Po o Tuu Atu iā Ieova e Fesili Mai iā te Oe?

E ANOANOAʻI fesili o loo i le Tusi Paia e fesili ai le tagata lava ia, e iloa ai mea o loo i lona loto. A o Ieova e na te faaaogā fesili e aʻoaʻoina ai upu moni tāua. O se faaaʻoaʻoga na faaaogā e Ieova ni fesili ina ua lapataʻia Kaino i lona ala leaga. (Kene. 4:6, 7) I isi taimi, e uunaʻia se tagata e fai se gaoioiga ona o se fesili patino a Ieova. Ina ua faalogo le perofeta o fesili Ieova: “O ai ou te auina atu, ma o ai foʻi o le a alu atu mo i matou?” na tali le perofeta: “O aʻu lenei! Inā auina atu ia aʻu.”—Isa. 6:8.

Na faaaogā lelei foʻi e le Faiaʻoga Sili o Iesu ia fesili. E sili atu i le 280 fesili a Iesu na faamauina i Evagelia. E ui lava na te faaaogāina fesili i nisi taimi e faafilemu ai le ʻaufaitio, ae o le tele lava o taimi, o ana fesili na fuafua ina ia pāʻia ai loto o ē na faalogologo atu, ma uunaʻia ai i latou e mafaufau i lo latou itu faaleagaga. (Mata. 22:41-46; Ioa. 14:9, 10) I se tulaga faapena, ina ua tusia e Paulo tusi e 14 o Tusitusiga Paia Eleni, na ia faaaogāina fesili e faatalitonuina ai. (Roma 10:13-15) O se faaaʻoaʻoga i lana tusi i Roma o loo iai le tele o fesili. O fesili a Paulo na uunaʻia ai ē na faitau i ana tusi, e talisapaia ‘le tele o le tamaoaiga, ma le atamai atoa ma le silafia o le Atua!’—Roma 11:33.

O nisi fesili e manaʻomia ai se tali mai, a o isi fesili e fai ina ia manatunatu loloto ai le tagata. O loo faamauina i Evagelia le auala na faaaogā ai e Iesu le tele o fesili e manatunatu loloto ai. I se tasi taimi na lapataʻia ai e Iesu ona soo ina ia “mataala ma faaeteete i le mea faafefete a le ʻau Faresaio ma le mea faafefete a Herota” o loo uiga atu i lo latou faagutugutulua ma aʻoaʻoga pepelo. (Mare. 8:15; Mata. 16:12) E leʻi malamalama soo o Iesu i lana fetalaiga, ma amata ona latou fefinauaʻi i le galo ona aumai o falaoa. Mātau le auala na faaaogā ai e Iesu fesili i se talanoaga puupuu o loo mulimuli mai. “Ona fetalai atu lea iā i latou: ‘Aiseā ua outou fefinauaʻi ai ona o le leai o ni falaoa? Pe e tou te lē iloa ea le uiga o lenei mea? Pe e leʻi malamalama ea lava o outou loto? “E fai o outou mata ae tou te lē vāai ea; e fai o outou taliga, ae e tou te lē lagona ea?” . . . Pe e tou te leʻi iloa lava ea le uiga o nei mea?’” Na fai fuafua fesili a Iesu ina ia latou mafaufau ai, ma uunaʻia ai ona soo e mafaufau i le uiga moni o ana upu.—Mare. 8:16-21.

“Seʻi Oʻu Fesili Atu iā te Oe”

Na faaaogā e Ieova le Atua fesili e toe fetuunaʻi ai le mafaufau o lana auauna o Iopu. O le tele o fesili a Ieova, na aʻoaʻoina ai e Iopu lona faatauvaa tele pe a faatusatusa i Lē na faia o ia. (Iopu, mata. 38-41) Pe na faatalitalia e Ieova e tali mai Iopu i ana fesili taʻitasi? E foliga mai e leai. O fesili e pei o le, “O fea na e iai a o oʻu faavaeina le lalolagi?” na fai ina ia faagaee ai le mafaufau o Iopu ma ona faalogona. Ina ua mavae nisi o na fesili loloto, sa toetoe a lē mafai ona tali atu Iopu. Sa na ona ia faapea atu: “O le ā ea se mea ou te tali atu ai iā te oe? Ua tuu aʻe foʻi loʻu lima i loʻu gutu.” (Iopu 38:4; 40:4) Na malamalama Iopu ma ua faamaulalo ai o ia. Ae peitaʻi, sa lē na ona aʻoaʻoina o ia e Ieova ina ia faamaulalo. Sa faasaʻoina foʻi ma ona mafaufauga. I le ā le itu?

