Uso e, Ia Lūlū e Tusa ma le Agaga ma Aapa Atu!

“O lē e lūlū e tusa ma le agaga, e na te selesele mai le ola e faavavau.”—KALA. 6:8.

1, 2. Ua faapefea ona faataunuuina le Mataio 9:37, 38, ma o le ā le manaʻoga ua tulaʻi mai i faapotopotoga?

UA OUTOU vāai i mea mataʻina o loo tutupu i le talafaasolopito! Ua faia nei i le lalolagi le galuega lea na taʻua e Iesu. Na fetalai Iesu: “E telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.” (Mata. 9:37, 38) Ua tali mai Ieova le Atua i na tatalo, i se auala e leʻi faapea ona faia muamua. A o faagasolo le tausaga faaleauaunaga o le 2009, na faateleina faapotopotoga a Molimau a Ieova i le lalolagi atoa i le 2,031, ma ausia ai le 105,298. I se fua faatatau, e 757 tagata na papatisoina i aso taʻitasi!

² O lenā faatelega ua tulaʻi mai ai se manaʻoga mo uso agavaa, e taʻimua i le aʻoaʻo atu ma le leoleoina o le faapotopotoga. (Efe. 4:11) A o faagasolo tausaga, na tofia e Ieova ni tane agavaa e tausia manaʻoga o ana mamoe, ma e tatou te mautinoa o le a faaauau ona ia faia faapea. Ua faamautinoa mai iā i tatou i le valoaga o loo i le Mika 5:5, i aso e gata ai, o le a iai i tagata o Ieova ni “leoleo mamoe se toʻafitu” ma “alo alii se toʻavalu,” e faaalia ai o le a toʻatele tane agavaa e taʻimua iā i latou.

3. Faamatala le uiga o le “lūlū e tusa ma le agaga.”

³ Pe afai o oe o se uso Molimau a Ieova ua papatisoina, o le ā e fesoasoani iā te oe ina ia aapa atu ai i faaeaga i le faapotopotoga? O se vala autū i lenei mea, o lou “lūlū e tusa ma le agaga.” (Kala. 6:8) O le faia faapea e aofia ai le ola i se auala e mafai ai ona fesoasoani le agaga paia o le Atua i lou olaga. Ia maumauaʻi e aua neʻi e “lūlū e tusa ma le tino agasala.” Aua neʻi avea se olaga e manuia faaletino, se olaga faifailemū ma faafiafiaga, ma itu e faaitiitia ai lou toʻaga e auauna i le Atua. E tatau i Kerisiano uma ona “lūlū e tusa ma le agaga,” ma mulimuli ane o le a agavaa ai tane ua faia faapea, mo faaeaga i le faapotopotoga. Talu ai o loo telē le manaʻoga mo ni auauna o le faiva ma toeaina i aso nei, ua fitoitonu ai lenei mataupu i tane Kerisiano. O lea la, uso e, e matou te faalaeiau outou ina ia iloilo lenei mataupu faatasi ma le tatalo.

Ia Aapa Atu mo se Galuega Lelei

4, 5. (a) O ā faaeaga i le faapotopotoga ua uunaʻia tane papatiso e aapa atu i ai? (e) E faapefea ona aapa atu se tasi?

⁴ E lē otometi ona avea se tane Kerisiano ma ovasia. E tatau ona ia aapa atu mo lenei “galuega lelei.” (1 Timo. 3:1) E aofia ai le auauna atu i uso talitonu, e ala i le tausia ma le faamaoni o o latou manaʻoga. (Faitau le Isaia 32:1, 2.) O se uso e aapa atu ma ni faanaunauga saʻo, e lē fia sili. Ae e uunaʻia o ia i faanaunauga lē manatu faapito mo le lelei o isi.

