Ia Tele Mea e Fai i le Seleselega Sili Faaleagaga

‘Ia tele mea e fai i le galuega a le Alii.’—1 KORI. 15:58.

1. O le ā na valaaulia e Iesu ona soo e fai?

A O FAIMALAGA Iesu i Samaria i le faaiʻuga o le 30 T.A., na mālōlō o ia i se vaieli e lata i Sukara. O i inā na fetalai atu ai o ia i ona soo: “Inā tetepa aʻe ia outou ma vāai atu i le faatoʻaga, ua matua mo le seleselega.” (Ioa. 4:35) E lē o faatatau le fetalaiga a Iesu i le seleselega o le saito, a o le seleselega faaleagaga o ē e lotofaamaoni o le a avea ma ona soo. Ua ia valaaulia ona soo ina ia auai i lenā seleselega. E tele galuega e ao ona fai ae e itiiti le taimi e faia ai.

2, 3. (a) O le ā e faaalia ai ua tatou ola i le taimi o le seleselega? (e) O le ā o le a talanoaina i lenei mataupu?

² E iai le uiga faapitoa o fetalaiga a Iesu i o tatou aso. Ua tatou ola i se vaitaimi ua “matua ai mo le seleselega” le lalolagi o tagata. E faitau miliona tagata ua valaaulia i tausaga taʻitasi, ina ia ave i fale upu moni e maua ai le ola, ma e faitau afe soo fou ua papatisoina. Ua iā i tatou le faaeaga o le faia o se sao i le seleselega aupito sili, i le vaavaaiga a Ieova le Atua, le Matai o le seleselega. Po o ‘tele ni au mea e fai’ i lenei seleselega?—1 Kori. 15:58.

³ I le tolu ma le ʻafa tausaga o le faiva a Iesu i le lalolagi, na ia aʻoaʻo ai ona soo i le faia o le seleselega. E tolu ni lesona tāua o le a talanoaina i lenei mataupu, mai i le tele o lesona na aʻoaʻo e Iesu i ona soo. Ua faamatilatila e lesona taʻitasi se uiga e sili ona tāua, a o tatou taumafai e faia le mea e sili i le aoaoina o soo i aso nei. Seʻi o tatou iloiloina nei uiga taʻitasi.

E Tāua le Lotomaulalo

4. Na faapefea ona faataʻitaʻia e Iesu le tāua o le lotomaulalo?

⁴ Seʻi faaāta lenei vaaiga: O lea faatoʻā uma le finauga a le ʻausoo po o ai o i latou e sili. E mautinoa o loo vaaia pea i o latou foliga le lē fefaatuatuaaʻi ma le lē fiafia. Ona valaau atu lea o Iesu i se tamaitiiti. Ua faatū o ia i o latou luma ma faapea atu: “O sē e faamaulalo e pei o lenei tamaitiiti, e sili o ia i le malo o le lagi.” (Faitau le Mataio 18:1-4.) Sa manaʻomia ona malamalama le ʻausoo, e faalagolago lo latou tulaga sili i le “faamaulalo” i le vaaiga a isi, nai lo o le mafaufau e pei o le lalolagi, e fua le tagata i lona malosi, tamaoaiga, ma lona tulaga. E faatoʻā faamanuia ma faaaogā i latou e Ieova i lana galuega, pe a faaalia le lotomaulalo moni.

5, 6. Aiseā e tatau ai ona e lotomaulalo ina ia tele ai mea e fai i le seleselega? Faataʻitaʻi.

⁵ E toʻatele tagata i le lalolagi i aso nei ua pupū i le saʻilia o le pule, tamaoaiga, ma tulaga lelei. Ua leai ai se taimi mo mea faaleagaga. (Mata. 13:22) Ae e ese ai tagata o Ieova, e fiafia e ‘faamaulalo i latou lava’ i le vaaiga a isi, ina ia maua ai le faamanuiaga ma le faamaoniga a le Matai o le seleselega.—Mata. 6:24; 2 Kori. 11:7; Fili. 3:8.

⁶ Seʻi manatu i le faaaʻoaʻoga a Francisco, o se toeaina i se faapotopotoga i Amerika i Saute. A o talavou, na tuua e ia le iunivesite ae avea ma paeonia. Na ia taʻua e faapea: “Mulimuli ane, ina ua ou faamau o le a faaipoipo, semanū ou te maua se galuega e tele ai ni a ma tupe ma loʻu toʻalua. Ae sa ma filifili  e faafaigofie o ma olaga ma faaauau ai i le auaunaga faataimi atoa. Mulimuli ane, sa faateleina luʻi ina ua fai la ma fanau. Ae na fesoasoani Ieova ia ma tumau i la ma filifiliga.” Ua fai mai atili o ia: “Ua silia i le 30 tausaga o oʻu olioli i le faaeaga o le avea o se toeaina i le faapotopotoga, ma le tele o isi tofiga faapitoa. E leai lava se taimi ua ma salamō ai ona o le filifili e ola i se olaga faigofie.”

