Ia Faagaoioi Pea Lou Mafaufau

E ESE le manaia o le vaai atu i se tagata tāfiti tomai e vavai lona tino, a o vave ona faia ni gaoioiga onomea! Ua uunaʻia e le Tusi Paia Kerisiano ia aʻoaʻo o latou mafaufau, e pei ona toleni e se tagata tāfiti o ia.

Na tusi atu Paulo i Kerisiano Eperu: “O meaʻai aano e mo tagata matutua ia, o ē ua faaaogā o latou mafaufau e iloa le mea saʻo ma le mea sesē ina ua aʻoaʻoina [toleni e pei o se tagata tāfiti].” (Epe. 5:14, fpl.) Aiseā na apoapoaʻi atu ai Paulo i Kerisiano Eperu ia faagaoioi o latou mafaufau, e pei ona faagaoioi e se tagata tāfiti ona maso? E faapefea ona toleni o tatou mafaufau?

Ia “Fai Outou ma Ē e Aʻoaʻo Atu”

Ina ua faamatalaina le tulaga o Iesu o se “ositaulaga sili e pei o Mekisateko,” na tusi Paulo e faapea: “E tele mea matou te fai atu ai e faatatau iā te ia [Iesu], ae e faigatā ona faamatala, auā ua outou faapalapala i la outou faalogo. O le mea moni, e ui ina ua leva ona tatau ona fai outou ma ē e aʻoaʻo atu, a ua manaʻomia ona toe aʻoaʻoina e se tasi outou mai i le amataga i mataupu faavae o afioga paia a le Atua; ma ua avea outou ma ē ua tatau i ai le suāsusu ae lē o meaʻai aano.”—Epe. 5:10-12.

E mautinoa, e leʻi agaʻi i luma i le malamalama nisi o Kerisiano Iutaia i le uluaʻi senituri, ma e leʻi agaʻi foʻi i luma faaleagaga. O se faaaʻoaʻoga, na faigatā iā i latou ona talia le malamalama ua faateleina e faatatau i le Tulafono ma le peritome. (Galu. 15:1, 2, 27-29; Kala. 2:11-14; 6:12, 13) Sa faigatā i nisi ona tuua tū ma aga sa fesootaʻi ma le Sapati ma le Aso o le Togisala. (Kolo. 2:16, 17; Epe. 9:1-14) O lea na faalaeiau ai i latou e Paulo ia toleni o latou mafaufau, ina ia iloa ai le saʻo ma le sesē, ma fai atu iā i latou ia “finafinau . . . ina ia avea ma tagata matutua.” (Epe. 6:1, 2) O lana apoapoaʻiga na uunaʻia ai nisi ina ia manatunatu i le auala o loo faaaogā ai o latou mafaufau, ma fesoasoani iā i latou ina ia agaʻi ai i luma faaleagaga. Ae faapefea i tatou?

Ia Faagaoioi Lou Mafaufau

E faapefea ona faagaoioi o tatou mafaufau ina ia avea ai o ni tagata e matutua faaleagaga? Na taʻua e Paulo, e ala i le “faaaogā.” E pei o tagata tāfiti, o ē e toleni o latou maso ma tino e ala i le faagaoioi, ina ia faia ni gaoioiga matagofie ma faigatā, e tatau foʻi ona tatou faagaoioi o tatou mafaufau ina ia iloa ai le mea saʻo ma le mea sesē.

Ua taʻua e John Ratey, o se fomaʻi o le mafaufau i le Aʻoga Faafomaʻi i Harvard, “o le faagaoioi o le tino, o le mea pito sili lea e te faia mo le lelei o lou faiʻai.” E tusa ai ma le faamatalaga a Gene Cohen, o le faatonu o le Nofoaga e faatatau i le Soifua Matua, Soifua Mālōlōina ma Tagata, i le Iunivesite o George Washington, “pe a toʻaʻaga e faagaoioi o tatou faiʻai, ona tutupu aʻe lea i sela o le faiʻai o ni laina felavasaʻi fou, ma iʻu ai ina faateleina fesootaʻiga o sela i le faiʻai.”