⁵ E saʻili se tasi ia agavaa e avea o se auauna o le faiva ma aapa atu e avea o se ovasia, e ala i le taumafai e ausia agavaa ua folasia mai i le  Tusi Paia. (1 Timo. 3:1-10, 12, 13; Tito 1:5-9) Pe afai o oe o se uso ua tuuina atu, ia fesili ifo: ʻPo o oʻu faia se sao atoatoa i le galuega talaʻi, ma po o ou fesoasoani atu i isi ia faia faapea? Po o oʻu atiaʻe oʻu uso tapuaʻi e ala i loʻu naunau faamaoni mo lo latou lelei? Po o iai soʻu talaaga o se tagata e suʻesuʻe lelei i le Afioga a le Atua? Po o faaleleia aʻu tali? Po o oʻu faia ma le filigā tofiga ua tuuina mai e toeaina iā te aʻu?’ (2 Timo. 4:5) E tatau ona manatunatu loloto i nei fesili.

6. O le ā se vala tāua ina ia agavaa ai mo tiute tauave i le faapotopotoga?

⁶ O se isi auala e agavaa ai mo tiute tauave i le faapotopotoga, ia ʻmalosi le tagata i totonu i le mana e ala i le agaga o le Atua.’ (Efe. 3:16) O le avea ma auauna o le faiva po o se toeaina i le faapotopotoga Kerisiano, e lē o se tofiga e tuuina atu i so o se tasi. Ae e na o le tuputupu aʻe faaleagaga e mafai ona maua ai lenei faaeaga. E faapefea ona tuputupu aʻe faaleagaga? O se tasi o auala, o le “savavali pea i la le agaga” ma atiaʻe lona fua. (Kala. 5:16, 22, 23) A o e faaalia atu uiga faaleagaga e manaʻomia ina ia taulima ai isi faaeaga, ma faatatauina fautuaga i le auala e faaleleia ai, o le a “iloa ai e tagata uma lou agaʻigaʻi i luma.”—1 Timo. 4:15.

E Manaʻomia se Agaga Faataulaga

7. O le ā e aofia ai i le auauna atu i isi?

⁷ O le auauna atu i isi, e aofia ai galuega fitā ma e manaʻomia ai se agaga faataulaga. Talu ai o ovasia Kerisiano o ni leoleo mamoe faaleagaga, e latou te matuā manatu mamafa la i faafitauli o le lafu. Seʻi mātau aafiaga na oo iā Paulo ona o ona tiute tauave i lana galuega faaleoleo mamoe. Na faapea atu o ia i uso talitonu i Korinito: “O le tele o puapuaga ma le atuatuvale o le loto, na ou tusi atu ai iā te outou ma le maligi tele o loimata, e lē ina ia outou faanoanoa ai ona o aʻu, ae ina ia outou iloa ai le tele o loʻu alofa iā te outou.” (2 Kori. 2:4) E manino mai,  na alu uma le malosi o Paulo i lana galuega.

8, 9. Aumai ni faaaʻoaʻoga i le Tusi Paia e iloa ai le auala na manatu mamafa ai tane i isi.

⁸ Ua avea pea le agaga faataulaga ma vala iloga o tane o ē na galulue mamafa ona o auauna a Ieova. O se faaaʻoaʻoga, e faigatā ona tatou mafaufau na faapea atu Noa i lona aiga: ʻIa taʻu mai pe a uma le vaa, ona ou alu atu ai lea.’ E leʻi fai atu Mose i tagata Isaraelu i Aikupito: ʻTatou fetaui i o i le Sami Ulaula. Faitalia outou ma le auala tou te ō ai.’ E leʻi fai atu foʻi Iosua: ʻA solo i lalo pā o Ieriko, ona taʻu mai lea.’ Ma e leʻi faasino atu Isaia i se tasi ma faapea atu: ʻAe a ia lale! Auina atu o ia.’—Isa. 6:8.

