E Saogalemu pe a Faatasi ma Tagata o le Atua

“Ou te faaneenee atu iā te oe i totonu o le faapotopotoga tele.”—SALA. 35:18.

1-3. (a) O ā mea e ono māfua ai ona lamatia faaleagaga nisi Kerisiano? (e) O fea e maua ai e tagata o le Atua le puipuiga?

A O TAFAFAO, na taeele Siō ma lana avā i le sami ma matamata i le aʻau e tumu i ituaiga eseese o iʻa felanulanuaʻi. Na feʻausi teisi atu i tai e matamata i lalo i le aʻau. Ina ua oo ina loloto le moana, na faapea atu le avā a Siō, “Ua fai si mamao o le mea ua ta oo i ai.” Ae fai mai Siō, “Aua e te popole. O lea ou te iloa le mea e fai.” Ua faamatala e Siō lona taumafaufau, ‘⁠Po o fea ua ō uma i ai iʻa?’ Ua matuā fefe o ia ina ua iloa atu le māfuaaga. O loo sau saʻo iā te ia se malie mai i le mea loloto. Ua leai se mea e mafai ona ia faia e puipuia ai o ia. Ina ua latalata mai le malie, na teʻi lava ua toe liliu ma alu ese.

² E ono taaʻina se Kerisiano i faatosinaga a le faiga o mea a Satani, e pei o faafiafiaga, galuega, ma meafaitino, e aunoa ma lona iloa ua oo i le sami loloto. Ua faapea mai Siō, o se toeaina Kerisiano: “O le mea na tupu iā te aʻu, na ou mafaufau ai e uiga i ē o loo tatou faifaimea faatasi. Ia aau i le mea e saogalemu ma fiafia ai, o totonu lea o le faapotopotoga!” Aua le aau i le mea loloto, lea e ono faaesea ma lamatia ai oe faaleagaga. Pe a e iloa ua e oo i inā, ia faavave ona toe foʻi i ‘⁠uta i le papaʻu e te saogalemu ai.’ Auā a leai, e ono lamatia ai oe i le faaleagaina o lou tulaga faaleagaga.

³ Ua avea le lalolagi i aso nei o se nofoaga mataʻutia mo Kerisiano. (2 Timo. 3:1-5) Ua iloa e Satani ua puupuu ona aso, ma e manaʻo o ia e ʻaina i latou e lē o mataala. (1 Pete. 5:8; Faaa. 12:12, 17) Ae peitaʻi, o loo iai lo tatou puipuiga. Ua saunia e Ieova le faapotopotoga Kerisiano e avea ma lafitaga faaleagaga mo ona tagata.

4, 5. O ā lagona o le toʻatele e uiga i lo latou lumanaʻi, ma aiseā?

⁴ E itiiti se saogalemu faaletino ma tau faalogona e saunia e tagata maualuluga o malo ma nuu. Ua manatu le toʻatele ua lamatia lo latou saogalemu faaletino i soligatulafono, sauāga, le taugatā o le soifuaga, e oo lava foʻi i mataupu tau siʻosiʻomaga. Ua fesagaʻi tagata uma ma faafitauli o le agaʻi ina matutua ma mamaʻi. Ua taumānatu i latou e iai galuega, fale, lava tupe, ma lelei le soifua mālōlōina, po o le ā le umi o le a tumau ai nei mea.

⁵ Ua faigatā foʻi ona maua e le toʻatele le saogalemu tau faalogona. E faanoanoa ona ua lē taunuu faamoemoega o le toʻatele, e maua le filemu ma le manuia i se faaipoipoga ma se aiga. I le itu faaleagaga, ua fememeaʻi ma lē mautonu le toʻatele o tagata lotu, ma fesiligia ai le aogā o le taʻitaʻiga ua latou maua. Aemaise lava i amioga leaga ma aʻoaʻoga e lē faale-Tusi Paia a o latou faifeʻau. O lea, ua manatu le toʻatele e sili pe a faalagolago i le faasaienisi, po o le alofa ma le mafaufau lelei o tagata. E lē o se mea la e faateʻia ai, ua leai se lagona saogalemu o tagata, po ua lē fia mafaufau foʻi e uiga i lo latou lumanaʻi.

