“Aua E te Fefe. Ou te Fesoasoani iā te Oe”

SA LAPATAʻIA e Iesu ona soo: “E faaauau ona lafoina e le Tiapolo nisi o outou i le falepuipui, ma e matuā tofotofoina ai outou.” A o leʻi avatua lenā lapataʻiga, na taʻua e Iesu: “Aua e te fefe i mea o le a e tigā ai.” Ona o loo faaauau pea ona faaaogā e Satani le faafalepuipuiina o le ʻauuso o se auala e taofia ai le talaʻia o le Malo, e ono sauāina moni ai lava e nisi malo Kerisiano moni. (Faaa. 2:10; 12:17) O lea, o le ā o le a fesoasoani iā i tatou e sauniuni ai i faufauga a Satani ma ‘⁠aua le fefe’ e pei ona timaʻi mai ai Iesu?

O le toʻatele o i tatou, e iai taimi e lagona ai le fefe. Ae ua faamautinoa mai e le Afioga a le Atua, e mafai ona tatou ʻalofia le lolo atu i le fefe e ala i le fesoasoani a Ieova. E faapefea? O se tasi o auala ua fesoasoani mai ai Ieova e sauniunia ai i tatou e taulima teteega, o le iloa lea o metotia o loo faaaogā e Satani ma ona sui. (2 Kori. 2:11) Ina ia faataʻitaʻia lenei tulaga, seʻi o tatou iloiloina se mea na tupu i taimi o le Tusi Paia. O le a tatou iloiloina foʻi ni faaaʻoaʻoga faaonapōnei o uso talitonu faamaoni o ē na “tutū mausalī e tetee atu i togafiti a le Tiapolo.”—Efe. 6:11-13.

Feagai se Tupu e Mataʻu i le Atua ma se Tupu Leaga

I le senituri lona valu T.L.M., na faasolosolo ona faatoʻilalo e Sanerivi le Tupu leaga o Asuria i isi malo. Ona o lona mautinoa naʻuā, na ia fuafua ai loa e liliu ane i tagata o Ieova ma lo latou laumua o Ierusalema, lea o loo pulea e le tupu e mataʻu i le Atua o Esekia. (2 Tu. 18:1-3, 13) E lē masalomia sa faaaogā e Satani le tulaga o mea na iai e faaosofia ai Sanerivi e faataunuu lana fuafuaga, ia tafiesea ai le tapuaʻiga moni mai le lalolagi.—Kene. 3:15.

Na auina atu e Sanerivi ni sui ma se aveaʻi i Ierusalema, ma faatonu i latou e siilima ane. O se tasi o sui na alu atu ai o Ravesaki o lē na avea ma fofoga fetalai sili a le tupu. * (2 Tu. 18:17) O le sini o Ravesaki, o le faalotovaivai lea o tagata Iutaia ma siilima ane e aunoa ma se taua. O ā metotia na faaaogā e Ravesaki e faafefe ai tagata Iutaia?

Faatuatua e ui Ina Tuua Toʻatasi

Na fai atu Ravesaki i sui o Esekia: “O le mea lenei ua fai mai ai le tupu sili, le tupu o Asuria: ‘O le ā lenei faatuatuaga ua e faatuatua i ai? Faauta! ua e faatuatua i le lagolagosua a lenei ū ua nutililii o Aikupito, lea afai e totoo i ai se tagata, e tuia lava lona lima ma ati ai.’” (2 Tu. 18:19, 21) Sa sesē le tuuaʻiga a Ravesaki, auā e leʻi faia e Esekia se sootaga ma Aikupito. Ua  faailoa mai i le tuuaʻiga a Ravesaki lona manaʻo i tagata Iutaia ia latou manatua lelei e faapea, e leai se tasi o le a fesoasoani iā i latou. Ua tuua na o i latou.

