Ia Tumau Ona “Lotomamā” i Nei Aso Faigatā

“E LEAI se tasi e mafai ona faafitia le manatu e faapea, o le amio mamā o se faafitauli i le Lotu i aso nei.” Na faia e le tusitala Katoliko o Vittorio Messori lenā faamatalaga, e faatatau i tulaga leaga tau feusuaʻiga lea na aafia talu ai nei le Lotu i Italia. “E lē mafai ona foʻia lenei tulaga e ala i le aveesea o le tulafono e sā ona faaipoipo patele, auā e 80 pasene o mea na tutupu e aofia ai le tauatane—o faiga faasotoma a patele o ē e latou faamalosia tane ma tama, e faia nei uiga matagā.”—La Stampa.

E mautinoa o le sasao faaafi o le amioleaga, o se faailoga o nei “aso e gata ai” o le faiga o mea a le lalolagi. (2 Timo. 3:1-5) E pei ona faaalia i tala fou, o aafiaga leaga o le paʻū maulalo o amioga, ua iai se taaʻiga leaga e lē gata i tagata lautele, ae faapea foʻi ē ua taʻua i latou lava o auauna a le Atua. O o latou loto faapiʻopiʻo ma lē mamā, ua uunaʻia ai i latou e faia amioga e matuā matagā lava. (Efe. 2:2) O se māfuaaga lelei na lapataʻi mai ai Iesu e faapea, “e sau mai i le loto o mafaufauga leaga, o le fasioti tagata, mulilua, faitaaga, gaoi, molimau pepelo, ma upuleaga.” (Mata. 15:19) Peitaʻi, e finagalo Ieova le Atua i ana auauna ia naunau i le “lotomamā.” (Faata. 22:11) E mafai faapefea la ona lotomamā se Kerisiano i nei aso faigatā?

Le Uiga o le “Lotomamā”

E tusa ai o se tasi tusi, o le upu i le Tusi Paia o le loto, o loo faasino atu i le “vaega i totonu o le tagata,” ma “o le vaega o le tagata e tāua tele i le Atua, lea e faavae aʻe ai le faiā a se tasi ma le Atua, ma e puna mai ai amioga tatau.” O le loto o loo faaāta mai ai le ituaiga tagata moni e iai i tatou. E pei ona faamatilatila mai i le manatu o loo taʻua i luga, e suʻesuʻe e Ieova lenei vaega i ana auauna ma e na te talisapaia.—1 Pete. 3:4.

I le Tusi Paia, e mafai ona faasino atu le upu “mamā,” i se uiga faaletino. Ae e faatatau atu foʻi lea upu i se mea e lē pisipisia⁠—e lē filogia, lē palapalā, pe leaga—i le tulaga tau amio ma tau tapuaʻiga. I le Lauga i luga o le mauga, na fetalai ai Iesu: “E fiafia o ē e lotomamā.” Sa faasino atu o ia i ē e mamā o latou loto ma mafaufau. (Mata. 5:8) E mamā o latou lagona, faanaunauga ma uunaʻiga. E latou te alolofa faamaoni iā Ieova ma o latou lotoatoa, e lē faatagāfai, ae e uunaʻia e le alofa ma le lotofaafetai. (Luka 10:27) E mautinoa e te manaʻo ia mamā i lenā auala.

O se Luʻi le Tumau Ona “Lotomamā”

E lē gata e ao i se auauna a Ieova ona “mamā ona lima,” ae e ao ona “mamā foʻi lona loto.” (Sala. 24:3, 4) Peitaʻi, i aso nei, o se matuā luʻi mo auauna a le Atua le taumafai e tumau ona ‘⁠mamā i le loto.’ E telē se taaʻiga a Satani ma le lalolagi o loo ia pulea, faapea foʻi lo tatou lava tino lē lelei atoatoa, e taumafai e vavaeese i tatou mai iā Ieova. Ina ia teena nei tulaga faigatā, e tāua tele mo i tatou ona naunau i le “lotomamā” ma taofimau i ai. O lenei tulaga o le a puipuia ai i tatou, ma fesoasoani e faaauau ai ona avea i tatou ma uō a le Atua. E faapefea ona tatou maua pea se lotomamā?