6, 7. (a) Aiseā e eseese ai manatu o ē e auauna i le Atua ma ē e lē o faia faapea, e uiga i le lumanaʻi? (e) O le ā o le a tatou talanoaina?

⁶ E matuā ese lava manatu o ē ua iai i le  faapotopotoga Kerisiano, ma ē e lē o iai! E ui lava o i tatou o tagata o Ieova, o loo fesagaʻi ma le tele o mataupu ma faafitauli e pei foʻi o isi tagata, ae e matuā ese le auala e tatou te tali atu ai. (Faitau le Isaia 65:13, 14; Malaki 3:18.) Aiseā? Auā ua tatou maua i le Tusi Paia se faamatalaga faamalieloto i le tulaga ua oo i tagata, ma ua saunia i tatou e feagai ma luʻi ma faafitauli o le olaga. O lea, e tatou te lē soona popole ai e uiga i le lumanaʻi. Ona o ni tagata tapuaʻi o Ieova, ua tatou maua ai le puipuiga mai i manatu lē saʻo ma lē faale-Tusi Paia, amioga lē mamā, ma āuga leaga o na mea. O lea ua tofo ai e tagata o le faapotopotoga Kerisiano le toʻafilemu, lea e lē o maua e isi.—Isa. 48:17, 18; Fili. 4:6, 7.

⁷ E ono fesoasoani nisi faaaʻoaʻoga iā i tatou, e mafaufau ai i le saogalemu ua maua e ē o auauna iā Ieova, e ese mai i ē e lē o auauna iā te ia. E ono uunaʻia i tatou i nei tala e iloilo o tatou mafaufauga ma gaoioiga, ma vaai pe mafai ona tatou faatatauina atili fautuaga a le Atua, ua faia e puipuia ai i tatou.—Isa. 30:21.

“Na Toetoe Ina a Liliuese Oʻu Vae”

8. O le ā e tatau i auauna a Ieova ona fai i taimi uma?

⁸ Mai i le amataga o le talafaasolopito o le tagata, na saʻili ai ē na filifili e auauna ma usitaʻi iā Ieova, e ʻalofia le faifaimea faatasi ma ē e lē o faia faapea. Ae ua faaalia e Ieova, o le a iai le feitagaʻi i le va o ona tagata tapuaʻi ma ē e mulimuli iā Satani. (Kene. 3:15) Ona o le maumauaʻi i taʻiala a le Atua, ua ese ai gaoioiga a tagata o le Atua mai i ē o loo siʻomia i latou. (Ioa. 17:15, 16; 1 Ioa. 2:15-17) E lē faigofie i taimi uma ona faia lea tulaga. O lea, i nisi taimi ua fesiligia ai e nisi o auauna a Ieova le atamai o le ola i se olaga faataulaga.

9. Faamatala le tauiviga na fesagaʻi ma le tusitala o le Salamo e 73.

⁹ O se tasi o auauna a Ieova na amata ona taumānatu pe na ia faia ni faaiʻuga saʻo, o le tusitala o le Salamo e 73, atonu o sē na  tupuga mai iā Asafo. Na fesili le faisalamo pe aiseā e foliga mai ai ua manuia, fiafia ma ola lelei le tagata amioleaga, a o mafatia i puapuaga ma faigatā nisi o loo taumafai e auauna i le Atua.—Faitau le Salamo 73:1-13.

