Le Mea o le a Faaalia i le Aso o Ieova

“E oo mai le aso o Ieova e pei o se gaoi, . . . e faaalia foʻi le lalolagi ma ana galuega.”—2 PETE. 3:10.

1, 2. (a) O le a faapefea ona faamutaina lenei faiga amioleaga o mea? (e) O ā fesili o le a tatou iloiloina?

UA FAAVAE aʻe lenei faiga amioleaga o mea i le pepelo e faapea, e mafai lava ona taulau manuia le pule a le tagata e aunoa ma Ieova. (Sala. 2:2, 3) Pe e mafai ona tumau se mea e faavae i le pepelo? E mautinoa e leai! O lea, e tatou te lē faatalitalia le lalolagi a Satani e faamutaina e ia ia lava. Nai lo lea, o le a tafiesea e le Atua i lana taimi atofaina ma i lana lava auala. O le a faaalia ai le faamasinotonu ma le alofa o le Atua i le auala o le a gaoioi ai faasaga i lenei lalolagi amioleaga.—Sala. 92:7; Faata. 2:21, 22.

² Na tusi le aposetolo o Peteru: “E oo mai le aso o Ieova e pei o se gaoi, e vave mou atu ai le lagi ma le gogolo tele, e mavae atu foʻi mea o fai aʻe ai ona o le aasa tele, e faaalia foʻi le lalolagi ma ana galuega.” (2 Pete. 3:10) O le ā “le lagi” ma le “lalolagi” o loo taʻua i inei? O ā “mea o fai aʻe ai” o le a mavae atu? O le ā sa uiga i ai le faamatalaga a Peteru e faapea, o le a “faaalia foʻi le lalolagi ma ana galuega”? O le iloaina o tali i nei fesili, e fesoasoani iā i tatou e sauni ai mo mea mataʻutia e lē o toe mamao ona tutupu lea.

Le Lagi ma le Lalolagi o le a Mou Atu

3. O le ā le “lagi” o loo taʻua i le 2 Peteru 3:10, ma o le a faapefea ona mou atu?

³ Pe a faaaogā i se auala faafaatusa e le Tusi Paia le upu “lagi” e masani ona faasino atu i pulega lea e maualuga aʻe i o latou tagatānuu. (Isa. 14:13, 14; Faaa. 21:1, 2) ‘O le lagi lea o le a mavae atu’ e faaata ai pulega faaletagata o loo pulea ai tagata e lē matataʻu i le Atua. O lo latou mou atu ma le “gogolo tele” po o le “taalili tele” e tusa ai ma se isi faaliliuga, e faailoa ai le vave tele o le faaumatiaga o nei pulega.

4. O le ā le “lalolagi,” ma o le a faapefea ona faaumatia?

⁴ O le “lalolagi” e faaata mai ai le lalolagi o tagata ua vavaeese mai le Atua. E faapena le lalolagi sa iai i aso o Noa, ma na faaumatia i le Lolo e tusa ai ma le afioga a le Atua. “O le afioga foʻi lea ua tuu ai le lagi ma le lalolagi o loo iai i le taimi nei mo le afi, ma ua taofia seʻia oo i le aso faamasino ma le faaumatiaga o tagata faalēmataʻu.” (2 Pete. 3:7) I le taimi o le Lolo, sa faaumatia tagata uma e lē matataʻu i le Atua i le taimi e tasi, ae o le faaumatiaga o loo faaloloʻi mai, o le a faasolosolo a o faagasolo le “puapuaga tele.” (Faaa. 7:14) O le vaega muamua o le puapuaga tele, o le a uunaʻia e le Atua pule faapolotiki o lenei lalolagi e faaumatia “Papelonia le Aai Tele” e faaalia ai lona ʻinoʻino i lenā fafine talitane faalelotu. (Faaa. 17:5, 16; 18:8) O le taua o Amaketo, o le vaega faaiʻu lea o le puapuaga tele, o le a tafiesea ai e Ieova vaega uma o totoe o le lalolagi a Satani.—Faaa. 16:14, 16; 19:19-21.

