E Valaaulia so o se Isi!

VALAAULIA i le ā? Ia asiasi atu i se ofisa o lālā o Molimau a Ieova, lea foʻi e taʻua o le Peteli. E 118 nofoaga autū o loo i atunuu eseese. E masani ona faailoa mai e tagata asiasi lo latou talisapaia o mea ua vāai o loo faia i le Peteli.

Na faagaeetia se alii talavou sa faia sana suʻesuʻega i lona mātauina o le toʻatele o ē e galulue mamafa ma auauna fiafia i le ofisa o le lālā i Mekisikō, ma fesili ai loa: “O le ā e fai ina ia ou nofo ai i inei?” Na taʻu atu iā te ia: “E tatau ona e papatiso muamua, ma e lelei pe a e paeonia, o sē e molimau faataimi atoa o le Malo.” Sa faia faapea e lenei alii talavou, ma na valaaulia o ia i le lua tausaga mulimuli ane e galue i le Peteli i Mekisikō, ma ua 20 tausaga o auauna ai.

O le ā le Peteli?

O le uiga o le upu Peteli i le faa-Eperu, o le “Fale o le Atua.” (Kene. 28:19, fpl.) Ua lomia ma tufaina atu Tusi Paia ma lomiga faale-Tusi Paia e lālā eseese, ma saunia ai fesoasoani faaleagaga mo faapotopotoga e silia i le 100,000 a Molimau a Ieova i le lalolagi aoao. E toetoe lava 20,000 tagata galulue i Peteli, o alii ma tamaʻitaʻi e eseese aganuu ma talaaga, o loo auauna faataimi atoa ma le lē manatu faapito iā Ieova ma o latou uso ma tuafāfine faaleagaga. O loo galulue faatasi ē ua tele tausaga o galulue i Peteli ma talavou o loo malaulau aʻe le malosi. I afiafi ma faaiʻuga o vaiaso, e fiafia sui o le aiga Peteli e auai i faapotopotoga a Molimau a Ieova o lata ane, i sauniga ma le talaʻiga. E faaaogā foʻi o latou taimi paganoa e suʻesuʻe ai le Tusi Paia, i evaevaga, faapea meafai a le tagata lava ia.

E maua e sui o le aiga Peteli sina alauni i masina taʻitasi. Ua saunia taumafa e aogā ma malolosi ai ma e nonofo i fale mamā ma lelei. O fausaga o fale Peteli e faigofie, ae ua talafeagai lelei. E maofa tagata asiasi ona o le lelei o le tausiga o fale faapea le sologa lelei o galuega, ma le agaga felagolagomaʻi ma le agalelei o loo iai i Peteli. O tagata uma e galulue filigā, ae e lē faapea ai e lē ano le tasi i le isi. E leai se faaeseesega o tagata pe iai ni manatu faasausili ona o galuega o loo galulue ai i le Peteli. E tāua galuega uma, e pei o galuega faamamā, faitogālaau, gaseseina o meaʻai, pe galue foʻi i fale lomitusi po o ofisa. Ua mātauina tagata Peteli i le galulue soosootauʻau e lagolagoina le galuega a Molimau a Ieova.—Kolo. 3:23.

 Feiloaʻi i Nisi Sui o le Peteli

Seʻi o tatou vāai i nisi o loo iai i lenei aiga faavaomalo. O le ā ua uunaʻia ai i latou e auauna i Peteli? Manatu i le tulaga o Mario. I le taimi na avea ai o ia ma Molimau a Ieova, sa iai sana galuega totogi lelei i se kamupani e iloga i le fai taavale i Siamani, ma na telē se avanoa e siitia ai lona tulaga. E leʻi leva ona papatiso, ae ofo atu loa e galue mo se vaiaso i le Peteli i lona atunuu. Sa tofia o ia e galue i le vaega e lolomi ai tusi. Na iloa ai e Mario le eseesega o ē na latou galulue faatasi i Peteli ma tagata i lana galuega masani. Na talosaga loa e fia auauna faataimi atoa i Peteli. E toʻatele ona aiga ma uō na faigatā ona malamalama i lana filifiliga, ae o se fiafiaga iā Mario le auauna ai i Peteli i Siamani i le taimi nei.

E toʻatele e ulufale i le auaunaga i Peteli e aunoa ma ni aʻoaʻoga po o ni tomai faapitoa. O le tulaga lenā o Apelu, ua 15 nei tausaga o galue i le Peteli i Mekisikō. Na fai mai o ia, “O le tele ia o mea ua ou aʻoaʻoina i Peteli. Ua ou iloa ai faaaogā masini lomitusi lavelave. Ou te iloa o le tomai lenei e mafai ona ou maua ai tupe e tele i galuega e ese mai le Peteli, ae ou te lē maua ai le olioli o loo iai i inei, o se olaga e filemu ma faamalieina e leai se popole po o se agaga faatautavā e pei o le tele o fale faigaluega. Ua ou lagona ua ou maua se aʻoaʻoga sili ona tāua e aogā i le atiina aʻe o aʻu i le avea ai o se auauna a le Atua ma atamai ai. E oo lava foʻi i se iunivesite lauiloa, ou te lē mauaina ai ni aogā faapea.”

