Lo Tatou Taʻitaʻi Sogasogā i Aso Nei

“Ua alu atu o ia ina ia manumalo, ma e oo ina manumalo aʻiaʻi.”—FAAA. 6:2.

1, 2. (a) Ua faapefea ona faamatalaina i le Tusi Paia gaoioiga a Keriso o se tupu talu mai le 1914? (e) O ā mea na faia e Keriso talu ona avea o ia ma tupu?

NA AVEA Keriso ma tupu o le Malo faa-Mesia a Ieova i le 1914. O le ā la tatou vaaiga iā te ia i le taimi nei? Pe e tatou te vāai iā te ia o se tupu o loo afio i lona nofoālii, e na o le manatunatu ma fai ma tagatagaʻi mai i le lalolagi po o ā mai lana faapotopotoga? Pe afai o lo tatou manatu lenā, e tatau ona suia. Ua faamatalaina o ia i le Salamo ma le Faaaliga, o se tupu malosi o loo tiʻetiʻe atu i se solofanua “ina ia manumalo, ma e oo ina manumalo aʻiaʻi,” seʻia iʻu ina taulau “manuia” o ia.—Faaa. 6:2; Sala. 2:6-9; 45:1-4.

² O le uluaʻi gaoioiga na faia e Keriso ina ua avea ma tupu, o lona manumalo lea i “le tarako ma ana agelu.” I le avea ma agelu sili o Mikaele o le taʻitaʻiʻau i ana agelu, na lafo ifo ai e Keriso Satani ma ana temoni mai i le lagi paia, ma taofiofia i latou i le lalolagi. (Faaa. 12:7-9) Ona afio mai lea o ia o le “avefeʻau o le feagaiga” a Ieova, faatasi ma lona Tamā e asiasi i le malumalu faaleagaga. (Mala. 3:1) Na faamasinoina e ia lotu ua faapea mai o Kerisiano, le vaega pito sili ona nofosala o “Papelonia le Aai Tele,” ma taʻusalaina i le faamasaatoto ma le mulilua faaleagaga ma malo o lenei lalolagi.—Faaa. 18:2, 3, 24.

Faamamāina Lana Pologa i le Lalolagi

3, 4. (a) O le ā le galuega na faia e Keriso i le avea ma “avefeʻau” a Ieova? (e) O le ā le mea na faaalia ina ua asiasia le malumalu, ma o le ā le tofiga na tofia atu e le Ulu o le faapotopotoga, o Iesu?

³ O le asiasiga a Ieova ma lana “avefeʻau,” na faaalia ai foʻi e iai se vaega o Kerisiano moni i le lotoā faalelalolagi o lenā malumalu faaleagaga, e lē auai i lotu ua faapea mai o Kerisiano. Peitaʻi, e tatau foʻi ona faamamāina nei Kerisiano faauuina, po o “atalii o Levi.” Na valoia e le perofeta o  Malaki: “E nofo o ia [Ieova] o lē e tunu ma faamamā i le siliva ma na te faamamāina atalii o Levi; e na te faamamāina i latou e pei ona faamamā o le auro ma le siliva, ona fai ai lea o i latou ma nuu o Ieova e avatuina le taulaga e fai ma meaalofa i le amiotonu.” (Mala. 3:3) Na faaaogā e Ieova lana “avefeʻau o le feagaiga,” o Keriso Iesu, ina ia faamamāina ai nei Isaraelu faaleagaga.

⁴ Na maua mai e Keriso nei Kerisiano faauuina faamaoni, o loo finafinau e saunia meaʻai faaleagaga i le taimi tatau mo le aiga o le faatuatua. Talu mai le 1879, ua latou lomia ai lenei lomiga o loo iai upu moni o le Tusi Paia e faatatau i le Malo o le Atua, i taimi taugalemu ma taimi e lē taugalemu ai. Na valoia e Iesu, pe a “taunuu” mai e asiasi lana ʻaufaigaluega i “le taufaaiʻuiʻuga o le faiga o mea a le lalolagi,” e na te maua mai se pologa o loo saunia “meaʻai i le taimi tatau” mo i latou. Na fetalai o ia e fiafia lenā pologa, ma e “tofia o ia e vaavaaia ana mea uma” i le lalolagi. (Mata. 24:3, 45-47) Ua faaaogā e le Ulu o le faapotopotoga Kerisiano, o Keriso, lenei “pologa faamaoni ma le faautauta” e vaavaaia Ana mea uma i le lalolagi e tau i le Malo. Ua ia saunia le taʻitaʻiga mo le “ʻaufaigaluega” faauuina ma a latou aumea o “isi mamoe,” e ala i le Vaega Pule.—Ioa. 10:16.

