Ia Leoleo Lou Laulaufaiva e “le Tulafono o le Alofa Faamaoni”

“Ua tautala o ia ma le atamai, ua i lona laulaufaiva foʻi le tulafono o le alofa faamaoni.”—FAATA. 31:26.

1, 2. (a) O le ā le uiga e manaʻomia ona atiaʻe e tagata tapuaʻi o Ieova? (e) O ā mea o le a talanoaina i lenei mataupu?

NA AOFIA i le feʻau tāua na maua e le tupu anamua o Lemuelu mai i lona tinā, se uiga e tāua i se avā lelei. Na taʻu atu iā te ia: “Ua tautala o ia ma le atamai, ua i lona laulaufaiva foʻi le tulafono o le alofa faamaoni.” (Faata. 31:1, 10, 26) O le alofa faamaoni, o se uiga e manaʻomia pe a tautala se fafine atamai, faapea ma isi uma e mananaʻo e faafiafia Ieova le Atua. (Faitau le Faataoto 19:22.) E tatau ona iloa le alofa faamaoni o tagata tapuaʻi moni i le auala e tautatala ai.

² O le ā le alofa faamaoni? O ai e ao ona faaalia i ai? O le ā e fesoasoani iā i tatou ina ia iai “le tulafono o le alofa faamaoni” i o tatou laulaufaiva? E faapefea i le faia faapea ona aafia ai a tatou fesootaʻiga ma tagata o le aiga ma uso Kerisiano?

O le ā le Alofa Faamaoni?

3, 4. (a) O le ā le uiga o le alofa faamaoni? (e) E faapefea ona ese le alofa faamaoni mai i le agalelei lea e faaalia e tagata uma?

³ O le alofa faamaoni e aofia ai uiga o le alofa ma le agalelei. O lona uiga, e aofia ai le faaalia o le naunau ma le manatu mamafa i isi e ala i gaoioiga fesoasoani ma upu agalelei. Ona o loo aofia ai le alofa, o le faaalia la o le alofa faamaoni e manaʻomia ai le naunau mo le lelei o isi ona o le alofa iā i latou. Ae o le upu mo le alofa faamaoni i le uluaʻi gagana, e sili atu i lo o le agalelei e māfua mai i le alofa. O le alofa faamaoni, o le agalelei lea e faaalia atu ma le faamaoni i se tasi, seʻia taunuu le fuafuaga o le faaalia o lea agalelei.

⁴ O le faaalia o le alofa faamaoni, e lē na o le avea o se tagata lelei po o le faaalia o le agalelei lea e masani ona faaalia e tagata uma. E mafai ona faaalia nei uiga e oo lava i tagata ese. O se faaaʻoaʻoga, na faaalia e tagata o le motu o Melita, o ē e latou te leʻi feiloaʻi muamua i ai lenei agalelei iā Paulo ma isi tagata e toʻa 275, na afātia la latou folauga ma malepe ai le vaa. (Galu. 27:37–28:2) E ui na agalelei tagata o lenā motu, ae e latou te leʻi faaalia le alofa faamaoni, auā o lenā uiga e faaalia i le va o ni tagata ua uma ona iai se faiā. * O le faaalia o le alofa faamaoni, e faamalosia ai ni sootaga māfana ma tumau ma isi. Ona o lenā uiga, ua mafai ai ona iai se faiā tumau ma mausalī i le va o Ieova ma ona tagata.—Teu. 7:9.