I tausaga e leʻi mamao tele atu, sa faapena foʻi ona taumafai fili o le tapuaʻiga moni e faaaogā le fefe i le tuua toʻatasi, e faafefe ai Kerisiano moni. Sa faamatala e se tuafafine Kerisiano na falepuipui ona o lona talitonuga, ma tuuesea ai mai le ʻauuso mo le tele o tausaga, le mea na fesoasoani iā te ia ia lē lolo atu ai i le fefe. Na ia faapea mai: “Sa fesoasoani le tatalo ou te mafuta vavalalata atu ai iā Ieova . . . Na ou manatua le faamautinoaga o loo i le Isaia 66:2 faapea, e silasila le Atua i lē ‘⁠ua mafatia ma nutimomomo lona agaga.’ Na avea pea na upu ma puna o le malosi ma faalaeiauga sili iā te aʻu.” O le faamatalaga lenei a se uso na loka toʻatasi mo le tele o tausaga: “Na iʻu ina ou manatu e faapea, o le sela laʻitiiti faatafafā na loka ai aʻu, e mafai ona pei o se vateatea telē pe a olioli se tasi i se faiā vavalalata ma le Atua.” Ioe, o le iai o se faiā vavalalata ma Ieova, na maua ai e nei Kerisiano le malosi e manaʻomia e feagai ai ma le tuua toʻatasi. (Sala. 9:9, 10) Sa mafai e ē na faasauā ona tuuesea i laʻua mai i o la aiga, uō, ma uso talitonu, peitaʻi na iloa e Molimau sa faafalepuipui e lē mafai e nei tagata tetee ona tuueseina i laʻua mai iā Ieova.—Roma 8:35-39.

E maʻeu la le tāua o lo tatou faaaogā o avanoa uma e maua e faamalosia ai la tatou faiā ma Ieova! (Iako. 4:8) Ia fesili ifo pea iā i tatou: ‘O le ā le moni o Ieova iā te aʻu? Po o aafia loloto ea aʻu i ana afioga a o faia aʻu filifiliga i aso taʻitasi pe itiiti pe telē?’ (Luka 16:10) E leai se māfuaaga e tatou te fefefe ai, pe afai tatou te tauivi e tausia la tatou faiā vavalalata ma Ieova. Na tautala le perofeta o Ieremia, e fai ma sui o tagata puapuagatia o Iutaia: “Ieova e, na ou valaau atu i lou suafa mai i se lua e matuā maulalo lava . . . Na e faalatalata mai i le aso na ou valaau atu ai pea iā te oe. Na e fetalai mai: ‘Aua e te fefe.’”—Aue. 3:55-57.

Lē Taulau se Faufauga

Sa faaaogā e Ravesaki ni faamatalaga e faatogafiti ona fai, ina ia faatupu ai le masalosalo i loto o tagata. Fai mai o ia: “Pe e lē o [Ieova] ea e ona mea maualuluga ma fata faitaulaga na aveesea e Esekia? . . . O Ieova lava ia na fetalai mai iā te aʻu, ‘Ia e alu aʻe e tau ma lenei atunuu, ma faaumatia ai.’” (2 Tu. 18:22, 25) Sa finau mai Ravesaki, o le a lē tau Ieova mo Ona tagata ona ua Ia lē fiafia iā i latou. Ae lē o le mea moni lenā. Sa fiafia Ieova iā Esekia ma tagata Iutaia na toe foʻi i le tapuaʻiga moni.—2 Tu. 18:3-7.

E faaaogā e tagata faasauā i aso nei, ni faamatalaga moni e fuafua ina ia iai ni manatu e ioe faatasi i ai, ae faatogafiti ona tuu i ai ma faamatalaga pepelo e fuafua e faatupu ai masalosaloga. O se faataʻitaʻiga, na iai taimi na taʻu atu ai i uso ma tuafāfine na faafalepuipui ua faamaamulu se uso na taʻimua iā i latou i lo latou atunuu, ma atonu e lē afāina foʻi lo latou faia faapea ma lafoaʻi loa la latou taʻutinoga. E ui i lea, e leʻi mafai e na faamatalaga ona faatupu ai se masalosalo i Kerisiano o ē na iai le faautaga poto.

Manatu i le mea na tupu i se tuafafine Kerisiano i le taimi o le Taua Lona Lua a le Lalolagi. A o iai i le falepuipui, na faaali atu iā te ia se faamatalaga tusitusia e faailoa ai le lafoaʻia e se uso na taʻimua o lona talitonuga. Sa  fesiligia o ia pe talitonu i lenā Molimau. Na tali le tuafafine, “O [le uso] o se tagata lē lelei atoatoa.” Sa ia toe faapea atu, o le umi lava na usitaʻia ai e le uso taʻiala o le Tusi Paia, o le umi foʻi lenā na faaaogā ai o ia e le Atua. “Ae ona ua lē ōgatusa ma le Tusi Paia lana faamatalaga, ua lē o toe avea nei o ia ma oʻu tuagane faaleagaga.” Na mulimuli ma le poto lenā tuafafine i fautuaga a le Tusi Paia: “Aua tou te faatuatua atu i tamālii, po o le fanau a tagata e lē o iai se faaolataga.”—Sala. 146:3.