10. Aiseā e tāua ai iā te oe mataupu na lāgā e le faisalamo?

¹⁰ Pe na iai se taimi na e fesili ai i fesili e pei ona tusia e le faisalamo? Afai o lea, aua e te manatu ua e faia se mea sesē pe mafaufau ua leai sou faatuatua. Sa manatu foʻi faapena nisi o auauna a Ieova, e aofia ai ma nisi o ē na faaaogā e Ieova e tusia le Tusi Paia. (Iopu 21:7-13; Sala. 37:1; Iere. 12:1; Sapa. 1:1-4, 13) O lea, e tatau iā i latou uma e naunau e auauna iā Ieova, ona mafaufau loloto ma talia le tali o lenei fesili: Po o le auauna ma usiusitaʻi i le Atua o le mea sili lea e fai? E atagia mai ai i lenei mea le finauga na lāgā e Satani i le faatoʻaga i Etena. E faaautū atu i le tonu o le pule silisili ese a Ieova i le aoao o mea. (Kene. 3:4, 5) E lelei la mo i tatou uma ona manatunatu i le mataupu na lāgā e le faisalamo. Pe e tatau ona tatou matauʻa i tagata leaga e mimitavale, o ē e foliga mai o loo sologa lelei o latou olaga? Pe e tatau ona tatou “liliuese” mai i le auauna atu iā Ieova, ma faataʻitaʻi iā i latou? O le mea tonu lenā o loo manaʻo Satani e tatou te faia.

11, 12. (a) Na faapefea ona foʻia e le faisalamo ona masalosaloga, ma o le ā ua tatou aʻoaʻoina mai i inei? (e) O le ā e fesoasoani iā te oe e te faia ai se faaiʻuga e tutusa ma le faisalamo?

¹¹ O le ā na fesoasoani i le faisalamo e foʻia ai ona masalosaloga? E ui ina faapea mai na toetoe a ia liliuese mai i le amiotonu, ae na suia ona manatu ina ua ulu atu i “le afioaga paia o le Atua,” o lona uiga, ina ua aufaatasi ma tagata faaleagaga i le faleʻie paia po o le malumalu o le Atua, ma manatunatu ai i le finagalo o le Atua. Ona manino ai lea i le faisalamo, e lē fia tofo i le iʻuga o tagata amioleaga. Na ia iloa ai o o latou ala ma filifiliga i le olaga, ua tuua ai i latou i “mea maseesee.” Na iloa e le faisalamo, o i latou ua tuua Ieova ona o amioga lē mamā, o le a oo mai lo latou iʻuga i “mala faafuaseʻi,” ae o le a lagolagoina e Ieova i latou e auauna iā te ia. (Faitau le Salamo 73:16-19, 27, 28.) E mautinoa ua e vaai i le moni o lenā faamatalaga. Atonu e lelei i le toʻatele le faamalie o o latou lava manaʻo, e aunoa ma le amanaʻia o tulafono a le Atua, ae e mautinoa e latou te selesele i āuga leaga.—Kala. 6:7-9.

¹² O le ā se isi mea e tatou te aʻoaʻoina mai i le mea na tupu i le faisalamo? Na ia maua le saogalemu ma le atamai, i le aufaatasi ma tagata o le Atua. Sa amata ona mafaufau lelei o ia ma iloa le mea tonu, ina ua alu i le mea e tapuaʻi ai iā Ieova. E faapena foʻi aso nei, e tatou te maua faufautua atamamai ma meaʻai lelei faaleagaga, i sauniga a le faapotopotoga. Ua talafeagai la ona fetalai mai ai Ieova i ana auauna, ia auai i sauniga faa-Kerisiano. O le a faalaeiauina ai i latou i inā ma uunaʻia ai e gaoioi ma le poto.—Isa. 32:1, 2; Epe. 10:24, 25.

Filifili ma le Poto Au Aumea

13-15. (a) O le ā le mea na tupu iā Tina, ma o le ā ua faataʻitaʻia mai ai? (e) Aiseā ua avea ai o se puipuiga le aufaatasi ma uso Kerisiano?