7. O faapefea ona e taumafai e faatatau le fautuaga o loo i le Roma 12:16?

⁷ Pe afai e te teena “mea silisili” po o mea e faatāua e lenei lalolagi, ae ‘taʻitaʻia oe e mea faatauvaa’ po o mea faaleagaga, e mafai foʻi ona e maua le tele o isi faamanuiaga ma faaeaga i le galuega o le seleselega.—Roma 12:16; Mata. 4:19, 20; Luka 18:28-30.

E Tauia le Filigā

8, 9. (a) Ia otooto mai le talafaatusa a Iesu i taleni. (e) O ai e sili ona faalaeiauina i lenei talafaatusa?

⁸ O le filigā, o le isi lea uiga e tatou te manaʻomia ina ia tele ai mea e fai i le seleselega. Na faataʻitaʻi mai e Iesu lenei mea i le talafaatusa i taleni. * O loo faatatau i se tagata a o leʻi malaga, na muamua avatu ana mea i ana pologa e toʻatolu. Na avatu i le pologa muamua ma le lona lua le lima ma le lua taleni, ae avatu i le pologa lona tolu le taleni e tasi. Ina ua alu le matai, na filigā loa ana pologa muamua e toʻalua ma ‘faaaogā taleni i se pisinisi.’ Ae e ese ai le pologa lona tolu, e “paiē.” Na tanu lana taleni i le eleele. Ina ua toe foʻi mai le matai, ona ia tauia lea o pologa muamua e toʻalua i le tofia o i laʻua “e vaaia mea e tele.” Na ia fao le taleni na avatu i le pologa lona tolu ma tuliese mai i lona aiga.—Mata. 25:14-30.

⁹ E lē taumatea o loo e naunau e faataʻitaʻi i pologa filigā o le talafaatusa a Iesu, ma fai se sao atoatoa i le galuega o le faia o soo. Ae faapefea pe afai e itiiti se mea e te mafaia ona o lou tulaga? Atonu o le taugatā tele o le soifuaga ua uunaʻia ai oe e faigaluega umi auā le tausiga o lou aiga. Pe atonu foʻi ua mou atu le malosi ma ua faalētonu lou soifua mālōlōina. Afai o le tulaga lenā, e matuā faalaeiauina oe i le talafaatusa e uiga i taleni.

10. Na faapefea ona faaalia e le Matai o le talafaatusa i taleni le magafagafa, ma e faapefea ona faalaeiauina ai oe?

¹⁰ Ia mātau, na iloa e le Matai o le talafaatusa, e eseese mea e mafai ona fai e ana pologa. Na iloa lea mea ina ua ia avatu taleni “e faatatau i le mea e mafaia e le tagata.” (Mata. 25:15)  E pei ona faatalitalia, e tele atu mea na mafai e le pologa muamua i lo le pologa lona lua. Ae na talisapaia e le matai le filigā o nei pologa uma e toʻalua i le taʻua o i laʻua e ‘⁠lelei ma faamaoni,’ ma e tutusa taui na avatu i ai. (Mata. 25:21, 23) Ua faapena foʻi ona silafia e Ieova le Atua, le Matai o le seleselega, e iai le mea e gata mai ai lou mafai i lana auaunaga ona o lou tulaga. E lē mafai ona lē silafia e Ieova au taumafaiga ma le lotoatoa e auauna iā te ia, ma o le a ia tauia oe.—Mare. 14:3-9; faitau le Luka 21:1-4.

11. Ia faamatala pe faapefea ona faamanuiaina le filigā, e ui i tulaga faigatā.

¹¹ Ua faaalia i le faaaʻoaʻoga a Selmira, o se tuafafine Kerisiano e nofo i Pasili, o le filigā e auauna i le Atua e lē faalagolago i le sologa lelei o le olaga. I le lua sefulu tausaga ua mavae, na fana ai e se ʻaugāoi le tane a Selmira ma oti ai, ae tuua ai na o ia ma le fanau laiti e toʻatolu. E uumi itula e faigaluega ai i lana galuega teufale, ma e faimalaga i pasi ma nofoaafi feomaʻi ma e vaivai ai. E ui i nei faigatā, ae na ia faatulaga lona aiga ina ia mafai ai ona paeonia sauatoa. E toʻalua lana fanau na avea mulimuli ane ma paeonia. Na fai mai o ia: “A o faagasolo tausaga, e silia i le 20 tagata na matou suʻesuʻe i le Tusi Paia ma ua avea ma uso ma tuafāfine. E oo mai i le asō, ua ou maua se faiā māfana ma faaleuō ma i latou. O se ʻoa e lē mafai ona faatau i tupe.” Ua matuā tauia e le Matai o le seleselega taumafaiga filigā a Selmira!

