Ua Fesili Mai le ʻAufaitau

Talu ai na faasā e Ieova le ifo i tupua, aiseā la na ia lē faasalaina ai Arona ona o le faia o le tamaʻi povi auro?

Ua tusia i le Esoto mataupu e 32 e faapea, ina ua faia e Arona le tamaʻi povi auro, na ia solia ai le tulafono a le Atua e faatatau i le ifo i tupua. (Eso. 20:3-5) O le iʻuga, “na matuā toʻatamaʻi foʻi Ieova iā Arona na toetoe a faaumatia ai o ia; ae na . . . faatoga foʻi [Mose] mo Arona i lenā taimi.” (Teu. 9:19, 20) Pe na aogā le faatoga a le tagata amiotonu o Mose e tusa ai ma le mea na faia e Arona? (Iako. 5:16) Ioe. Ona o lea faatoga ma isi māfuaaga e lua, e foliga mai ai na tali mai Ieova i le tatalo a Mose ma lē faasalaina ai Arona.

E foliga mai o se tasi o māfuaaga, o le talaaga faamaoni o Arona. Ina ua faatonu e Ieova Mose e alu atu i luma o Farao ma aumai Isaraelu mai Aikupito, na tofia e Ieova Arona e ō faatasi ma Mose ma tautala e fai ma fofoga fetalai mo ia. (Eso. 4:10-16) Na faatele ona usiusitaʻi nei tamāloloa e toʻalua, ma ō atu i luma o le tupu o Aikupito, ma onosaia ai le loto maaa o Farao. O lea la, a o iai pea i Aikupito na iloa ai le talaaga faamaoni o le tumau o Arona i le auaunaga iā Ieova.—Eso. 4:21.

Seʻi manatu foʻi i le pogai na faia ai e Arona le tamaʻi povi auro. E 40 aso na iai Mose i le mauga o Sinai. Ina ua “iloa e tagata ua tuai ona alu ifo Mose mai i le mauga,” ona latou tauanau lea o Arona e fai se tupua mo i latou. Na usiusitaʻi Arona ma faia se faatusa o se tamaʻi povi auro. (Eso. 32:1-6) Ae peitaʻi na faaalia i gaoioiga mulimuli ane a Arona, e leʻi iai lona loto i lenei gaoioiga ifo i tupua. E foliga mai na lolo atu o ia ona o omiga. Ina ua faailoa atu e Mose le faaiʻuga mataʻutia i lenei mataupu o le ifo i tupua, na ʻau atu atalii uma o Levi i le itu a Ieova e aofia ai ma Arona. Na fasiotia le toʻatolu afe o nei tagata ifo i tupua, o ē na taulamua i lenei gaoioiga o le ifo i tupua.— Eso. 32:25-29.

Mulimuli ane na taʻu atu e Mose i le nuu: “Ua outou agasala i le agasala telē lava.” (Eso. 32:30) O lea la, e lē na o Arona na nofosala i le mea sesē na faia. Na maua e ia ma le nuu atoa aogā mai i le alofa mutimutivale tele o Ieova.

Ina ua uma le mataupu e faatatau i le tamaʻi povi auro, ona poloaʻi lea o Ieova ina ia tofia Arona e fai ma ositaulaga sili. Na fetalai mai le Atua iā Mose: “E te faaofuina Arona i ofu paia ma faauu iā te ia, ma faapaia iā te ia, ina ia auauna mai o ia o se ositaulaga iā te aʻu.” (Eso. 40:12, 13) E manino mai na faamagalo e Ieova Arona i lona vaivaiga. O Arona o se tagata faamaoni sa lagolagoina le tapuaʻiga moni, ae e lē o sē e fouvale e ifo i tupua.