Seleselega o le Lalolagi

5. O le ā na vaaia e Ioane i se faaaliga o loo faia e le Tupu?

⁵ Na maua e le aposetolo o Ioane se faaaliga e uiga i se isi mea e faia e le Tupu faa-Mesia i “le aso o le Alii,” pe a uma ona avea ma tupu i le 1914. Na tusi Ioane: “Ona ou iloa lea, faauta foʻi! o se ao paʻepaʻe, ma i luga o le ao o loo tiʻetiʻe ai se tasi e pei o le atalii o le tagata, o loo iai se palealii auro i lona ulu, ma se selesaito maʻai i lona lima.” (Faaa. 1:10; 14:14) Na faalogo Ioane i se agelu a Ieova o fai atu i Lē e selesaito, e faaoo atu le selesaito auā “ua matuā pula lava le fuata o le lalolagi.”—Faaa. 14:15, 16.

6. O le ā le mea na taʻua e Iesu o le a tupu a o faagasolo le taimi?

⁶ O lenei “fuata [po o le seleselega] o le lalolagi,” e tatou te manatua ai le talafaatusa a Iesu i le saito ma vao leaga. Na faatusa e Iesu o ia i se tagata na lūlūina ni fatu saito i lona fanua, ma le faamoemoe e selesele mai ni saito lelei lea e faaatagia ai ‘⁠atalii o le malo,’ o Kerisiano moni faauuina o ē o le a faatasi ma ia i lona Malo. Ae ina ua oo i le pō, na lūlū ai e le fili, o “le Tiapolo” lea, le fanua i vao leaga, o ‘⁠atalii ia o lē o loo leaga.’ Na faatonu e le tagata lūlū fatu lana ʻaufaigaluega ia tuu pea le saito ma vao leaga e ola faatasi, seʻia oo i le taimi o le seleselega, i “le taufaaiʻuiʻuga o le faiga o mea a le lalolagi.” O le taimi lenā o le a ia aauina mai ai ana agelu e tuu eseese le saito ma vao leaga.—Mata. 13:24-30, 36-41.

7. Ua faapefea ona faamaopoopo e Keriso le seleselega “o le lalolagi”?

 ⁷ Ina ia faataunuuina le faaaliga na tuuina atu iā Ioane, ua faamaopoopo ai e Iesu se galuega o le seleselega o loo faia i le lalolagi aoao. Na amata le seleselega “o le lalolagi” i le aoaoina o ē o totoe o le 144,000, o “atalii o le malo,” o “le saito” i le talafaatusa a Iesu. Na matuā manino mai le eseesega o Kerisiano moni ma Kerisiano pepelo ina ua mavae le Taua Muamua a le Lalolagi, ma na fesoasoani tele lea i le vaega lona lua o le seleselega “o le lalolagi,” o le aoaoina o isi mamoe. E lē o i latou o ni “atalii o le malo,” ae “o se motu o tagata e toʻatele” o tagatānuu usiusitaʻi o lenā Malo. Ua aoaoina i latou mai i “tagata ma nuu ma gagana uma.” E latou te gauaʻi atu i le Malo faa-Mesia, lea ua faia aʻe iā Keriso Iesu ma le 144,000 o le “ʻaupaia,” o ē o le a aufaatasi ma ia i lenā malo i le lagi.—Faaa. 7:9, 10; Tani. 7:13, 14, 18.

Taʻitaʻiga o Faapotopotoga

8, 9. (a) O le ā se mea ua faaalia ai e mātauina e Keriso amioga a le faapotopotoga atoa, ma olaga o ona sui taʻitoʻatasi? (e) O ā “mea loloto a Satani” e tatau ona tatou ʻalofia, e pei ona faaalia i le ata i le itulau e 26?

