“E Suʻesuʻe le Agaga i . . . Mea Loloto a le Atua”

“E suʻesuʻe le agaga i mea uma, e oo lava i mea loloto a le Atua.”—1 KORI. 2:10.

1. O le ā le vaega a le agaga paia o loo faamatilatila mai e Paulo i le 1 Korinito 2:10, ma o ā fesili ua lāgā?

MAʻEU lo tatou lotofaafetai ona o le gaoioiga a le agaga paia o Ieova! Ua taʻua i le Tusi Paia le agaga o se fesoasoani, o se meaalofa, o se molimau, ma o le fautua mo i tatou. (Ioa. 14:16; Galu. 2:38; Roma 8:16, 26, 27) Na faamatilatila e le aposetolo o Paulo le isi vaega tāua ua faia e le agaga paia: “E suʻesuʻe le agaga i mea uma, e oo lava i mea loloto a le Atua.” (1 Kori. 2:10) Ioe, e faaaogā e Ieova lona agaga paia e faailoa mai ai upu moni loloto faaleagaga. Pe a aunoa ma lenei fesoasoani, o le a faigatā ona tatou malamalama i le finagalo o Ieova. (Faitau le 1 Korinito 2:9-12.) Peitaʻi, ua lāgā ai ni fesili: E faapefea ona ‘suʻesuʻe le agaga i mea loloto a le Atua’? O ai na ala mai ai ona faaalia mai e Ieova nei mea i le uluaʻi senituri T.A.? E faapefea ma e ala iā te ai, ua suʻesuʻe ai le agaga i nei mea loloto i o tatou aso?

2. O ā vala e lua o le a galue ai le agaga?

² Na faaalia e Iesu vala e lua o le a galue ai le agaga. A o leʻi maliu o ia, na ia taʻu atu i ona aposetolo: “O le fesoasoani, o le agaga paia lea e auina mai e le Tamā i loʻu igoa, e aʻoaʻo iā te outou i mea uma, ma faamanatu atu i o outou mafaufau mea uma na ou taʻu atu.” (Ioa. 14:26) O lona uiga, e galue le agaga paia o se aʻoaʻo ma o se faamanatu. I le avea o se aʻoaʻo, e fesoasoani le agaga paia i Kerisiano e iloa ai mea e leʻi malamalama  muamua i ai. I le avea o se faamanatu, e fesoasoani iā i latou e manatua ma faatatauina saʻo mea na aʻoaʻoina.

I le Uluaʻi Senituri

3. O ā upu a Iesu na faaalia ai o le a faasolosolo ona faailoa mai “mea loloto a le Atua”?

³ Na aʻoaʻo e Iesu ona soo i le tele o upu moni na fou iā i latou. Ae peitaʻi, o loo tele pea mea e tatau ona latou aʻoaʻoina. Na taʻu atu e Iesu i aposetolo: “E tele mea ou te fia taʻu atu iā te outou, ae e lē mafai ona outou malamalama i na mea uma i le taimi nei. Ae peitaʻi, pe a oo mai lenā fesoasoani, o le agaga lea o le upu moni, ona ia taʻitaʻi lea iā te outou i upu moni uma.” (Ioa. 16:12, 13) O lea, na faaalia ai e Iesu, o le a faasolosolo ona faailoa mai mea loloto faaleagaga e ala i le agaga paia.

4. I le aso o le Penetekoso 33 T.A., na faapefea ona galue le agaga paia o se aʻoaʻo ma o se faamanatu?

⁴ I le aso o le Penetekoso 33 T.A., na liligi ifo ai ‘⁠le agaga o le upu moni’ i Kerisiano e tusa ma le 120 sa potopoto i Ierusalema. Sa vāai ma faalogo i faamaoniga o lenei mea. (Galu. 1:4, 5, 15; 2:1-4) Na tautatala le ʻausoo i gagana eseese e uiga i “mea matagofie a le Atua.” (Galu. 2:5-11) Ua oo i le taimi e faaalia ai se mea fou. Na valoia e le perofeta o Ioelu lenei liligiina ifo o le agaga paia. (Ioe. 2:28-32) Na molimau ē na vaavaai ane i le faataunuuga o lenei mea i se auala e latou te leʻi faatalitalia, ma na taʻimua le aposetolo o Peteru i le faamatalaina o lenei mea na tupu. (Faitau le Galuega 2:14-18.) O lenei auala na galue ai le agaga paia o se aʻoaʻo, i le faamanino atu iā Peteru e faapea, o le mea na tupu i le ʻausoo na faataunuuina ai lenā valoaga anamua. Na gaoioi foʻi le agaga paia o se faamanatu, auā na sii mai e Peteru le valoaga a Ioelu faapea salamo e lua a Tavita. (Sala. 16:8-11; 110:1; Galu. 2:25-28, 34, 35) O mea na vāai ma faalogo i ai i latou uma na faapotopoto ai, e moni o mea loloto a le Atua.

