga. E lē gata i lea, o ō tatou lava vaivaiga, e pei o le matamuli po o le fefe ina neʻi lē fiafia mai tagata. E anoanoaʻi māfuaaga e faafaigatā ai ona tatou “saʻoloto e tautala atu,” ma taʻutaʻu atu le Afioga a le Atua ma le “lototele.” (Efe. 6:19, 20) O le finafinau e tautala atu i le Afioga a le Atua, e manaʻomia ai le lototele. O le ā e mafai ona fesoasoani iā i tatou e maua ai le lototele?

4. (a) O le ā le lototele? (e) Na faapefea ona lototele le aposetolo o Paulo e talaʻi atu i tagata Tesalonia?

⁴ O le upu Eleni ua faaliliuina i le “lototele,” o lona uiga, “e lē mā e tautala atu, tautala saʻo, taʻu atu ma le lē fefe le mea moni.” O lona uiga, “e toa, mautinoa, . . . e lē fefe.” O le lototele, e lē uiga atu i le tautala lē migao po o le lē mafaufau. (Kolo. 4:6) O le lototele e tatou te mananaʻo ai foʻi ia filemu ma tagata uma. (Roma 12:18) E lē gata i lea, e manaʻomia ona ōgatusa lo tatou lototele ma le faautauta a o tatou talaʻi atu le tala lelei o le Malo o le Atua, ina ia tatou lē faatigā ai fua i se tagata o loo tatou talaʻi atu i ai. O le mea moni, ina ia maua le lototele, e tatau ona tatou taumafai e atiaʻe isi uiga e manaʻomia. Peitaʻi, e lē mafai ona tatou faalagolago atoatoa i lo tatou lava tomai, po o le malosi ina ia atiaʻe ai le lototele. Ina ua “faileagaina ma le lē mafaufau” Paulo ma ana aumea i Filipi, na mafai faapefea ona latou “lototetele” e tautatala atu i tagata i Tesalonia? Na tusi Paulo: “Ona o lo tatou Atua.” (Faitau le 1 Tesalonia 2:2.) E mafai e Ieova le Atua ona faateʻaese lo tatou fefe, ae foaʻi mai iā i tatou le lototele.

5. Na faapefea ona avatu e Ieova le lototele iā Peteru, Ioane ma isi soo?

⁵ Ina ua luʻia e “taʻitaʻi [o tagata], o toeaina, ma le ʻautusiupu,” na faapea atu Peteru ma Ioane: “Pe e tonu i le silafaga a le Atua ona ma faalogo iā te outou nai lo o le Atua, ia pule outou. A o i maʻua, e lē mafai ona ma lē taʻu atu mea ua ma vāai ma faalogo i ai.” Nai lo o le tatalo i le Atua ina ia taofia sauāga, na la ʻaiʻoi atu i le Atua faatasi ma o la uso talitonu e faapea: “Ieova e, ia e silasila mai i la latou faamataʻu, ma ia tuuina mai i au pologa le malosi e tautatala atu ai pea i lau afioga ma le lototetele.” (Galu. 4:5, 19, 20, 29) O le ā le tali mai a Ieova i la latou talosaga? (Faitau le Galuega 4:31.) Na fesoasoani mai Ieova iā i latou ia maua le lototele e ala i lona agaga. E mafai foʻi ona faia faapea e le agaga o le Atua iā i tatou. E faapefea la ona tatou maua le agaga o le Atua ma taʻitaʻia ai i tatou i le faiva?

Le Auala e Maua ai le Lototele

6, 7. O le ā le auala sili e maua ai le agaga paia o le Atua? Aumai ni faaaʻoaʻoga.

⁶ O le auala sili e maua ai le agaga paia o le Atua, o le talosaga atu lea i ai. Na faapea atu Iesu i lana ʻaufaalogologo: “O outou o ē e leaga, afai tou te avatu i a outou fanau meaalofa lelei, e sili atu la ona foaʻi mai e le Tamā o i le lagi le agaga paia iā i latou o ē e ōle atu iā te ia!” (Luka 11:13) O lea la, e ao ona tatou tatalo atu e lē aunoa mo le agaga paia. Pe afai e tatou te fefefe e fai nisi vala patino o le faiva—e pei o le molimau atu i le alatele, talaʻi lē fuafuaina, pe galue i oganuu pisinisi—e mafai ona tatou tatalo iā Ieova mo lona agaga ma talosaga atu iā te ia e fesoasoani mai iā i tatou e maua le lototele e manaʻomia.—1 Tesa. 5:17.