⁸ Na tatou faitau i le mataupu ua mavae, na mataʻitu e Keriso le tulaga faaleagaga o faapotopotoga taʻitasi i le uluaʻi senituri T.A. Talu ai ua tuuina atu i le Tupu le “pule uma i le lagi ma le lalolagi,” ua sogasogā ai foʻi i aso nei Keriso lo tatou Taʻitaʻi e faatino lona tulaga ulu, i faapotopotoga i le lalolagi aoao ma o latou ovasia. (Mata. 28:18; Kolo. 1:18) Ua “tofia o ia [e Ieova] e fai ma ulu i mea uma lava mo le lelei o le faapotopotoga” o le ʻaufaauuina. (Efe. 1:22) Ona o lea, e lē lilo i lana silafaga so o se mea e tupu i totonu o le silia i le 100,000 o faapotopotoga o Molimau a Ieova.

⁹ O le feʻau lenei na tuuina atu e Iesu i le faapotopotoga anamua o Tuatira: “O mea ia ua faapea mai ai le Atalii o le Atua, o lē e pei o le afi mumū ona mata, . . . ‘⁠ua ou iloa au galuega.’” (Faaa. 2:18, 19) Na aʻoaʻia e ia sui o lenā faapotopotoga ona o o latou olaga lē mamā ma manatu faapito, ina ua ia faapea atu iā i latou: “O aʻu o lē e suʻesuʻeina faalogona loloto ma manatu, ma ou te taui atu iā te outou taʻitoʻatasi e tusa ma a outou galuega.” (Faaa. 2:23) O lenā faamatalaga ua faaalia ai e mātauina e Keriso amioga a faapotopotoga taʻitasi, ma olaga o sui taʻitoʻatasi o le faapotopotoga. Na faamālō atu Iesu i Kerisiano i Tuatira, ‘⁠o ē e lē iloa mea loloto a Satani.’ (Faaa. 2:24) E faapena foʻi aso nei, e fiafia o ia i ē iti ma ē matutua, o ē e faamamao ese mai i le saʻili atu i “mea loloto a Satani,” e ala i le Initaneti po o taaloga vitiō e iai faiga sauā, po o le lolo atu i manatu tuufau o tagata. Maʻeu lona fiafia e mātauina taumafaiga ma mea ua faataulagaina e le toʻatele o Kerisiano i aso nei, o ē ua taumafai malosi e mulimuli i lana taʻitaʻiga i vala uma o o latou olaga!

10. Ua faapefea ona faaata mai le taʻitaʻia e Keriso o toeaina o faapotopotoga, ae o le ā le faatulagaga e ao ona amanaʻia?

¹⁰ Ua saunia e Keriso le vaavaaiga alofa o ana faapotopotoga i le lalolagi, e ala i toeaina tofia. (Efe. 4:8, 11, 12) I le uluaʻi senituri, na faauuina ovasia uma i le agaga. I le Faaaliga o loo faaata ai i latou o ni fetu i le aao taumatau o Keriso. (Faaa. 1:16, 20) I aso nei, e toetoe lava o toeaina uma i faapotopotoga o i latou o isi mamoe. E tofia i latou pe a mavae ni tatalo ma e ala i le taʻitaʻiga a le agaga paia, ua mafai foʻi la ona manatu iā i latou o loo taʻitaʻia e le aao o Keriso. (Galu. 20:28) Peitaʻi ua latou amanaʻia, o loo faaaogā e Keriso se vaega toʻaitiiti o tane Kerisiano faauuina, o se Vaega Pule e taʻitaʻia ma faatonutonuina ona soo i le lalolagi.—Faitau le Galuega 15:6, 28-30.

