Ua Fesili Mai le ʻAufaitau

O ā māfuaaga e ono iloilo ai le toe papatisoina o se tasi?

I nisi o tulaga, e ono manatunatu ai se tagata ua uma ona papatiso, pe sa talafeagai ona papatisoina o ia i le taimi muamua, ma manaʻo ai e toe papatisoina. O se faataʻitaʻiga, i le taimi o le papatisoga, atonu na ola se tagata i se tulaga lē lelei, pe faia foʻi ni amioga semanū e faateʻaina ai pe ana faapea ua uma ona papatiso. Pe na fetaui lona faia o se tuuina atu i le Atua a o iai i lenā tulaga? E na o le pau le auala e ono mafai ai e lea tagata ona faia se tuuina atu aloaʻia iā Ieova, pe afai na te lē o toe faia lenā amioga e lē talafeagai ma le Tusi Paia. O lea la, o se tagata na papatiso a o iai pea i sea tulaga matuiā, e ono talafeagai ona manatu e tatau ona toe papatisoina o ia.

Ae faapefea se tagata e na te leʻi faia se agasala i le taimi o lona papatisoga, ae na ia faia se mea sesē mulimuli ane ma manaʻomia ai ona taulima e le komiti faafaamasinoga? Atonu e faapea mai o ia, e leʻi malamalama atoatoa i le mea na ia faia i le taimi o lona papatisoga, ma sa leʻi agavaa ai o ia e papatisoina. Pe a feiloaʻi ma le tagata faimea sesē, e lē tatau i le ʻautoeaina ona fai atu ni fesili e uiga i lona papatisoga, pe fesili atu pe na te lagona o aogā lona tuuina atu ma lona papatisoga. Auā ua uma ona faalogo o ia i le lauga e faavae mai i le Tusi Paia e uiga i le tāua o le papatisoga. Sa ia tali atu foʻi ma le mautinoa i fesili e faatatau i le tuuina atu ma le papatisoga. Ona sui lea o ona laʻei ma na faatofuina foʻi i le vai. O le mea lea, e talafeagai ai ona talitonu sa malamalama lelei o ia i le tāua o le mea na ia faia. O lea la, e feutagaʻi le ʻautoeaina ma ia o se tagata ua papatisoina.

Afai e fesiligia e le tagata pe na talafeagai ona papatisoina o ia, e mafai ona faasino i ai e le ʻautoeaina le Watchtower o Mati 1, 1960, itulau e 159 ma le 160, ma Fepuari 15, 1964, itulau e 123 e oo i le 126, o loo talanoaina ai le mataupu i le toe papatisoina o se tasi. Afai e toe papatisoina mulimuli ane pe afai e iai ni tulaga, e pei o le lē lava o le malamalama i le Tusi Paia i le taimi o le papatisoga, o se mataupu lenā e fitoitonu i le tagata lava ia.

O ā vala e ao ona manatunatu i ai se ʻauaiga Kerisiano, pe afai e tasi se fale e nonofo ai?

E manaʻomia e tagata uma se mea e nofo ai. Peitaʻi, o le toʻatele o tagata i aso nei e leai ni o latou fale. Atonu e faalētonu le tamaoaiga, pe iai se faafitauli tau soifua mālōlōina, po o isi māfuaaga, ua nonofo faatasi ai se ʻauaiga, e aofia ai ma nisi tauaiga. I nisi vaega o le lalolagi, e ono feomaʻi ai se aiga i se potu e tasi ma ua leai ai se taimi mo oe lava.

E lē o se matafaioi a le faalapotopotoga a Ieova le faia o se lisi umi o tulafono mo le ʻauuso i le lalolagi aoao, e faatatau i tulaga o loo nonofo ai. Ua faalaeiauina Kerisiano ina  ia mafaufau i taʻiala o le Tusi Paia, ina ia iloa ai pe talia e le Atua pe leai a latou faatulagaga o loo iai. O ā nisi o nei taʻiala?