O le mauaina o le poto saʻo o le Afioga a le Atua ma faatatauina fautuaga o iai, e fesoasoani iā i tatou e leoleo ai faasaga i faamatalaga e faatogafiti ona fai, lea e faavaivaia ai la tatou filifiliga e tumau. (Efe. 4:13, 14; Epe. 6:19) Ina ia sauniunia la i tatou e mafaufau lelei pe a feagai ma omiga, e ao ona ave la tatou faamuamua i le faitauina o le Tusi Paia i aso taʻitasi, ma suʻesuʻega a le tagata lava ia. (Epe. 4:12) Ioe, o le taimi lenei e faateleina ai lo tatou poto ma faamalosia lo tatou faatuatua. Na faapea mai se uso sa onosaia le lokaina toʻatasi o ia mo le tele o tausaga: “Ou te manaʻo e faalaeiau tagata uma ina ia faaalia le matuā talisapaia o meaʻai faaleagaga uma ua aumaia mo i tatou, auā tatou te lē iloa le auala e aogā ai iā i tatou.” O le mea moni, afai tatou te suʻesuʻe ma le faaeteete le Afioga a le Atua ma lomiga ua saunia e le vasega o le pologa i aso nei, o le a ‘⁠faamanatu mai i o tatou mafaufau’ e le agaga paia mea na tatou aʻoaʻoina pe a feagai ma taimi faigatā o le olaga.—Ioa. 14:26.

Leoleo Faasaga i le Taufaamataʻu

Sa taumafai Ravesaki e faafefe tagata Iutaia i le faapea mai: “Ia fai se petipetiga ma loʻu alii le tupu o Asuria, ona ou avatu lea iā te oe o solofanua e lua afe, ma iloa ai pe e mafai ona e tuu i ai ni tagata tiʻetiʻe. E faapefea ona e tulia se kovana o se tasi o auauna e sili ona faatauvaa a loʻu alii?” (2 Tu. 18:23, 24) I le manatu faaletagata e matuā lē mafai lava e Esekia ma ona tagata ona tū e tetee faasaga i le mataʻutia o le fitafita a Asuria.

E mafai foʻi ona foliga malolosi tele tagata faasauā i aso nei, aemaise lava pe afai o loo lagolagoina e le Malo. O le tulaga lenā na iai tagata faasauā a Nasi i le taimi o le Taua Lona Lua a le Lalolagi. Sa latou taumafai e faafefe le toʻatele o auauna a le Atua. Sa faamatala mulimuli ane e se tasi o tatou uso sa i le falepuipui mo le tele o tausaga, le auala na faafefe ai o ia. I se tasi taimi, na fesili atu se taʻitaʻiʻau iā te ia: “Sa e vaai i le fanaina o lou uso? O le ā se lesona mo oe?” O lana tali: “O aʻu o se Molimau mo Ieova ma ou te tumau pea i ai.” Na taumafai e faafefe aʻu i le faapea mai, “O lona uiga o oe le isi lea o le a sosoo.” E ui i lea, sa tū mausalī lo tatou uso ma na muta ai i inā a latou taumafaiga. O le ā na mafai ai ona ia fesagaʻia lenā faamataʻuga? O lana tali: “Ou te faatuatua i le suafa o Ieova.”—Faata. 18:10.

O le faatuatua atoatoa iā Ieova, ua tatou tauaveina ai se talita telē e puipuia ai mai mea uma e faaaogā e Satani e faaleagaina ai i tatou faaleagaga. (Efe. 6:16) E lelei foʻi ona ōle atu iā Ieova e fesoasoani e faamalosia lo tatou faatuatua. (Luka 17:5) E manaʻomia foʻi ona tatou faaaogā lelei faatulagaga mo le faamalosia o le faatuatua ua saunia mai e le vasega o le pologa faamaoni. Pe a feagai ma ni faamataʻuga, e tatou te lototele pe a manatua le faamautinoaga a Ieova na avatu i le perofeta o Esekielu, o lē na feagai ma tagata ulu malō. Na taʻu atu e Ieova iā te ia: “Ua ou faia ou foliga ia malō e pei o o latou foliga, ma lou muāulu ia malō e pei o o latou muāulu. Ua ou faia lou muāulu e pei o se taimane, ia sili ona malō nai lo o se maa malō.” (Eseki. 3:8, 9) Pe a manaʻomia, e mafai ona fesoasoani Ieova ia avea i tatou e pei o se taimane malō e pei ona ia faia iā Esekielu.

