Le Fanau e, ia Faamalosia lo Outou Naunau e Auauna iā Ieova

“Ia e manatua . . . Lē e Sili na Foafoaina oe i aso o lou tauleʻaleʻa.”—FAI. 12:1.

1. O le ā le valaaulia na faasafua atu i fanau iti i Isaraelu?

PE TUSA o le 3,500 tausaga ua mavae, na faatonuina ai e le perofeta a Ieova o Mose, faitaulaga ma toeaina o Isaraelu: “Ia faapotopoto le nuu, o tane, o fafine, o fanau iti . . . , ina ia latou faalogo ma latou aʻoaʻo ai, auā e ao ona latou matataʻu iā Ieova lo outou Atua, ma ia toʻaʻaga e tausia upu uma o lenei tulafono.” (Teu. 31:12) Mātau mai i latou na faatonu e auai i faatasitasiga mo le tapuaʻiga: o tane, fafine, ma fanau iti. Sa aofia fanau iti iā i latou na faatonuina e faalogo, aʻoaʻo, ma mulimuli i le taʻitaʻiga a Ieova.

2. Na faapefea ona faailoa mai e Ieova lona manatu mamafa i talavou, i le faapotopotoga o uluaʻi Kerisiano?

² I le uluaʻi senituri, sa faaauau ona faaalia e Ieova lona manatu mamafa i fanau iti. O se faataʻitaʻiga, sa Ia uunaʻia le aposetolo o Paulo e faaaofia i nisi o ana tusi na auina atu i faapotopotoga, ia faatonuga patino i fanau iti. (Faitau le Efeso 6:1; Kolose 3:20.) O Kerisiano talavou sa faatatauina na faatonuga, sa agaʻigaʻi i luma lo latou talisapaia o lo latou Tamā faalelagi ma maua ai lana faamanuiaga.

3. Ua faaalia faapefea e fanau i aso nei lo latou naunau e auauna i le Atua?

³ Po o talosagaina talavou i aso nei e faapotopoto e tapuaʻi iā Ieova? Ioe! O le māfuaaga lea o le olioli o tagata uma o le Atua, le vaai atu i le toʻatele o auauna talavou a le Atua i le lalolagi aoao o usitaʻia le timaʻiga a Paulo: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou e pei o le masani a isi, a ia fefaalaeiauaʻi, ia sili foʻi ona faia faapea auā ua outou iloa ua matuā latalata mai lava le aso.” (Epe. 10:24, 25) E toʻatele fanau ua auai ma o latou mātua i le talaʻia o le tala lelei o le Malo o le Atua. (Mata. 24:14) Ina ia faaalia lo latou alofa loloto mo Ieova, e faitau afe fanau ua papatisoina i tausaga uma ma olioli ai i faamanuiaga o le avea ma soo o Keriso.—Mata. 16:24; Mare. 10:29, 30.

Ia Talia Nei le Valaaulia

4. O le ā le matutua o fanau e talia ai le valaaulia a le Atua e auauna iā te ia?

⁴ Ua taʻua i le Failauga 12:1 e faapea: “Ia e manatua o Lē e Sili na Foafoaina oe i aso o lou tauleʻaleʻa.” O le ā le matua e tatau ona iai outou le fanau, ina ia talia ai lenā valaaulia māfana e tapuaʻi ma auauna iā Ieova? E lē o iai se matua faatulagaina i le Tusi Paia. O lea la, aua e te faatuutuu ona e te manatu e te laʻitiiti tele e faalogo atu iā Ieova, ma auauna iā te ia. Po o le ā lava lou matua o iai, ae ua faalaeiauina oe e talia lenei valaaulia e aunoa ma le faatuai.