O le mea muamua e mafaufau i ai, po o le ā le aafiaga o i tatou ma lo tatou itu faaleagaga pe a nonofo faatasi ma isi tagata. O ai nei tagata? E tapuaʻi iā Ieova? Po o ola e tusa ai ma tapulaa a le Tusi Paia? Na tusi le aposetolo o Paulo: “Aua neʻi faasesēina outou. O aumea leaga e faaleagaina ai mea lelei ua masani ai tagata.”—1 Kori. 15:33.

Ua taʻua e le Tusi Paia, e taʻusalaina e Ieova o e ē faitaaga ma e ē mulilulua. (Epe. 13:4) O lea la, e so o se fuafuaga e nonofo faatasi ai ni tagata e leʻi faaipoipo e avea o se ulugalii, e mautinoa lava e lē talia e le Atua. E lē manaʻo se Kerisiano e nofo i se nofoaga e faia ai amioga lē mamā.

E lē gata i lea, ua uunaʻia i tatou e le Tusi Paia o i latou uma e mananaʻo e faafiafia le Atua, ia “sosola ese i le faitaaga.” (1 Kori. 6:18) O le mea lea, e atamai i se Kerisiano le ʻalofia o le nonofo faatasi i se tulaga e ono faaosoosoina ai e faia amioga lē mamā. O se faataʻitaʻiga, seʻi manatu i le tulaga e nonofo faatasi ai ni Kerisiano i se fale. Pe e iai se taimi e ono faaosoosoina ai se tasi ona o lea faatulagaga? Ae ā pe afai e teʻi ua tuua ni tagata se toʻalua e lē o se ulugalii na o i laʻua i le fale, ona e lē o iai isi tagata e latou te nonofo faatasi i lea taimi? E faapena foʻi ona lamatia ni tagata se toʻalua e leʻi faaipoipo ae e fiafia le tasi i le isi, pe afai o loo nonofo i le fale e tasi. O se faiga atamai le ʻalofia o tulaga faapena.

E faapena foʻi ona lē talafeagai mo ē ua tatala faaipoipoga ona nonofo faatasi i se fale e tasi. Talu ai ona sa māfana a latou mafutaga, e ono faaosoosoina e faia amioga lē mamā.—Faata. 22:3.

O se isi foʻi vala e tāua e ao ona manatua, o le vaaiga a le nuu. Atonu e lē o afāina i manatu o Kerisiano faatulagaga o le nonofo faatasi o se ʻauaiga, ae e aliaʻe mai ai ni faamatalaga lē lelei i le nuu, ma o se mea lea e popole ai. E tatou te lē mananaʻo e taʻuvalea le suafa o Ieova ona o a tatou amio. Ua faapenei ona faaupu mai e Paulo: “Aua neʻi avea outou ma mea e tausuai ai tagata Iutaia, ma tagata Eleni, atoa foʻi ma le faapotopotoga a le Atua, e pei foʻi ona ou faafiafia i tagata uma i mea uma lava, ou te lē o saʻili i soʻu lava lelei ae e mo le lelei o le toʻatele, ina ia faaolaina ai i latou.”—1 Kori. 10:32, 33.

O le saʻilia o ni fale talafeagai e nonofo ai, e ono tulaʻi mai ai ni luʻi iā i latou e naunau e lagolagoina tapulaa amiotonu a Ieova. Ae peitaʻi, e tatau i Kerisiano ona “faamautinoa pea po o ā mea e fiafia i ai le Alii.” E tatau ona latou faamautinoa, e leai se mea leaga o faia i o latou aiga. (Efe. 5:5, 10) E manaʻomia ai i Kerisiano ona tatalo mo le taʻitaʻiga a le Atua, ma faia mea uma latou te mafaia ina ia puipuia ai e le tasi le isi i le lelei faaletino, tau amio, ma taʻuleleia ai le suafa o Ieova.