Karana—O Se Nofoaga na Pisi ai Tagata

I LE na o le taʻua o Karana, e vave ai lava ona manatua e i latou ua masani i le Tusi Paia, le augātamā faatuatua o Aperaamo. I lana malaga mai i Uro i Kanana, na nonofo ai i Karana o ia ma lana avā o Sara, o lona tamā o Tara ma Lota le atalii o lona uso. E tele mea faitino na maua ai e Aperaamo i inā. Ina ua maliu lona tamā, sa toe faaauau le malaga a Aperaamo i le nuu na folafola mai e le Atua moni. (Kene. 11:31, 32; 12:4, 5; Galu. 7:2-4) Mulimuli ane na auina atu e Aperaamo lana auauna aupito matua i Karana, po o se nuu latalata ane, e saʻili ai se avā ma Isaako. E tele foʻi tausaga na nofo ai i inā Iakopo, le atalii o le atalii o Aperaamo.—Kene. 24:1-4, 10; 27:42-45; 28:1, 2, 10.

I le faamataʻu na fai atu e Sanerivi le tupu o Asuria iā Esekia le tupu o Iuta, o loo taʻua ai Karana faatasi ma “nuu” na faatoʻilalo e tupu o Asuria. I lenei mau, o loo faasino atu le igoa “Karana” e lē na o le aai ae faapea foʻi le itumalo atoa. (2 Tu. 19:11, 12) O loo taʻua i le valoaga a Esekielu Karana o se tasi o nofoaga o fefaatauaʻiga a Turo, ma faamautinoa ai o Karana o se nofoaga tāua o fefaatauaʻiga.—Eseki. 27:1, 2, 23.

I aso nei, o Karana ua na o se nuu laʻitiiti e tū latalata ane i Şanlıurfa, i le itu i sasaʻe o Take. Ae sa iai se taimi na tele ai mea na fai i Karana anamua. O Karana foʻi o se tasi o nofoaga mai anamua o loo igoa pea i le igoa o loo iai i le Tusi Paia. O le uiga o lea igoa i le gagana Asuria, o Harranu, o le “Auala Tele” po o le “Auala o Femalagaaʻiga,” e faaalia ai sa tū Karana i le auala tele o fefaatauaʻiga i le va o aai tetele. E tusa ai ma tusitusiga na eli aʻe i le eleele i Karana, ua taʻua ai sa avea le tinā o le tupu o Papelonia o Naponita, ma ositaulaga fafine sili i le malumalu o Sinu, o le atua lea o le masina i Karana. Ua taʻua mai na toe faia e Naponita lenei malumalu. A o iai pea Karana e tele emepaea eseese na tulaʻi mai ma paʻuʻū mulimuli ane.

E ese mamao lava Karana i aso nei i lo aso ua mavae. O Karana anamua, o se aai e matuā tamaoaiga ma tāua, aemaise lava i nisi o vaitaimi. Ae peitaʻi o Karana i aso nei, e na o ni fale e lapotopoto taualuga o loo i ai. O loo siʻomia Karana i faatafunaga o aai anamua. I le lalolagi fou a le Atua, o le a toe faatutūina ai le toʻatele o tagata na ola i Karana, e aofia ai Aperaamo, Sara ma Lota. E lē taumatea, o le a latou faamatala mai iā i tatou le tele o isi mea e uiga iā Karana, o se nofoaga anamua sa pisi ai tagata.

[Ata i le itulau 20]

Faatafunaga o Karana

[Ata i le itulau 20]

Fale e lapotopoto taualuga

[Ata i le itulau 20]

Vaaiga iā Karana i aso nei