¹³ O se tasi na oo i ai se faalavelave matuiā ona o le aufaatasi ma aumea o le lalolagi, o Tina le afafine o Iakopo. Ua taʻu mai i le tala a le Kenese, na masani ona aufaatasi o ia ma teine talavou o Kanana i le vaipanoa sa nonofo ai lona aiga. E leʻi tutusa amioga a tagata Kanana ma tapulaa maualuga tau amio a tagata tapuaʻi o Ieova. Auā ua faaalia mai i mea na maua e tagata e suʻesuʻe i toega mea i le eleele, o amioga a tagata Kanana na tumu ai lo latou laueleele i le ifo i tupua, amioga lē mamā, tapuaʻiga matagā tau feusuaʻiga ma faiga sauā. (Eso. 23:23; Levi. 18:2-25; Teu. 18:9-12) Ia toe mafaufau i le  iʻuga o le auau faatasi o Tina ma nei tagata.

¹⁴ O se tagata o le nuu e igoa iā Sekema, ua faamatalaina o lē “ua sili le aga faatamālii i le aiga atoa o lona tamā,” na vaai iā Tina “ma mulimuli ane ona faamalosia ai lea o ia.” (Kene. 34:1, 2, 19) Pagā se mea a leaga! E lē taumate sa lilo i le manatu o Tina o le a tupu se mea faapena iā te ia. Atonu sa na ona fia faauō atu i talavou o ē sa manatu i ai o ni tama lelei. Ae na matuā faasesēina lava Tina.

¹⁵ O le ā se mea ua tatou iloa mai i lenei tala? E lē mafai ona tatou faifaimea faatasi ma ē e lē talitonu ma le faamoemoe e leai ni iʻuga leaga e oo i ai. Ua taʻu mai i le Tusi Paia “o aumea leaga e faaleagaina ai mea lelei ua masani ai tagata.” (1 Kori. 15:33) Ae peitaʻi, o se puipuiga le aufaatasi ma tagata e tutusa o outou talitonuga, a outou tapulaa maualuga tau amio ma lo outou alofa iā Ieova. O aufaatasiga lelei faapena, o le a uunaʻia ai outou e gaoioi ma le poto.—Faata. 13:20.

“Ua Faamamāina Outou”

16. O le ā na taʻua e Paulo e uiga i nisi i le faapotopotoga i Korinito?

¹⁶ E toʻatele tagata ua fesoasoani i ai le faapotopotoga Kerisiano ia faamamā mai i amioga leaga. Ina ua tusia e Paulo lana uluaʻi tusi i le faapotopotoga i Korinito, na ia taʻua suiga na faia e Kerisiano i inā, ina ia ola e ōgatusa ma tapulaa a le Atua. O nisi sa faitaaga, ifo i tupua, mulilulua, tauatane, gāoi, onanā ma faia isi mea faapena. Ae na faapea atu Paulo iā i latou: “Ua faamamāina outou.”—Faitau le 1 Korinito 6:9-11.

17. Ua faapefea ona suia le olaga o le toʻatele ona o le ola e tusa ma tapulaa a le Tusi Paia?

¹⁷ O tagata ua leai se faatuatua ua leai foʻi ni taʻiala e taʻitaʻia ai i latou. Ua filifili e i latou lava o latou ala, po ua lolo atu foʻi e fai amioga leaga, e pei ona faia e nisi i Korinito anamua a o leʻi avea ma tagata talitonu. (Efe. 4:14) Ae peitaʻi ua iai i le poto saʻo o le Afioga a le Atua ma lona finagalo, le mana e sui ai i le lelei olaga o i latou uma o loo faatatauina le Afioga o le Atua. (Kolo. 3:5-10; Epe. 4:12) Ua faamatala mai e le toʻatele o tagata i le faapotopotoga Kerisiano i aso nei, na ola i latou i ni olaga lē taupulea a o leʻi aʻoaʻoina ma mulimuli i tapulaa amiotonu a Ieova. Ae e leʻi faamalieina ma fiafia i latou. Na faatoʻā maua e i latou le toʻafilemu, ina ua aufaatasi ma tagata o le Atua ma ola e tusa ma tapulaa a le Tusi Paia.

