Aua le Faatigā i le Agaga Paia o Ieova
Aua le Faatigā i le Agaga Paia o Ieova
“Aua . . . tou te faatigā i le agaga paia o le Atua, ua faamaufaailogaina ai outou.”—EFE. 4:30.
1. O le ā ua faia e Ieova mo le faitau miliona o tagata, ma o le ā e tatau ona latou fai?
UA FAIA e Ieova se mea faapitoa mo le faitau miliona o tagata o loo soifua i lenei lalolagi fesouaʻiina. Ua ia faia ina ia mafai ai e i latou ona mafuta vavalalata atu iā te ia, e ala i lona Alo e toʻatasi o Iesu Keriso. (Ioa. 6:44) Pe afai ua tuuina atu oe i le Atua ma ola e tusa ai, ua avea la oe ma se tasi o i latou nei. Ona o se tagata ua papatisoina i le suafa o le agaga paia, e tatau la ona e amioaʻi e tusa ma lenā agaga.—Mata. 28:19.
2. O ā fesili o le a tatou talanoaina?
2 O i tatou o ē e “lūlū e tusa ma le agaga,” ua oofu i le tagata fou. (Kala. 6:8; Efe. 4:17-24) A ua fautuaina i tatou e Paulo, ia aua neʻi faatigā i le agaga paia o le Atua. (Faitau le Efeso 4:25-32.) O le a tatou iloiloina fautuaga a le aposetolo. O le ā le uiga o upu a Paulo ina ua ia taʻua le faatigā i le agaga o le Atua? E faapefea i se tasi ua tuuina atu iā Ieova ona faia se mea faapena? E faapefea ona tatou ʻalofia le faatigā i le agaga o Ieova?
Le Uiga o Upu a Paulo
3. E faapefea ona e faamatala le uiga o upu o loo i le Efeso 4:30?
3 Muamua, seʻi mātau upu a Paulo o loo i le Efeso 4:30. Na tusi o ia e faapea: “Aua . . . tou te faatigā i le agaga paia o le Atua, ua faamaufaailogaina ai outou mo le aso e faasaʻolotoina ai e ala i le togiola.” E leʻi manaʻo Paulo e faia e ona uso talitonu se mea e lamatia ai lo latou itu faaleagaga. O le agaga paia o Ieova ua “faamaufaailogaina ai [i latou] mo le aso e faasaʻolotoina ai e ala i le togiola.” Sa avea, ma o loo avea pea le agaga paia o le Atua ma faamaufaailoga, po o se “faamaoniga o le mea o le a oo mai” mo le vaega faauuina ua tausia le faamaoni. (2 Kori. 1:22) O le faamaufaailoga, ua faamaonia ai o i latou o tagata o le Atua ma o le a maua le ola i le lagi. O le aofaʻi o i latou o le a faamaufaailogaina, e 144,000.—Faaa. 7:2-4.
4. Aiseā e tāua ai ona ʻalofia le faatigā i le agaga o le Atua?
4 E ono avea le faatigā i le agaga paia, ma gaoioiga e iʻu ai ina aveesea le fesoasoani a le mana galue o le Atua i le olaga o se Kerisiano. E iloa lenei mea i faamatalaga a Tavita ina ua la faia le agasala ma Patesepa. Na augani atu ma le salamō Tavita iā Ieova: “Aua e te lafoaʻiina aʻu mai i ou luma; aua foʻi neʻi e aveesea lou agaga paia mai iā te aʻu.” (Sala. 51:11) E na o i latou o le vaega faauuina e “faamaoni seʻia oo i le oti,” o le a maua le “pale” o le ola i le lagi e lē mafai ona oti. (Faaa. 2:10; 1 Kori. 15:53) E manaʻomia foʻi e Kerisiano e faamoemoe e ola i le lalolagi, le agaga paia ina ia tumau ai ona faamaoni i le Atua ma maua lana meaalofa o le ola, e ala i le faatuatua i le taulaga togiola a Keriso. (Ioa. 3:36; Roma 5:8; 6:23) Ia faaeteete i tatou uma e aua le faatigā i le agaga paia o Ieova.
