E Maua le Faafouina i Mea Faaleagaga

“Ia outou amoina laʻu amo . . . , ona faafouina ai lea o outou.”—MATA. 11:29.

1. O le ā na faatulaga e Ieova i le mauga o Sinai e fai, ma aiseā?

INA ua amata faamamaluina le feagaiga o le Tulafono na tuuina atu i le mauga o Sinai, na aofia ai ma le tausia o le Sapati faalevaiaso. Na poloaʻia e Ieova le nuu o Isaraelu e ala i lana fofoga fetalai o Mose: “E ono aso e fai ai au galuega; ae o le aso lona fitu e te lē galue ai, ina ia mālōlō ai lau povi poʻa ma lau asini ma mālōlō ai le tama tama a lau teine pologa ma le tagata ese e aumau ai.” (Eso. 23:12) Ioe, o le manatu alofa iā i latou sa i lalo o le Tulafono, na faatulaga ai ma le agalelei e Ieova se aso e latou te “mālōlō ai.”

2. Na faapefea ona aogā i tagata Isaraelu le tausia o le Sapati?

² Po o le Sapati ua na o se aso e tau ina mālōlō ai? E leai, o le Sapati o se vaega tāua o le tapuaʻiga a tagata Isaraelu iā Ieova. O le tausia o le Sapati, na mafai ai e ulu o aiga ona aʻoaʻo o latou aiga “ia latou tausia ala o Ieova ma fai le amiotonu.” (Kene. 18:19) Na maua ai foʻi le avanoa mo aiga ma uō e aufaatasi ai ma mafaufau loloto i mea ua faia e Ieova, ma latou olioli ai i na faatasiga. (Isa. 58:13, 14) Ae e sili atu ona tāua, na faasino atu faavaloaga le Sapati i se taimi o i luma o le a maua ai le faafouina moni e ala i le Pulega a Keriso i le afe o tausaga. (Roma 8:21) Ae faapefea o tatou aso? O fea ma e faapefea ona maua e Kerisiano moni o loo naunau i ala o Ieova lenā faafouina?

Faafouina e Ala i Aufaatasiga Faa-Kerisiano

3. O le ā le auala na lagolago ai e le tasi Kerisiano le isi i le uluaʻi senituri, ma o ā iʻuga na maua ai?

³ Na faamatalaina e le aposetolo o Paulo le faapotopotoga Kerisiano e faapea, “o le poutū ma le lagolago o le upu moni.” (1 Timo. 3:15) Na maua e uluaʻi Kerisiano lenā lagolagosua e ala i le faalaeiau, ma atiaʻe e le tasi le isi i le alofa. (Efe. 4:11, 12, 16) A o iai Paulo i Efeso, na faalaeiauina o ia ina ua asiasi ane sui o le faapotopotoga i Korinito. Mātau mai iʻuga na oo i ai: “Ua ou fiafia ona ua faatasi mai Setefana, ma Fotunato, ma Akaiko. . . . Auā ua latou faamalosi i loʻu agaga.” O le faamatalaga lea a Paulo. (1 Kori. 16:17, 18) Na faapena foʻi ina ua alu atu Tito i Korinito e fesoasoani i uso i inā, na tusi atu Paulo i le faapotopotoga, ma faapea atu: “Ua faamalosia e outou uma lona agaga.” (2 Kori. 7:13) Ua faapena foʻi i aso nei, ua maua e Molimau a Ieova le faafouina moni e ala i aufaatasiga faa-Kerisiano e atiaʻe ai.

4. Ua faapefea ona faafouina i tatou e sauniga a le faapotopotoga?

⁴ Ua outou iloa, o sauniga a le faapotopotoga e maua ai le olioli tele. O inā e tatou te “fefaalaeiauaʻi ai i le faatuatua.” (Roma 1:12) O o tatou uso ma tuafāfine, e lē o ni aumea e na ona feiloaʻi puupuu pe faatopetope atu i ai mai lea taimi i lea taimi, e aunoa ma se manatu mamafa iā i latou. O i latou o a tatou uō moni, ma o tagata e tatou te alolofa ma faaaloalo i ai. E tatou te maua le olioli tele ma faamāfanafanaina ai e ala i lo tatou faatasitasi e lē aunoa ma i latou i a tatou sauniga.—File. 7.