“E Mavae Atu . . . Mea o Fai Aʻe Ai”

5. O ā mea o aofia ai i mea faafaatusa o loo faia aʻe ai le lalolagi a Satani?

⁵ O ā “mea o fai aʻe ai” o le a “mavae atu”? E faamatalaina e se lomifefiloi o le Tusi Paia  “mea o fai aʻe ai” e faapea, o “mea tāua” po o “mea autū.” O le faaupuga o loo taʻua ai, sa faaaogā i mataʻitusi o le alafapeta, o mea tāua e fai aʻe ai se gagana. O lea la, o “mea o fai aʻe ai” sa taʻua e Peteru, e faasino atu i mea autū ua iloga ai le lalolagi e lē mataʻu i le Atua e tusa o amioga, uiga, tū ma aga, ma sini. O “mea o fai aʻe ai” e aofia ai ma “le agaga o le lalolagi” lea “o loo galue i fanau e lē usiusitaʻi.” (1 Kori. 2:12; faitau le Efeso 2:1-3.) O lenā agaga po o le “ʻea” ua taatele i le lalolagi a Satani. O loo uunaʻia ai tagata e mafaufau, faia fuafuaga, tautala, ma gaoioi i auala e atagia mai ai le mafaufau o Satani, “le pule a le taʻitaʻi o le ʻea,” e faamaualuga ma tetee.

6. O faapefea ona faaalia mai le agaga o le lalolagi?

⁶ O lea la, pe iloa pe lē iloa, ae o ē ua pisia i le agaga o le lalolagi ua latou faaatagia maia mafaufauga ma uiga o Satani, ona ua latou faataga o latou mafaufau ma loto e na te taaʻina. O le iʻuga, ua fai ai lava le mea e manaʻo ai le tagata, e aunoa ma se amanaʻiaina o le finagalo o le Atua. E latou te gaoioi ma le faamaualuga po o le manatu faapito foʻi, ma faaalia o latou uiga tetee i le pule, ma lolo atu ma le lē taofiofia i “tuʻinanauga o le tino, ma tuʻinanauga o mata.”—Faitau le 1 Ioane 2:15-17.

7. Aiseā e tatau ai ona “leoleoina [o tatou] loto”?

⁷ E matuā tāua tele le “leoleoina [o o tatou] loto” e ala i le faatatauina o le poto faale-Atua i a tatou filifiliga i aumea, mea tatou te faitau ai, faafiafiaga, faapea ma polokalame o le Initaneti! (Faata. 4:23) Na tusi le aposetolo o Paulo: “Ia faaeteete: ina neʻi maileia outou e se tasi i filosofia ma manatu taufaasesē e lē aogā e tusa ma tū masani a tagata, e tusa ma mataupu faavae a le lalolagi, ae e lē tusa ma aʻoaʻoga a Keriso.” (Kolo. 2:8) Ua sili atu nei ona matuā tāua lenei faatonuga a o lalata mai le aso o Ieova, lea e lē mafaatusalia lona “aasa tele” o le a liusuavai uma ai “mea o fai aʻe ai” le faiga o mea a Satani, ma faaalia ai le lē mafai ona tatalia e na mea le toʻasā o le Atua. Ua toe faamanatu mai ai iā i tatou upu o le Malaki 4:1: “O loo fotuaʻi mai le aso e mumū ai e pei o le ogaumu, ma e avea e pei o tagutugutu o saito o ē e faamaualuluga ma ē uma e faia mea leaga. E faatamaʻia i latou i le aso o loo fotuaʻi mai.”