12. E faapefea ona tatou faaalia le filigā i le galuega talaʻi?

¹² Pe afai ua itiiti se mea e te mafai i le faiva ona o lou tulaga i le taimi nei, e mafai lava ona faateleina lou sao i le seleselega e ala i le taumafai ia fua tele mai lau faiva. Pe a faatatauina lelei fautuaga mai i le Sauniga o le Auaunaga i vaiaso taʻitasi, o le a faaleleia ai ou tomai e talaʻi atu ma faaaogā isi auala e talaʻi ai. (2 Timo. 2:15) Afai foʻi e mafai, ia toe faatulaga pe tuu mea e faalētāua ina ia mafai ai ona e lagolago e lē aunoa faatulagaga a le faapotopotoga mo le talaʻiga.—Kolo. 4:5.

13. O le ā le vala e sili ona tāua i le atiina aʻe ma tausisia o le filigā?

¹³ Ia manatua, o le filigā e sau mai i se lototalisapaia. (Sala. 40:8) Na fefe le pologa lona tolu o le talafaatusa a Iesu i lona matai, i le manatu iā te ia o se tagata e tagisā ma faigatā. O lea, na tanu ai e le pologa lana taleni ae leʻi faaaogāina e faatele ai mea a lona matai. Ina ia ʻalofia se uiga faatalalē faapena, e manaʻomia ona tatou atiaʻe ma tausia se faiā māfana ma Ieova le Matai o le seleselega. Ia sema se taimi e suʻesuʻe ma mafaufau loloto ai i ona uiga mataʻina, o lona alofa, onosaʻi ma le alofa mutimutivale. O le faia faapea, e uunaʻia ai oe e lou loto e faia le mea sili i lana auaunaga.—Luka 6:45; Fili. 1:9-11.

“E Tatau Ona Paia Outou”

14. O le ā le manaʻoga tāua e tatau ona ausia e i latou e fia avea ma ē e galulue i le seleselega?

¹⁴ Ua sii mai e le aposetolo o Peteru se mau mai Tusitusiga Eperu, ma taʻu mai le finagalo o le Atua mo ana auauna i le lalolagi: “E tusa ai ma Lē e Paia na valaauina outou, ia faapea foʻi ona paia outou uma i a outou amio, auā ua tusia: ‘E tatau ona paia outou, auā o aʻu nei e paia lava aʻu.’” (1 Pete. 1:15, 16; Levi. 19:2; Teu. 18:13) Ua faamamafa i lenei mau le tāua ona mamā o amio ma le faaleagaga o ē e galulue i le seleselega. E mafai ona tatou ausia lenā manaʻoga tāua pe a faamamāina i tatou i se uiga faafaatusa. E faapefea ona faia lea tulaga? E ala i le fesoasoani a le upu moni o le afioga a le Atua.

15. O le ā e faia e le mana o le upu moni o le afioga a le Atua iā i tatou?

¹⁵ Ua faatusaina le upu moni o le afioga a le Atua i le vai e faamamā ai. O se faataʻitaʻiga,  na tusi Paulo ua mamā le faapotopotoga o Kerisiano faauuina i le silafaga a le Atua, e pei o se tamaʻitaʻi faaipoipo mamā mo Keriso, ua faamamāina “i le faatāʻele i le vai e ala i le upu . . . , ia paia ma ia lē taʻuleagaina.” (Efe. 5:25-27) Sa taʻua muamua foʻi e Iesu le faamamāina i le mana o le afioga a le Atua, lea na ia talaʻia. Na faapea atu o ia i ona soo: “Ua uma ona faamamāina outou, ona o le upu na ou tautala atu ai iā te outou.” (Ioa. 15:3) O lea, e iai i le upu moni o le afioga a le Atua le mana e faamamāina ai amio ma le faaleagaga. Seʻiloga e tuu atu i tatou e faamamāina i le upu moni a le Atua, ona talia ai lea e Ia o la tatou tapuaʻiga.

16. E faapefea ona tausia lo tatou mamā faaleagaga ma tau amio?

¹⁶ O lea, ina ia avea ma ʻaufaigaluega i le seleselega a le Atua, e ao ona faamamā o tatou olaga mai i amioga uma e inosia e le Atua. Ioe, ina ia faaauau ona agavaa e maua le faaeaga o le avea ma ē e galue i le seleselega, e ao ona avea i tatou ma faaaʻoaʻoga lelei i le lagolagoina o tapulaa maualuluga tau amio a Ieova ma le faaleagaga. (Faitau le 1 Peteru 1:14-16.) E pei lava ona tausia pea lo tatou mamā faaletino, e tatau foʻi ona tatou gauaʻi i taimi uma i le mana o le upu moni o le afioga a le Atua e faamamāina ai. E aofia ai i lenei mea le faitauina o le Tusi Paia ma auai i sauniga, ma taumafai ma le faamaoni e faatatau i o tatou olaga faamanatuga mai i le Atua. O le faia faapea o le a manumalo ai i o tatou faanaunauga agasala, ma teena taaʻiga leaga a lenei lalolagi. (Sala. 119:9; Iako. 1:21-25) Ioe, e matuā faamāfanafanaina le iloa, e tusa pe matuiā se agasala, e mafai ona “faamamāina” i tatou ona o le fesoasoani mai o le upu moni o le afioga a le Atua!—1 Kori. 6:9-11.