⁷ O le mea lenā na fai e se fafine Kerisiano e igoa iā Rosa. * I se tasi aso a o iai Rosa i lana galuega, sa faitau ai e se faiaʻoga e la te faigaluega faatasi se lipoti, mai i se isi aʻoga e uiga i le faileagaina o tamaiti. Na matuā faateʻia le faiaʻoga i le mea na ia faitau ai, ma alaga atu, “O le ā le mea ua tupu i lenei lalolagi?” E leʻi fia misia e Rosa le avanoa e talaʻi atu ai. O le ā na ia faia ina ia maua ai le lototele e tautala atu ai?  Fai mai Rosa: “Na ou tatalo iā Ieova ina ia fesoasoani mai lona agaga iā te aʻu.” Sa mafai ona ia avatu se molimau lelei ma faia se fuafuaga e toe talanoa atili. Seʻi manatu foʻi i le tulaga o se teineitiiti e lima tausaga, e igoa iā Milane, e nofo i le aai o Niu Ioka. Ua faapea mai Milane: “Ae ou te leʻi alu i le aʻoga, e masani ona ma tatalo pea ma loʻu tinā iā Ieova.” O le ā le mea e la te tatalo ai? Ina ia maua e Milane le lototele e tūmausalī ai ma molimau atu e uiga i lona Atua! Ua faapea mai lona tinā: “O le auala lenei na fesoasoani iā Milane, e faamatala atu ai lona tulaga e faatatau i aso fanau ma aso mālōlō, ma taumamao ese ai mai le auai atu i na aso faamanatu.” Po ua lē faaalia ai i nei faaaʻoaʻoga, e aogā le tatalo pe a manaʻomia le lototele?

8. O le ā tatou te aʻoaʻoina mai i le perofeta o Ieremia e uiga i le mauaina o le lototele?

⁸ Seʻi manatu foʻi i le mea na fesoasoani i le perofeta o Ieremia ina ia maua ai le lototele. Ina ua tofia o ia e Ieova e avea ma perofeta i nuu, na tali atu Ieremia: “O aʻu nei e lē iloa tautala, auā ua na o aʻu o se tamaitiiti.” (Iere. 1:4-6) Peitaʻi, mulimuli ane na oo ina maumauaʻi ma malosi Ieremia i lana galuega talaʻi, ma na manatu ai le toʻatele iā te ia o sē e folafola atu mala. (Iere. 38:4) E silia i le 65 tausaga o ia folafola atu ma le lototele faamasinoga a Ieova. Na lauiloa o ia i Isaraelu i lona lē fefe ma le talaʻi ma le lototele, o lea pe tusa o le 600 tausaga mulimuli ane, ina ua tautala atu ma le lototele Iesu, na manatu nisi o ia o Ieremia lea ua toetū mai. (Mata. 16:13, 14) Na faapefea ona manumalo le perofeta o Ieremia i lona matamuli? Ua ia faapea mai: “I loʻu loto, ua pei [le afioga a le Atua] o se afi e mumū o loo punitia i totonu o oʻu ivi; ma ua ou lē lavā taofi.” (Iere. 20:9) Ioe, o le afioga a Ieova na avatu ai iā Ieremia le malosi ma uunaʻia ai o ia e tautala atu.

9. E aafia faapefea i tatou i le afioga a le Atua e pei ona tupu iā Ieremia?

⁹ Na tusi atu le aposetolo o Paulo i lana tusi i Kerisiano i Eperu e faapea: “O loo ola le afioga a le Atua ma e matuā malosi foʻi, e sili atu lona maʻai i lo o le pelu e faatau maʻai ona itu, ma e ati e oo lava i le vaevaeina o le tino ma le agaga, o gaugātino ma aano o ivi, e mafai foʻi ona faamasino i manatu ma faanaunauga o le loto.” (Epe. 4:12) O lenei feʻau, po o le afioga a le Atua, e mafai ona iai se aafiaga iā i tatou e pei o Ieremia. Ia manatua, e ui lava na faaaogā tane e tusiaina le Tusi Paia, ae e lē o se tuufaatasiga o ni tusi o le atamai faaletagata, auā na faagaeeina e le Atua. I le 2 Peteru 1:21, tatou te faitau ai e faapea: “E lē o loto o tagata na aumai ai valoaga, ae na tautatala tagata i mea na faailoa mai e le Atua e ala i le taʻitaʻiga a le agaga paia.” Pe a tatou faaalu se taimi e faia ai ni suʻesuʻega loloto a le tagata lava ia i le Tusi Paia, o le a faatumulia o tatou mafaufau i le feʻau na faagaeeina i le agaga paia. (Faitau le 1 Korinito 2:10.) E mafai ona avea lenā feʻau e “pei o se afi e mumū” i totonu iā  i tatou, ma lē mafai ai ona tatou taofiofia ae taʻu atu.

