Le Vaega a Le Agaga Paia i le Faataunuuina o le Finagalo o Ieova

“E faapea foʻi laʻu upu e alu atu mai i loʻu gutu . . . e taulau foʻi e tusa ma le mea na ou auina atu ai.”—ISA. 55:11.

1. Faataʻitaʻi le eseesega o le fuafuaga ua faataatia, ma le finagalo ua faataatia.

SEʻI manatu i ni tamāloloa se toʻalua, o loo sauniuni le tagata lava ia mo lana malaga i se taavale. Ua fuafua e le tasi tamāloa se auala patino e alu ai ina ia taunuu i le mea o loo fia malaga i ai. Ua iloa e le isi tamāloa le auala e taunuu ai i le mea o loo fia malaga i ai, ae e na te iloa foʻi isi auala e mafai ona taunuu ai. Ua nofosauni o ia e suia lona ala pe a manaʻomia, e tusa ai ma tulaga e tutupu mai i le faigāmalaga. I nisi o itu, o manatu eseese o nei tamāloloa, o loo faataʻitaʻi mai ai le eseesega o le fuafuaga ua faataatia, ma le finagalo ua faataatia. O se fuafuaga ua faataatia e mafai ona faatusa i le faatulagaina o se auala e taunuu ai i se mea o faamoemoe i ai. Ae o le finagalo ua faataatia, e ono aofia ai se sini, ae e lē faapea ai e na o le tasi se auala patino e faataunuu ai.

2, 3. (a) O le ā e aafia i le faataunuuina o le finagalo o le Atua, ma na faapefea ona ia gaoioi e tusa ai ma le tulaga na tulaʻi mai ina ua agasala Atamu ma Eva? (e) Aiseā e ao ai ona tatou iloa ma gaoioi, e tusa ai o le faataunuuina o le finagalo o Ieova?

² Pe a faataunuu le finagalo o Ieova, e lē faapea e lē mafai ona fai i ai se suiga, ae o le a faataunuuina lava lona finagalo a o faagasolo taimi. (Efe. 3:11) O lona finagalo, e aofia ai faamoemoega na iai i le amataga mo tagata ma le lalolagi—ia faaliliuina lenei lalolagi e  avea ma parataiso, e nonofo ai tagata lelei atoatoa i le filemu ma le fiafia e faavavau. (Kene. 1:28) Ina ua agasala Atamu ma Eva, na gaoioi Ieova e tusa ai ma lenā tulaga ma fai fuafuaga e faamautinoa ai o le a faataunuu lona finagalo. (Faitau le Kenese 3:15.) Na finagalo Ieova e aumaia e lana fafine faafaatusa se “fanau,” po o se Atalii, o lē o le a oo ina faaumatia Satani o lē na māfua ai mea leaga, ma toe faaleleia mea uma na leaga ona o ia.—Epe. 2:14; 1 Ioa. 3:8.

³ E leai se malosi i le lagi po o le lalolagi e mafai ona taofia le Atua mai le faataunuuina o le mea na ia fetalai o le a ia faia. (Isa. 46:9-11) Aiseā ua tatou fai atu ai faapea? Ona o loo aafia ai le agaga paia o Ieova. O le agaga paia ua faamautinoa ai o le a “taulau” le finagalo o le Atua. (Isa. 55:10, 11) E lelei ona tatou iloa ma gaoioi e ōgatusa ma le auala o loo faataunuuina ai le finagalo o le Atua. E faalagolago lo tatou ola i le lumanaʻi i le faataunuuina o lona finagalo. E lē gata i lea, e faamalosia le faatuatua i le vaai atu i le auala o loo faaaogā ai e Ieova lona agaga paia. O lea la, seʻi o tatou iloiloina le vaega a le agaga—i aso ua mavae, i le taimi nei, faapea ma le lumanaʻi—i le faataunuuina o le finagalo o Ieova.

Le Vaega a le Agaga Paia i Aso ua Mavae

4. Na faapefea ona faasolosolo ona faailoa mai e Ieova lona finagalo?

⁴ I taimi o le Tusi Paia, na faasolosolo ona faailoa mai e Ieova lona finagalo. Muamua, na leʻi iloa le Fanau folafolaina, ona o se “mea lilo paia.” (1 Kori. 2:7) Pe tusa o le 2,000 tausaga mulimuli ane ai na faatoʻā toe taʻua ai e Ieova se faamatalaga e faatatau i se fanau. (Faitau le Kenese 12:7; 22:15-18.) Na tuuina atu e Ieova iā Aperaamo se folafolaga e iai sona faataunuuga e tele atu. O upu “o lau fanau” o se faailoaga manino lea o le a oo mai le Fanau o se tagata, ma o sē e tupuga mai iā Aperaamo. E tatou te mautinoa sa vaavaai mai ma le naunau Satani a o faailoa mai lenā faamatalaga. E lē taumatea, na manaʻo lenā fili e faaumatia pe faaleagaina le gafa o Aperaamo, ma lē taulau ai le finagalo o le Atua. Ae na lē mafai ona faia lenā mea, ona na gaoioi le agaga lē vaaia o le Atua. I ā auala?

