O le Autasi e Iloa ai le Tapua‘iga Moni
O le Autasi e Iloa ai le Tapuaʻiga Moni
“Ou te autasia i latou e pei o se lafu i le lotoā.”—MIKA 2:12.
1. Ua faapefea ona faamaonia le atamai o le Atua i le foafoaga?
NA FAAPEA mai le faisalamo: “Ieova e, ua matuā tele lava au galuega! Ua e faia ia mea uma i le atamai. Ua tumu foʻi le lalolagi i mea na e faia.” (Sala. 104:24) Ua iloa le atamai o le Atua i le mataʻina o le ola felagolagomaʻi o le faitau miliona o ituaiga o laau eseese, o iniseti, manu, ma meaola ninii. Ua iai foʻi i o tatou tino le faitau afe o vaega eseese, mai lava i totoga lapopoʻa e oo i sela ninii, ma e galulue faatasi ina ia e malosi ma mālōlōina ai.
2. E pei ona faaalia i le ata i le itulau e 13, aiseā e foliga mai ai e pei o se vavega le autasi o le faapotopotoga Kerisiano?
2 Na foafoaina e Ieova tagata ina ia ola felagolagomaʻi. E eseese foliga vaaia o tagata, o uiga, ma o latou tomai. E lē gata i lea, na Ia tuuina i le uluaʻi tagata uiga e pei o ona uiga, ia mafai ai ona galulue faatasi ma faalagolago le tasi i le isi. (Kene. 1:27; 2:18) Peitaʻi, i le taimi nei, o le toʻatele o tagata ua faaesea i latou mai i le Atua, ma ua lē mafai lava ona galulue ma le autasi. (1 Ioa. 5:19) Ae a fua i le eseese o tagata na faia aʻe ai le faapotopotoga Kerisiano i le uluaʻi senituri, e pei o pologa mai i Efeso, o tamaʻitaʻi tāua o Eleni, o tane popoto o Iutaia, ma ē na tapuaʻi muamua i tupua, e foliga mai o se vavega lo latou autasi.—Galu. 13:1; 17:4; 1 Tesa. 1:9; 1 Timo. 6:1.
3. Ua faapefea ona faamatala mai i le Tusi Paia le autasi o Kerisiano, ma o ā vala o le a tatou iloiloina i lenei mataupu?
3 O le tapuaʻiga moni, ua mafai ai ona galulue autasi tagata e pei ona galulue autasi o o tatou itutino eseese. (Faitau le 1 Korinito 12:12, 13.) O nisi nei o vala o le a tatou iloiloina i lenei mataupu: E faapefea ona autasi tagata ona o le tapuaʻiga moni? Aiseā ua na o Ieova ai e mafai ona autasia le faitau miliona o tagata mai i atunuu uma? O ā toʻatugā i le autasi ua fesoasoani mai Ieova iā i tatou e foʻia? Ua faapefea ona ese le faa-Kerisiano moni ona o le autasi, mai i lotu ua taʻua o Kerisiano?
Ua Faapefea Ona Autasia e le Tapuaʻiga Moni Tagata?
4. Ua faapefea ona autasia tagata e le tapuaʻiga moni?
4 E talisapaia e tagata i le tapuaʻiga moni e faapea, ona o Ieova na faia mea uma, o ia la o le Pule Silisili Ese i le aoao o mea. (Faaa. 4:11) O lea, e ui e eseese tulaga ma siʻomaga o loo soifua aʻe ai Kerisiano moni, ae e usiusitaʻi uma i tulafono a le Atua, ma ola e tusa ai ma mataupu silisili o le Tusi Paia. O lea la, ua talafeagai ai i tagata uma o le tapuaʻiga moni ona taʻua Ieova o le “Tamā.” (Isa. 64:8; Mata. 6:9) O le mea lea, ua avea ai i latou uma o le ʻauuso faaleagaga, ma ua olioli ai i le autasi matagofie ua faamatalaina e le faisalamo: “Faauta! Maʻeu le lelei ma le matagofie pe a nonofo faatasi o uso i le autasi!”—Sala. 133:1.