5. E faapefea ona fesoasoani mātua i le la fanau ia agaʻigaʻi i luma faaleagaga?

⁵ O le toʻatele o outou ua maua se fesoasoani ina ia agaʻigaʻi ai i luma faaleagaga, mai se tasi o mātua po o mātua uma foʻi. O lenei auala, ua pei ai oe o Timoteo i taimi o le Tusi  Paia. A o laʻitiiti lava Timoteo, na aʻoaʻoina o ia i le Tusi Paia e lona tinā o Eunike, ma le tinā o lona tinā o Loi. (2 Timo. 3:14, 15) Atonu o loo faapena foʻi ona toleniina oe e ou mātua i le suʻesuʻeina o le Tusi Paia, tatalo faatasi, ave oe i sauniga a le faapotopotoga ma fonotaga tetele a tagata o le Atua, ma galulue faatasi i le talaʻiga. O le mea moni, o le aʻoaʻoina o oe i ala o le Atua, o se tiutefai tāua tele a ou mātua mai iā Ieova. Po o e talisapaia lo la alofa ma lo la manatu mamafa iā te oe?—Faata. 23:22.

6. (a) E tusa ai ma le Salamo 110: 3, o le ā le auala e ao ona tapuaʻi atu ai iā Ieova? (e) O ā mea o le a tatou iloiloina nei?

⁶ A o tutupu aʻe ma matutua outou le fanau, e finagalo Ieova ia “faamaonia e outou lava po o le ā le finagalo o le Atua, lea e lelei, e mālie, ma lelei atoatoa,” e pei lava ona faia e Timoteo. (Roma 12:2) Pe a e faia faapea, o le a e auai la i mea o loo fai e le faapotopotoga, e lē ona e mananaʻo i ai ou mātua, ae ona e te manaʻo e faia le finagalo o le Atua. Pe a e auauna iā Ieova ma le lotomalie, o le a fiafia ai lona finagalo. (Sala. 110:3) E faapefea la ona e faaalia e te manaʻo e faamalosia lou naunau e faalogo atu iā Ieova, ma mulimuli i ana faatonuga? O le a tatou talanoaina ni auala tāua se tolu e te faia ai faapea. O le suʻesuʻe, tatalo, ma le amio. Seʻi o tatou iloiloina nei vala taʻitasi.

Ia Taumafai e Iloa Uiga o Ieova

7. O le ā le faaaʻoaʻoga na faataatia e Iesu i le avea ai ma tagata aʻoga o le Tusi Paia, ma o le ā na fesoasoani iā te ia e faia faapea?

⁷ O le auala muamua e faaalia ai e te manaʻo e faamalosia lou naunau e auauna iā Ieova, o le faitauina lea o le Tusi Paia i aso taʻitasi. E mafai ona faamalieina lou manaʻoga faaleagaga ma maua le poto tāua o le Tusi Paia e ala i le faitau e lē aunoa. (Mata. 5:3) Na faataatia e Iesu se faaaʻoaʻoga. I se tasi taimi ina ua 12 ona tausaga, na maua o ia e ona mātua i le malumalu, “o loo nonofo faatasi ma aʻoaʻo, o loo faalogologo ma tuufesili atu iā i latou.” (Luka 2:44-46) A o laʻitiiti Iesu, sa fiafia o ia i le Tusi Paia ma malamalama foʻi i ai. O le ā na fesoasoani iā te ia ina ia faia faapea? E mautinoa sa telē se matafaioi tāua na faia e lona tinā o Maria, ma lona tamāfai o Iosefa. O i laʻua o auauna a le Atua na aʻoaʻoina Iesu e faatatau i le Atua mai lava i lona itiiti.—Mata. 1:18-20; Luka 2:41, 51.

8. (a) O fea le taimi e amata ai ona aʻoaʻo e mātua le la fanau ia naunau i le Afioga a le Atua? (e) Taʻu mai se faaaʻoaʻoga e faamaonia ai le tāua o le toleniina o fanau mai lava o lāiti.

⁸ Ua faapena foʻi ona iloa e mātua e matataʻu i le Atua i aso nei, le tāua o le matuā aʻoaʻoina soo o a latou fanau ia iai se naunau mo upu moni o le Tusi Paia mai lava a o laiti. (Teu. 6:6-9) O le mea lenā na faia e se tuafafine Kerisiano e igoa iā Rupi, i le taimi lava na fanau ai lana tamatama matua, o Iosefa. I aso taʻitasi na ia faitau i lana pepe le tusi, Laʻu Tusi o Tala o Le Tusi Paia. A o tuputupu aʻe, na fesoasoani atu lona tinā iā te ia e tauloto mau eseese o le Tusi Paia. Pe na aogā iā Iosefa lena toleniga? O le taimi lava na iloa ai e Iosefa tautala, na mafai ona ia faamatalaina mai le tele o tala o le Tusi Paia i ana lava upu. Ae ina ua lima ona tausaga, na fai ai lana uluaʻi lauga o le Aʻoga o le Faiva Faatiokarate.