E Tāua le Manatunatu Loloto ma le Tatalo

5. O le ā e fesoasoani iā i tatou e faatonutonu ai o tatou laulaufaiva?

⁵ E lē faigofie ona atagia atu le alofa faamaoni i a tatou faamatalaga. Na tusi le soo o Iakopo e faatatau i le laulaufaiva: “E lē mafai e se tagata ona pulea lona laulaufaiva. O le  mea leaga lea e lē mafai ona taofiofia, e tumu i mea oona e oti ai.” (Iako. 3:8) O le ā e fesoasoani iā i tatou e faatonutonu ai lenei vaega o le tino e faigatā tele ona pulea? E tatou te maua se malamalamaga i upu a Iesu i taʻitaʻi lotu i ona aso. Na fetalai o ia: “O le tele o mea i le loto e tautala mai ai le gutu.” (Mata. 12:34) Ina ia leoleo e le alofa faamaoni o tatou laulaufaiva, e tatau ona atiaʻe lenā uiga i o tatou loto, o lo tatou tagata i totonu. Seʻi o tatou vaai i le auala e fesoasoani ai le manatunatu loloto ma le tatalo iā i tatou, ina ia faia ai faapea.

6. Aiseā e tatau ai ona tatou mafaufau loloto ma le lotofaafetai i gaoioiga o le alofa faamaoni o Ieova?

⁶ Ua faapea mai le Tusi Paia, o Ieova e “tele lona alofa faamaoni.” (Eso. 34:6) Na pese le faisalamo: “Ieova e, ua tumu le lalolagi i lou alofa faamaoni.” (Sala. 119:64) E tele faamaumauga o loo i le Tusi Paia ua taʻua ai le auala na faaalia ai e Ieova le alofa faamaoni i ona tagata tapuaʻi. O le faaavanoa o se taimi e mafaufau loloto ai ma le lotofaafetai ‘⁠i mea uma na faia e Ieova,’ e faatupu ai i o tatou loto le faanaunauga e atiaʻe lenei uiga o le Atua.—Faitau le Salamo 77:12.

7, 8. (a) O le ā le gaoioiga o le alofa faamaoni na faia e Ieova iā Lota ma lona aiga? (e) O ā lagona o Tavita ina ua ia tofo i le alofa faamaoni o le Atua?

⁷ Seʻi manatu i le auala na laveaʻi ai e Ieova Lota, le atalii o le uso o Aperaamo ma lona aiga ina ua Ia faaumatia Sotoma, le aai na latou nonofo ai. A o lata i lenā taimi, na uunaʻia Lota e agelu na ō ane iā te ia e ave lona aiga ma vave ona tuua le aai. Ua faapea mai le Tusi Paia: “Ua faifaiaga pea o ia, ae ona o le alofa mutimutivale o Ieova iā te ia, ua fetagofi atu ai [agelu] i lona lima, ma lima o lana avā, ma lima o ona afafine e toʻalua, ua la aveese atu o ia ma tuu i fafo o le aai.” Pe e lē pāʻia ai o tatou loto pe a manatunatu i lenei gaoioiga laveaʻi, ma uunaʻia ai i tatou e ioe o se faailoaga lea o le alofa faamaoni o le Atua?—Kene. 19:16, 19.

⁸ Seʻi manatu foʻi i le faaaʻoaʻoga a le tupu o Isaraelu anamua o Tavita, o lē na pese: “O [Ieova] o lē e faamagaloina au mea sesē uma, o [ia] na te faamālōlōina ou maʻi uma.” Maʻeu le lotofaafetai o Tavita ina ua faamagaloina e Ieova la la agasala ma Patesepa! Na viiviia e Tavita Ieova i lona faapea atu: “Auā e pei ona maualuga atu o le lagi i le lalolagi, e faapea foʻi ona sili atu lona alofa faamaoni iā i latou e matataʻu iā te ia.” (Sala. 103:3, 11) O le manatunatu loloto i nei mea ma isi tala o loo i le Tusi Paia, e tatou te matuā lotofaafetai ai ona o le alofa faamaoni o Ieova, ma uunaʻia ai i tatou e vivii ma faafetai atu iā te ia. O le tele o lo tatou lotofaafetai, o le tele foʻi lea o lo tatou naunau e faaaʻoaʻo i le Atua.—Efe. 5:1.