E ui lava o Iopu o “le tagata e lē taʻuleagaina ma amio saʻo,” ae e iai taimi na iloa ai i ana upu se vaaiga sesē, lea na mātauina e Eliu ina ua ia faasaʻoina Iopu i “lona taʻuamiotonuina o ia lava nai lo o le Atua.” (Iopu 1:8; 32:2; 33:8-12) O lea la, o fesili a Ieova na faasaʻoina ai foʻi le malamalamaga o Iopu. Ina  ua fetalai atu le Atua iā Iopu e ala i se matagi malosi, na ia faapea atu: “O ai lenei ua ia faafenumiaʻia le fautuaga i upu e lē o iai le poto? Inā fusi ia o lou sulugātiti e pei o se tagata malosi, ma seʻi oʻu fesili atu iā te oe, ona e faailoa mai lea iā te aʻu.” (Iopu 38:1-3) O fesili, na tataʻi atu ai e Ieova manatu i lona atamai e lē gata mai, ma lona mana e pei ona faaalia i ana galuega ofoofogia. Na fesoasoani lenei faamalamalamaga iā Iopu e faatuatuaina atili ai le pule a Ieova ma le auala e na te faia ai mea. Maʻeu se mea ina a mataʻina na oo iā Iopu—o le fesiligia e Lē ona le malosi uma lava!

Le Auala e Tuu Atu ai iā Ieova e Fesiligia i Tatou

Ae faapefea i tatou? Pe mafai foʻi ona tatou maua ni aogā i fesili o loo tusia i le Tusi Paia? Ioe e mafai! O lo tatou mafaufau i na fesili e tatou te maua ai faamanuiaga faaleagaga. O fesili loloto o loo i le Afioga a le Atua, e faaopoopo atu i le māfuaaga e malosi ai. O le mea moni, o “le afioga a le Atua e matuā malosi . . . e mafai foʻi ona faamasino i manatu ma faanaunauga o le loto.” (Epe. 4:12) Ae peitaʻi, ina ia maua aogā sili, e manaʻomia ona taulaʻi mai na fesili iā i tatou, e pei o loo fesili tuusaʻo mai Ieova iā i tatou. (Roma 15:4) Seʻi o tatou iloiloina nisi o faaaʻoaʻoga.

“Pe e lē faia ea e le Faamasino o le lalolagi uma le mea ua tonu?” (Kene. 18:25) Na faia e Aperaamo lenei fesili faatupu manatu iā Ieova i le taimi o le faamasinoga a le Atua iā Sotoma ma Komoro. Sa manatu Aperaamo e lē mafai e Ieova ona faia se mea lē tonu—le faaumatia o ē amiotonu ma ē amioleaga. O le fesili a Aperaamo e faaalia ai lona faatuatua tele i le amiotonu a Ieova.

I aso nei, e foliga mai ua taumafaufau nisi e faatatau i le faamasinoga a Ieova i le lumanaʻi, po o ai moni o le a faasaoina iā Amaketo a o ai foʻi o le a toe faatūina aʻe. Nai lo le avea o na manatu ma mea e faapopoleina ai i tatou, ae ia tatou manatua le fesili a Aperaamo. O le iloaina o Ieova o le Tamā agalelei i le lagi ma faatuatuaina atoatoa lana faamasinotonu ma lona alofa mutimutivale e pei ona faia e Aperaamo, o le a lē maumau ai lo tatou taimi ma le malosi i le soona popole ai fua, masalosaloga lē faavaea, ma felafolafoaʻiga lē aogā.

“O ai ea se tasi o outou e mafai e lona popole ona toe faaopoopo ni nai aso i lona olaga?” (Mata. 6:27) Ina ua lauga atu Iesu i se motu o tagata e aofia ai ma ona soo, na faaaogā e Iesu le fesili lenei e faamamafa ai le manaʻomia ona tuu atu i latou i aao o Ieova. O aso e gata ai o lenei faiga amioleaga o mea, ua tutupu mai ai le tele o popolega, ae o le taulaʻi atu i  na mea o le a lē faaopoopo ai ni aso o o tatou olaga pe faaleleia ai foʻi le olaga.

Po o le ā lava le taimi e tatou te popole ai iā i tatou lava po o ē pele iā i tatou, ae o le toe faamanatu pea iā i tatou o le fesili a Iesu, e fesoasoani iā i tatou ia saʻo la tatou vaai i mea o loo tatou popole ai. E fesoasoani e taofia ai le popole ma manatu lē lelei e vaivai ai o tatou mafaufau, o tatou faalogona, ma o tatou tino. Ae ua faamautinoa mai e Iesu iā i tatou, o loo fafaga e lo tatou Tamā i le lagi manufelelei o le lagi ma faaofuina laau o le vao, e na te silafia atoatoa mea e tatou te manaʻomia.—Mata. 6:26-34.