10, 11. (a) O le ā le auala e tatou te suʻesuʻeina ai le Tusi Paia ina ia maua le lototele e tautala atu ai? (e) Taʻu mai se laasaga se tasi ua e fuafua e fai ina ia faaleleia ai le auala e fai ai au lava suʻesuʻega.

¹⁰ Ina ia matuā aogā iā i tatou a tatou lava suʻesuʻega o le Tusi Paia, e tatau ona faia i se auala e pāʻia ai o tatou loto i le feʻau o le Tusi Paia, ma aafia ai lo tatou tagata i totonu. O se faaaʻoaʻoga, na vaaia e le perofeta o Esekielu se faaaliga, lea na talosagaina ai o ia e ʻai le tusi tāʻai o loo iai se feʻau malosi, e ao ona faaoo atu i se nuu e lē fia faalogo. Sa tatau ona ave i fale atoatoa e Esekielu le feʻau ma avea o sana mea totino. O le faia faapea, o le a avea ai o se mea fiafia le faaooina atu o lenā feʻau—e suamalie e pei o le meli.—Faitau le Esekielu 2:8–3:4, 7-9.

¹¹ O loo tatou iai i se tulaga e pei o Esekielu. I aso nei, e toʻatele tagata e lē fia faalogo i mea o loo fai mai ai le Tusi Paia. Pe afai e tatou te finafinau e tautala atu i le afioga a le Atua, e tāua la ona tatou suʻesuʻe le Tusi Paia i se auala e mafai ai ona tatou ave i fale atoatoa le feʻau o loo i le Tusi Paia. Ia fai ma masani le faia e lē aunoa o a tatou suʻesuʻega, ae e lē tatau ona fai ma misi. Ia pei lo tatou faanaunauga o le faisalamo, o lē na pese e faapea: “Ia mālie iā te oe upu a loʻu gutu ma manatunatuga o loʻu loto Ieova e, loʻu Papa ma Lē e togiolaina aʻu.” (Sala. 19:14) Maʻeu le tāua o le tatou faaalu o se taimi e manatunatu loloto ai i mea ua tatou faitau ai, ina ia matuā goto ifo upu moni o le Tusi Paia i o tatou loto! Ioe, e ao ona tatou tauivi e faaleleia le auala e fai ai a tatou lava suʻesuʻega. *

12. Aiseā e fesoasoani ai sauniga faa-Kerisiano iā i tatou ina ia taʻitaʻia e le agaga paia?

¹² O se isi auala e maua ai aogā mai i le agaga paia o Ieova, o le “manatunatu . . . le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou.” (Epe. 10:24, 25) O lo tatou faamalolosi e auai e lē aunoa i sauniga faa-Kerisiano, faalogologo lelei ma faatatau mea ua tatou aʻoaʻoina, o ni auala lelei ia e taʻitaʻia ai e le agaga. E lē gata i lea, pe e lē o aumaia ea e le agaga o Ieova faatonuga e ala mai i le faapotopotoga?—Faitau le Faaaliga 3:6.

Aogā o le Mauaina o le Lototele

13. O le ā ua tatou iloa mai i mea na faataunuuina i le galuega talaʻi a Kerisiano i le uluaʻi senituri?

¹³ O le agaga paia o le mana e aupito sili ona malosi i le vateatea, ma e mafai ona faamalosia ai tagata e fai le finagalo o Ieova. O le taʻitaʻiga a le agaga na mafai ai ona faataunuu e Kerisiano i le uluaʻi senituri se galuega talaʻi tele. Na latou talaʻi atu le tala lelei “i foafoaga uma i lalo o le lagi.” (Kolo. 1:23) Pe a tatou manatu i ai, o le toʻatele o i latou “e leʻi lava ni aʻoaʻoga ma e faatauvaa,” o lea la, ua iloa ai na uunaʻia i  latou i se mana e sili atu ona malosi.—Galu. 4:13.

14. O le ā e fesoasoani iā i tatou ina ia “maelega [ai] i la le agaga”?

¹⁴ O le ola e tusa ai ma le taʻitaʻiga a le agaga paia, e faamalosia ma uunaʻia ai i tatou e faataunuu le faiva ma le lototele. O le tatalo e lē aunoa mo le agaga, tinoū e suʻesuʻe, tatalo ma manatunatu loloto i mea e tatou te faitau ai, ma auai pea i sauniga faa-Kerisiano, e fesoasoani iā i tatou e “maelega [ai] i la le agaga.” (Roma 12:11) E tusa ai ma “se tagata Iutaia e igoa iā Apolo na fanau i Alesania, o se tagata mauupu,” ua taʻua i le Tusi Paia: “Ua tumu o ia i le agaga paia, ua ia tautala atu ma aʻoaʻo atu ma le saʻo i mea e uiga iā Iesu.” (Galu. 18:24, 25) E ala i le “finafinau i la le agaga,” e mafai ai ona tatou lototetele i la tatou faiva mai i lea fale i lea fale, ma pe a molimau atu lē fuafuaina.—Roma 12:11, The Bible—An American Translation.