9. O le ā le māfuaaga malosi e faaalia ai e tagata tapuaʻi o Ieova le alofa faamaoni i le olaga i aso faisoo?

⁹ Ua faaalia i faaaʻoaʻoga i le Tusi Paia, e faasafua atu e Ieova lona alofa faamaoni iā i latou ua uma ona iai se faiā faamaonia ma ia. Ae faapefea i latou e leai se faiā vavalalata ma le Atua soifua? Pe e sauā ma agaleaga Ieova iā i latou? E leai. “E agalelei mai [le Atua] i ē e lē lotofaafetai ma ē amioleaga,” e pei ona taʻua i le Luka 6:35. “O lē na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.” (Mata. 5:45) A o leʻi aʻoaʻoina le upu moni ma faatatauina, sa tatou tofo i le agalelei o le Atua, po o le agalelei e faaalia e le Atua i tagata uma. Ae i le avea ma ona tagata tapuaʻi, ua tatou maua ai lona alofa faamaoni lē maluelue. (Faitau le Isaia 54:10.) Maʻeu lo tatou lotofaafetai ona o lenā mea! Maʻeu foʻi se māfuaaga malosi e tatou te faaalia ai le alofa faamaoni i a tatou upu, ma isi vala o le olaga i aso faisoo!

10. Aiseā e avea ai le tatalo o se fesoasoani tāua ina ia avea ai le alofa faamaoni ma o tatou uiga?

¹⁰ O se fesoasoani e tāua tele i lo tatou atiina aʻe o le alofa faamaoni, o le faaeaga o le  tatalo. Talu ai o le alofa ma le agalelei, lea e faia aʻe ai le alofa faamaoni, o vala ia o le fua o le agaga paia o Ieova. (Kala. 5:22) E mafai ona faatupu le alofa faamaoni i o tatou loto e ala i le tuu atu e taʻitaʻia e lenā agaga i tatou. O le auala sili e maua ai le agaga paia o Ieova, o le ōle atu mo lea agaga i le tatalo. (Luka 11:13) E tatau ona tatou tatalo pea mo le agaga o le Atua ma talia lana taʻitaʻiga. Ioe, e tāua le manatunatu loloto ma le tatalo ina ia iai le tulafono o le alofa faamaoni i o tatou laulaufaiva.

E Tāua pe a Talanoa Paaga Faaipoipo

11. (a) E faapefea ona tatou iloa e finagalo Ieova ia alofa faamaoni tane i a latou avā? (e) E faapefea ona fesoasoani le tulafono o le alofa faamaoni i se tane e pulea ai lona laulaufaiva?

¹¹ Ua timaʻi mai Paulo i tane: “Ia faaauau ona alolofa atu i a outou avā, e pei o le Keriso foʻi ona alofa i le faapotopotoga, ma foaʻi mai lona ola mo le faapotopotoga.” (Efe. 5:25) Ua faamanatu mai foʻi e Paulo iā i latou le mea na taʻu atu e Ieova iā Atamu ma Eva. Ua tusi le aposetolo: “E tuua . . . e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi.” (Efe. 5:31) E manino mai, e faatalitalia e Ieova tane e nonofo ma le faamaoni ma a latou avā, ma faaalia pea le alofa faamaoni iā i latou. O se tane e pulea e le alofa faamaoni lona laulaufaiva, e na te lē faaali atu i isi tagata masei o lana avā pe tautala i upu e taʻufaatauvaa ai o ia. E fiafia e viviia lana avā. (Faata. 31:28) Pe a tulaʻi mai ni faafitauli i le aiga, o le alofa faamaoni e uunaʻia ai le tane e pulea lona laulaufaiva, ae aua le faamāina lana avā.

