Pe E te Manatua?

Pe na e fiafia i le faitauina o lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

• Aiseā sa tatau ai ona maliu le Mesia?

O le maliu o Iesu e faamaonia ai e mafai e se tagata lelei atoatoa, ona tumau i lona tuutoina i le Atua e ui i tofotofoga mataʻutia. E lē gata i lea, na ia totogia le tau o le agasala na tuufaasolo mai i le fanau a Atamu, ma maua ai le avanoa e ola ai e faavavau.—12/15, itulau e 22-23.

• O le ā e fesoasoani i se tagata ina ia faaaogā tatau le ʻava malosi?

E mafai ona fesoasoani le tatalo ma le suʻesuʻeina o le Tusi Paia. E tāua le pulea totino, ia pipii i lau faaiʻuga ua fai, ma filifili ni uō lelei. O le tagata e inu ʻava malosi e tatau ona iloa le mea e gata ai lana inu, ma ia maumauaʻi e faapea atu e leai.—1/1, itulau e 7-9.

• O le ā e aofia ai i talanoaga lelei ma fanau?

Nai lo o le tau ina talanoa, e tatau ona fai atu ni fesili ma ia faalogologo lelei i a latou tali. E toʻatele e latou te manatu o taimi o taumafataga o se avanoa lelei lea mo talanoaga.—1/15, itula e 18-19.

• Aiseā na salamō ai Ieova a o ia o se Atua e atoatoa ona lelei?

I nisi taimi, e suia uiga o le Atua e faatatau i tagata. Mo se faaaʻoaʻoga, na atulasi ona tuua e Isaraelu anamua Ieova ae mulimuli atu i isi atua. Na lē toe iai se puipuiga a Ieova iā i latou. Ae i le taimi e tasi, ina ua salamō mai i a latou mea sesē ma ōle atu i le Atua mo se fesoasoani, na suia ona lagona o lona uiga na “salamō” o ia. (Faama. 2:18, O le Tusi Paia Samoa—Lomiga o le 1884)—2/1, itulau e 21.

• I ā tulaga e manaʻomia ai ona iloilo le toe papatisoina o se tasi?

O le mea lenā e fai pe afai i le taimi o le papatisoga, atonu na ola se tagata i se tulaga lē lelei, pe faia foʻi ni amioga semanū e faateʻaina ai pe ana faapea ua uma ona papatiso.—2/15, itulau e 22.

• O ā ni faamolemolega se tolu e ala ai ona lē faamaoni isi tagata?

E taʻutonuina e isi le gaoi ona e faapea e matitiva. Ua fai e isi le faamolemolega e faapea, “O loo faia e tagata uma.” O nisi foʻi o ē na maua ni mea tāua a tagata, e latou te manatu “a maua ave ma oe.” E lē lagolagoina e le Tusi Paia na faamolemolega.—3/1, itulau e 12-14.

• I le talafaatusa a Iesu i saito ma vao leaga, o le ā na faaata mai e le lūlū po o le totōina o fatu lelei?

Na sauniunia e le Atalii o le tagata o Iesu le fanua, i lana faiva i le lalolagi. Mai le Penetekoso 33 T.A. ma faasolo mai ai, na totōina fatu lelei ina ua faauuina Kerisiano e avea ma atalii o le Atua, o atalii ia o le Malo.—3/15, itulau e 20.

• I le talafaatusa a Iesu, na faapefea ona aumaia le saito faafaatusa i totonu o le fale saito o Ieova? (Mata. 13:30)

Na faataunuu i se vaitaimi a o faagasolo le faaiʻuiʻuga o le faiga o mea. O atalii faauuina o le Malo, o le saito faafaatusa, ua aumaia i totonu o le fale saito o Ieova ina ua aumaia i latou i le faapotopotoga Kerisiano ua toefuataʻiina, po ua maua lo latou taui faalelagi.—3/15, itulau e 22.

• O ai na filifilia tusi o Tusitusiga Paia Eleni?

E lē o se fono a se lotu po o ni taʻitaʻi lotu. Nai lo lenā, na iloa e Kerisiano moni tusitusiga mai i le Atua, e ala i le taʻitaʻiga a le agaga paia. Ua ōgatusa ma le mea moni, o se tasi o meaalofa faavavega a le agaga na tuuina mai i le amatamataga o le faapotopotoga Kerisiano o le ‘iloa o afioga mai i le Atua.’ (1 Kori. 12:4, 10)—4/1, itulau e 28.