5, 6. (a) Ina ua mavae le Penetekoso 33 T.A., o ā fesili tāua e uiga i le feagaiga fou na manaʻomia ona taliina? (e) O ai na auala mai ai mataupu na lāgā, ma na faapefea ona faia faaiʻuga?

⁵ E tele pea mataupu sa manaʻomia ona faamanino atu i Kerisiano o le uluaʻi senituri. O se faaaʻoaʻoga, sa iai ni fesili e uiga i le feagaiga fou lea na faamamaluina i le aso Penetekoso. Pe e na o tagata Iutaia ma ē na liliu i le lotu Iutaia na iai i le feagaiga fou? Pe na aofia ai ma tagata o Nuu Ese, ma faauuina i latou i le agaga paia? (Galu. 10:45) Pe na tatau ona peritomeina muamua tane o Nuu Ese ma mulimuli i le Tulafono a Mose? (Galu. 15:1, 5) Sa tāua tele nei fesili. Sa manaʻomia le agaga o Ieova e suʻesuʻe ai i nei mea loloto. Ae o ai e ala mai ai ona galue le agaga?

⁶ O uso taʻimua, na lāgā mataupu taʻitasi e talanoaina. Na iai Peteru, Paulo ma Panapa i lenā fono a le vaega pule, ma na latou faamatala le auala na feutagaʻi ai Ieova ma tagata o Nuu Ese e leʻi peritomeina. (Galu. 15:7-12) Ina ua uma ona iloiloina lenei faamaoniga faatasi ai ma mea o taʻua i Tusitusiga Eperu atoa ai ma le fesoasoani a le agaga paia, na faia ai e le vaega pule se faaiʻuga. Ona latou faailoa atu lea o lenā faaiʻuga i faapotopotoga e ala i tusi.—Faitau le Galuega 15:25-30; 16:4, 5; Efe. 3:5, 6.

7. O le ā le auala na faaalia mai ai upu moni loloto?

⁷ O le tele o isi mataupu na faamanino mai e ala i tusitusiga faagaeeina a Ioane, Peteru, Iakopo ma Paulo. Ae ina ua māeʻa ona tusia Tusitusiga Kerisiano, ona muta ai lea o meaalofa e fai ai valoaga ma le poto ua faaalia mai i vavega. (1 Kori. 13:8) Po o le a faaauau ona galue le agaga o se aʻoaʻo ma o se faamanatu? Po o le a faaauau ona fesoasoani i Kerisiano e suʻesuʻe i mea loloto a le Atua? Na faaalia i valoaga o le a faia faapea.

 I le Taimi o le Iʻuga

8, 9. O ai ē e iai le tofā mamao faaleagaga, o le a “susulu atu” i le taimi o le iʻuga?

⁸ Na valoia e se agelu e faatatau i le taimi o le iʻuga: “O ē ua iai le tofā mamao, o le a susulu atu e pei o le malamalama o le vanimonimo, o i latou foʻi ua faaliliu ai tagata e toʻatele i le amiotonu e pei o fetu i aso uma lava e oo i le faavavau. . . . Ma o le a faatuputeleina le poto saʻo.” (Tani. 12:3, 4) O ai ē o le a iai le tofā mamao ma o le a susulu atu? Na faailoa mai e Iesu le tali i lana talafaatusa e uiga i le saito ma vao leaga. Na ia taʻua e faatatau i le “taufaaiʻuiʻuga . . . o le faiga o mea a le lalolagi” e faapea: “I lenā taimi e susulu atu ai o ē e amiotonu, e pei o le malamalama o le lā i le malo o lo latou Tamā.” (Mata. 13:39, 43) Na faailoa mai ai e Iesu “ē e amiotonu,” o “atalii o le malo,” po o Kerisiano faauuina.—Mata. 13:38.