Teena Faaosoosoga

Ua iloa e tagata tetee, afai e lē taulau isi togafitiga uma, i nisi taimi, e mafai ona lafoaʻia le faamaoni o se tasi pe a tofotofoina i le mauaina o ni faamanuiaga. Sa faaaogā foʻi e Ravesaki lenei auala. Na fai atu o ia iā i latou i  Ierusalema: “O le mea lenei ua fai mai ai le tupu o Asuria: ‘Ia lolo mai iā te aʻu, ma ō mai iā te aʻu, . . . seʻia ou alu atu ma ave outou i le laueleele e pei o lo outou lava laueleele, o le laueleele o saito ma uaina fou, o le laueleele o falaoa ma togāvine, o le nuu o laau o le olive ma le meli; ma ola ai pea outou ae e lē feoti.’” (2 Tu. 18:31, 32) O le faamoemoe e aai i ni falaoa fou ma inu se uaina fou, na matuā ese le faatosina iā i latou sa i totonu o le pā o le aai lea ua vagaia e le ʻautau!

Sa faaaogā lenei auala e faavaivaia ai le faamaoni o se misionare sa falepuipui. Sa taʻu atu iā te ia, mo le ono masina o le a ave o ia e nofo i se “fale manaia” e iai se “togālaau matagofie,” e mafaufau ai. Peitaʻi, na filifili le uso e tumau i lona faatuatua ma lē lafoaʻia ai taʻiala faa-Kerisiano. O le ā sa fesoasoani iā te ia? Na ia faamatala mulimuli ane: “Sa ou mafaufau pea i le Malo o lea le faamoemoe moni. . . . O le faamalosia i le poto e faatatau i le Malo o le Atua, ma le mautinoa atoatoa i ai, sa leʻi mafai ai ona latou aveesea loʻu faamaoni.”

O le ā le moni o le Malo o le Atua iā i tatou? O le augātamā o Aperaamo, le aposetolo o Paulo, ma Iesu lava ia, sa mafai ona latou onosaia puapuaga faigatā, ona o le moni o le Malo o le Atua iā i latou. (Fili. 3:13, 14; Epe. 11:8-10; 12:2) O le faaauau ona faamuamua o le Malo i o tatou olaga, ma teu i manatu faamanuiaga e faavavau, o le a mafai ai ona tatou teena tofotofoga e talia se ofo mo se mapusaga e na o sina taimi e aogā ai.—2 Kori. 4:16-18.

E Lē Tuulafoaʻia i Tatou e Ieova

E ui i taumafaiga uma a Ravesaki e faafefe tagata Iutaia, ae na tumau pea ona faalagolago atu Esekia ma ona tagata iā Ieova. (2 Tu. 19:15, 19; Isa. 37:5-7) Na tali Ieova i a latou tatalo mo se fesoasoani, e ala i le auina ane o se agelu e fasioti tagata totoa e 185,000 i le pō e tasi i le nofoaga sa tolauapi ai ʻau a Asuria. I le aso na sosoo ai, sa faanatinati atu Sanerivi ma le māsiasi tele i lona laumua o Nineva, ma se vaega toʻaitiiti o lana vaegaʻau na totoe.—2 Tu. 19:35, 36.

E manino lava, e leʻi tuulafoaʻia e Ieova i latou na faalagolago atu iā te ia. O faaaʻoaʻoga i aso nei o tatou uso ma tuafāfine na tumau i puapuaga, e faaalia ai o loo faapena foʻi ona faia e Ieova i aso nei. E iai la māfuaaga lelei, ua faamautinoa mai ai e lo tatou Tamā o i le lagi e faapea: “O aʻu o Ieova lou Atua, o loo uuina lou lima taumatau, o Lē e fai atu iā te oe, ‘Aua e te fefe. Ou te fesoasoani iā te oe.’”—Isa. 41:13.

[Faaopoopoga i lalo]

[Faamatalaga faaopoopo i le itulau 13]

E silia i le 30 taimi i lana Afioga, na faamautinoa mai ai e Ieova lava ia ana auauna e faapea: “Aua e te fefe”

[Ata i le itulau 12]

Na faapefea ona tutusa faufauga a Ravesaki ma faufauga a fili o tagata o le Atua i aso nei?

[Ata i le itulau 15]

O se faiā vavalalata ma Ieova e faatumauina ai lo tatou faamaoni i taimi o puapuaga