Lipoti o le Fonotaga Faaletausaga—Autasi i le Alofa

NA MATUĀ fiafia i latou na iai i le Maota Fono a Molimau a Ieova i le Aai o Jersey, i New Jersey i Amerika. I le taeao o le aso 3 o Oketopa 2009, e silia i le 5,000 ē na tauaofia ai mo le fonotaga faaletausaga lona 125, a le Watch Tower Bible and Tract Society of Pennsylvania. E faitau afe isi sa matamata i le polokalame, e ala i TV na taʻi atu i fale Peteli e tolu i Amerika, ma le Peteli i Kanata. I nei nofoaga, e 13,235 ē ua autasi i lo latou alofa iā Ieova, na olioli i le sauniga e tolu itula.

O Geoffrey Jackson o le Vaega Pule na avea ma taʻitaʻifono. Na ia amata le polokalame i le faailoa mai o se ʻaufaipese o tagata Peteli, o ē na usuina pese mai i la tatou tusi pese fou. O le isi sui o le Vaega Pule, o David Splane, na taʻitaʻia le ʻaufaipese ma talanoa puupuu i le tāua o musika i le tapuaʻiga mamā. Na valaaulia le aofia e usu ni pese fou se tolu; na usu muamua e le ʻaufaipese, ona usu faatasi lea e le ʻaufaipese ma le aofia. Sa faaaogā se ʻaufaipese mo na o lenei faatasiga faapitoa; ae e lē o se faiga e faataʻitaʻi i ai faapotopotoga, matagaluega ma itumalo.

Lipoti Mai i Lālā

O sui asiasi o Komiti o Lālā na faamatalaina ni lipoti mai i lālā e lima. Na taʻua e Kenneth Little, ua lē o toe umi ae amata ona lomia i Kanata le tele o mekasini mo Amerika ma Kanata, ma iʻu ai i se faatelega e faasefuluina lomiga e faia. Ina ia faataunuu lenei mea, o le a faaaogā ai se masini lomitusi fou mo le taʻi valu itula i le sifi, e 16 itula i le aso.

Na lipotia e Reiner Thompson le galuega o le Malo i Dominican Republic, ae faamatala e Albert Olih la tatou galuega i Nigeria. Na faamatala e Emile Kritzinger mai i Mozambique, ina ua mavae le faitau sefulu o tausaga o sauāga i inā, na lesitalaina ai faaletulafono Molimau a Ieova i le 1992. E leʻi leva talu ai nei na iai ni faatelega tetele o le ʻautalaʻi i nei atunuu e tolu. Na faamatala e Viv Mouritz mai i le lālā i Ausetalia, le agaʻi i luma o le galuega i Timoa i Sasaʻe, lea o loo vaaia e uso i Ausetalia.

O Komiti o le Vaega Pule

I le 1976, na tuu atu ai le vaavaaiga o galuega uma a Molimau a Ieova i komiti e ono o le Vaega Pule. Na mulimuli ane filifilia sui o le vasega o isi mamoe ina ia fesoasoani. I le taimi nei e toʻa 23 ē o loo fesoasoani i le galuega. E toʻaono ē na faatalanoa. E 341 le aofaʻi o tausaga o la latou auaunaga faataimi atoa, e tusa lea ma le 57 tausaga a le tagata e toʻatasi.

Na faamatala e Don Adams, o lē na sau i Peteli i le 1943, o le Komiti o Sooupu e faia aʻe i sooupu o isi komiti e lima, e faamautinoa ai le galulue soosootauʻau o ia komiti e lima. E gafa lenei komiti ma le vaaia o faalavelave matuiā faafuaseʻi, sauāga, mataupu taufaamasinoga, mala ma isi mataupu e aafia ai Molimau a Ieova i le lalolagi aoao.