⁹ O le faaaʻoaʻoga sili o se tane na uunaʻia e le agaga o le Atua, o Iesu Keriso. Na talia ma le lotomalie e ia lona tofiga e avea ma Togiola mo le fanau a tagata. (Ioa. 3:16) Pe e lē uunaʻia ai ea i tatou i le alofa faataulaga o Iesu, ina ia faia foʻi faapea? Ina ua faamatala e se uso ua leva ona avea ma toeaina ona lagona mo le lafu, na ia faapea mai: “Na matuā uunaʻia aʻu i upu a Iesu iā Peteru, ia leoleo i aʻu tamaʻi mamoe. I le faagasologa o tausaga, ua ou talisapaia ai le auala e mafai ai e ni nai upu alofa ma sina gaoioiga agalelei, ona faamalosiau ai se tasi. Ou te matuā fiafia tele i le galuega faaleoleo mamoe.”—Ioa. 21:16.

10. O le ā e uunaʻia ai tane Kerisiano e faataʻitaʻi i le faaaʻoaʻoga a Iesu e auauna atu i isi?

¹⁰ I le lafu mamoe a le Atua, e mautinoa e mananaʻo tane o le faapotopotoga, o ē ua tuuina atu, e faaatagia atu uiga o Iesu o lē na fetalai: “Ona ou faafouina lea o outou.” (Mata. 11:28) O le faatuatua i le Atua ma le alofa i le faapotopotoga, ua uunaʻia ai tane Kerisiano e aapa atu mo lenei galuega lelei, ma e lē manatu e tele mea e tatau ona faataulaga pe e alu uma ai le taimi. Ae faapefea pe afai e lē fia aapa atu se tasi? Pe e mafai e se uso ona atiaʻe le faanaunauga e auauna atu i le faapotopotoga?

Atiaʻe le Faanaunauga e Auauna Atu

11. E faapefea ona atiaʻe e se tasi le faanaunauga e auauna atu i isi?

¹¹ Pe afai ua taofia oe mai i le aapa atu ona o lagona e te lē agavaa, e tatau ona e tatalo mo le agaga paia. (Luka 11:13) O le a fesoasoani le agaga o Ieova iā te oe e feagai ai ma ou popolega e tusa ai o lenei tulaga. O le faanaunauga e auauna atu e mai i le Atua, auā o le agaga o Ieova e uunaʻia ai se uso e aapa atu, ma aumaia le malosi e fai ai le auaunaga paia. (Fili. 2:13; 4:13) O lea la, e talafeagai ai ona talosaga atu iā Ieova e fesoasoani mai iā te oe, ina ia atiaʻe se faanaunauga e talia faaeaga i le faapotopotoga.—Faitau le Salamo 25:4, 5.

12. E faapefea ona maua e se tagata le atamai e taulima ai tiute tauave ua tuuina atu iā te ia?

¹² E ono filifili se Kerisiano e lē aapa atu, ona ua ia mātauina o se galuega mamafa ma faigatā le tausia o le lafu. Pe e manatu foʻi e lē lava lona atamai e taulima ai ia tiute tauave. Pe afai o lea, e mafai ona ia maua le atamai e ala i le maelega e suʻesuʻe atili i le Afioga a le Atua ma lomiga faale-Tusi Paia. E lelei ona ia fesili ifo, ʻPo o oʻu sema se taimi e suʻesuʻe ai le Afioga a le Atua, ma po o oʻu tatalo mo le atamai?’ Na tusi le soo o Iakopo: “Pe afai ua leai se atamai i se tasi o outou, inā ōle atu pea ia i le Atua, auā o ia na te foaʻi tele mai ma le lē toe taʻutaʻua, ona foaʻiina mai lea iā te ia.” (Iako. 1:5) Pe e te talitonu i lenei faamatalaga? I le tali mai i le tatalo a Solomona, na foaʻi mai ai e le Atua iā te ia “se loto e atamai ma malamalama,” lea na ia iloa ai le mea lelei ma le mea leaga i le faia o faamasinoga. (1 Tu. 3:7-14) E moni sa tutasi le tulaga o Solomona. Ae peitaʻi, e tatou te mautinoa o le a foaʻi mai e le Atua le atamai i tane ua tuuina atu i ai tiute tauave i le faapotopotoga, ina ia latou tausia lelei ai lana lafu.—Faata. 2:6.