5, 6. Na faaaogā faapefea e Ieova lona agaga e puipuia ai tagata o le gafa e tau atu i le Fanau?

⁵ Na faaaogā e Ieova lona agaga e puipuia ai tagata o le gafa e tau atu i le Fanau. Na fetalai Ieova iā Aperamo (Aperaamo): “O aʻu o lou talita.” (Kene. 15:1) Sa lē o se folafolaga tau ina fai. O se faataʻitaʻiga seʻi manatu i le mea na tupu pe tusa o le 1919 T.L.M. ina ua aumau Aperaamo ma Sara mo sina taimi i Kira. Ona e leʻi iloa e Apimeleko le tupu o Kira o Sara o le avā a Aperaamo, na ia ave ai Sara ma le faamoemoe e fai ma ana avā. Pe na faaaogā e Satani i se auala faatogafiti lea tulaga, e taumafai ai e taofia Sara mai le fanauina o se suli o Aperaamo? E lē o iai se tala a le Tusi Paia e uiga i lea mea. Ae o loo taʻu mai iā i tatou e faapea, na faalaa ane Ieova. Sa lapataʻia e Ieova Apimeleko i se miti, e aua neʻi paʻi atu iā Sara.—Kene. 20:1-18.

⁶ E lē na o le pau lenā o se mea na puipuia ai i laʻua e Ieova. Na faasaoina e Ieova Aperaamo ma tagata o lona aiga i isi mea na tutupu. (Kene. 12:14-20; 14:13-20; 26:26-29) Na faapea mai le faisalamo e faatatau iā Aperaamo ma ē na tupuga mai iā te ia: “E na te leʻi tuuina atu i se tagata e faoa a latou mea, Ae na ia aʻoaʻia tupu ona o i latou, E faapea: ‘Aua neʻi o outou fetagofi atu i ē ua ou faauuina, Aua foʻi neʻi o outou faia se mea leaga i aʻu perofeta.’”—Sala. 105:14, 15.

7. O ā auala na puipuia ai e Ieova le nuu o Isaraelu?

⁷ Na puipuia le nuu anamua o Isaraelu lea o le a fanau mai ai le Fanau folafolaina e Ieova, e ala i lona agaga paia. E ala i lona agaga, na avatu ai e Ieova lana Tulafono iā Isaraelu, lea na faatumauina ai le tapuaʻiga moni, ma puipuia ai tagata Iutaia mai le faaleagaina faaleagaga, i amioga, ma le itu faaletino. (Eso. 31:18; 2 Kori. 3:3) I le taimi o Faamasino, na oo le agaga o Ieova i nisi o tagata ina ia faasaoina le fanauga a Isaraelu mai ona fili. (Faama.  3:9, 10) A o faagasolo senituri seʻia oo atu i le fanau mai o Iesu le vaega autū a le fanau a Aperaamo, e lē taumatea na puipuia e le agaga paia Ierusalema, Peteleema, ma le malumalu—ona o nei mea uma na aofia i le faataunuuga o valoaga e faatatau iā Iesu.

8. E faaalia faapefea na aafia tuusaʻo le agaga paia i le soifuaga ma le faiva a le Alo o le Atua?

⁸ O le soifuaga ma le faiva a Iesu, na aafia tuusaʻo ai le agaga paia. O le gaoioiga a le agaga paia i le manava o le taupou o Maria, na faataunuuina ai se mea e leʻi tupu muamua ma mulimuli ane ai. Na faapogaia ai se tamaʻitaʻi e lē lelei atoatoa e tō ma fanauina mai se tama tane e lelei atoatoa, e lē aafia i le faasalaga o le oti. (Luka 1:26-31, 34, 35) Na puipuia Iesu e le agaga mulimuli ane mai le maliu a o laʻitiiti. (Mata. 2:7, 8, 12, 13) Pe tusa o le 30 tausaga o Iesu, na faauuina ai o ia i le agaga paia o le Atua e avea ma suli o le nofoālii o Tavita, ma tofia o ia e talaʻi. (Luka 1:32, 33; 4:16-21) Na maua e Iesu le mana e fai ai vavega ona o le agaga paia, e aofia ai le faamālōlōina o ē mamaʻi, fafagaina o se motu o tagata, ma le faatutūina o tagata mai le oti. O na gaoioiga mamana o faaataga na o faamanuiaga o loo tatou nofo tatali i ai i lalo o le pulega tautupu a Iesu.