E Faapefea Ona Faatigā se Kerisiano i le Agaga?
5, 6. E faapefea ona faatigā e se Kerisiano le agaga o Ieova?
5 Ona o ni Kerisiano ua tuuina atu, e mafai ona tatou ʻalofia le faatigā i le agaga. E mafai pe a tatou ʻsavavali pea ma ola i la le agaga,’ ona lē manumalo lea o tuʻinanauga sesē faaletagata iā i tatou, ma lē faia ai ni amioga lē lelei. (Kala. 5:16, 25, 26) Ae e mafai ona suia lenā tulaga. E tatou te ono faatigā i le agaga o le Atua pe a faasolosolo mālie ona faia, atonu ma le lē iloa, amioga o loo taʻusalaina i le Afioga a le Atua.
6 Pe afai e tatou te faia pea mea e feteenaʻi ma le taʻitaʻiga a le agaga paia, o le a tatou faatigā la i le agaga, ma o le faatigā lava foʻi lenā iā Ieova, o le Puna o lenā agaga. O le iloiloina o le Efeso 4:25-32, o le a iloa ai mea e tatau ona tatou faia, ma fesoasoani iā i tatou ia lē faatigā ai i le agaga o le Atua.
Auala e ʻAlofia ai le Faatigā i le Agaga
7, 8. Faamatala le māfuaaga e tatau ai ona tatou tautatala faamaoni.
7 E tatau ona tatou tautatala faamaoni. I le Efeso 4:25, na tusi Paulo e faapea: “Ona ua outou tuu ese le pepelo, ia taʻitasi outou ma tautala i le mea moni ma lona tuaoi, auā o i tatou o itutino o le tino e tasi.” Talu ai ua tatou autasi o “itutino o le tino e tasi,” e lē tatau la ona tatou tautatala faapiʻopiʻo pe taumafai e faasesē o tatou uso tapuaʻi, auā e tusa lava lenā ua tatou pepelo iā i latou. O so o se tasi e faia na amioga, o le a iʻu ina lē toe iai sa laʻua faiā ma le Atua.—Faitau le Faataoto 3:32.
8 E mafai e upu ma gaoioiga taufaasesē ona lepeti ai le autasi o le faapotopotoga. O lea la, e tatau ona tatou pei o le perofeta maufaatuatuaina o Tanielu, o lē e leʻi maua e tagata se mea leaga iā te ia. (Tani. 6:4) E tatau foʻi ona tatou manatua le fautuaga a Paulo i Kerisiano e faamoemoe e ola i le lagi e faapea, e tatau i itutino taʻitasi o le “tino o Keriso,” ona tumau i le autasi ma soo faauuina faamaoni o Keriso. (Efe. 4:11, 12) Pe afai e tatou te faamoemoe e ola e faavavau i le Parataiso i le lalolagi, e tatau foʻi ona tatou tautatala faamaoni, auā o le a saosaolaumea i le autasi o le ʻauuso i le lalolagi aoao.
9. Aiseā e tāua ai ona tatou usitaʻia le Efeso 4:26, 27?
9 Ia tetee atu i le Tiapolo, ia lē tuu atu se avanoa iā te ia e faaleaga ai i tatou faaleagaga. (Iako. 4:7) E fesoasoani le agaga paia iā i tatou e tetee atu ai iā Satani. O se faataʻitaʻiga, e mafai ona tatou faia faapea e ala i le ʻalofia o le ita leaga. Na tusi Paulo: “Pe a outou ita, aua neʻi agasala ai, aua neʻi goto le lā o tumau pea lo outou ita, aua foʻi neʻi tuua e outou se mea e mautū ai le Tiapolo.” (Efe. 4:26, 27) Pe afai e tatou te ita ona o se māfuaaga tatau, e aogā le vave fai o se tatalo lē leoa ina ia ʻtoʻafilemu ai le loto,’ ma faaalia ai le amio pulea nai lo o le gaoioi i se auala e faatigā ai i le agaga o le Atua. (Faata. 17:27) O lea la, seʻi aua neʻi tumau lo tatou ita ma maua ai e Satani se avanoa e faaosooso ai i tatou e fai se mea leaga. (Sala. 37:8, 9) O se isi auala e tetee ai iā te ia, o le vave faalelei lea o feeseeseaʻiga e tusa ma le fautuaga a Iesu.—Mata. 5:23, 24; 18:15-17.