5. E faapefea ona faafouina e le tasi le isi i tauaofiaga ma fonotaga?

⁵ O le isi puna e faafouina ai, o a tatou fonotaga ma tauaofiaga faaletausaga. E lē gata e tatou te maua ai vai o le ola mai upu moni o le  Afioga a le Atua le Tusi Paia, ae o nei faatasiga tetele e tatou te maua ai le avanoa e “faalautele atu” ai a tatou sootaga ma isi. (2 Kori. 6:12, 13) Ae e faapefea pe afai e tatou te matamumuli ma faigatā ona tatou faafeiloaʻia isi tagata? O se tasi o auala e faamasani ai i o tatou uso ma tuafāfine, o le fesoasoani atu iā i latou i tauaofiaga. Ina ua uma ona fesoasoani atu se tuafāfine i se tasi o tauaofiaga faavaomalo, na ia taʻua e faapea: “Ou te leʻi iloa le toʻatele o i latou na iai i inā, seʻi vaganā ai lo matou aiga ma ni nai uō sa iai. Ae ina ua ou fesoasoani atu i galuega faamamā, na ou feiloaʻi atu ai i le toʻatele o uso ma tuafāfine! Se e ese le manaia!”

6. O le ā se tasi o auala e tatou te maua ai le faafouina a o tatou iai i faigāmālōlōga?

⁶ E masani ona malaga atu tagata Isaraelu i Ierusalema mo la latou tapuaʻiga, i tausamiga e tolu faaletausaga. (Eso. 34:23) O lona uiga, e tuua a latou faatoʻaga ma faleoloa, ae malaga mo ni aso e savavali atu i auala pefu. Ae ui i lea, o le ō atu i le malumalu e maua ai le “olioli tele” a o avatu e i latou na auai le “viiga iā Ieova.” (2 No. 30:21) Ua maua foʻi e Molimau a Ieova i aso nei le olioli tele, a o latou malaga atu ma o latou aiga e asiasi i Peteli, o fale o le lālā o Molimau a Ieova o lata ane. O lea, po o le a e faaaofia ai sea asiasiga i le isi faigāmālōlōga a le tou aiga o sosoo ai?

7. (a) E faapefea ona aogā faatasitasiga faasamasamanoa? (e) O le ā e saosaolaumea i se aufaatasiga e fiafia ma atiaʻe ai?

⁷ O le auaufaatasi ma aiga ma uō i faatasitasiga faasamasamanoa e mafai foʻi ona faalaeiauina ai. Na taʻua e le tupu poto o Solomona e faapea: “E leai se mea e sili i le tagata nai lo o le ʻai ma inu, ma iloa e ia mea lelei ona o lana galuega mamafa.” (Fai. 2:24) O faatasitasiga faasamasamanoa e lē gata e faafouina ai, ae e faamalosia ai lo tatou alofa i uso Kerisiano a o faasolo ina tatou iloa lelei i latou. Ina ia saosaolaumea i se aufaatasiga e fiafia ma atiaʻe ai, e sili ona lelei pe a faalaʻitiiti ma ia  faamautinoa ua lelei ona vaavaaia, aemaise lava pe afai o loo faaaogā ai le ʻava malosi.

E Faafouina e Ala i le Faiva

8, 9. (a) Taʻu mai le eseesega o le feʻau a Iesu ma le feʻau a le ʻautusiupu ma le ʻau Faresaio. (e) E aogā faapefea iā i tatou le faasoa atu o upu moni o le Tusi Paia?