9, 10. (a) Na faapefea ona manino mai le iai o le agaga paia i soo o Iesu i le uluaʻi senituri? (e) O ā mea na tutupu i le faataunuuina o le finagalo o Ieova na faaalia i le uluaʻi senituri T.A.?

⁹ Na amata mai i le Penetekoso o le 33 T.A. ona faaaogā e Ieova lona agaga e faauuina ai le vaega lona lua o le fanau a Aperaamo, ma o le toʻatele o i latou e lē tupuga mai iā Aperaamo. (Roma 8:15-17; Kala. 3:29) Sa manino mai le iai o le agaga paia i soo o Iesu i le uluaʻi senituri, lea na mafai ai ona latou talaʻi ma le maelega ma faia galuega mamana. (Galu. 1:8; 2:1-4; 1 Kori. 12:7-11) E ala i na meaalofa faavavega, na faaalia ai se mea fou mataʻina i le auala o le a faataunuuina ai le finagalo o Ieova. Ua lē o toe finagalo Ieova e tapuaʻi atu tagata i le auala lava e tasi lea na faatulaga i le faitau senituri ua tuanaʻi, lea na faaautū atu i le malumalu i Ierusalema. Ua suia lona finagalo malie mai le faatulagaga na iai muamua, ae tuu atu i le faapotopotoga fou faa-Kerisiano lea faatoʻā faavae. Ma talu mai lenā taimi, o loo faaaogā pea e Ieova lenā faapotopotoga faauuina ina ia faataunuu ai lona finagalo.

¹⁰ O le puipuia, tuu atu i ai o le mana, faauuina—ua na o ni nai auala na faaaogā ai e Ieova le agaga paia i taimi o le Tusi Paia ina ia faamautinoa ai e taunuu lona finagalo. Ae faapefea o tatou aso? Ua faapefea ona faaaogā e Ieova lona agaga e lagolagoina ai lona finagalo? E manaʻomia ona tatou iloa, ona e tatou te mananaʻo e gaoioi e ōgatasi ma le agaga. O lea, seʻi o tatou iloiloina ni auala se fā o loo faaaogā ai e Ieova lona agaga i aso nei.

Le Vaega a le Agaga Paia i Aso Nei

11. O le ā e faaalia ai o le agaga paia o se malosi e ola ai tagata o le Atua i se olaga mamā, ma e faapefea ona faaalia o loo e galue faatasi ma le agaga?

¹¹ Muamua, e fesoasoani le agaga paia i tagata o le Atua ina ia mamā. O tagata o le Atua o loo auauna iā te ia e tusa ai ma lona finagalo, e ao ona mamā a latou amio. (Faitau le 1 Korinito 6:9-11.) O nisi ua avea ma Kerisiano moni na faia muamua amioga lē mamā e pei o le faitaaga, mulilua, ma le tauatane. E mafai ona matuā mauaa tuʻinanauga lea e oo atu ai i le faia o le agasala. (Iako. 1:14, 15) Ae ua “faamamāina” na tagata, ma ua iloa ai ua faia suiga e manaʻomia, ina ia maua le finagalo malie o le Atua. O le ā e mafai ai e se tasi e alofa i le Atua, ona taulau manuia i le teena o faalogona e manaʻo e faia mea sesē? Ua taʻua i le 1 Korinito 6:11, o “le agaga o lo tatou Atua.” O le tausia o le mamā o amioga, e faaalia ai ua tuu atu i le agaga e pulea lou olaga.

12. (a) E tusa ai ma le faaaliga a Esekielu, e faapefea ona taʻitaʻia e Ieova lana faalapotopotoga? (e) E faaalia faapefea o loo e gaoioi e ōgatusa ma le agaga?

¹² O lona lua, ua faaaogā e Ieova lona agaga paia e taʻitaʻia ai lana faalapotopotoga i le itulagi e finagalo i ai o ia. I le faaaliga na iloa e Esekielu, o loo faaata mai ai le vaega faalelagi  o le faalapotopotoga a Ieova i se kariota faalelagi o loo gaoioi ma le lē mataofiofia e faataunuu le finagalo o Ieova. O le ā ua uunaʻia ai le kariota e alu atu i se itulagi patino? O le agaga paia. (Eseki. 1:20, 21) Seʻi o tatou manatua, e lua vaega o le faalapotopotoga a Ieova, o le tasi e i le lagi ae o le isi e i luga o le lalolagi. Pe afai o le vaega faalelagi o loo taʻitaʻia e le agaga, e tatau foʻi ona faapena le vaega i luga o le lalolagi. O le usiusitaʻi ma faamaoni i taʻiala o loo maua mai i le vaega faalelalolagi o le faalapotopotoga a le Atua, ua faaalia ai o loo e piiama atu i le kariota faalelagi a Ieova ma o loo e gaoioi e ōgatusa ma lona agaga paia.—Epe. 13:17.