15. E faapefea ona aogā iā i tatou le tautala atu ma le matuā lototele?

¹⁵ O le matuā lototele i le molimau atu, e iai sona aafiaga lelei iā i tatou. E faaleleia ai o tatou manatu, auā e tatou te matuā talisapaia le tāua ma le aogā o la tatou galuega. E faaleleia atili ai lo tatou maelega auā e tatou te matuā olioli pe a taulau manuia i le faiva. Ma e faamalosia ai lo tatou maelega, ona ua tatou iloa lelei le faanatinati o le faia o le galuega talaʻi.

16. O le ā e ao ona fai pe afai ua tau mou atu lo tatou maelega i le faiva?

¹⁶ Ae faapefea pe afai ua mou atu lo tatou maelega i le faiva e pei ona sa iai muamua? E manaʻomia la se iloiloga faamaoni o le tagata lava ia. Na tusi Paulo e faapea: “Ia tofotofo pea iā te outou po o outou iai i le faatuatua, ia suʻesuʻe ifo pea iā te outou po o faapeʻī outou.” (2 Kori. 13:5) Ia fesili ifo iā te oe lava: ‘⁠Po o oʻu maelega pea i la le agaga? Po o oʻu tatalo iā Ieova mo lona agaga? Po o faaalia i aʻu tatalo ou te faalagolago iā Ieova ina ia faia lona finagalo? Po o aofia ai i aʻu tatalo le faafetai atu iā Ieova ona o le faiva ua tuuina mai iā i tatou? O ā mai aʻu lava suʻesuʻega? O le ā le tele o le taimi ou te manatunatu loloto ai i mea ua ou faitau ma faalogo ai? Po o fai soʻu sao i sauniga a le faapotopotoga?’ O le mafaufau i fesili e pei o fesili nei, e mafai ona fesoasoani iā te oe e iloa ai vala o loo faalētonu ma fai se taumafaiga e faaleleia.

Ia Lototele e Ala i le Agaga o le Atua

17, 18. (a) O le ā le tele ua faia ai le galuega talaʻi i aso nei? (e) E faapefea ona tatou “saʻoloto e tautala atu” i le faalauiloaina o le tala lelei o le Malo o le Atua?

¹⁷ Na taʻu atu e Iesu o lē ua toetū mai i ona soo e faapea: “E maua e outou le mana, pe a oo ifo iā te outou le agaga paia, ona fai lea o outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.” (Galu. 1:8) Ua faia i aso nei le galuega lea na amata mai i lenā taimi, i se auala e leʻi faia ai faapea i se taimi muamua. E silia i le fitu miliona Molimau a Ieova o loo faalauiloaina atu le feʻau o le Malo, i le silia i le 230 atunuu, ma e lata i le 1.5 piliona itula o loo faaalu i le tausaga i le galuega talaʻi. Maʻeu le faagaeetia ai i le faia o se sao maelega i lenei galuega o le a lē toe faia!

¹⁸ E pei ona sa iai i le uluaʻi senituri, o loo faia le galuega talaʻi i le lalolagi aoao i aso nei, i le taʻitaʻiga a le agaga o le Atua. Pe afai e tatou te talia le taʻitaʻiga a le agaga, o le a tatou “saʻoloto e tautala atu” i la tatou faiva. (Galu. 28:31) O lea la, seʻi taʻitaʻia i tatou e le agaga a o tatou faalauiloa atu le tala lelei o le Malo o le Atua!

[Faamatalaga pito i lalo]

O le ā na E Aʻoaʻoina?

• Aiseā e manaʻomia ai ona tatou lototetele e tautatala atu i le afioga a le Atua?

• O le ā na fesoasoani i uluaʻi soo ina ia tautatala atu ai ma le lototetele?

• E faapefea ona tatou maua le lototele?

• E faapefea ona aogā iā i tatou le mauaina o le lototele?

[Fesili mo le Suʻesuʻega]

[Ata i le itulau 7]

E faapefea ona fesoasoani mātua i a latou fanau ia maua le lototele?

[Ata i le itulau 8]

O se tatalo puupuu e mafai ona fesoasoani iā te oe e maua ai le lototele i le faiva