“E Faaalia Foʻi le Lalolagi ma Ana Galuega”

8. O le a faapefea ona “faaalia” le lalolagi ma ana galuega?

⁸ O le ā le uiga o le faamatalaga a Peteru ina ua tusi o ia e faapea, “e faaalia foʻi le lalolagi ma ana galuega”? O le upu “faaalia” e mafai foʻi ona uiga atu i le “iloa” po o le “faaalialia i lumamea.” O le uiga o le tala a Peteru, a o faagasolo le puapuaga tele, o le a faaalialia i lumamea e Ieova le lalolagi a Satani, ma lona tetee iā te Ia ma Lona Malo, ma ua tatau i ai le faaumatiaga. Sa valoia mai lenā taimi i le Isaia 26:21 e faapea: “O loo afio mai Ieova mai i lona afioaga ina ia faasalaina o ē o loo nonofo i le laueleele e tusa ma a latou agasala iā te ia, o le a faaalia foʻi e le laueleele lona faamasaatoto ma e lē toe ufitia ai ona tagata ua fasiotia.”

9. (a) O le ā e tatau ona tatou teena, ma aiseā? (e) O le ā e tatau ona tatou atiaʻe, ma aiseā?

⁹ A o faagasolo le aso o Ieova, o le a faaalia e i latou ua taaʻina e le lalolagi ma lona agaga leaga o latou tagata moni, e iʻu lava foʻi ina fefasiotiaʻi ai. O le mea moni, o le tele o ituaiga o faafiafiaga sauā o loo lauiloa i aso nei atonu ua sauniunia ai mafaufau o le toʻatele mo le taimi e taʻitoʻatasi ai ma sii aʻe lona lima e “faasagatau i le lima o lona tuaoi.” (Saka. 14:13) O lea la, e tāua tele ona tatou teena so o se mea lava e pei o ata tifaga, tusi, taaloga vitiō, ma isi mea faapena, lea e ono faatupuina ai iā i tatou uiga e inosia e le Atua, e pei o le faamaualuga ma le fiafia i le  faasauā! (2 Samu. 22:28; Sala. 11:5) Nai lo lea, seʻi o tatou atiaʻe le fua o le agaga paia o le Atua auā o na uiga, e lē mavae atu i le aasa o le afi faafaatusa o le aso o Ieova.—Kala. 5:22, 23.

Le “Lagi Fou ma le Lalolagi Fou”

10, 11. O le ā le “lagi fou” ma le “lalolagi fou”?

¹⁰ Faitau le 2 Peteru 3:13. O le “lagi fou” o le Malo faalelagi o le Atua, lea sa faavaeina i le tausaga 1914 ina ua faaiʻuina “taimi atofaina o nuu ese.” (Luka 21:24) O lenei malo tautupu ua faia aʻe iā Keriso Iesu ma le 144,000 o ē e latou te pule faatasi, ma o le toʻatele lava o i latou ua maua lo latou taui faalelagi. I le tusi o Faaaliga, o i latou nei ua filifilia, ua faaata mai e “le aai paia o Ierusalema Fou, ua alu ifo mai i le lagi mai i le Atua, ua saunia e faapei o se tamaʻitaʻi faaipoipo ua teuteuina mo lona alii.” (Faaa. 21:1, 2, 22-24) E pei lava ona avea Ierusalema faalelalolagi ma nofoaga o le pulega i Isaraelu anamua, ua faia aʻe e le Ierusalema Fou ma lona Alii le pulega o le faiga fou o mea. O lenei aai paia “ua alu ifo mai i le lagi” o lona uiga ua ia liuliualo mai i le lalolagi.

¹¹ O le “lalolagi fou” e faasino atu i le sosaiete fou o tagata i le lalolagi o ē o le a faaalia lo latou gauaʻi atoatoa atu i le Malo o le Atua. O le parataiso faaleagaga o loo olioli ai tagata o le Atua e oo lava i aso nei, o le a iai i sona tulaga talafeagai lelei i lenā “lalolagi o loo fotuaʻi mai.” (Epe. 2:5) E faapefea ona avea i tatou ma vaega o lenā faiga fou o mea?