⁸ Sa maelega Iesu i le faiva, ma faalaeiau ona soo ia faia faapea. E tatou te iloa lenā manatu i ana upu: “E telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.” (Mata. 9:37, 38) O le feʻau na aʻoaʻo e Iesu sa faafouina moni ai lava; ma o se “tala lelei.” (Mata. 4:23; 24:14) Sa matuā ese lenā mai i tulafono mamafa a le ʻau Faresaio na faamalosia tagata e tausia.—Faitau le Mataio 23:4, 23, 24.

⁹ A o tatou faasoa atu le feʻau o le Malo i isi, ua tatou faafouina faaleagaga i latou, ma i le taimi e tasi ua faateleina ai lo tatou malamalama ma le loto faafetai i upu moni tāua o le Tusi Paia. Ua talafeagai ai la upu a le faisalamo e faapea: “O outou le nuu e, inā vivii atu ia Ioa, auā e lelei ona fai pesega i lo tatou Atua; auā o le mea mālie lea.” (Sala. 147:1) Po o faateleina ea lou olioli ua maua e ala i le viiviia o Ieova i ou tuaoi?

10. Pe fua lo tatou taulau manuia i le faiva i le tali lelei mai a tagata i la tatou feʻau? Faamatala.

¹⁰ O le mea moni, e tali lelei mai tagata i le tala lelei i nisi o oganuu, nai lo isi oganuu. (Faitau le Galuega 18:1, 5-8.) Pe afai o loo e nofo i se oganuu e tau lē tali lelei mai tagata i le feʻau o le Malo, ia taumafai e taulaʻi atu i le itu lelei o mea ua e faataunuuina i lau faiva. Ia manatua, e lē iʻuvale au taumafaiga faifai pea e faalauiloa le suafa o Ieova. (1 Kori. 15:58) E lē gata i lea, e lē fuaina lo tatou taulau manuia i le tali mai a tagata i le tala lelei. E tatou te iloa o le a faamautinoa e Ieova ua maua e tagata loto faamaoni le avanoa e tali mai ai i le feʻau o le Malo.—Ioa. 6:44.

O le Tapuaʻiga a le Aiga e Faafouina Ai

11. O le ā le tiute tauave ua tuuina atu e Ieova i mātua, ma e faapefea ona latou faataunuuina?

¹¹ O mātua e matataʻu i le Atua e paʻū iā i laʻua le aʻoaʻoina o la la fanau e faatatau iā Ieova ma ona ala. (Teu. 11:18, 19) Pe afai o oe o se matua, po o iai sau faasologa o se taimi e aʻoaʻo ai lau fanau e faatatau i lo tatou Atua alofa i le lagi? Ina ia fesoasoani iā te oe e faataunuu lau matafaioi tāua ma tausia manaʻoga o lou aiga, ua saunia e Ieova le anoanoaʻi o meaʻai lelei faaleagaga e ala i tusi, mekasini, vitiō, ma mea ua puʻeina.

12, 13. (a) E faapefea ona aogā i aiga le Tapuaʻiga a le Aiga i afiafi? (e) E faapefea ona faamautinoa e mātua e avea le tapuaʻiga a le latou aiga ma puna o faalaeiauga?

¹² E lē gata i lea, ua faatulaga e le pologa faamaoni ma le faautauta le faia o le Tapuaʻiga a le Aiga i le afiafi. O se afiafi lea ua tuu ese i vaiaso taʻitasi mo le suʻesuʻega faale-Tusi Paia a le aiga. Ua iloa e le toʻatele, o lenei fuafuaga ua māfana ai la latou mafutaga ma faateleina ai le alofa o le tasi i le isi, ma ua faamalosia ai la latou faiā ma Ieova. Ae faapefea ona faamautinoa e mātua, ua avea le tapuaʻiga a lo latou aiga ma puna o le faafouina faaleagaga?