9. Aiseā e tāua ai le faitauina o le Tusi Paia, ma mafaufau loloto i mea o e faitauina?

⁹ Ina ia agaʻigaʻi pea i luma i lo outou itu faaleagaga, ia fai ma a outou masani le fanau e, le faitauina o le Tusi Paia i aso uma, ma faia faapea a o faagasolo tausaga talavou ma oo atu ai ina matutua. (Sala. 71:17) E faapefea ona fesoasoani le faitauina o le Tusi Paia e agaʻigaʻi ai i luma faaleagaga? Mātau mai le fetalaiga lenei a Iesu i lana tatalo i lona Tamā: “O le ola e faavavau foʻi lenei, ia latou iloa oe, le Atua moni e toʻatasi.” (Ioa. 17:3) Ioe, a o e ave i fale le poto o Ieova, o le a e malamalama atili i Ona uiga ma faateleina ai lou alofa iā te ia. (Epe. 11: 27) O lea la, o taimi taʻitasi e te  faitauina ai se vaega o le Tusi Paia, ia faaaogā le avanoa e aʻoaʻo atili ai e faatatau iā Ieova. Fesili ifo iā te oe lava: ‘⁠O le ā le mea ou te aʻoaʻoina mai i lenei faamatalaga e faatatau iā Ieova ma Ona uiga? Ua faapefea i lenei fuaitau o le Tusi Paia ona faaalia ai le alofa o le Atua, ma lona manatu mamafa mo aʻu?’ O le mafaufau loloto i na fesili, o le a fesoasoani iā te oe e iloa ai le auala e mafaufau ma lagona ai Ieova, ma mea o loo ia faafinagaloina mai iā te oe. (Faitau le Faataoto 2:1-5.) I le pei o le talavou o Timoteo, o le a “faatalitonuina” oe i mea ua e aʻoaʻoina mai le Tusi Paia, ma uunaʻia ai e tapuaʻi iā Ieova ma se lotomalie.—2 Timo. 3:14.

Le Auala e Faamalosia ai e le Tatalo Lou Alofa iā Ieova

10, 11. E fesoasoani faapefea le tatalo iā te oe e faamalosia ai lou naunau e auauna i le Atua?

¹⁰ O le auala lona lua e faamalosia ai lou naunau e auauna iā Ieova ma lou lotoatoa, e ala lea i le tatalo. E tatou te faitau i le Salamo 65: 2, e faapea: “Le Faafofoga tatalo e, e ō atu iā te oe tagata uma lava.” E oo lava i le taimi na avea ai Isaraelu ma tagata na osi feagaiga ma Ieova, na mafai e tagata ese na ō ane i le malumalu o Ieova ona faalatalata iā te ia i le tatalo. (1 Tu. 8:41, 42) E lē faailoga tagata le Atua. Ua maua e i latou e tausia ana poloaʻiga le faamautinoaga, o le a ia faafofoga atu iā i latou. (Faata. 15:8) E mautinoa la, o “tagata uma lava” o loo aofia ai ma outou le fanau.

¹¹ E te silafia o le faavae o so o se faauōga, o le iai o ni fesootaʻiga lelei. Atonu e te fiafia e talatalanoa i ou manatu, o mea e te popole ai, ma ou lagona i sau uō e te māfana i ai. I se tulaga taitutusa, o le faia o tatalo mai le loto, e te fesootaʻi atu ai i Lē na Foafoaina oe. (Fili. 4:6, 7) Talanoa iā Ieova e pei o loo sasaa atu lou loto i se matua alofa po o se uō māfana. O le mea moni, e malosi le sootaga i le auala e te tatalo ai ma ou lagona e faatatau iā Ieova. O le a e mātauina o le māfana o la oulua faauōga ma Ieova, o le uigā foʻi lea o au tatalo.

12. (a) Aiseā e lē na o upu e aofia ai i tatalo uigā? (e) O le ā e fesoasoani iā te oe e iloa ai e latalata Ieova iā te oe?