12. E faapefea ona faaalia i upu a se avā, e pulea e le tulafono o le alofa faamaoni lona laulaufaiva?

¹² E tatau foʻi ona pulea e le tulafono o le alofa faamaoni le laulaufaiva o le avā. Aua neʻi taaʻina lana tautala i le agaga o le lalolagi. Ona e “matuā faaaloalo o ia i lana tane,” e tautala ai i mea lelei e faatatau iā te ia i luma o tagata, ma atili ai ona faaaloalo isi i lana tane. (Efe. 5:33) I lona lē manaʻo e faaitiitia le faaaloalo o lana fanau i lo latou tamā, e na te ʻalofia le faatautee atu, pe e fesiligia foʻi ona manatu i luma o le fanau. E na te foʻia na mataupu na o i laʻua. Ua faapea mai le Tusi Paia: “Ua atiaʻe e le fafine atamai lona fale.” (Faata. 14:1) O lona aiga o se nofoaga e maua ai e le aiga atoa le fiafia ma le lotomalie.

13. O fea tonu e tatau ona faatatauina ai le tulafono o le alofa faamaoni, ma e faapefea ona faia faapea?

¹³ E oo lava i totonu o o latou aiga, e tatau ona faaaogā ai pea e paaga faaipoipo o latou laulaufaiva, i se auala e faaalia ai le feavataʻi. Na tusi Paulo: “Ia outou tuu ese mai iā te outou le lotoa, o le ita, o le leaga, o upuleaga, ma e lē tatau ona sau se upu masoā mai i o outou gutu.” Ona ia toe faapea mai lea: “Ia oofu outou i le alofa mutimutivale, le agalelei, lotomaulalo, agamalu ma le faapalepale. . . . Ia oofu outou i le alofa, auā o le fusi lea e atoatoa ona autasi ai.” (Kolo. 3:8, 12-14) Pe a masani ona faalogo fanau i upu alofa ma  agalelei i le aiga, e lē gata e ola manuia ai ae e faaaʻoaʻo ai foʻi i le auala e tautatala ai o latou mātua.

14. E faapefea ona faaaogā e ulu o aiga o latou laulaufaiva e faamāfanafana ai ē o loo latou tausia?

¹⁴ Na tusi le faisalamo e faatatau iā Ieova: “Ia faamāfanafanaina aʻu e lou alofa faamaoni.” (Sala. 119:76) O se auala mataʻina o loo faamāfanafana ai e Ieova ona tagata, o le avatu lea i ai o timaʻiga ma le taʻitaʻiga. (Sala. 119:105) E faapefea ona aogā i ulu o aiga le faaaʻoaʻoga a lo tatou Tamā i le lagi, ma faaaogā o latou laulaufaiva e faamāfanafana ai ē o loo latou tausia? E ala i lo latou saunia o le taʻitaʻiga ma faalaeiauga e manaʻomia. O le Tapuaʻiga afiafi a le Aiga, o le avanoa lelei lea e maua ai ʻoa faaleagaga.—Faata. 24:4.

Faaalia le Alofa Faamaoni i Uso Talitonu

15. E faapefea ona faaaogā e toeaina ma isi ua taʻumatuaina faaleagaga, o latou laulaufaiva e leoleoina ai le faapotopotoga?

¹⁵ Na tatalo le tupu o Tavita: “Ia leoleoina pea aʻu e lou alofa faamaoni ma lau upu moni.” (Sala. 40:11) E faapefea i toeaina Kerisiano ma isi ua taʻumatuaina faaleagaga i le faapotopotoga, ona faaaʻoaʻo iā Ieova i lenei vala? O le faaaogā o o tatou laulaufaiva e ōgatusa ma lenei fautuaga, e mautinoa o se faaaliga o le alofa faamaoni.—Faata. 17:17.

16, 17. O ā nisi o auala e faaalia ai o loo pulea e le tulafono o le alofa faamaoni a tatou upu?