“Pe e mafai ea e se tagata ona tuu le afi i lona fatafata ae e lē mū ai ona ofu?” (Faata. 6:27) O uluaʻi mataupu e iva o le tusi o Faataoto e aofia ai ni manatu pupuu o loo faia e se tamā o loo aʻoaʻoina le atamai aogā i sona atalii. O le fesili o loo sii mai i luga e faatatau atu i āuga tigā o le faia o le mulilua. Pe afai e teʻi ua iloa ane ua tatou faia ni amioga faatafai po o le mafaufau pea i so o se faanaunauga sesē tau feusuaʻiga, e tatau la ona lapataʻia i tatou i lenei fesili. E mafai foʻi ona fai lenei fesili po o fea lava le taimi e tofotofoina ai se tasi e fai se gaoioiga sesē. O loo manino le faamamafaina ai o le mataupu silisili aogā o le Tusi Paia: ‘E te selesele le mea e te lūlū’!—Kala. 6:7.

“O ai ea oe e te faamasinosino ai i le auauna a le tasi tagata?” (Roma 14:4) I le tusi a Paulo i Roma, na ia talanoaina ai faafitauli na tulaʻi mai i le faapotopotoga i le uluaʻi senituri. O nisi Kerisiano, e eseese aganuu e ō mai ai, na faamasinosino i filifiliga ma gaoioiga a o latou uso talitonu. O le fesili a Paulo na faamanatu atu ai iā i latou, ia talia e le tasi le isi ma tuu iā Ieova e faamasinoina tagata.

E faapena foʻi i aso nei, o tagata o Ieova e eseese talaaga ma tulaga o o latou olaga. Peitaʻi, ua aumaia faatasi i tatou e Ieova i se autasiga tāua. Po o faia so tatou sao i lenā autasi? Pe afai e vave ona tatou faaali atu lo tatou lē fiafia i gaoioiga fitā a se uso, maʻeu le atamai o le fesili ifo iā i tatou lava i le fesili a Paulo o loo taʻua i luga!

O Fesili e Tatou te Māfana Atu ai iā Ieova

O nai faataʻitaʻiga nei e faaalia ai, o fesili o loo i le Afioga a le Atua, e uunaʻia ai se tagata e iloiloina ai ia lava. O le mafaufau i manatu o loo siʻomia ai fesili taʻitasi e fesoasoani iā i tatou e faia ai ni faatatauga aogā i o tatou lava tulaga. Ma a o tatou faitauina le Tusi Paia, o le a tatou mātauina ai nisi fesili faaopoopo e fesoasoani iā i tatou.—Tagaʻi i le pusa i le itulau e 14.

O le pāʻia o o tatou lagona loloto i fesili faatupu manatu o loo i le Afioga a le Atua, o le a fesoasoani iā i tatou e faaōgatusa ai o tatou mafaufau ma loto ma ala amiotonu a Ieova. Ina ua uma ona fesilisili Ieova iā Iopu, na faamautinoa mai e Iopu e faapea: “Ua faalogo oʻu taliga e uiga iā te oe, a o lenei ua vaai atu oʻu mata iā te oe.” (Iopu 42:5) Ioe, na moni Ieova iā Iopu, e pei o loo i ona luma. Mulimuli ane na faaupu e le soo o Iakopo e faapea: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iako. 4:8) Tau ina ia tatou faaaogā vaega uma o le Afioga a le Atua e aofia ai ma fesili, ina ia tatou tutupu aʻe ai faaleagaga ma manino atili ai la tatou “vaai” iā Ieova!

[Pusa/Ata i le itulau 14]

E fesoasoani faapefea nei fesili iā te oe e maua ai le finagalo o Ieova i nei mataupu?

▪ “Pe e sili ea le fiafia o Ieova i taulaga mū ma isi taulaga, i le fiafia i le usiusitaʻi i le siʻufofoga o Ieova?”—1 Samu. 15:22.

▪ “O Lē na faia le mata, pe e lē o silasila mai ea o ia?”—Sala. 94:9.

▪ “Pe a saʻili e tagata lo latou lava mamalu, po o le mamalu ea lea?”—Faata. 25:27.

▪ “Pe e iai ea se māfuaaga talafeagai o lou ita?”—Iona 4:4.

▪ “O le ā le aogā i le tagata pe afai na te maua le lalolagi uma ae maʻimau ai lona ola?”—Mata. 16:26.

▪ “O ai e na te faateʻaeseina i tatou mai i le alofa o Keriso?”—Roma 8:35.

▪ “O le ā se mea o iā te oe e leʻi foaʻiina atu?”—1 Kori. 4:7.

▪ “E faapefea ona mafuta le malamalama ma le pōuliuli?”—2 Kori. 6:14.

[Ata i le itulau 15]

O le ā na aʻoaʻoina e Iopu mai fesili a Ieova?