13, 14. (a) O ai o loo faia aʻe ai “lenei tupulaga” na taʻua e Iesu? (e) Taʻu mai se faataʻitaʻiga e faaalia ai o loo galue le agaga paia i le faamalamalamaina o upu moni o le Tusi Paia. (Tagaʻi i le pusa “Po o E Piiama Atu i Malamalamaga Fou?”)

¹³ O lona tolu, o loo gaoioi le agaga paia ina ia malamalama atili i upu moni o le Tusi Paia. (Faata. 4:18) Ua loa ona faaaogā lenei mekasini e “le pologa faamaoni ma le faautauta” e avea o se auala autū e faasolosolo ona faailoa mai ai upu moni o le Tusi Paia. (Mata. 24:45) O se faaaʻoaʻoga, seʻi manatu i lo tatou malamalamaga iā i latou o loo faia aʻe ai “lenei tupulaga” o loo taʻua e Iesu. (Faitau le Mataio 24:32-34.) O lē fea tupulaga o loo faasino atu i ai Iesu? Ua faamatala mai e le mataupu, “O le ā le Uiga o le Faatasi Mai o Iesu iā te Oe?” faapea e lē o faasino atu e Iesu le faaupuga “lenei tupulaga” i tagata amioleaga, ae o loo faasino atu i ona soo, ia e lē o toe umi ae faauuina e le agaga paia. * O soo faauuina o Iesu i le senituri muamua faapea ma o tatou aso, o i latou na e lē gata e latou te vāai i le faailoga, ae e latou te iloa foʻi le uiga o le faailoga, “ua i faitotoʻa” Iesu.

¹⁴ O le ā le uiga o lenei faamatalaga iā i tatou? E ui lava e lē mafai ona fua ma le tonu le umi o “lenei tupulaga,” ae e lelei pe a tatou manatu i isi mea e faatatau i le upu “tupulaga”: E masani ona faasino atu le upu tupulaga i tagata e eseese o latou matutua, na iai se taimi na soifua faatasi ai a o faagasolo se vaitaimi patino; e lē matuā umi tele lenā vaitaimi; ma e iai lona iʻuga. (Eso. 1:6) E faapefea la ona tatou malamalama i upu a Iesu e faatatau i “lenei tupulaga”? E manino mai na uiga atu le faamatalaga a Iesu i ē faauuina na soifua ina ua amata ona manino mai le faailoga i le 1914, ma o le a iai se taimi o o latou olaga e soifua faatasi ai ma isi o le vaega faauuina, o ē  o le a vāai i le amataga o le puapuaga tele. O lenā tupulaga na iai lona amataga, ma e mautinoa foʻi o le a iai lona mutaaga. O le faataunuuina o vala eseese o le faailoga ua faaalia manino ai ua tatau ona latalata mai le puapuaga tele. O le faatumauina o lou uiga faanatinati ma le mataala, e faaalia ai o loo e piiama atu i le malamalamaga o le upu moni, ma mulimuli i le taʻitaʻiga a le agaga paia.—Mare. 13:37.

15. O le ā e faaalia ai o loo aumaia e le agaga paia le malosi e tatou folafola atu ai le tala lelei?

¹⁵ Lona tolu, e faamalosi e le agaga paia i tatou e folafola atu le tala lelei. (Galu. 1:8) E leai se isi mea e mafai ona faamatalaina le talaʻia o le tala lelei i le lalolagi aoao. Seʻi manatu i ai. Atonu o oe le isi na manatu ‘e lē mafai ona ou alu e talaʻi mai lea fale i lea fale!’ ona e te matuā matamuli lava, pe fefe. Ae o lea ua e faia nei se sao maelega i lenā galuega. * O le toʻatele o Molimau a Ieova faamaoni, o loo faaauau pea ona talaʻi e ui i teteega ma sauāga. E na o le agaga paia o le Atua e mafai ona tatou maua ai le malosi e foʻia ai toʻatugā ma faia mea e lē mafai e lo tatou lava malosi. (Mika 3:8; Mata. 17:20) O le faia o se sao atoatoa i le galuega talaʻi, e faaalia ai o loo e galue faatasi ma lenā agaga.