10, 11. Aiseā e lē tatau ai ona tatou gāoi pe faia se gaoioiga lē faamaoni?
10 Aua neʻi o tatou lolo atu i se faaosoosoga e gaoi pe fai se gaoioiga lē faamaoni. Na tusi Paulo e tusa ai o le gaoi: “O lē e gaoi, aua neʻi toe gaoi, a ia galue mamafa o ia, ma ia faia e ona lima galuega lelei, ina ia mafai ai ona ia avatu ni mea i se tagata mativa.” (Efe. 4:28) Pe afai e gaoi se Kerisiano tuuina atu, o le a ia ʻfaalumaina le suafa o le Atua.’ (Faata. 30:7-9) E lē avea foʻi le mativa ma itu e taʻutonuina ai le gaoi. O ē e alolofa i le Atua ma tuaoi, e latou te iloa e lē taitai ona taʻutonuina le gaoi.—Mare. 12:28-31.
11 E lē na ona taʻu mai e Paulo le mea e lē tatau ona tatou faia; a ua ia faailoa mai foʻi le mea e tatau ona fai. Pe a ola ma savavali e tusa ma le agaga, o le a tatou galulue malosi e tausia o tatou aiga ma “avatu ni mea i se tagata mativa.” (1 Timo. 5:8) Sa teu e Iesu ma ona aposetolo ni tupe mo ē e matitiva, ae na gaoia e le faalata o Iuta le Sekara nisi o na tupe. (Ioa. 12:4-6) E mautinoa e leʻi taʻitaʻia o ia e le agaga paia. O i tatou o ē e taʻitaʻia e le agaga o le Atua, e “faia mea uma ma le faamaoni” e pei ona faia e Paulo. (Epe. 13:18) Ona tatou ʻalofia ai lea o le faatigā i le agaga paia o Ieova.
Isi Auala e ʻAlofia ai le Faatigā i le Agaga
12, 13. (a) E pei ona faaalia i le Efeso 4:29, o le ā le ituaiga tautala e ao ona tatou ʻalofia? (e) E tatau ona faapeʻī la tatou tautala?
12 Ia faaeteete i la tatou tautala. Na faalauiloa mai e Paulo: “Ia aua neʻi alu atu se upuleaga mai i o outou gutu, a ia fai atu ni upu lelei e atiaʻe ai i taimi e tatau ai, ina ia aogā i ē o faalogologo i ai.” (Efe. 4:29) E lē na ona taʻu mai e Paulo le mea e lē tatau ona tatou faia; a ua ia taʻu mai foʻi le mea e tatau ona fai. I le taʻitaʻiga a le agaga o le Atua, o le a tatou ʻfai atu ai ni upu lelei e atiaʻe ai, ina ia aogā i ē o faalogologo i ai.’ E lē gata i lea, e lē tatau ona alu atu se “upuleaga” mai i o tatou gutu. O le upu Eleni ua faaliliuina ai le “leaga,” ua mafai ona faamatala ai se fualaau ʻaina, iʻa po o aano o manu ua namu leaga. E pei lava ona tatou ʻinoʻino i ni meaʻai faapena, e tatou te ʻinoʻino foʻi la i upu e inosia e Ieova.