I le Eperu 3:12, e tatou te maua ai le lapataʻiga lenei: “Le ʻauuso e, ia faaeteete ina neʻi  iai i se tasi o outou se loto ua leaga e lē faatuatua, ona ua ia tuulafoaʻia le Atua soifua.” E lē mafai ona tatou tumau ona “lotomamā,” pe afai e iā i tatou se loto “e lē faatuatua.” O ā manatu ua faasalalau e Satani le Tiapolo ina ia faavaivaia ai le faatuatua i le Atua? E aofia ai i nei manatu le aʻoaʻoga e faatatau i le evolusione, le filosofia e faapea e leai ni tapulaa moni e iloa ai le mea saʻo ma le mea sesē, ma masalosaloga i le moni o le faagaeeina e le agaga o le Atua o le Tusi Paia. E lē tatau ona tatou talitonu i na filosofia e matuā mataʻutia. (Kolo. 2:8) O le faitauina i aso taʻitasi o le Tusi Paia ma manatunatu loloto i ai, o auala autū ia e tetee atu ai i nei osofaʻiga. O le mauaina o le poto saʻo e uiga i le Afioga a le Atua, o le a faamalosia ai lo tatou alofa mo Ieova ma lo tatou talisapaia o ana feutagaʻiga ma tagata. E matuā manaʻomia lenā alofa ma le talisapaia, pe afai e tatou te mananaʻo e tetee atu i manatu sesē, ma malosi pea le faatuatua iā Ieova, ma tatou maua ai pea se lotomamā.—1 Timo. 1:3-5.

Pe a Fesagaʻi ma Tuʻinanauga o le Tino

O le isi osofaʻiga e ono feagai ma i tatou i le taumafai e tumau ona “lotomamā,” e aofia ai tuʻinanauga o le tino ma meafaitino. (1 Ioa. 2:15, 16) O le manaʻo tele i tupe po o le fia mauʻoa ma maua mea faitino, e mafai ona faaleagaina ai le loto, ma iʻu ai ina faia e se Kerisiano mea e lē tusa ma le finagalo o le Atua. Ua iai nisi ua lē faamaoni i galuega, taufaasesē i isi, pe gaoia foʻi tupe ma mea e lē o ni a latou mea.—1 Timo. 6:9, 10.

E faaalia lo tatou naunau ia “lotomamā,” pe a tatou atiina aʻe se mataʻu talafeagai ia lē faia se mea e faatigā ai iā Ieova, naunau i le mea tonu ma maumauaʻi e taofimau i se lotofuatiaifo lelei. O lenā naunau e uunaʻia ai i tatou e faaauau ona “faia mea uma ma le faamaoni.” (Epe. 13:18) Pe a tatou faia le mea ua tonu, e mafai e le faamaoni ona avatu ai se molimau lelei. Na maua e Emilio, o se Molimau i Italia, o lē e galue o se avetaavale i se kamupani e laʻu pasese, se atotupe na iai se tupe e tusa ma le  470 tupe Europa ($680 Amerika). Na faateʻia tagata e latou te faigaluega faatasi, ina ua ia tuu atu le atotupe i lona pule, lea na mulimuli ane ia toe faafoʻi atu le atotupe i lē e ona. O nisi o tagata e faigaluega faatasi ma Emilio na matuā ofo i lana amio, ma na latou faaalia le fiafia i le Tusi Paia ma amata ni suʻesuʻega. O le iʻuga, e toʻafitu tagata mai i aiga e lua na taliaina le upu moni. Ioe, o le faamaoni mai i se lotomamā, e mafai moni ona uunaʻia ai isi e vivii atu i le Atua.—Tito 2:10.

E iai foʻi se isi mea e mafai ona faaleagaina ai le lotomamā o se Kerisiano, o le iai lea o se vaaiga sesē ma lē mamā e tusa ai o feusuaʻiga. O le mea moni, e mafai ona faaleagaina le loto o se Kerisiano, ona ua manatu le toʻatele e lē afāina le faia o feusuaʻiga a o leʻi faaipoipo, mulilua ma le feusuaʻi o tagata o le itupā lava e tasi. O se tagata e lolo atu i le faia o feusuaʻiga lē mamā, e ono ola o ia i se olaga uigalua, ma natia lana agasala. E mautinoa e lē o faaalia mai ai se “lotomamā.”