 “Inā Maliu Mai ia le Alii e, Iesu”

11. Aiseā e tatou te naunau ai e vāai i le vave maliu mai o lo tatou Taʻitaʻi?

¹¹ I le faaaliga na tuuina atu iā Ioane, e iai taimi na taʻua ai e Iesu e vave ona alu atu o ia. (Faaa. 2:16; 3:11; 22:7, 20) E lē taumatea na faatatau lana faamatalaga i lona maliu mai e faaumatia Papelonia le Aai Tele, ma le vaega totoe o le lalolagi amioleaga a Satani. (2 Tesa. 1:7, 8) Ona o le naunau e vaai i le faataunuuga o mea matagofie uma na valoia, na faapea atu ai le aposetolo matua o Ioane: “Amene! Inā maliu mai ia le Alii e, Iesu.” O i tatou foʻi o ē o loo ola i le taimi o le iʻuga o lenei faiga amioleaga o mea, e tatou te naunau e vāai i lo tatou Taʻitaʻi ma le Tupu, o loo maliu mai i le mana o le Malo ina ia faapaia le suafa o lona Tamā, ma faamaonia le tonu o Lana pule silisili ese.

12. O le ā le galuega o le a faamāeʻa e Keriso a o leʻi tatalaina matagi o le faaumatiaga?

¹² A o leʻi faaumatia e Iesu le faalapotopotoga vaaia a Satani, o le a maua e sui mulimuli o le 144,000 o le Isaraelu faaleagaga, le faamaufaailogaina faaiʻu. O loo manino ona taʻua i le Tusi Paia o le a lē tatalaina matagi o le faaumatiaga o le lalolagi a Satani, a o leʻi māeʻa lenei faamaufaailogaina o le 144,000.—Faaa. 7:1-4.

13. E faapefea ona faaali mai e Keriso lona faatasi mai, a o faagasolo le vaega muamua o le “puapuaga tele”?

¹³ E lē o iloa e le toʻatele o tagata o le lalolagi le “faatasi mai” o Keriso talu mai le 1914. (2 Pete. 3:3, 4) Peitaʻi ua toeitiiti ona ia faaalia lea o lona faatasi mai, e ala i le faaoo mai o faasalaga a Ieova i tafa eseese o le faiga o mea a Satani. O le faaumatiaga o “le tagata o le amioleaga,” o taʻitaʻi o lotu ua faapea mai o Kerisiano, o se faailoga manino lenā o le “faaali mai i lona faatasi mai.” (Faitau le 2 Tesalonia 2:3, 8.) O le a matuā faamaonia ai e gaoioi Keriso o le Faamasino tofia a Ieova. (Faitau le 2 Timoteo 4:1.) O le a amata le faaumatiaga atoatoa o lotu sesē uma o le lalolagi, i le faaumatiaga o le vaega e sili ona nofosala o Papelonia le Aai Tele. O le a tuuina e Ieova i loto o taʻitaʻi o malo e latou te faaumatia lenei fafine talitane faaleagaga. (Faaa. 17:15-18) O le vaega muamua lenā o le “puapuaga tele.”—Mata. 24:21.

14. (a) Aiseā o le a faapuupuuina ai le vaega muamua o le puapuaga tele? (e) O le ā le uiga o “le faailoga o le Atalii o le tagata” mo auauna a Ieova?

¹⁴ Na fetalai Iesu o le a faapuupuuina aso o lenā puapuaga “ona o ē ua filifilia,” o le vaega totoe o Kerisiano faauuina o loo iai pea i le lalolagi. (Mata. 24:22) O le a lē faatagaina e Ieova lenei faaumatiaga o lotu sesē, e avea ma itu e tafiesea ai Kerisiano faauuina ma a latou aumea o isi mamoe. Na taʻua atili e Iesu “a mavae . . . le puapuaga o ia aso,” o le a iai faailoga i le lā, masina ma fetu, “ona iloa ai lea i le lagi o le faailoga o le Atalii o le tagata.” Ona “taufaitagituʻi ai lea” o atunuu o le lalolagi ona o lenei mea. Ae e lē o le tulaga lenā o le ʻaufaauuina, o ē e iai le faamoemoe i le lagi, ma a latou aumea, o ē e iai le faamoemoe i le lalolagi. O le a latou ‘⁠tutū i luga ma ea i luga o latou ulu, auā ua latalata ona laveaʻiina i latou.’—Mata. 24:29, 30; Luka 21:25-28.