⁹ Po o le a “susulu atu” Kerisiano faauuina uma? Ioe, auā o le a auai Kerisiano uma i le talaʻiga, le faia o isi ma soo, ma le atiina aʻe o isi i sauniga. O le a faia e le ʻaufaauuina le faaaʻoaʻoga. (Saka. 8:23) E lē gata i lea, o le a faaalia foʻi mea loloto i le taimi o le iʻuga. Na “faamauina” le valoaga na tusia e Tanielu seʻia oo i lenā taimi. (Tani. 12:9) E faapefea,  ma o ai o le a auala mai ai ona suʻesuʻe e le agaga nei mea loloto?

10. (a) E ala iā te ai ua faaalia mai ai e le agaga upu moni loloto i aso e gata ai? (e) Faamatala pe na faapefea ona faamanino mai upu moni e uiga i le malumalu sili faaleagaga o Ieova.

¹⁰ Pe a oo ina faamaninoina se mataupu faaleagaga i o tatou aso, e fesoasoani le agaga paia i sui taʻimua o le “pologa faamaoni ma le faautauta” o loo i le ofisa ulu, ina ia malamalama i upu moni loloto e leʻi manino muamua. (Mata. 24:45; 1 Kori. 2:13) E iloilo faatasi e le Vaega Pule pe manaʻomia ona fai ni suiga i nisi o malamalamaga. (Galu. 15:6) Ona fai lea o la latou faaiʻuga, ma pe a talafeagai ona lomia lea ma faasalalau ina ia maua e tagata uma aogā. (Mata. 10:27) A o faagasolo taimi, atonu e manaʻomia nisi faamalamalamaga atili, ma o le a faamatala lelei mai foʻi nei mea.—Tagaʻi i le pusa  “Ua Faamalamalama e le Agaga le Uiga o le Malumalu Faaleagaga.”

Aogā e Maua Mai i le Agaga i Aso Nei

11. E faapefea ona aogā i Kerisiano uma i aso nei, le galuega a le agaga paia o le faailoa mai o mea loloto a le Atua?

¹¹ E maua e Kerisiano faamaoni uma aogā mai i le galuega a le agaga paia o le faailoa mai o mea loloto a le Atua. Ua pei i tatou i aso nei o Kerisiano i le uluaʻi senituri, e tatou te suʻesuʻe ona toe manatua lea ma faatatau mea ua fesoasoani mai le agaga paia e tatou te malamalama ai. (Luka 12:11, 12) E lē tau tulia ia lelei ni a tatou aʻoaʻoga, ina ia malamalama ai i upu moni loloto faaleagaga ua aumaia. (Galu. 4:13) E faapefea ona faaleleia lo tatou malamalama i mea loloto a le Atua? Seʻi iloilo ni nai fautuaga nei.

12. O fea le taimi e tatau ona tatou tatalo atu ai mo le agaga paia?

¹² Ia tatalo mo le agaga paia. A o leʻi suʻesuʻeina mataupu faale-Tusi Paia, e tatau ona tatou muaʻi tatalo i le agaga paia e taʻitaʻia i tatou. E faapena foʻi pe a na o i tatou pe puupuu le taimi e suʻesuʻe ai. O ia talosaga ma le lotomaulalo e mautinoa o le a fiafia ai le finagalo o lo tatou Tamā o i le lagi. E pei ona taʻua e Iesu, e matuā foaʻi mai e Ieova lona agaga paia pe a tatou talosaga atu ma le faamaoni iā te ia.—Luka 11:13.

13, 14. E faapefea ona aogā le sauniuni mo sauniga ina ia malamalama ai i mea loloto a le Atua?