¹³ O le Tapuaʻiga a le Aiga i le afiafi e lē tatau ona pē le faiga, pe soona sasalu foʻi, ona o loo tatou tapuaʻi atu i “le Atua fiafia,” ma e finagalo o ia ina ia tatou olioli i la tatou tapuaʻiga. (1 Timo. 1:11; Fili. 4:4) O le iai o se afiafi faaopoopo e talanoaina ai mea tāua o upu moni o le Tusi Paia, o se faamanuiaga moni lava. E mafai ona fetuutuunaʻi mātua i le auala e aʻoaʻo atu ai, ma mafaufau i auala e fuafua ai ni mea fou. O se faataʻitaʻiga, na tuu atu e se tasi o aiga iā Brandon e 10 ona tausaga e na te faia se lipoti e faaulutala e faapea “Aiseā na Faaaogā ai e Ieova se Gata e Fai ma Sui o Satani?” Sa popole Brandon i lenei mea ona e fiafia o ia i gata, ma sa lē fiafia ona na faafesootaʻi le gata iā Satani. O nisi o aiga e  latou te faatino ni tala mai le Tusi Paia mai lea taimi i lea taimi, e tofu le tagata o le aiga ma lana vaega e fai, e faitau le vaega a le tagata mai le Tusi Paia, po o le faatinoina foʻi e le aiga o se mea na tupu. O nei auala e aʻoaʻo ai e lē gata e mālie, ae o loo aofia ai ma lau fanau, lea e mafai ona pāʻia ai o latou loto i mataupu silisili o loo iai. *

ʻAlofia Mea e Ono Avea ma Avega Mamafa

14, 15. (a) Ua faapefea ona faatupulaʻia le popole ma lagona lē saogalemu i aso e gata ai? (e) O ā isi mafatiaga e tatou te ono fesagaʻia?

¹⁴ Ua faateleina le popole ma lagona lē saogalemu i nei aso e gata ai o lenei faiga amioleaga o mea. Ua aafia le faitau miliona o tagata i le leai o ni galuega po o isi faigatā tautupe. E oo lava iā i latou e iai galuega e lagona faapea, o tupe o loo latou maua, ua pei o loo tuu i se taga e pūpū solo, ua itiiti lava se aogā i lo latou aiga. (Faatusatusa i le Hakai 1:4-6) E foliga mai ua lē taulau le ʻaufaipolotiki ma isi taʻitaʻi a o latou tauivi e aveesea faiga faatupu faalavelave ma isi pogai o mea leaga. E toʻatele tagata ua mafatia i o latou lava sesē o loo iai.—Sala. 38:4.

¹⁵ O loo feagai Kerisiano moni ma faafitauli ma omiga ua aumaia e le faiga o mea a Satani. (1 Ioa. 5:19) I nisi taimi, e ono feagai soo o Keriso ma isi foʻi mafatiaga a o latou tauivi e tumau i le faamaoni iā Ieova. Na fetalai Iesu e faapea: “Afai na latou faasauā mai iā te aʻu, e latou te faasauā foʻi iā te outou.” (Ioa. 15:20) Ae peitaʻi, e tusa lava foʻi pe ‘⁠sauāina i tatou’ ae e ‘⁠lē o tuulafoaʻiina i tatou.’ (2 Kori. 4:9) Aiseā ua faapea ai?

16. O le ā e fesoasoani iā i tatou e tumau ai lo tatou olioli?

¹⁶ Na fetalai Iesu: “Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou.” (Mata. 11:28) O le faatuatua atoatoa i le togiola ua saunia e Keriso, ua pei ai ua tatou tuu atu i tatou i aao o Ieova. O le auala lenei e tatou te maua ai “le mana lea e sili atu i le malosi o tagata.” (2 Kori. 4:7) O le agaga paia o le Atua “o le fesoasoani,” ma e na te matuā faamalosia lo tatou faatuatua ina ia lē gata e tatou te onosaia ai tofotofoga ma puapuaga e tatou te fesagaʻia, ae e tumau ai foʻi lo tatou olioli.—Ioa. 14:26; Iako. 1:2-4.