5. O le ā le uiga e saosaolaumea i le autasi o tagata tapuaʻi moni?
5 E ui e lē lelei atoatoa Kerisiano moni, ae e latou te tapuaʻi faatasi ma le autasi ona ua aʻoaʻoina i latou ia alofa le tasi i le isi. E leai se isi e pei o Ieova i le aʻoaʻoina o i latou ia fealofani. (Faitau le 1 Ioane 4:7, 8.) Ua faapea mai lana Afioga: “Ia oofu outou i le alofa mutimutivale, le agalelei, lotomaulalo, agamalu ma le faapalepale. Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia. Ae o le sili i nei mea uma, ia oofu outou i le alofa, o le fusi lea e atoatoa ona autasi ai.” (Kolo. 3:12-14) O lea, o le alofa, o le fusi e atoatoa ona autasi ai, o le uiga autū lenā e mātaulia ai Kerisiano moni. E tusa ma mea ua e iloa, pe e te lē o mātauina ea, o lenei autasi, o le vala lea ua tutasi ai le tapuaʻiga moni?—Ioa. 13:35.
6. Ua faapefea ona autasia i tatou ona o le faamoemoe o le Malo?
6 E autasi foʻi tagata tapuaʻi moni ona e tepa taulaʻi atu i le Malo o le Atua, e na o lea le faamoemoe o tagata. Ua latou iloa, e lē o toe umi ona sui tulaga lea o le Malo o le Atua i pulega a tagata, ma faamanuia tagata usiusitaʻi i le filemu moni e tumau. (Isa. 11:4-9; Tani. 2:44) O lea, e utagia e Kerisiano fetalaiga a Iesu e faatatau i ona soo: “E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioa. 17:16) E solitū Kerisiano moni i feteenaʻiga a le lalolagi; ma ua latou autasi ai, e ui ina fetauaʻi tagata i o latou vaipanoa.
Le Puna e Tasi o Aʻoaʻoga Faaleagaga
7, 8. Ua faapefea ona saosaolaumea faatonuga mai i le Tusi Paia i lo tatou autasi?
7 Sa autasi Kerisiano i le uluaʻi senituri, ona sa latou maua uma faalaeiauga mai le puna e tasi. Na latou iloa, o loo aʻoaʻo ma faatonutonu e Iesu le faapotopotoga e ala i le vaega pule, lea sa faia aʻe i le ʻauaposetolo ma toeaina i Ierusalema. Sa faavae i le Afioga a le Atua faaiʻuga a nei tane tuuina atu, ma na faaoo atu e ovasia femalagaaʻi a latou faatonuga i faapotopotoga i le tele o atunuu. Ua faapea mai le Tusi Paia e faatatau i nisi o na ovasia: “A o latou ō atu i aai, ua latou tuuina atu iā i latou i inā o poloaʻiga na faia e le ʻauaposetolo ma toeaina i Ierusalema, ina ia latou tausia.”—Galu. 15:6, 19-22; 16:4.
8 Ua faapena foʻi i aso nei, ona saosaolaumea le Vaega Pule ua faia aʻe i Kerisiano faauuina i le agaga, i le autasi o le faapotopotoga i le lalolagi aoao. Ua saunia e le Vaega Pule lomiga i le tele o gagana, e faalaeiau ai faaleagaga. E faavae nei meaʻai faaleagaga i le Afioga a le Atua. O lea, o mea ua aʻoaʻoina, e lē mai i tagata ae e mai iā Ieova.—Isa. 54:13.
9. E faapefea ona tatou autasi ona o la tatou galuega mai i le Atua?
9 E faaauiluma e ovasia Kerisiano le autasi e ala i le taʻimua i le talaʻiga. E sili atu ona malosi le faiā māfana lea e autasi ai i latou o loo auauna i le Atua, i lo o faiā a tagata o le lalolagi e na ona miomiō faatasi. E leʻi faavaeina le faapotopotoga Kerisiano o se mea e na ona tafafao ai, a ia faamamaluina ai Ieova ma faataunuu ai le galuega, o le talaʻia lea o le tala lelei, faia isi ma soo, ma atiaʻe le faapotopotoga. (Roma 1:11, 12; 1 Tesa. 5:11; Epe. 10:24, 25) O lea, ua faapea mai le aposetolo o Paulo e faatatau i Kerisiano: “Ua outou tutū mausalī i le mafaufau e tasi ma le tino e tasi, a o galulue soosootauʻau mo le faatuatua i le tala lelei.”—Fili. 1:27.