¹³ Ia sauniuni mo sauniga. Ua tatou maua “meaʻai i le taimi tatau” e ala mai i le vasega o le pologa. Ua faatino e le “pologa” lona tofiga i le aumaia o mataupu faale-Tusi Paia, ma faatulaga polokalame mo suʻesuʻega ma sauniga. E iai māfuaaga lelei ua fautuaina ai “le ʻauuso atoa” e talanoaina na mataupu. (1 Pete. 2:17; Kolo. 4:16; Iuta 3) E tatou te galulue felagolagomaʻi ma le agaga paia pe a tatou faia le mea sili e mulimuli ai i fautuaga ua aumaia.—Faaa. 2:29.

¹⁴ Pe a sauniuni mo a tatou sauniga faa-Kerisiano, e lelei ona faitau mau o loo sii mai ma taumafai e malamalama i le auala e faatatau ai i le mataupu o loo talanoaina. O lenei faiga o le a faasolo ai ina loloto lo tatou  malamalamaga i le Tusi Paia. (Galu. 17:11, 12) O le suʻe o mau ma faitau i ai, e fesoasoani mai ai le agaga paia iā i tatou ia manatua. E lē gata i lea, pe a tatou vāai i le mea o iai le mau i le itulau o le Tusi Paia, o le a faigofie ai ona tatou manatua le mea e toe suʻe i ai.

15. Aiseā e tatau ai ona tatou faitauina lomiga uma, ma o le ā le auala e te faia ai?

¹⁵ Ia faitau lomiga uma. O nisi mataupu i lomiga e lē o talanoaina i a tatou sauniga, ae ua saunia mo lo tatou lelei. E oo foʻi i lomiga ua saunia mo le lautele, ua faia foʻi mo i tatou. I lenei lalolagi pisi tele, e masani lava ona alu le taimi e tatou te faatali ai i se isi po o se mea. Pe afai e tatou te ave se lomiga e leʻi faitauina pe e leʻi uma ona faitau, e mafai ona tatou faaaogā nei avanoa e faitau ai. O isi e faalogologo i a tatou lipine ma CD a o savavali pe feoaʻi i a latou taavale. O nei lomiga uma ua lelei ona iloiloina ma tusia ina ia aogā i tagata uma e faitau i ai, e faateleina ai lo tatou talisapaia o mea faaleagaga.—Sapa. 2:2.

16. O le ā le aogā o le faamaumau ma suʻesuʻe i fesili e tulaʻi mai?

¹⁶ Ia manatunatu loloto. Ia mafaufau i mea o e faitauina a o faitau le Tusi Paia po o lomiga e faavae i le Tusi Paia. A o e mulimuli lelei i manatu o loo e faitauina, e ono tulaʻi mai ni fesili. E lelei ona faamaumau na fesili ma suʻesuʻe mulimuli i ai. E masani lava ona tatou matuaʻi suʻesuʻe i mataupu e sili ona tatou fia malamalama i ai. O le malamalamaga e tatou te maua mai ai, ua faaopoopo i oloa faaleagaga a le tagata lava ia e faaaogā i taimi e manaʻomia ai.—Mata. 13:52.

17. O le ā le polokalame o loo faia mo au lava suʻesuʻega po o suʻesuʻega a le aiga?

¹⁷ Faatulaga se taimi mo le tapuaʻiga a le aiga. Ua faalaeiau i tatou uma e le Vaega Pule e faatulaga se afiafi po o se isi taimi o vaiaso taʻitasi, mo suʻesuʻega a le tagata lava ia po o le aiga. O le fetuunaʻiga i le faasologa o a tatou sauniga, ua maua ai le avanoa e faatatau ai lenei fautuaga. O ā mea e tou te talanoaina i afiafi o le Tapuaʻiga a le Aiga? O nisi e faitau le Tusi Paia, saʻiliʻili mau e fia malamalama i ai ma fai ni faamaumauga pupuu i a latou Tusi Paia. O le tele o aiga o loo taumafai e faatatau mea ua suʻesuʻeina. E filifili e nisi ulu o aiga mataupu e latou te iloa e manaʻomia ona talanoaina e le aiga, po o mataupu ma fesili o loo fia malamalama i ai le aiga. E mautinoa lava e iai isi mataupu e te fia malamalama i ai a o faagasolo taimi. *