¹² Ia teu i mafaufau, o tatalo uigā e lē na o upu e aofia ai. E aofia ai lagona loloto o le tagata. Ia faailoa atu lou alofa māfana i au tatalo, le faaaloalo loloto, ma lou faalagolago atu atoatoa iā Ieova. A o e mātaulia le tali mai a Ieova i au tatalo, o le a e iloa ai lava e oe, “e latalata Ieova iā i latou uma e valaau atu iā te ia.” (Sala. 145:18) Ioe, o le a latalata mai Ieova iā te oe, ma faamalosia oe e tetee atu i le Tiapolo ma faia filifiliga saʻo o le olaga.—Faitau le Iakopo 4:7, 8.

13. (a) Na faapefea ona fesoasoani se faauōga ma le Atua i se tasi o tuafafine? (e) E faapefea ona fesoasoani se faauōga ma le Atua e feagai ai ma omiga mai aumea?

¹³ Seʻi manatu i le auala na faamalosia ai Cherie ona o le iai o se faiā māfana ma Ieova. A o iai o ia i le aʻoga maualuga, na ia maua faailoga ona sa lelei ana mataupu i le aʻoga, ma sa maoaʻe foʻi lona tulaga i taaloga. Ina ua māeʻa ana aʻoga, na ofo atu i ai se sikolasipi  lea e mafai ona oo atu ai i aʻoaʻoga e maualuluga atu. Na faapea mai Cherie: “O se luʻi le ofo na tuuina mai, ma sa matuā uunaʻia aʻu e i latou na matou aʻoʻoga faatasi faapea ma faiaʻoga o taaloga, ina ia ou taliaina le ofo.” Ae peitaʻi na ia iloa, o le ulu atu i isi aʻoaʻoga e manaʻomia ai le tele o lona taimi e suʻesuʻe ai ma sauniuni ai mo taaloga, ae itiiti ai le taimi e auauna ai iā Ieova. O le ā na faia e Cherie? Ua ia faapea mai: “Ina ua uma ona ou tatalo iā Ieova, na ou lē taliaina loa le sikolasipi ae amata ona ou auauna o se paeonia sauatoa.” Ua lima nei tausaga talu ona paeonia o ia. Ua ia faapea mai: “E leai ma se mea ua ou faanoanoa ai. O le iloa ua ou faia se filifiliga e fiafia ai Ieova, ua ou lagona ai le fiafia. O le mea moni, a e faamuamua le Malo o le Atua, o le a faaopoopo atu isi mea iā te oe.”—Mata. 6:33.

O le Amio Lelei e Iloa ai o Loo ‘⁠Mamā Lou Loto’

14. Aiseā e tāua ai iā Ieova lau amio lelei?

¹⁴ O le auala lona tolu e iloa ai o loo e auauna iā Ieova ma se lotomalie, e ala lea i lau amio. E faamanuia e Ieova talavou e tumau ona amio mamā. (Faitau le Salamo 24:3-5.) A o laʻitiiti Samuelu, na musu e faataʻitaʻi i amioga lē mamā a atalii o le faitaulaga sili o Eli. Na iloa e isi le amio lelei o Samuelu. Ua taʻua i le Tusi Paia: “Ua tupu pea le tama o Samuelu, ma ua sili atu ona alofagia o ia e Ieova atoa ma tagata.”—1 Samu. 2:26.

15. O ā nisi o māfuaaga e te tumau ai i au amioga lelei?

¹⁵ Ua tatou ola i se lalolagi e tumu i tagata e alolofa iā i latou lava, e faamaualuluga, lē usiusitaʻi i mātua, lē lotofaafetai, lē faamaoni, sauā, o ē ua faafefeteina i le faamaualuga, o ē pupū i mea faafiafia nai lo o le alolofa i le Atua.—ua na o nisi na o mea na taʻua e Paulo. (2 Timo. 3:1-5) E mafai ona faigatā tele iā te oe le faatumauina o amioga lelei, i le iai i se siʻomaga e matua leaga lava. Ae peitaʻi, o taimi taʻitasi e te faia ai le mea ua saʻo ae ʻalofia amioga sesē, ua e faamaonia ai o loo e i le itu a Ieova o le finauga o le pule silisili ese i le aoao o mea. (Iopu 2: 3, 4) E te lagonaina foʻi le fiafia, i le iloa o loo e tali atu i le augani māfana mai a Ieova: “Loʻu atalii e, ia atamai oe ma faafiafia ai loʻu loto, ona ou mautali ai lea i lē o loo taufaifai mai.” (Faata. 27:11) E lē gata i lea, o le iloa o loo finagalo malie Ieova iā te oe, o le a faamalosia ai lou naunau e auauna iā te ia.