10. O ā ni auala ua tatou autasi ai o tagata o le Atua?
10 O lea la, ua tatou autasi ai o tagata o Ieova, ona o le lagolagoina o le pule silisili ese a Ieova, alolofa i o tatou uso, faamoemoe i le Malo o le Atua, ma faaaloalo i ē ua tofia e le Atua e taʻimua iā i tatou. Ua fesoasoani mai Ieova iā i tatou e foʻia uiga e māfua ona o lo tatou lē lelei atoatoa, ma lamatia ai lo tatou autasi.—Roma 12:2.
Faatoʻilalo le Faamaualuga ma le Matauʻa
11. Aiseā e fevaevaeaʻi ai tagata ona o le faamaualuga, ma ua faapefea ona fesoasoani Ieova iā i tatou ia faatoʻilalo lea uiga?
11 O le faamaualuga e fevaevaeaʻi ai tagata. E manatu le tagata faamaualuga e sili o ia, ma e fai ma ana masani le gugutu. Ae e lē maua ai se autasi, auā e oso ai le lotoleaga o ē e faalogologo i ai. Ua taʻutino mai e le soo o Iakopo iā i tatou: “E leaga le faamaualuga.” (Iako. 4:16) E lē o se alofa le vaai maulalo i isi. Ae ua avea Ieova ma faaaʻoaʻoga mataʻina o le lotomaulalo, ona e feutagaʻi o Ia ma tagata lē lelei atoatoa e pei o i tatou. Na tusi Tavita: “O lou agamalu [le Atua e] ua faasilisiliina ai aʻu.” (2 Samu. 22:36) Ua fesoasoani mai le Afioga a le Atua e faatoʻilalo le faamaualuga, i le aʻoaʻoina lea o i tatou e mafaufau lelei. Na faagaeeina Paulo e fesili: “O ai na faia oe ia ese mai i le isi? Auā o le ā se mea o iā te oe e leʻi foaʻiina atu? Ae afai na foaʻiina atu iā te oe, aiseā la e te mimitavale ai e peiseaʻī e leʻi foaʻiina atu?”—1 Kori. 4:7.
12, 13. (a) Aiseā e faigofie ai ona matauʻa? (e) O le ā le aogā o lo tatou vaai i isi e pei ona silasila o Ieova iā i latou?
12 O le matauʻa, o se tasi lea o toʻatugā masani i le autasi. Ona o le tino agasala, ua iai iā i tatou uma “le agaga o le matauʻa,” ma e iai taimi e matauʻa ai foʻi i latou ua leva ona avea ma Kerisiano, ona o tulaga, o meafaitino, faaeaga, po o tomai o isi. (Iako. 4:5) O se faaaʻoaʻoga, atonu e matauʻa se uso ua fai sona aiga, ona o faaeaga ua maua e se uso e galue faataimi atoa, e aunoa ma lona iloa, e fai foʻi si matauʻa o le uso o loo galue faataimi atoa, ona e leai sana fanau e pei o ia. E faapefea ona puipuia lo tatou autasi ia lē faaleagaina e le matauʻa?
13 Ina ia fesoasoani iā i tatou e ʻalofia le matauʻa, ia manatua ua faatusatusa e le Tusi Paia sui faauuina o le faapotopotoga Kerisiano i itutino o le tagata. (Faitau le 1 Korinito 12:14-18.) O se faaaʻoaʻoga, e iloagofie ou mata i lo o lou fatu, ae e tāua uma na mea iā te oe. E faapena foʻi ona tāua iā Ieova sui uma o le faapotopotoga, e ui o loo maua faaeaga o isi mo sina taimi. O lea, ia vaai i o tatou uso e pei ona silasila Ieova iā i latou. Aua le matauʻa i isi ae ia alofa ma naunau i ai. O le faia faapea, ua faaeseese ai Kerisiano moni ma i latou i lotu ua taʻua o Kerisiano.
O le Fevaevaeaʻi—Ua Iloga ai Lotu ua Taʻua o Kerisiano
14, 15. Na faapefea ona lē autasi le Faa-Kerisiano ua tetee i le upu moni?