13 E tatau ona logolelei, agalelei ma “ia faamāi i le masima” a tatou faamatalaga. (Kolo. 3:8-10; 4:6) E tatau ona iloa e tagata e ese i tatou, pe a faalogo i a tatou tala e fai. O lea, seʻi o tatou fesoasoani atu i isi e ala i le fai atu o ni “upu lelei e atiaʻe ai.” Tau ina ia iā i tatou lagona sa i le faisalamo, o lē na pese: “Ia mālie iā te oe upu a loʻu gutu ma manatunatuga o loʻu loto Ieova e, loʻu Papa ma Lē e togiolaina aʻu.”—Sala. 19:14.
14. O le ā e tatau ona tatou tuu ese e tusa ai o le Efeso 4:30, 31?
14 E tatau ona tatou tuu ese le ita umi, lotoa, upu masoā, ma mea leaga uma. Ina ua uma ona lapataʻi mai i le faatigā i le agaga o le Atua, na tusi Paulo: “Ia tuu lo outou ita umi, ma le itaitagofie, ma le lotoa, ma le soona ʻeʻē, ma upu masoā, atoa foʻi ma mea leaga uma.” (Efe. 4:30, 31) Ona o ni tagata e lē lelei atoatoa, e ao iā i tatou uma ona galulue mamafa ia pulea o tatou mafaufauga ma gaoioiga. O le lolo atu i le “ita umi, ma le itaitagofie, ma le lotoa,” ua tatou faatigā ai i le agaga o le Atua. E faapena foʻi pe a tatou teuloto mea sesē na faia mai iā i tatou, faaauau ona ita, ma musu e faalelei ma lē na sesē mai. Pe afai foʻi e amata ona tatou faagalo fautuaga a le Tusi Paia, e tatou te ono atiaʻe ni uiga e iʻu ai ina agasala i le agaga, ma selesele ai i ni iʻuga mataʻutia.
15. O le ā e tatau ona tatou fai pe a fai mai se mea sesē iā i tatou?
15 E tatau ona tatou agalelei, alolofa, ma faamagalo atu. Na tusi Paulo e faapea: “Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa, e pei ona finagalo malie le Atua e faamagaloina outou e ala iā Keriso.” (Efe. 4:32) E tusa lava foʻi pe tatou te matuā tigā i se mea sesē na faia mai iā i tatou, seʻi o tatou faamagalo atu, e pei ona faia e le Atua. (Luka 11:4) Seʻi faapea ua faia e se uso po o se tuafafine se tala lē lelei e uiga iā i tatou. E tatou te talanoa atu iā te ia ina ia faasaʻo le mataupu. Ua ia faailoa mai lona salamō moni ma talosaga mai e faamagalo atu. E tatou te faamagalo o ia, ae e iai le isi mea e tatau foʻi ona fai. Ua taʻua i le Levitiko 19:18: “Aua e te tauimasui pe ita faamoemoe i fanau a lou nuu; ia e alofa atu i lou uso a tagata e pei o oe lava. O aʻu o Ieova.”
E Manaʻomia Ona Mataala
16. Aumai se faaaʻoaʻoga e faaalia ai e tatou te ono manaʻomia ni suiga, ina ia le faatigā ai i le agaga o Ieova.
16 E oo lava foʻi pe a lē iloa mai e nisi, e mafai ona faaosoosoina i tatou e fai se mea e lē fiafia i ai le Atua. O se faataʻitaʻiga, e ono faalogologo se uso i ni musika e lē talafeagai. E iʻu ina ōia lona lotofuatiaifo, ona ua ia lē amanaʻia fautuaga a le Tusi Paia ua aumaia i lomiga a “le pologa faamaoni ma le faautauta.” (Mata. 24:45) Atonu e tatalo o ia e uiga i lenei faafitauli, ma manatua upu a Paulo o loo i le Efeso 4:30. O le maumauaʻi ia lē faia se mea e faatigā ai i le agaga o le Atua, ua ia filifili ai e amata atu nei ona lē toe faalogologo i musika e lē talafeagai. O le a faamanuia Ieova i lenā uiga ua faaalia e le uso. O lea la, seʻi faaauau ona tatou faaeteete i le faatigā i le agaga o le Atua.