16. Na faapefea e se tasi o tuafafine ona faafiafiaina le finagalo o Ieova?

¹⁶ Sa pipii atu pea se tuafafine talavou Kerisiano e igoa iā Carol i mataupu silisili o le Tusi Paia a o auai i le aʻoga, ma sa mātauina e tagata lana amio lelei. O le ā na tupu? Na feagai Carol ma tauemuga mai tamaiti o lana vasega ona o le lē auai i le faamanatuina o aso mālōlō ma sauniga faalemalo, ona o lona lotofuatiaifo ua aʻoaʻoina i le Tusi Paia. O na taimi na mafai ai ona faamatala atu ona talitonuga i isi. I le tele o tausaga mulimuli ane ai, na maua ai e Carol se tusi mai se tagata na la vasega ma na ia tusi mai e faapea: “Sa ou manaʻo lava e faafesootaʻi oe e faafetai atu iā te oe. Na mātauina lau amio lelei ma lau faataʻitaʻiga o se talavou Kerisiano, faapea ma lou lototele, e tusa ai ma le tausia o aso faamanatu. O oe le Molimau a Ieova muamua na ou iloa.” O le faaaʻoaʻoga lelei a Carol na pipii pea i le mafaufau o se tasi sa la vasega,  lea na oo ina suʻesuʻeina foʻi e ia le Tusi Paia. Na ia tusia i lana tusi na avatu iā Carol e faapea, ua silia nei i le 40 tausaga talu ona avea o ia ma Molimau papatiso! O outou fanau o loo pipii atu pea ma le lototele i mataupu silisili o le Tusi Paia e pei o Carol, e mafai e lenā mea ona uunaʻia ai tagata loto faamaoni ia iloa Ieova.

Talavou o Loo Vivii Atu iā Ieova

17, 18. (a) O le ā sou lagona i talavou i lau faapotopotoga? (e) O le ā le lumanaʻi o loo taatia mai mo talavou e matataʻu i le Atua?

¹⁷ O i tatou uma lava o loo i le faalapotopotoga a Ieova i le lalolagi aoao, ua tatou olioli i le vaai atu i le faitau afe o talavou maelega o loo auai i le tapuaʻiga moni! Ua faamalosia e nei talavou lo latou faanaunauga e tapuaʻi iā Ieova e ala i le faitauina o le Tusi Paia i aso taʻitasi, tatalo, ma amioaʻi e tusa ma le finagalo o le Atua. O na talavou lelei o loo avea ma puna o faalaeiauga i mātua ma tagata uma o Ieova.—Faata. 23:24, 25.

¹⁸ I le lumanaʻi, o le a iai talavou faamaoni i ē o le a faasaoina i le lalolagi fou ua folafola mai e le Atua. (Faaa. 7:9, 14) O le a latou tofo i le tele o faamanuiaga matagofie a o faaauau ona faateleina lo latou talisapaia o Ieova, ma o le a mafai ona latou vivii atu iā te ia e faavavau.—Sala. 148:12, 13.

Pe Mafai Ona E Faamatala?

• E faapefea ona fai se sao o fanau i le tapuaʻiga moni i aso nei?

• Ina ia aogā iā te oe le faitauina o le Tusi Paia, aiseā e tāua ai le manatunatu loloto?

• E faapefea ona fesoasoani le tatalo iā te oe e faalatalata atu ai iā Ieova?

• O le ā e mafai ona tupu ona o le amio lelei a se Kerisiano?

[Fesili mo le Suʻesuʻega]

[Ata i le itulau 5]

Po o fai ma masani lou faitauina o le Tusi Paia i aso taʻitasi?