O Iʻuga Lelei pe a Mataala

PO O e mataala i avanoa e ono tulaʻi mai e talaʻi ai i le oganuu a la outou faapotopotoga? O le mataala o o tatou uso i se taulaga i Turku i Finilani, na maua ai ni iʻuga lelei.

I se taimi ua tuanaʻi, na mātauina ai e le ʻauuso i Turku le taunuu ane o se vaega o tamāloloa Asia e faauma le fauina o se meli laʻu pasese telē o loo fausia i se lotoā e tuu ai vaa. Na iloa mulimuli ane e se uso faletalimālō sa nonofo ai lea ʻaufaigaluega. Na ia iloaina foʻi, e laʻu e pasi le ʻaufaigaluega i le taeaopō mai i faletalimālō i le taulaga. Ona ia faailoa atu loa i le ʻauuso i le faapotopotoga faa-Peretania i Turku.

Na iloa e toeaina o lenā faapotopotoga, o le iai o le toʻatele o tagata ese, ua maua ai se avanoa e leʻi faatalitalia e talaʻi atu ai le tala lelei iā i latou, ma na vave ona latou faia se fuafuaga faapitoa. I le Aso Sa o le vaiaso lava lenā, e toʻasefulu le ʻautalaʻi na faapotopoto i le fitu i le taeao i le mea e tutū ai pasi. I le amataga, na tuai ona ō atu tagata faigaluega. Na taumānatu le ʻauuso, ‘⁠Po ua fai si o tatou tuai mai? Po ua tuua e i latou Turku?’ Ae iloa atu loa se tagata ua sau ma lona ofu faigaluega. Na sosoo mai ai ma se isi tagata faigaluega, ma e toʻatele i latou ua ō mai. E leʻi umi lava ae tumutumu le ʻaufaigaluega i le mea e tutū ai pasi. Na amata loa le talaʻiga a le ʻauuso ma ō atu e avatu lomiga faa-Peretania i tagata faigaluega. O le mea e lelei ai ona e tusa ma le itula o tau suʻe nofoa o le ʻaufaigaluega i pasi, ma maua ai e le ʻauuso le avanoa e talanoa ai i le toʻatele o i latou. Ina ua ō ese pasi, na ō le ʻaufaigaluega ma ave tamaʻitusi e 126 ma mekasini e 329!

O iʻuga lelei, na faalaeiauina ai le ʻauuso e ō e toe asi i latou i le vaiaso na sosoo ai, i le taimi o le asiasiga a le ovasia matagaluega. I le ʻafa o le ono i se taeao timuga, na fai ai e le ovasia asiasi se faatasiga mo le talaʻiga, ma e 24 le ʻautalaʻi na ō atu i le mea e tutū ai pasi. Na ō ma ave lomiga i le gagana Tagalog, auā na latou iloa o le toʻatele o le ʻaufaigaluega e mai i Filipaina. I lenā taeao, ina ua ō ese pasi a le ʻaufaigaluega, na ave ai a latou tusi e 7, tamaʻitusi e 69, ma mekasini e 479. E uiga ese le fiafia o uso ma tuafāfine na talaʻi atu i le ʻaufaigaluega!

A o leʻi taliu atu le ʻaufaigaluega i o latou atunuu na ō mai ai, na asiasi atu le ʻauuso i faletalimālō sa nonofo ai nisi o i latou, ma faamalamalama atili atu le feʻau o le Malo. Na taʻua e nisi o le ʻaufaigaluega, na latou feiloaʻi muamua ma Molimau a Ieova i isi vaega o le lalolagi. Na faaalia e le ʻaufaigaluega le talisapaia o le galuega a le ʻauuso i le asiasi atu a o latou iai i Finilani.

Po o e mataala i avanoa e ono tulaʻi mai i oganuu a lau faapotopotoga? Po o e tausolomua e talanoa atu i tagata mai talaaga eseese. Afai o e faia faapea, o le a e olioli foʻi la i avanoa e pei ona maua e o tatou uso i Turku.

[Faafanua/Ata i le itulau 32]

(Tagaʻi i le lomiga mo le ata atoa)

FINILANI

HELSINKI

Turku