17. O le ā e ono tupu pe a tatou lē mataala ma tatalo?
17 Pe a tatou lē mataala ma tatalo, o le a mafai ona tatou lolo atu i se gaoioiga lē mamā pe lē saʻo, ma iʻu ai ina faatigā i le agaga. Talu ai e fua mai e le agaga paia fua e atagia mai ai uiga o lo tatou Tamā o i le lagi, o le faatigā la i le agaga paia, o le faatigā foʻi lenā iā Ieova, o se mea e tatou te lē fia nofosala ai. (Efe. 4:30) Na faapea atu ma le leaga le ʻautusiupu Iutaia o le uluaʻi senituri, o Satani na māfua ai vavega na faia e Iesu. (Faitau le Mareko 3:22-30.) Na “fai upuleaga i le agaga paia” na fili o Keriso, ma faia ai le agasala e lē mafai ona faamagaloina. Seʻi aua lava neʻi o tatou oo i lenā tulaga!
18. E faapefea ona tatou iloa e tatou te lē o faia le agasala e lē mafaamagaloina?
18 Talu ai e tatou te matuā lē mananaʻo e fai se mea e iʻu ai i le faia o le agasala e lē mafaamagaloina, e tatau la ona manatua le tala a Paulo e uiga i le lē faatigā i le agaga. Ae faapefea pe afai ua tatou faia se agasala matuiā? Pe afai ua tatou salamō ma maua le fesoasoani mai i toeaina, ua tatou iloa ai ua faamagalo i tatou e le Atua, ma e tatou te lē o agasala i le agaga paia. E mafai foʻi ona tatou ʻalofia le toe faatigā i le agaga i so o se auala, e ala i le fesoasoani a le Atua.
19, 20. (a) O ā nisi o mea e manaʻomia ona tatou ʻalofia? (e) O le ā e ao ona tatou maumauaʻi e fai?
19 E faaaogā e le Atua lona agaga paia e faatuputele ai le alofa, olioli ma le autasi o ona tagata. (Sala. 133:1-3) O lea la, e tatau ona tatou taumamao mai i le faatigā i le agaga, ona o le faia o ni faitatala e faatigā ai, pe faia ni tala e taʻufaatauvaa ai i latou ua tofia e le agaga paia e avea ma leoleo mamoe. (Galu. 20:28; Iuta 8) Ae e tatau ona tatou lagolagoina le autasi ma le faaaloalo o le tasi i le isi i le faapotopotoga. E lē tatau foʻi ona tatou taumafai e fai ni faiga vaega i totonu o le faapotopotoga. Na tusi Paulo: “Uso e, ou te apoapoaʻi atu iā te outou i le suafa o lo tatou Alii o Iesu Keriso, ia outou autasi i a outou upu, ma ia leai ni fevaevaeaʻiga iā te outou, ae ia autasi o outou manatu ma mafaufauga.”—1 Kori. 1:10.
20 E finagalo Ieova e fesoasoani mai iā i tatou ina ia ʻalofia le faatigā i lona agaga. Seʻi faaauau ona tatou tatalo mo le agaga paia ma maumauaʻi e lē faatigā i ai. Tau ina ia faaauau ona tatou “lūlū i la le agaga,” ma saʻili ma le naunau i lana taʻitaʻiga i le taimi nei e oo i le faavavau.
O le ā Lau Tali?
• O le ā le uiga o le faatigā i le agaga o le Atua?
• E faapefea i se tagata ua tuuina atu iā Ieova ona faatigā i Lona agaga?
• O ā auala e mafai ai ona tatou ʻalofia le faatigā i le agaga paia?
[Fesili mo le Suʻesuʻega]
[Ata i le itulau 30]
Ia vave ona faaleleia feeseeseaʻiga
[Ata i le itulau 31]
O lē fea fualaau ʻaina e sili ona atagia mai ai lau tautala?