17. Ina ia tumau ona mamā, o le ā le fautuaga a le Tusi Paia e tatau ona tatou utagia?

¹⁷ Pe e te talia le mana o le upu moni o le afioga a le Atua e faamamā ai lou olaga? O se faaaʻoaʻoga, o ā ou uiga faaalia pe a faailoa atu iā te oe le mataʻutia o faafiafiaga matagā a lenei lalolagi? (Sala. 101:3) Pe e te ʻalofia aufaatasiga lē talafeagai ma ē e aʻoʻoga ma faigaluega faatasi, o ē e lē tutusa o o outou talitonuga? (1 Kori. 15:33) Po o e taumafai moni e manumalo i ou vaivaiga ia e te ono lē mamā ai i le silafaga a Ieova? (Kolo. 3:5) Pe e te vavaeese mai i fefinauaʻiga faapolotiki a lenei lalolagi, ma le agaga lotonuu lea ua taatele i le tele o taaloga i aso nei?—Iako. 4:4.

18. E faapefea ona aogā iā i tatou le mamā tau amio ma le faaleagaga, e fua tele mai ai i le seleselega?

¹⁸ O lou usiusitaʻi ma le faamaoni i na mataupu, o le a maua ai ni iʻuga e sili ona lelei. I le faatusaina o ona soo faauuina i lālā o se vine, na fetalai Iesu: “O lālā uma ua iā te aʻu e lē fua mai, e aveeseina [e loʻu Tamā], a o lālā uma e fua mai, e na te teuteuina ina ia saga fua tele mai.” (Ioa. 15:2) A o e gauaʻi atu i le vai e faamamā ai o le upu moni o le Tusi Paia, o le a e fua tele mai ai.

Faamanuiaga i le Taimi Nei ma le Lumanaʻi

19. Na faapefea ona faamanuiaina taumafaiga a soo o Iesu o ni ē e galulue i le seleselega?

¹⁹ O soo faamaoni na faatatauina aʻoaʻoga a Iesu, na mulimuli ane faamalosia e le agaga paia i le Penetekoso 33 T.A. e avea  ma molimau i “tuluʻiga uma o le lalolagi.” (Galu. 1:8) Na faaauau ona latou auauna o ni sui o le vaega pule, misionare, ma toeaina femalagaaʻi, ma faia se vaega tāua i le talaʻia atu o le tala lelei i “foafoaga uma i lalo o le lagi.” (Kolo. 1:23) Maʻeu ni faamanuiaga na latou maua, ma le olioli na maua ai e isi!

20. (a) O ā faamanuiaga ua e maua i le faia o se sao atoatoa i le seleselega faaleagaga? (e) O le ā ua e filifili e fai?

²⁰ Ioe, o le faaalia o le lotomaulalo, le filigā, ma le lagolagoina o tapulaa maualuluga o le Afioga a le Atua, o le a faaauau ai ona tatou olioli i le faia o se sao atoatoa ma aogā, i le seleselega sili faaleagaga o loo faia nei. A o mafatia le toʻatele i tigā ma le lē fiafia ona o le ola i se olaga matapeʻapeʻa ma le saʻilia o faafiafiaga a lenei lalolagi, ae o loo maua e i tatou le olioli moni ma le lotomalie. (Sala. 126:6) O le mea e sili ona tāua, “e lē iʻuvale a [tatou] galuega fitā i le Alii.” (1 Kori. 15:58) O le a tauia i tatou e faavavau e le Matai o le seleselega, o Ieova le Atua, ona o ‘⁠la tatou galuega, ma le alofa ua tatou faaalia i lona suafa.’—Epe. 6:10-12.

[Faaopoopoga i lalo]

Pe E te Manatua?

A o e tauivi e fai se sao atoatoa i le seleselega . . .

• aiseā e tāua ai ona faaalia le lotomaulalo?

• e faapefea ona e atiaʻe ma tausisia le filigā?

• aiseā e tāua ai ona tausia pea le mamā tau amio ma le faaleagaga?

[Fesili mo le Suʻesuʻega]

[Ata i le itulau 17]

E aogā le lotomaulalo e faafaigofie ai le olaga ma faaautū i le Malo o le Atua