13, 14. (a) Faamatala le auala na taaʻina ai Paulo i le “alofa o le Keriso.” (e) E faapefea ona aafia i tatou i le “alofa o le Keriso”?

¹³ O le isi fesoasoani e atiaʻe ai le faanaunauga e auauna atu i isi, o le mafaufau loloto  lea i mea uma ua faia e Ieova ma lona Alo mo i tatou. O se faaaʻoaʻoga, seʻi manatu i le 2 Korinito 5:14, 15. (Faitau.) E faapefea ona “faamalosia i [tatou] ona o le alofa o le Keriso”? E matuā uigaese le alofa na faaalia e Keriso, i le tuuina mai o lona soifua mo i tatou e tusa ma le finagalo o le Atua, ma a o tuputupu aʻe lo tatou talisapaia, ua matuā aafia ai o tatou loto. Na taaʻina Paulo i le alofa o Keriso. Na taofia ai o ia mai i le faia o gaoioiga manatu faapito, ma fesoasoani iā te ia e faamuamua le auauna atu i le Atua ma tagata, i totonu ma fafo atu o le faapotopotoga.

¹⁴ O le manatunatu loloto i le alofa o Keriso i tagata, ua faagaee ai lo tatou lototalisapaia. Ona tatou iloa ai lea, e matuā lē talafeagai ona saga “lūlū e tusa ma le tino agasala,” e ala i le saʻilia o sini manatu faapito ma tele ina ola e faamalie o tatou lava tuʻinanauga. Ae ua fetuunaʻi a tatou mea e fai ina ia faamuamua le galuega ua tuuina mai e le Atua iā i tatou e fai. O le alofa ua uunaʻia ai i tatou e “pologa” mo o tatou uso. (Faitau le Kalatia 5:13.) Pe afai e manatu o i tatou o ni pologa o loo galulue ma le lotomaulalo mo auauna tuuina atu a Ieova, o le a tatou faamamaluina ma faaaloalo ai iā i latou. E mautinoa e tatou te lē faataʻitaʻi i le agaga faitio ma le faamasinosino lea ua faapogaia e Satani.—Faaa. 12:10.

Taumafaiga a le Aiga

15, 16. O le ā le vaegafai a tagata o le aiga, i le tofiaina o se tane e avea ma auauna o le faiva po o se toeaina?

¹⁵ Pe afai ua faaipoipo le uso ma e iai sana fanau, e manatunatu i le tulaga o lona aiga pe a filifili po ua agavaa e avea ma auauna o le faiva po o se toeaina. O le mea moni, e telē se aafiaga o le tulaga faaleagaga ma le talaaga o lona aiga i lona tofiga. Ua faamamafa ai i lenei mea le tāua o le lagolagosua a le aiga i le tane po o le tamā, a o saʻili e auauna atu i le faapotopotoga o se auauna o le faiva po o se toeaina.—Faitau le 1 Timoteo 3:4, 5, 12.

¹⁶ E fiafia le finagalo o Ieova pe a felagolagomaʻi tagata o le aiga Kerisiano. (Efe. 3:14, 15) E manaʻomia e le ulu o le aiga ona fuafua lelei le taulimaina o tiute tauave i le faapotopotoga, ma le pulea “lelei” o lona aiga. O lea, e tāua i se toeaina po o se auauna o le faiva ona suʻesuʻe le Tusi Paia faatasi ma lana avā ma le fanau, ina ia maua e tagata uma o le aiga aogā mai i le Tapuaʻiga a le Aiga i vaiaso taʻitasi. E tatau ona auai e lē aunoa o ia faatasi ma lona aiga i le galuega talaʻi. E faapena foʻi tagata o le aiga, e tāua ona lagolago atu i taumafaiga a le ulu o le aiga.