Na faamatala e Dan Molchan le galuega a le Komiti o le ʻAufaigaluega, lea e vaavaaia le tulaga lelei faaleagaga ma le faaletino o tagata Peteli e 19,851 i le lalolagi aoao. Na taʻua e David Sinclair le auala e vaavaaia ai e le  Komiti Lomitusi, le faatauina mai o mea e manaʻomia ma meafaigaluega mo lālā. Ona faamatala lea e Robert Wallen, o lē ua toetoe 60 tausaga o galue i Peteli, le auala e vaavaaia ai e le Komiti o le Auaunaga le galuega a tagata o Ieova i le fanua ma faapotopotoga. Na taʻua e William Malenfant le fitā o le galuega a le Komiti Tauaʻoaʻoga, i le saunia o le polokalame o se tauaofiaga. Na faaiʻu i le faamatala e John Wischuk le auala o loo vaavaaia ai e le Komiti o Tusitusiga, le saunia lelei o mataupu mo a tatou lomiga. *

O le Alofa e Autū i ai le Mau o le Tausaga e 2010

O lauga e tolu na sosoo ai na fofogaina e sui o le Vaega Pule. Na amata e Gerrit Lösch i le fesili e faapea, “Pe e te manaʻo e alofagia oe e isi?” Na ia faamatala o le alofa o se uiga e manaʻomia e tagata, ma e tatou te fiafia uma i ai. Ua māfua ona tatou iai ona o le alofa, auā na faia i tatou e Ieova ona o lona alofa tele. O le uunaʻiga autū o la tatou talaʻiga ma le aʻoaʻo atu, o le alofa iā Ieova.

O le alofa e faavae i mataupu silisili, e faaali atu e lē na o o tatou tuaoi a o fili foʻi. (Mata. 5:43-45) Na faalaeiau le aofia ia manatunatu i puapuaga o Iesu ona o i tatou, le sasaina, tauemua, tuufeanu i ai ma tuia. E ui i nei mea, ae na ia tatalo mo fitafita na faatautauina o ia. Pe e lē atili ai ea ona tatou alolofa iā te ia ona o lenei mea? Ona faasilasila mai lea e le uso o Lösch le mau o le tausaga e 2010: 1 Korinito 13:7, 8, ‘O le alofa, e tumau i mea uma. E lē uma le alofa.’ E lē gata ua tatou maua le faamoemoe e ola e faavavau, ae ia alolofa atu foʻi ma alofagia e faavavau.

Po ua Tau Uma le Penisini o Lau Taavale?

Na amata le lauga a Samuel Herd i se talafaatusa. Seʻi faapea ua ave oe e sau uō e tiʻetiʻe mo se malaga e 30 maila. A o e tiʻetiʻe i le taavale, ua e iloa ai ua laʻitiiti le penisini, ma ua e taʻu atu i lau uō. Ua ia faapea mai e aua le popole, o loo iai le isi kalone penisini i le tane. E leʻi umi ae uma le penisini. Pe e talafeagai la ona alu pea a ua laʻitiiti le penisini, ma le iloa e pē le taavale i se mea o le auala? E sili ona lelei pe a faatumu pea le tane! I se uiga faafaatusa, e manaʻomia ona faatumu pea le tane penisini, o lo tatou poto lea e uiga iā Ieova.

O lea, e manaʻomia ona utu pea e lē aunoa la tatou penisini. E fā auala e tatou te faia ai faapea. Muamua, o au lava suʻesuʻega, ia iloa lelei le Tusi Paia e ala i le faitau i ai i aso taʻitasi. E tatau ona tatou malamalama i mea o faitauina, ae e lē o le tau ina faitau o upu.  Lua, ia faaaogā lelei le afiafi o le Tapuaʻiga a le Aiga. Pe e taʻi vaiaso ma faatumu la tatou tane, pe e na ona utu i ai o sina penisini? Tolu, auai i suʻesuʻega ma sauniga a le faapotopotoga. Fā, ia iai se nofoaga toʻafilemu e manatunatu loloto ai ma mafaufau i ala o Ieova. Ua taʻua i le Salamo 143:5: “Ou te manatua aso anamua; na ou mafaufau loloto ai i au galuega uma lava.”

‘E Susulu Atu Ē e Amiotonu’

O John Barr na faia le lauga lona tolu, ma o le lauga faaiʻu lea, na faamatala ai le talafaatusa a Iesu i le saito ma vao leaga. (Mata. 13:24-30, 38, 43) E faasino atu lenā talafaatusa i se “seleselega” i le taimi e aoao ai ‘atalii o le malo,’ ae aveese vao leaga e susunu.