15. O le ā le galuega o le a faia e Keriso pe a maliu mai?

¹⁵ A o leʻi manumalo aʻiaʻi o ia, o le a maliu mai le Atalii o le tagata i se isi auala. Na valoia e ia: “Pe a taunuu le Atalii o le tagata i lona  mamalu, ma agelu uma faatasi ma ia, ona tiʻetiʻe ai lea o ia i lona nofoālii mamalu. E faapotopotoina foʻi atunuu uma i ona luma, ona tuueseeseina lea e ia o tagata, e pei ona tuueseeseina e se leoleo mamoe o mamoe ma ʻoti. Ona ia tuuina lea o mamoe i lona itu taumatau, a o ʻoti i lona itu tauagavale.” (Mata. 25:31-33) E faatatau atu lenei mau i le maliu mai o Keriso o le Faamasino e tuueseese tagata o “atunuu uma” i ni vaega se lua: “o mamoe,” o i latou o ē e matuā lagolagoina ona uso faaleagaga (o Kerisiano faauuina i le lalolagi), ma “ʻoti” o “ē e lē usiusitaʻi i le tala lelei a lo tatou Alii o Iesu.” (2 Tesa. 1:7, 8) O le a maua e mamoe, o i latou ua taʻua “o ē e amiotonu,” le “ola e faavavau” i le lalolagi, a o ʻoti ‘o le a ō atu i latou i le faaumatiaga e faavavau.’—Mata. 25:34, 40, 41, 45, 46.

E Manumalo Aʻiaʻi Iesu

16. O le a faapefea ona manumalo aʻiaʻi lo tatou Taʻitaʻi o Keriso?

¹⁶ Pe a faamaufaailogaina le aofaʻi atoa o ē o le a fai ma tupu ma ositaulaga faatasi ma Keriso, ma iloa mamoe ma tuu i latou i lona itu taumatau mo le faaolataga, ona alu atu lea o ia ma “e oo ina manumalo aʻiaʻi.” (Faaa. 5:9, 10; 6:2) I le avea ma taʻitaʻi o se ʻautau malosi o agelu, ma e lē taumatea o ona uso ua toe faatutūina, o le a ia faaumatia le faiga aoao o mea faapolotiki, faavaegāʻau ma faapisinisi a Satani. (Faaa. 2:26, 27; 19:11-21) O le a manumalo aʻiaʻi Keriso pe a ia faaumatiaina le faiga amioleaga o mea a Satani. Ona ia saisaitia lea o Satani ma ana temoni i le tō mo le afe tausaga.—Faaa. 20:1-3.

17. O fea o le a taʻitaʻia ai e Keriso isi mamoe a o faagasolo le Pulega i le Afe Tausaga, ma o le ā e ao ona tatou maumauaʻi e fai?

¹⁷ Ina ua taʻua “se motu o tagata e toʻatele” o isi mamoe o ē o le a faasaoina mai le puapuaga tele, na valoia e le aposetolo o Ioane o le a “leoleoina i latou e le Tamaʻi Mamoe o loo i tafatafa o le nofoālii, ma e na te taʻitaʻia i latou i vaipuna o le vai o le ola.” (Faaa. 7:9, 17) A o faagasolo le Pulega a Keriso i le Afe Tausaga, o le a faaauau ona taʻitaʻia e ia isi mamoe, o ē e faalogo moni i lona siʻufofoga, ma taʻitaʻia i latou i le ola e faavavau. (Faitau le Ioane 10:16, 26-28.) Tau ina ia tatou mulimuli ma le faamaoni i lo tatou Taʻitaʻi ma o le Tupu, i le taimi nei seʻia oo i le lalolagi fou na folafola mai e Ieova!

O se Autaluga

• O le ā le mea na faia e Keriso ina ua avea ma tupu?

• O ai o loo faaaogā e Keriso e taʻitaʻia faapotopotoga?

• O ā auala o le a maliu mai ai i le lumanaʻi Keriso lo tatou Taʻitaʻi?

• E faapefea ona faaauau ona taʻitaʻia i tatou e Keriso i le lalolagi fou?

[Fesili mo le Suʻesuʻega]

[Ata i le itulau 29]

O le a faaali mai i le faaumatiaga o le faiga amioleaga o mea a Satani le faatasi mai o Keriso