18. Aiseā e lē tatau ai ona tatou augatatā e suʻesuʻe upu moni loloto o le Afioga a le Atua?

¹⁸ Na fetalai Iesu o le a galue le agaga o se fesoasoani. E lē tatau la ona tatou augatatā e suʻesuʻe upu moni loloto o le Afioga a le Atua. O na upu moni o vaega tāua o le “poto i le Atua,” ma ua faalaeiauina i tatou e saʻiliʻili i ai. (Faitau le Faataoto 2:1-5.) Ua matuā faamanino mai ai le uiga o “mea ua saunia e le Atua mo ē e alolofa iā te ia.” A o fai a tatou taumafaiga e malamalama atili e uiga i le Afioga a Ieova, o le a fesoasoani le agaga paia iā i tatou, auā “e suʻesuʻe le agaga i mea uma, e oo lava i mea loloto a le Atua.”—1 Kori. 2:9, 10.

[Faaopoopoga i lalo]

O le ā Lau Tali?

• O ā vala e lua e fesoasoani ai le agaga iā i tatou e suʻesuʻe i “mea loloto a le Atua”?

• I le uluaʻi senituri, o ai na ala mai ai le faaalia e le agaga paia o upu moni loloto?

• E faapefea ona galue le agaga paia e faamanino mai mea i o tatou aso?

• O le ā e te faia ina ia maua ai aogā mai i le galuega a le agaga?

[Fesili mo le Suʻesuʻega]

[Pusa/Ata i le itulau 22]

 Ua Faamalamalama e le Agaga le Uiga o le Malumalu Faaleagaga

E aofia i “mea loloto a le Atua” na faaalia mai i le uluaʻi senituri, ia le faleʻie paia ma mulimuli ane o malumalu na faaatagia ai se mea faaleagaga e sili atu. Na taʻua e Paulo lenā mea o le “faleʻie moni, lea na faatūina e Ieova ae e lē o tagata.” (Epe. 8:2) O le malumalu sili faaleagaga lenei, o se auala e faalatalata atu ai i le Atua e ala i le taulaga ma le tofiga faaositaulaga o Iesu Keriso.

Na amata ona iai “le faleʻie moni” i le 29 T.A. ina ua papatisoina Iesu, ma talia o ia e Ieova e avea ma taulaga e lelei atoatoa. (Epe. 10:5-10) Ina ua mavae lona maliu ma le toetū, na ulu atu ai Iesu i le Mea e Sili Ona Paia o le malumalu faaleagaga, ma ofo atu le tāua o lana taulaga “i luma o le Atua.”—Epe. 9:11, 12, 24.

I isi mau, na tusi ai Paulo e uiga i Kerisiano faauuina o ē ua ‘tutupu aʻe e avea ma malumalu paia mo Ieova.’ (Efe. 2:20-22) Pe e tutusa lenei malumalu ma le “faleʻie moni” lea na ia faamatala mulimuli ane i lana tusi i Kerisiano i Eperu? E tele tausaga o manatu auauna a Ieova, e tutusa. E foliga mai sa sauniunia Kerisiano faauuina i le lalolagi, e avea ma “maa” i le malumalu faalelagi o Ieova.—1 Pete. 2:5.

Ae ina ua latalata i le 1971, na amata ai ona malamalama ē e taʻimua i le vasega o le pologa, o le malumalu o loo taʻua e Paulo i le Efeso, e lē o le malumalu sili faaleagaga o Ieova. Pe afai na faia aʻe “le faleʻie moni” i Kerisiano faauuina ua toetutū, o lona uiga la na amata ona iai ina ua toe faatutūina i latou i le taimi o le “faatasi mai o le Alii.” (1 Tesa. 4:15-17) Ae na tusi Paulo e faatatau i le faleʻie paia e faapea: “O lenei faleʻie o le faatusa lea mo taimi atofaina ua oo mai.”—Epe. 9:9.

O le faatusatusa lelei o nei mau ma isi mau uma, ua manino mai ai e lē o faaauau ona fausia le malumalu faaleagaga, ma e lē o saunia Kerisiano faauuina o i le lalolagi e avea ma “maa” i lea malumalu. Ae o loo auauna Kerisiano faauuina i le lotoā ma le Mea Paia o le malumalu faaleagaga, e ofo atu e lē aunoa “taulaga o viiga” i le Atua.—Epe. 13:15.

[Ata i le itulau 23]

E faapefea ona faaleleia lo tatou malamalama i “mea loloto a le Atua”?