Sauni mo le Aso Tele o Ieova

12. Aiseā o le a faateʻia ai le lalolagi i le oo mai o le aso o Ieova?

¹² Sa valoia uma e Paulo ma Peteru le oo mai o le aso o Ieova “e pei o se gaoi,” e faafuaseʻi, e lē faatalitalia. (Faitau le 1 Tesalonia 5:1, 2.) E oo lava foʻi i Kerisiano moni o loo faatalitalia le oo mai o lenā aso, o le a faateʻia i lona faafuaseʻi mai. (Mata. 24:44) Ae o le a sili atu ona faateʻia le lalolagi i le mea o le a tupu. Na tusi Paulo: “Pe a latou [o ē ua faaesea mai iā Ieova] faapea ane: ‘Ua filemu ma saogalemu!’ ona oo faafuaseʻi mai loa lea o le faaumatiaga iā i latou, e pei o le tigā o le fafine tō o le a fanau; ma e latou te lē sao ai lava.”—1 Tesa. 5:3.

13. E faapefea ona tatou ʻalofia le faasesēina i le alaga, “Ua filemu ma saogalemu!”?

¹³ O le alaga, “Ua filemu ma saogalemu!” o le isi lenā pepelo o le a faatupuina e temoni; ae o le a lē faasesēina ai auauna a Ieova. Na tusi Paulo: “Tou te lē o i le pōuliuli ina neʻi maua mai outou e lenā aso, e pei ona maua o tagata gaoi pe a malamalama, auā o outou uma o atalii o le malamalama ma atalii o le ao.” (1 Tesa. 5:4, 5) O lea, seʻi o tatou tumau pea i le malamalama, ma ia mamao ese mai le pogisa o le lalolagi a Satani. Na tusi Peteru: “Le ʻaupele e, ona ua outou muaʻi iloa lenei mea, ia outou leoleo ai iā te outou ina neʻi taʻitaʻieseina outou e i latou [aʻoaʻo pepelo i totonu o le faapotopotoga Kerisiano] i le sesē o tagata solitulafono, ma outou paʻuʻū ai mai i lo outou tutū maumauaʻi.”—2 Pete. 3:17.

14, 15. (a) Ua faapefea ona faamamaluina i tatou e Ieova? (e) O ā upu faagaeeina e tatau ona tatou teulotoina?

 ¹⁴ Seʻi mātau, e lē o tau ina faapea mai Ieova ‘⁠ia leoleo i tatou’ ona tuu ai lea faapena. Ae ua ia faamamaluina i tatou e ala i lo tatou “muaʻi iloa” o mea o le a tutupu i le lumanaʻi lea ua ia faamalamalamaina mai ma le agalelei iā i tatou.

¹⁵ E faanoanoa ona ua lē manatu mamafa nisi, pe e faalētalitonu i faamanatu o loo aumai e faatatau i le manaʻomia pea ona mataala. Atonu e latou te faapea mai, ‘Ua tele tausagā o matou faalogo pea i na faamanatu.’ O lea, e ao ona manatua e na tagata, o le faia o na ituaiga faamatalaga, ua latou fesiligia ai le vasega o le pologa faamaoni, faapea foʻi Ieova ma lona Alo. Ua fetalai Ieova: “Ia faatalitali pea.” (Sapa. 2:3) Na fetalai foʻi Iesu: “Ia faaauau . . . ona outou mataala, auā tou te lē iloa po o lē fea aso e sau ai lo outou Alii.” (Mata. 24:42) Na faaopoopo mai Peteru: “Pe e faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua, a o faatalitali ma tāmau i mafaufau le oo mai o le aso o Ieova.” (2 Pete. 3:11, 12) E lē o manatu māmā pe lē ano le pologa faamaoni ma lana Vaega Pule i na upu e tāua tele!