O lea la, o se mea atamai le faagaoioi o o tatou mafaufau ma faateleina le iloa o le Afioga a le Atua. Ona tatou agavaa ai lea e faia le “finagalo o le Atua, lea e . . . lelei atoatoa.”—Roma 12:1, 2.

 Ia Naunau i “Meaʻai Aano”

Pe afai e tatou te naunau e “avea ma tagata matutua” faaleagaga, e tatau ona tatou fesili ifo: ʻPo o ou agaʻi i luma i loʻu malamalama i le upu moni o le Tusi Paia? Po o manatu isi iā te aʻu o se tagata e matua faaleagaga?’ E fiafia se tinā e fafaga lana pepe i le suāsusu ma meaʻai a pepe, a o laʻitiiti. Ae seʻi mafaufau i le popole o le tinā pe a mavae atu tausaga ae e lē ʻai lana tama i meaʻai aano. E faapena foʻi ona tatou fiafia pe a vāai atu o agaʻigaʻi i luma se tagata o loo tatou suʻesuʻe i le Tusi Paia, ma oo ina tuuina atu lona ola ma papatiso. Ae faapefea pe afai ua lē toe agaʻigaʻi i luma faaleagaga lea tagata? Pe e lē o se mea ea e lotovaivai ai? (1 Kori. 3:1-4) E faamoemoe le faiaʻoga o le a avea foʻi le soo fou ma faiaʻoga.

O le faaaogā o o tatou mafaufau e fefulifulisaʻi ai mataupu, e aofia ai le manatunatu loloto ma faia ni taumafaiga. (Sala. 1:1-3) E lē tatau ona faalavelave mai mea e tosina ese ai le mafaufau, e pei o le matamata i le televise po o mea e fiafia e fai, o mea e lē faagaoioia ai le mafaufau ma lē manatunatu ai i mea e tāua. Ina ia mafai ona tatou mafaufau lelei, e tatau ona atiaʻe ma faamalie le faanaunauga e suʻesuʻe le Tusi Paia ma lomiga a “le pologa faamaoni ma le faautauta.” (Mata. 24:45-47) E lē gata i se faasologa faifai pea o le faitauina o le Tusi Paia, e tāua foʻi ona tatou faataatia ese se taimi mo le Tapuaʻiga a le Aiga, ma suʻesuʻega loloto o mataupu faale-Tusi Paia.

Ua taʻua e Jerónimo, o se ovasia femalagaaʻi i Mekisikō, o le taimi lava e taunuu mai ai Le Olomatamata, e na te suʻesuʻeina ai lomiga taʻitasi. E na te sema foʻi se taimi e suʻesuʻe faatasi ai ma lana avā. Ua faapea mai Jerónimo, “E masani ona ma faitau faatasi le Tusi Paia i aso taʻitasi, ma faaaogā tusi e pei o le polosiua o le ʻNuu Lelei.’” Ua taʻua e se Kerisiano e igoa iā Ronald, e mulimuli pea o ia i le faasologa o le faitau Tusi Paia a le faapotopotoga. E iai foʻi ana poloketi e suʻesuʻe i ni mataupu loloto, lea e umi se taimi e alu ai. Ua faapea mai Ronald: “O nei poloketi e uunaʻia ai aʻu e aloalo atu i le isi taimi e fai ai aʻu suʻesuʻega.”

Ae faapefea i tatou? Po o lava se taimi e tatou te suʻesuʻe ai le Tusi Paia, ma mafaufau loloto ai i le Afioga a le Atua? Po o faagaoioi o tatou mafaufau, ma maua ai le tomai e faia ai faaiʻuga e ōgatusa ma taʻiala a le Tusi Paia? (Faata. 2:1-7) Seʻi tau ina ia fai ma o tatou sini le avea ma tagata e matutua faaleagaga, ua faamanuiaina i le poto ma le atamai ua maua e i latou ua aʻoaʻoina o latou mafaufau, e iloa ai le mea saʻo ma le mea sesē!

[Ata i le itulau 23]

Ia faagaoioi o tatou mafaufau e ala i le “faaaogā”