Na taʻua e le uso o Barr, e lē faavavau ona faia lenā aoaoina. Sa ia faasino atu i le Mataio 24:34 lea e faapea mai: “E lē mavae atu lenei tupulaga seʻia taunuu nei mea uma.” E faalua ona ia faitau le manatu lenei: “E manino na uiga Iesu e faapea, o nisi o le vaega faauuina na ola i le taimi na amata ai ona iloa le faailoga i le 1914, o le a ola pea mo se taimi faatasi ma nisi o le vaega faauuina, o ē o le a vāai i le amataga o le puapuaga tele.” E tatou te lē iloa tonu le umi o le taimi o “lenei tupulaga,” ae e aofia ai vaega nei e lua o ē e ola faatasi mo se taimi. E ui e eseese le matutua o le ʻaufaauuina, ae ua faia aʻe lenei tupulaga i sui o nei vaega e lua, o ē e ola faatasi mo se taimi a o faagasolo aso e gata ai. O se faamāfanafanaga le iloa, e lē o le ʻaufaauuina talavou uma, o ē na ola faatasi mo se taimi ma le ʻaufaauuina matutua, ia na iloa le faailoga ina ua amata i le 1914, o le a maliliu a o leʻi amataina le puapuaga tele.

O loo faatalitali ma le naunau atu “atalii o le malo” i lo latou taui i le lagi, ae e tatau iā i tatou uma ona tumau i le faamaoni ma susulu atu seʻia oo i le iʻuga. Maʻeu se faaeaga o le vāai i le aoaoina o le “saito” i o tatou aso.

Ina ua uma le pese faaiʻu, ona faia lea e Theodore Jaracz o le Vaega Pule le tatalo faaiʻu. Na avea le polokalame o le fonotaga faaletausaga ma mea e atiaʻe ai!

[Faaopoopoga i lalo]

[Pusa i le itulau 5]

LE AʻOGA MO TOEAINA

I le fonotaga faaletausaga, na faalauiloa ai e Anthony Morris, o se sui o le Vaega Pule, o le a faaauau ona iai ni toleniga mo toeaina o le faapotopotoga. Na amata se aʻoga mo toeaina i Amerika i le amataga o le 2008, i le nofoaga autū tau aʻoaʻoga i Patterson, Niu Ioka. O lea faatoʻā uma le vasega lona 72, ma e 6,720 toeaina na toleniina ai. E tele mea o loo manaʻomia pea ona fai. I Amerika lava ia, e silia i le 86,000 toeaina. O lea, na fuafua ai e le Vaega Pule se isi aʻoga e faia i Brooklyn, i Niu Ioka, na amata iā Tesema 7, 2009.

E lua masina e toleni ai i Patterson ni ovasia femalagaaʻi se toʻafā, e avea ma faiaʻoga. Ona siitia atu lea o i latou nei i Brooklyn e aʻoaʻo ai, ma toleni ai foʻi le isi toʻafā. Ona avea lea o le toʻafā mulimuli ma faiaʻoga i Brooklyn, ae o le toʻafā muamua o le a ō atu e aʻoaʻo i aʻoga i Maota Fono ma Maota mo Sauniga. E faia pea lenei mea seʻia maua ni faiaʻoga se toʻa 12, e aʻoaʻo i aʻoga e ono i le faa-Peretania i vaiaso taʻitasi i Amerika. E toʻafā faiaʻoga o le a toleniina e aʻoaʻo i le gagana Sepania. E lē suia e lenei aʻoga le Aʻoga o le Faiva o le Malo o loo iai nei; o le fuafuaga ia fesoasoani i toeaina e agaʻigaʻi atili i luma faaleagaga. O le a amata e lālā i le lalolagi aoao ona faia aʻoga i Maota Fono ma Maota mo Sauniga, i le tausaga faaleauaunaga e 2011.

[Ata i le itulau 4]

Na amata le fonotaga faaletausaga i le usuina o pese mai i le tusi pese fou