Pe e Mafai Ona E Toe Auauna?

17, 18. (a) O le ā e manaʻomia pe afai ua lē toe agavaa se uso mo tofiga? (e) O le ā le lagona e ao ona iai i se uso sa avea muamua o se toeaina po o se auauna o le faiva?

¹⁷ Atonu na avea oe o se toeaina po o se auauna o le faiva, a ua lē toe auauna nei. E te alofa iā Ieova ma e mautinoa o loo alofa mai pea o ia iā te oe. (1 Pete. 5:6, 7) Pe na taʻu atu iā te oe e manaʻomia ona e faia ni suiga? Ia lotomalie e iloa le mea sesē ma galue i ai faatasi ma le fesoasoani a le Atua. Ia aua le ita. Ia atamai ma faaalia se agaga lelei. Na taʻua e se toeaina na auauna mo le tele o tausaga, ae na aveesea ona faaeaga i le faapotopotoga, e faapea: “Sa ou maumauaʻi ina ia tumau pea ona  auai i sauniga, le galuega talaʻi, ma le faitauina o le Tusi Paia e pei ona sa ou faia a o avea ma toeaina, ma sa ou faia faapea. Na ou onosaʻi ona sa ou manatu o le a toe maua loʻu faaeaga pe a mavae se tausaga po o se lua, ae na toetoe lava fitu tausaga faatoʻā toe avea aʻu ma toeaina. I lenā taimi, na fesoasoani tele iā te aʻu le faalaeiauga ia aua le faavaivai ae ia aapa atu pea.”

¹⁸ Pe afai o oe o se uso o loo iai i le tulaga e pei ona faamatalaina, aua le lotovaivai. Ia manatunatu i le auala o loo faamanuia ai e Ieova lau faiva ma lou aiga. Ia atiaʻe lou aiga i le itu faaleagaga, asiasi atu i ē e mamaʻi, ma faalaeiau ē ua vaivai. Ae sili i mea uma, ia faatāua lou faaeaga o le vivii atu i le Atua ma folafola atu le tala lelei o le Malo, o se Molimau a Ieova. *—Sala. 145:1, 2; Isa. 43:10-12.

Ia Faia se Iloiloga

19, 20. (a) O le ā ua uunaʻia tane papatiso uma e faia? (e) O le ā o le a talanoaina i le mataupu lea e sosoo mai?

¹⁹ Ua sili ona manaʻomia i aso nei nai lo o le taimi muamua, ni ovasia ma auauna o le faiva. O lea e faalaeiau atu ai i tane papatiso uma, ia iloilo o latou tulaga ma fesili ifo, ʻPe afai e lē o aʻu o se auauna o le faiva po o se toeaina, aiseā ua ou lē auauna ai i se tasi o nei tofiga?’ Ia fesoasoani le agaga o le Atua iā te oe e maua se vaaiga saʻo i lenei mataupu tāua.

²⁰ O le a maua e tagata uma o le faapotopotoga aogā mai i taumafaiga faataulaga a o latou uso. Pe a faia ni gaoioiga agalelei ma lē manatu faapito, o le a tatou olioli i le auauna atu i isi, ma lūlū e tusa ma le agaga. Ae ua faaalia i le mataupu o sosoo mai, e lē tatau ona tatou faatigā i le agaga paia o le Atua. E faapefea ona ʻalofia lenā mea?

[Faaopoopoga i lalo]

O le ā Lau Tali?

• O le ā ua faamautinoa mai iā i tatou e le valoaga o loo i le Mika 5:5?

• Faamatala mea e aofia ai i se agaga faataulaga.

• E faapefea ona atiaʻe e se tasi le faanaunauga e auauna atu i isi?

• O le ā le tāua o le felagolagomaʻi o se aiga, i le tofiaina o se uso e avea ma auauna o le faiva po o se toeaina?

[Fesili mo le Suʻesuʻega]

[Ata i le itulau 25]

O le ā e te faia ina ia aapa atu ai?