¹⁶ O le ā e ao ona tatou fai pe a iloa ua agaʻi ina faia e se Kerisiano se mea e feteenaʻi ma mataupu silisili o le Tusi Paia? Pe e lē o le alofa faamaoni, e uunaʻia ai i tatou e faaaogā o tatou laulaufaiva e taumafai e faasaʻo o ia? (Sala. 141:5) Pe a tatou iloa ua faia e se uso talitonu se agasala matuiā, o le alofa faamaoni e uunaʻia ai i tatou e faalaeiau le tagata fai mea sesē, e “aami atu . . . toeaina o le faapotopotoga” ina ia “tatalo mo ia, ma uu iā te ia i le suāuu i le suafa o Ieova.” (Iako. 5:14) Pe a lē taʻuina atu e le tagata fai mea sesē lana mea sesē i toeaina, e lē o se alofa po o le agalelei pe a tatou lē taʻuina i toeaina. Atonu ua lotovaivai nisi, lagona le tuua toʻatasi, mafatia i faalogona o le lē aogā, po ua lofitūina i mea e faanoanoa ai. O le auala lelei e faaalia ai o loo i o tatou laulaufaiva le tulafono o le alofa faamaoni, o le “faamāfanafana i ē mafatia.”—1 Tesa. 5:14.

¹⁷ E faapefea ona tatou tali atu pe a faasalalau e fili o le Atua ni talasalatua e faatatau i uso talitonu? Nai lo o le masalomia o le faamaoni o o tatou uso, ia teena na tala e aunoa ma le toe tali atu i ai, pe fesili atu i lē ua faia le  tuuaʻiga pe a talafeagai, pe e iai se faamaoniga o ana faamatalaga. Pe a saʻilia e fili o tagata o le Atua le mea o iai o tatou uso Kerisiano ina ia fai se mea leaga iā i latou, o le alofa faamaoni i o tatou uso e tatou te lē taʻuina atu ai ni faamatalaga.—Faata. 18:24.

O Lē e “Alofa Faamaoni, e Maua e Ia le Ola”

18, 19. Aiseā e lē tatau ai ona teʻa ese i o tatou laulaufaiva le tulafono o le alofa faamaoni i le va feagai ai ma uso tapuaʻi?

¹⁸ E tatau ona iloa le alofa faamaoni i lo tatou va feagai ai ma uso tapuaʻi iā Ieova. E lē tatau ona teʻa ese i o tatou laulaufaiva le tulafono o le alofa faamaoni, e oo lava i tulaga faigatā. Na lē fiafia le finagalo o Ieova ina ua avea le alofa faamaoni o le fanauga a Isaraelu e pei o “le sau e vave ona mavae atu.” (Ho. 6:4, 6) Ae e fiafia le finagalo o Ieova pe a faaalia pea e tagata le alofa faamaoni. Seʻi manatu i le auala ua ia faamanuiaina ai i latou o loo faaalia lenā uiga.

¹⁹ Ua taʻua i le Faataoto 21:21: ‘⁠O lē e na te saʻilia le amiotonu ma le alofa faamaoni, e maua e ia le ola, o le amiotonu ma le mamalu.’ O se tasi o faamanuiaga o le a maua e lea tagata, o le ola e lē uma. E fesoasoani Ieova iā te ia ina ia “taofimau i le ola moni.” (1 Timo. 6:12, 19) O lea la, seʻi o tatou “faaauau ona alofa faamaoni . . . le tasi i le isi.”—Saka. 7:9.

[Faaopoopoga i lalo]

O le ā Lau Tali?

• E faapefea ona e faamatalaina le alofa faamaoni?

• O le ā e fesoasoani ina ia iai i o tatou laulaufaiva le tulafono o le alofa faamaoni?

• E faapefea ona faaalia e paaga faaipoipo le alofa faamaoni i a latou upu?

• O le ā e faaalia ai o loo iai le tulafono o le alofa faamaoni i o tatou laulaufaiva, i le va feagai ai ma uso talitonu?

[Fesili mo le Suʻesuʻega]

[Ata i le itulau 23]

Na viiviia e Tavita le alofa faamaoni o Ieova

[Ata i le itulau 24]

Po o faia e lē aunoa le Tapuaʻiga afiafi a lou Aiga?