16. O ā uiga e tatau ona tatou ʻalofia ma aiseā?

¹⁶ O le mea moni, ua faapea ifo le “pologa leaga” ua tuai mai le Matai. (Mata. 24:48) O lenā pologa leaga o se vaega o ē o loo faamatalaina i le 2 Peteru 3:3, 4. Na tusi Peteru: “O aso e gata ai e ō mai ai tagata tauemu . . . e tusa ai ma o latou lava tuʻinanauga,” ma latou faatauemu iā i latou o loo tāmauina pea i o latou mafaufau le aso o Ieova. Ioe, nai lo le uaʻi atu o na tagata tauemu i manaʻoga o le Malo, ua latou uaʻi atu iā i latou lava ma o latou manaʻoga manatu faapito. Ia aua lava neʻi o tatou maua i na uiga e lē usitaʻi ma mataʻutia! Nai lo lenā, “ia manatunatu foʻi o le onosaʻi o lo tatou Alii ua maua ai le faaolataga,” e ala i le pisi i le talaʻia o le Malo ma le faia o soo, ae lē o le popole i le tau fuafuaina o le taimi e tutupu ai mea, lea e na o Ieova e pule ai.—2 Pete. 3:15; faitau le Galuega 1:6, 7.

Faamoemoe i le Atua o le Faaolataga

17. Sa faapefea ona tali atu Kerisiano faamaoni i le lapataʻiga a Iesu, e sosola ese mai Ierusalema, ma aiseā?

¹⁷ Ina ua mavae le vagaia e fitafita Roma o Iutaia i le 66 T.A., na vave ona gaoioi Kerisiano faamaoni e sosola ese mai le aai o Ierusalema e tusa ai ma le lapataʻiga a Iesu. (Luka 21:20-23) Aiseā na latou vave gaoioi ai ma le mautinoa? O le mea moni, sa latou teulotoina le lapataʻiga a Iesu. E mautinoa, sa latou faatalitalia faigatā e oo ane e tusa ai ma la latou  filifiliga, e pei ona lapataʻi mai ai Keriso. Peitaʻi, sa latou iloa e lē tuulafoaʻia e Ieova ana auauna faamaoni.—Sala. 55:22.

18. E faapefea i upu a Iesu o loo i le Luka 21:25-28 ona aafia ai lau vaaiga i le puapuaga tele o loo faaloloʻi mai?

¹⁸ E ao foʻi iā i tatou ona faamoemoe atoatoa iā Ieova, ua na o ia lo tatou faaolataga, pe a feagai lenei faiga o mea ma le puapuaga e leai sona tusa i le talafaasolopito atoa o le tagata. I se taimi pe a mavae le amataga o le puapuaga tele, a o leʻi faaumatia e Ieova le vaega o loo totoe o le lalolagi, o le a “matapogia foʻi tagata ona o le fefefe ma faatalitali i mea e oo mai i le lalolagi uma.” Ioe, a o gatete ma matataʻu fili o le Atua, ae o le a lē lagona e auauna faamaoni a Ieova se fefefe. Ae o le a latou olioli ona ua latou iloa, ua lata lo latou laveaʻiga.—Faitau le Luka 21:25-28.

19. O le ā o le a suʻesuʻeina i le mataupu o sosoo mai?

¹⁹ Ioe, maʻeu se lumanaʻi fiafia mo i latou e tumau ona vavaeese mai le lalolagi, ma “mea o fai aʻe ai”! I le mataupu o sosoo mai, e faamatalaina ai e faapea, pe a tatou mananaʻo e maua le ola, e tatau ona tatou faia mea e sili atu i lo le tau ina ʻalofia o mea leaga. E manaʻomia ona tatou atiaʻe uiga e fiafia i ai Ieova, ma faia galuega e talia e ia.—2 Pete. 3:11.

Pe Mafai Ona E Faamatala?

• O le ā o loo faaata mai e . . .

le ‘lagi ma le lalolagi’ o loo iai nei?

“mea o fai aʻe ai”?

le ‘lagi fou ma le lalolagi fou’?

• Aiseā e tatou te faamoemoe atoatoa atu ai i le Atua?

[Fesili mo le Suʻesuʻega]

[Ata i le itulau 5]

E faapefea ona e “leoleoina lou loto”

ma tumau ona vavae ese mai le lalolagi?

[Ata i le itulau 6]

E faapefea ona tatou iloa o loo tatou ‘⁠manatu i le onosaʻi o lo tatou Alii ua maua ai le faaolataga’?