18. O le ā le mea na tupu i se tasi o talavou, ma o le ā e faamaonia ai?

¹⁸ I aso ua tuanaʻi, o nisi na filifili e tuua o le faapotopotoga Kerisiano lea e pei o le ‘⁠vaega saogalemu o le sami, po o le aloalo,’ ae ua matuā salamō lava i le taimi nei ona o lenā faaiʻuga. Ua faamatala mai e se tasi tuafafine o le a faaigoa iā Tania e faapea “na ola aʻe o ia i le upu moni,” ae ina ua 16 ona tausaga, na ia tuua le faapotopotoga ae “saʻili i mea mananaia a le lalolagi.” O nisi o iʻuga na oo iā te ia, o se maʻitaga e leʻi manaʻomia ma le faapaʻū o lana pepe. Ua faapea mai nei o ia: “O le tolu tausaga na ou alu ese ai mai i le faapotopotoga, na matuā afāina ai oʻu faalogona ma e lē mafai ona galo. O se mea o loo mamafa pea iā te aʻu, o loʻu fasiotia lea o laʻu pepe e leʻi fanau mai. . . . Ou te fia taʻu atu i talavou uma o loo moomoo e fia ‘⁠tofo’ i le lalolagi, e tusa lava pe na o se taimi puupuu: ‘⁠Ia aua!’ Atonu o le a manaia i le taimi  muamua, ae e matuā oona lava i le taimi mulimuli. E na o le leaga e aumaia e le lalolagi. Ua ou iloa. Auā na ou tofo i ai. Ia nofo mau i le faalapotopotoga a Ieova! Ona pau lea o le auala e maua ai se olaga fiafia.”

19, 20. O le ā le puipuiga ua saunia e le faapotopotoga Kerisiano, ma e faapefea?

¹⁹ Seʻi tau ina manatu i le mea o le a oo iā te oe pe afai e te lafoaʻia le puipuiga malu a le faapotopotoga Kerisiano. E lē fia manatua e le toʻatele o latou olaga iʻuvale na iai a o leʻi talia le upu moni. (Ioa. 6:68, 69) E te maua pea le saogalemu ma le puipuiga mai i puapuaga ma mafatiaga, ua taatele i le lalolagi a Satani, e ala i le aufaatasi ma uso ma tuafāfine Kerisiano. O le aufaatasi ma i latou ma auai e lē aunoa i sauniga a le faapotopotoga, e faamanatu mai ai pea iā te outou le lelei o tapulaa amiotonu a Ieova, ma uunaʻia ai e ola e tusa ma na tapulaa. E tele māfuaaga e tatau ai ona outou ‘⁠faaneenee atu iā Ieova i totonu o le faapotopotoga tele,’ e pei ona faia e le faisalamo.—Sala. 35:18.

²⁰ Ae peitaʻi ona o māfuaaga eseese, e iai taimi e faigatā ai i Kerisiano uma ona tausisia lo latou faamaoni faa-Kerisiano. Atonu e manaʻomia ona faaali atu e se tasi iā i latou le auala saʻo e ui ai. O le ā le mea e mafai ona e faia, faapea ma le faapotopotoga atoa ina ia fesoasoani ai i uso talitonu i taimi faapena? O le a talanoaina i le mataupu e sosoo ai, le auala e mafai ai ona e ‘⁠fefaamāfanafanaaʻi pea ma atiaʻe’ ou uso.—1 Tesa. 5:11.

O le ā Lau Tali?

• O le ā ua tatou iloa mai i le mea na tupu i le tusitala o le Salamo e 73?

• O le ā se mea ua tatou iloa mai i le mea na tupu iā Tina?

• E faapefea ona outou maua le saogalemu i le faapotopotoga Kerisiano?

[Fesili mo le Suʻesuʻega]

[Ata i le itulau 7]

Aau i le mea e saogalemu ai; nofo mau i le faapotopotoga!