Na papatiso Gabriele i le 15 o ona tausaga ma amata loa ona paeonia. Mulimuli ane, na amata ona latou ō atu ma ana aumea lē lelei i fale kalapu. (Sala. 26:4) O inei na amata ai ona ola o ia i se olaga lē mamā ma faatagāfai, ma na faateʻaina ese mai i le faapotopotoga Kerisiano. O lenā aʻoaʻiga mai iā Ieova na māfua ai ona toe mafaufau loloto lenei tauleʻaleʻa. Ua faapea mai Gabriele: “Na amata ona ou faia mea uma ou te leʻi manatu mamafa muamua i ai. Na ou faitauina le Tusi Paia i aso uma, taumafai e malamalama i mea o fetalai mai ai Ieova, ma matuā suʻesuʻe i lomiga faa-Kerisiano. Na ou iloaina e tauia ma faamalieina i le faia o aʻu lava suʻesuʻega, ma e maua le malosi mai i le faitauina o le Tusi Paia ma tatalo faatauanau.” O lenei mea sa fesoasoani iā Gabriele e lafoaʻia ai ana amioga lē mamā, ae toe atiaʻe le la faiā ma Ieova.

Ua toe auauna nei Gabriele o se paeonia, faatasi ma lana avā. Ua faamaonia mai ai i le mea na tupu iā te ia, o le suʻesuʻeina o le Tusi Paia ma lomiga mai i “le pologa faamaoni ma le faautauta,” e mafai ona fesoasoani i se tagata ina ia maua ai se lotomamā ma teena amioga lē mamā.—Mata. 24:45; Sala. 143:10.

Ia “Lotomamā” pe a Feagai ma Tulaga Faigatā

Ua lotovaivai nisi o auauna a le Atua ona o ē tetee mai, faafitauli tau le tamaoaiga ma maʻi tugā. I nisi o taimi e lē lelei faalogona o o latou loto. O le mea foʻi lenā na oo i le tupu o Tavita, lea na faapea mai: “Ua vaivai loʻu loto i totonu iā te aʻu. Ua lē toe lagona foʻi e loʻu loto se mea.” (Sala. 143:4) Aiseā na mafai ai ona foʻia e Tavita na tulaga? Na manatua e Tavita feutagaʻiga a le Atua ma Ana auauna, ma le auala foʻi na laveaʻia ai o ia. Na ia mafaufau loloto i mea na faia e Ieova ona o Lona suafa mamalu. Na naunau Tavita e mafaufau pea i galuega a le Atua. (Sala. 143:5) E faapena foʻi ona fesoasoani le mafaufau loloto i Lē na foafoaina i tatou, ma mea ua ia faia ma o loo faia pea mo i tatou, pe a mafatia i puapuaga.

Pe a agaleagaina i tatou, pe e manatu foʻi ua agaleaga mai se tasi, e mafai ona tigā tele ai o tatou loto. O le mafaufau pea i le mea na tupu e mafai ai ona lē lelei o tatou lagona agaʻi i o tatou uso. E tatou te ono lē toe fia aufaatasi ma lē naunau fiafia ai iā i latou. Peitaʻi, po o ōgatusa lea gaoioiga ma lo tatou faanaunauga ina ia “lotomamā”? E manino la, o le sini ia iai se lotomamā e aofia ai a tatou feutagaʻiga ma o tatou uso Kerisiano, ma le auala tatou te taulimaina ai feeseeseaʻiga.

I se lalolagi ua sasao faaafi ai le amioleaga, ua ese mai ai i tatou o Kerisiano moni ona e tatou te naunau ia “lotomamā.” E tatou te ola i se olaga lelei, a o tatou lagona le toʻafimālie ona o le faia o le finagalo o le Atua. Ae sili ai, o loo tatou olioli i se faauōga vavalalata ma Lē na foafoaina i tatou, o Ieova le Atua o lē e alofa i “ē e mamā o latou loto.” (Sala. 73:1) O le a aofia ai i tatou i ē o le a fiafia, ona na folafola e Iesu, “e latou te iloa atu le Atua” a o Ia gaoioi mo i latou e naunau ia “lotomamā.”—Mata. 5:8.