Se Asiasiga e Atiaʻe Ai

E iai aafiaga lelei faaleagaga i se isi e asiasi atu i Peteli. E faapena Omar, mai i Mekisikō. Na aʻoaʻo o ia e lona tinā i upu moni o le Tusi Paia. Ae ina ua 17 ona tausaga, na lē toe alu ai i sauniga pe toe talaʻi. Na aafia o ia i masaniga leaga ma se olaga matapeʻapeʻa. Mulimuli ane, ina ua faigaluega i se kamupani o mea tau fesootaʻiga, na avea Omar ma sui o le kamupani e asiasi atu i le Peteli e faasino i le ʻaufaigaluega le faia o masini. Na fai mai Omar: “Ina ua māeʻa a matou faataʻitaʻiga, ona ave lea o i matou e faamatamata i  le fale. O mea na ou vaai i ai ma le agalelei mai o le ʻauuso, na ou mafaufau ai i loʻu olaga lea ua iai ua vavae ese mai iā Ieova. Na amata ai loa ona ou toe auai i sauniga ma suʻesuʻe le Tusi Paia. I le ono masina talu laʻu asiasiga i Peteli, na ou papatiso ai loa. Ou te faafetaia Ieova ona o le faalaeiauga na ou maua mai i laʻu asiasiga i le Peteli.”

E faapena foʻi Masahiko i Iapani, sa ola aʻe i se aiga Molimau. Ae na amata ona manatu o ia, e tele faasāsāga o le olaga o se Kerisiano. Na alu uma lona taimi i meafai a le aʻoga, ma lē toe auai i sauniga pe toe talaʻi. O lana tala lenei: “Na fai se fuafuaga a lo matou aiga ma nisi o uō Kerisiano e alu sa matou matamataga i Peteli. Na mananaʻo lava loʻu aiga ia ou alu ma na matou ō ai loa. O le taimi muamua lea ua ou lagonaina ai le faafouina ona o la matou matamataga i le Peteli. O le fiafia na ou maua i le faatasitasiga ma isi Kerisiano a o alu le malaga, o se mea ou te leʻi maua i aʻu uō e lē o ni Molimau. Ua tupu aʻe nei se lagona ou te fia ola o se Kerisiano, ma tonu ai loa i loʻu mafaufau e talosaga atu mo se suʻesuʻega faale-Tusi Paia.” O loo auauna nei Masahiko o se faifeʻau faataimi atoa i lana faapotopotoga.

Na siitia atu se Molimau mai Falani i Moscow e faigaluega ai. O inā na lē toe maua ai se fesootaʻiga ma tagata o Ieova ma oo ai ina vaivai faaleagaga. Na lolo atu o ia i le faia o mea sesē ma iʻu ai ina faaipoipo ma se tagata e lē o se Molimau. Ona asiasi atu lea iā te ia o se tuafafine mai Falani, ma la faimalaga atu ai i le aai o St. Petersburg i Rusia, e asiasi i le aiga Peteli i inā. Na tusi o ia e faapea: “Na faafeiloaʻia ma le māfana i maʻua i le Peteli ma na pāʻia ai loʻu loto. Oka se filemu. Na ou lagonaina le agaga o Ieova. Na faapefea ona ou sesē ma tafetafea ese ma le faalapotopotoga a Ieova? Ina ua uma laʻu asiasiga i le Peteli, sa ou tatalo mo le fesoasoani a Ieova ma na toe faafouina loʻu maelega ia aʻoaʻoina laʻu fanau i le Tusi Paia.” E lē gata i fesoasoani faaleagaga na maua e lenei Molimau ua vaivai faaleagaga, ae na matuā faamalosia foʻi o ia i lana asiasiga i Peteli ma agaʻigaʻi ai i luma faaleagaga.

A o ā lagona o i latou e asiasi i Peteli ae e lē masani i Molimau a Ieova? O Alberto o se alii sa pisi i mea faapolotiki, ae i le 1988, na asiasi ai i le Peteli i Pasili. Na matuā faagaeetia ai lava o ia ona o le mamā ma le maopoopo, aemaise e leai se galuega e faia faalilolilo. A o leʻi oo atu o ia i Peteli, na asiasi muamua i le seminario e galue ai o se patele le tuagane laʻitiiti o lana avā. Na mātauina e Alberto le eseesega. Na taʻua e Alberto, “O mea uma lava e faia i le seminario, e fai faalilolilo.” E leʻi umi talu lana asiasiga i le Peteli, ae malie loa e fai sana suʻesuʻega faale-Tusi Paia, ma lē toe auai i mea faapolotiki, ma o loo auauna nei o se toeaina o le faapotopotoga.

Asiasi Mai i Peteli!

E tele taumafaiga ua faia e le toʻatele e fia asiasi atu i ofisa o lālā i o latou atunuu. O se faataʻitaʻiga, e fā tausaga o teu tupe a se ulugalii Pasili o Paulo ma Eugenia, ona e fia malaga atu i le pasi mo le lua aso i le mamao e 2,000 maila (3,000 km), e matamata ai i le Peteli i lenā atunuu. Na fai mai i laʻua: “O se taumafaiga na aogā tele. Ua sili ona lautele ai la ma vaaiga i le faalapotopotoga a Ieova. Pe a ma faamatala atu galuega o faia i Peteli i a ma suʻesuʻega faale-Tusi Paia, e latou te fesili mai i nisi taimi, ‘Ua lua oo i ai?’ Ua mafai nei ona ma faapea atu, ioe.”

Po o iai se ofisa o le lālā ma se Aiga Peteli i lou atunuu, po o se atunuu o lata ane? Matou te valaaulia oe e asiasi atu i ai. E mautinoa o le a faafeiloaʻia māfana ai oe ma maua ai aogā sili faaleagaga i lou asiasi atu i Peteli.

[Ata i le itulau 18]

Mario

[Ata i le itulau 18]

Apelu

[Ata i le itulau 18]

Siamani

[Ata i le itulau 18]

Iapani

[Ata i le itulau 18]

Pasili