17, 18. (a) O le ā le agaga e manaʻomia ona leoleo malu mai ai i tatou? (e) O le ā e iʻu i ai lo tatou faamamafa o mea masani o le olaga?

¹⁷ O Kerisiano moni i aso nei, e manaʻomia ona latou leoleo malu i le soona taaʻina e le agaga o le lalolagi o le tuʻinanau i mea faafiafia. (Faitau le Efeso 2:2-5.) A lē faia lenā mea, e maileia i tatou i “tuʻinanauga o le tino, ma tuʻinanauga o mata, ma le faalialiavale o meafaitino a se tasi.” (1 Ioa. 2:16) Po o le faasesēina foʻi o i tatou e talitonu faapea, o le lolo atu i tuʻinanauga o le tino o le a maua ai le faafouina. (Roma 8:6) O se faaaʻoaʻoga, o nisi ua latou faaaogā sesē fualaau ma le ʻava malosi, ata ma faamatalaga o faiga matagā faaleulugalii, taaloga mataʻutia, po o gaoioiga eseese e lē faatagaina i le tulafono ina ia faagaee ai o latou faalogona. O “togafiti” a Satani ua fuafua e faasesēina ai se tasi e ala i le iai o  se lagona sesē i mea e faafouina ai.—Efe. 6:11.

¹⁸ E lē leaga le ʻai, inu, ma auai i ni ituaiga o faafiafiaga lelei pe a talafeagai le auala e fai ai. Ae e lē avea na mea ma mea e sili ona tāua i o tatou olaga. E tāua ona paleni ma pulea na mea, aemaise lava pe a fua atu i le taimi ua tatou ola ai nei. O mea e saʻilia e le tagata lava ia e ono avea ma avega mamafa ua oo ai ina tatou “paiē ma lē fua mai, e tusa ai ma le poto saʻo i lo tatou Alii o Iesu Keriso.”—2 Pete. 1:8.

19, 20. E faapefea ona maua le faafouina moni?

¹⁹ Pe a tatou faaōgatusa o tatou mafaufauga ma tulafono a Ieova, e tatou te iloa ai, e so o se mea faafiafia e ofo mai e lenei lalolagi iā i tatou, ua na o sina taimi puupuu e aogā ai. Na iloa lelei e Mose lenā tulaga, ma e faapena foʻi i tatou. (Epe. 11:25) O le faafouina moni, e tatou te maua ai le olioli tumau ma le faamalieina, lea e maua i lo tatou faia o le finagalo o lo tatou Tamā i le lagi.—Mata. 5:6.

²⁰ Seʻi faaauau ona faafouina i tatou e ala i mea faaleagaga. O le faia faapea, e tatou te “teena [ai] amioga faalēmataʻu ma tuʻinanauga o le lalolagi . . . a o tatou faatalitali i le faamoemoe fiafia ma le faaali mai i le mamalu o le Atua sili, atoa ma lo tatou Faaola o Keriso Iesu.” (Tito 2:12, 13) O lea la, seʻi o tatou maumauaʻi e tumau i lalo o le amo a Iesu e ala i le gauaʻi i lana pule ma lana taʻitaʻiga. O le faia faapea, o le a tatou maua ai le fiafia moni ma faafouina ai!

[Faaopoopoga i lalo]

E Faapefea Ona E Tali?

• E faapefea ona maua e tagata o Ieova le faafouina i aso nei?

• E faapefea ona faafouina i tatou e la tatou faiva ma ē e tatou te talanoa atu i ai?

• O le ā e mafai ona fai e ulu o aiga e faamautinoa ai o la latou tapuaʻiga faaleaiga e maua ai le faafouina?

• O le ā e avea ma avega mamafa i lo tatou itu faaleagaga?

[Fesili mo le Suʻesuʻega]

[Ata i le itulau 26]

O le tauaveina o le amo a Iesu, e tatou te maua ai le tele o mea e faafouina ai