Aiseā e Faaaloalo ai i Ē ua Loa le Soifua?

I LE talafatai o Kalifonia i le Iunaite Setete, o loo iai se tasi o laau e sili ona fiafia tagata e puʻeina ona ata. O le igoa o le laau o le Lone Cypress. Ua lipotia mai o lenei laau e sili atu i le 250 tausaga. O lenei laau matagofie e lauiloa i le umi ona ola ma isi auala eseese. Mo se faataʻitaʻiga, ua faamalosia lenei laau e ni fusi ma ni maa o loo siʻo ai.

O le Lone Cypress e ono faamanatu mai ai iā i tatou Kerisiano matutua o loo tatou faatasi, ua iloga lo latou tutumau. O se tasi o auala sili ua latou faia ai faapea, e ala i le faalauiloaina o le tala lelei. Na valoia e le perofeta o Ioelu “toeaina” o ē e folafola atu le feʻau mai le Tusi Paia. (Ioe. 2:28-32; Galu. 2:16-21) Seʻi mafaufau i le tele o itula o loo faaaluina e i latou, e fesoasoani atu ai i isi ina ia aʻoaʻoina le “tala lelei o le malo”! (Mata. 24:14) O nisi o i latou o loo faalauiloa le Malo ua loa le soifua, sa tumau i le tele o tausaga i sauāga ma isi faigatā. Pe afai o lea na mātauina le umi o le ola o le laau o le cypress ona o fusi ma maa o loo siʻo ai, pe e lē sili atu ai la ona tatou faaaloalo ma āva i ē ua loa le soifua!

Na faatonuina e Ieova le Atua ona tagata anamua e faapea: “Ia e tulaʻi i luma o ē ua ulusinā, ia e faaaloalo i le tagata ua loa le soifua.” (Levi. 19:32) O loo iai foʻi i  auauna a Ieova i aso nei ni faaaʻoaʻoga lelei o ē e faatuatua, o loo ‘savavali ma le Atua’ mo le tele o tausaga. (Mika 6:8) A o latou faaauau ona faatatauina mataupu silisili o le Tusi Paia, o le mea moni o lo latou ulusinā “o le pale matagofie lea.”—Faata. 16:31.

Na faatonuina e le aposetolo o Paulo le talavou o Timoteo e “aua le soona faitio i se toeaina.” Nai lo o lea, sa tatau iā Timoteo ona “ʻaiʻoi atu iā te ia e pei o [sona] tamā,” a o “fafine matutua e pei o ni [ona] tinā.” (1 Timo. 5:1, 2) O le mea moni, sa “tulaʻi” Timoteo i luma o ē e ulusinā. E manino mai la, e faatalitalia e Ieova i tatou e faaalia le faaaloalo i le auala e tautatala ai.

Ua taʻua i le Roma 12:10: “Ia tausolomua ona faaaloalo le tasi i le isi.” E faaalia foʻi e ovasia o le faapotopotoga le faaaloalo i Kerisiano ua loa le soifua. Ae e ao foʻi iā i tatou uma ona tausolomua e faaalia le faaaloalo o le tasi i le isi.

O le mea moni, ua iai i sui uma o le aiga se tiute tauave faapitoa i o latou mātua ma mātua o mātua. E saʻili e tagata ni auala e faatumau ai le ola o le laau o le Lone Cypress, ma ua faaauau ona latou faia faapea. O le mea mautinoa la, e ao ona tatou saʻilia ni auala e faatumauina ai le tulaga mamalu o o tatou mātua ua loa le soifua, ma mātua o mātua. Mo se faataʻitaʻiga, o le avea ma sē e faalogologo lelei, o le a tatou lē tautū ai i le faia o mea i la tatou lava auala e aunoa ma le amanaʻia o o latou faalogona.—Faata. 23:22; 1 Timo. 5:4.

E matuā tautele iā Ieova ē ua loa le soifua o loo tatou faatasi. E na te lē tuulafoaʻia i latou. (Sala. 71:18) E faamalosia e le Atua moni i latou ina ia tumau ona auauna atu iā te ia ma le faamaoni. Seʻi o tatou faaauau ona lagolagosua ma faaaloalo i ē ua loa le soifua.

[Ata i le itulau 7]

E pei ona manaʻomia e le Lone Cypress ni lagolago, e manaʻomia foʻi e ē ua loa le soifua le āva ma le faaaloalo

[Ē Ana le Ata]

American Spirit Images/age fotostock