Le Vaega Fai a le Agaga Paia i le Lumanaʻi

16. E faapefea ona tatou te mautinoa o le a puipuia e Ieova ona tagata i le taimi o le puapuaga tele?

¹⁶ O le a faaaogā e Ieova lona agaga paia i ni auala mataʻina i le lumanaʻi e faataunuu ai lona finagalo. Seʻi manatu muamua i le tulaga i le puipuiga. Ua tatou iloa, na faaaogā e Ieova lona agaga i taimi ua teʻa e puipuia ai tagata taʻitoʻatasi, faapea foʻi ma le nuu atoa o Isaraelu. O lea, ua iai māfuaaga uma e tatou te mautinoa ai, o le a ia faaaogā foʻi lenā lava agaga malosi, e puipuia ai ona tagata i le taimi o le puapuaga tele ua fotuaʻi mai. E lē tatau ona tatou fuafuaina le auala tonu o le a tausia ai i tatou e Ieova i lenā taimi. Ae ia tatou vaavaai atu i le lumanaʻi ma le mautinoa, o le a iai pea le fesoasoani a le agaga paia, ma o le a lē lilo i le silasila a Ieova ē e alolofa iā te ia.—2 No. 16:9; Sala. 139:7-12.

17. O le a faaaogā faapefea e Ieova lona agaga paia i le lalolagi fou?

¹⁷ O le a faaaogā faapefea e Ieova lona agaga paia i le lalolagi fou o le a oo mai? O lenā agaga o le malosi lea o le a iai i tusi tāʻai fou o le a tatala i lenā taimi. (Faaa. 20:12) O ā mea o le a iai i na tusi tāʻai? E manino mai, o le a iai mea maʻoti e faafinagaloina e Ieova mo i tatou a o faagasolo le afe o tausaga. Po o e tulimataʻia mea o le a iai i na tusi tāʻai? O loo tatou faatalitali atu ma le naunau i lenā lalolagi fou. O le a avea o se taimi ofoofogia le ola i le taimi, o le a faaaogā ai e Ieova lona agaga paia e faataunuu ai lona finagalo mo le lalolagi, ma tagata o le a iai.

18. O le ā le mea e te maumauaʻi e fai?

¹⁸ Ia aua lava neʻi galo iā i tatou o le a faataunuuina le finagalo o Ieova o loo faasolosolo ona faailoa mai, ona e na te faaaogā lona agaga paia—o le mana e aupito sili ona malosi i le aoao o mea—e faataunuuina ai. E aofia ai ma oe i lona finagalo. O lea la, ia e maumauaʻi e ōle atu iā Ieova mo lona agaga ma gaoioi e ōgatusa ma lana taʻitaʻiga. (Luka 11:13) O lea e te ono maua le faamoemoe e pei ona finagalo i ai Ieova mo tagata, o le ola e faavavau i le Parataiso i le lalolagi.

[Faamatalaga pito i lalo]

Pe E te Manatua?

• O ā auala na faaaogā ai e Ieova lona agaga paia i taimi o le Tusi Paia, ina ia faasolosolo ona faailoa mai ai lona finagalo?

• Ua faapefea ona faaaogā e Ieova lona agaga i aso nei?

• O le a faaaogā faapefea e Ieova lona agaga i le lumanaʻi e faataunuuina ai lona finagalo?

[Fesili mo le Suʻesuʻega]

[Pusa/Ata i le itulau 10]

Po o E Piiama Atu i Malamalamaga Fou?

O loo faaauau ona faasusulu mai e Ieova le malamalama i ona tagata. O ā nisi o faamalamalamaga fou na lomia i Le Olomatamata?

▪ O le ā le iʻuga lelei ua faamatalaina i le talafaatusa a Iesu i le mea faafefete, e tusa ai ma le tuputupu aʻe faaleagaga? (Mata. 13:33)—Iulai 15, 2008, itulau 19-20.

▪ O afea e muta ai le valaauina o Kerisiano e faamoemoe e ola i le lagi?—Me 1, 2007, itulau 30-31.

▪ O le ā le uiga o le tapuaʻi iā Ieova “i le agaga”? (Ioa. 4:24)—Iulai 15, 2002, itulau 15.

▪ O lē fea lotoā o loo auauna ai le motu o tagata e toʻatele? (Faaa. 7:15)—Me 1, 2002, itulau 30-31.

▪ O afea e tuueseese ai mamoe ma ʻoti? (Mata. 25:31-33)—Oketopa 15, 1995, itulau 18-28.