14 Ua matuā eseese le autasi o Kerisiano moni ma le fevaevaeaʻi o lotu ua taʻua o Kerisiano. E oo ane i le senituri lona fā, ua matuā salalau atu le Faa-Kerisiano e tetee i le upu moni, o lea, na faamaopoopo ai e le emeperoa faapaupau o Roma, ma tele ai lotu ma atunuu ua taʻua o Kerisiano. Na faasolosolo ona vavaeese le tele o atunuu mai i le pulega a Roma, ma faavae lotu a o latou lava malo.
15 Ua faitau senituri o fetauaʻi le tele o na malo. I le gasologa o le senituri lona 17 ma le 18, na uunaʻia ai tagata i Peretania, Falani, ma Amerika, ia faamuamua o latou atunuu, ma avea ai le lotonuu e pei o se lotu e tapuaʻi i ai. I le vaitaimi o le senituri lona 19 ma le 20, na faasilisilia ai e le toʻatele o tagata le lotonuu. Mulimuli ane, na vavaeese ai mai i lotu autū ua taʻua o Kerisiano le anoanoaʻi o isi lotu, ma e leʻi leaga i le tele o na lotu le lotonuu. Ona o le lotonuu, na iʻu ai ina fetauaʻi tagata mai atunuu eseese, e ui ina tutusa o latou talitonuga. I aso nei, ua fevaevaeaʻi ai lotu ua taʻua o Kerisiano, ona o le eseese o talitonuga, ma le lotonuu.
16. O ā mea ua fevaevaeaʻi ai lotu ua taʻua o Kerisiano?
16 I le senituri lona 20, na taumafai ai nisi lotu mai i le faitau selau o lotu ua taʻua o Kerisiano, ina ia autasi lotu. E ui ua tele tausaga o faia na taumafaiga, ae e lē tele ni lotu ua mafai ona autasi, ona o loo fefinauaʻi pea le toʻatele o tagata lotu i talitonuga e iai le evolusione, le faapaʻū tama, tauatane, ma le tofia o fafine e avea ma faifeʻau. Ua taumafai taʻitaʻi lotu o nisi lotu Kerisiano, ia autasi tagata o lotu eseese e ala i le lē faatāuaina o aʻoaʻoga ua māfua ai ona fevaevaeaʻi. Ae, o le lē faatāuaina o na aʻoaʻoga, ua faavaivaia ai le faatuatua o tagata, ma ua lē mafai ai ona autasi lotu Kerisiano fevaevaeaʻi.
E Sili i lo o le Lotonuu
17. Na faapefea ona valoia le autasi o tagata tapuaʻi moni i “aso e gata ai”?
17 Ua sili ona fevaevaeaʻi tagata i le taimi nei, ae e iloga tagata tapuaʻi moni ona o le autasi. Na valoia e le perofeta a le Atua o Mika e faapea: “Ou te autasia i latou e pei o se lafu i le lotoā.” (Mika 2:12) Na valoia e Mika le siitia o le tapuaʻiga moni e sili i isi tapuaʻiga, po o atua sesē, po o malo ua avea ma atua. Na tusi o ia: “O aso e gata ai, e oo ina faatumauina ai le mauga o le fale o Ieova i luga o tumutumu o atumauga, e faamaualugaina foʻi e sili i aʻega; ma e gasolo ane i ai tagata. Auā e taʻitasi nuu uma ma savavali i le igoa o lona atua; a o i tatou, e tatou te savavali i le suafa o Ieova lo tatou Atua.”—Mika 4:1, 5.
18. O ā suiga ua mafai ona tatou faia ona o le tapuaʻiga moni?
18 Ua faamatala foʻi e Mika le auala e autasia ai e le tapuaʻiga moni i latou na feitagaʻi muamua. “E ō mai lava nuu e tele ma faapea ane: ‘Ō mai ia outou, ma tatou ō aʻe i le mauga o Ieova, i le fale o le Atua o Iakopo; e na te aʻoaʻo mai iā i tatou i ona ala, ma tatou savavali ai i ona ala.’ . . . E latou te tuʻi a latou pelu e fai ma suōtosina, ma a latou tao e fai ma pelu e teu ai laau. E latou te lē toe sii le pelu, o le tasi atunuu i le isi atunuu, pe e latou te toe aʻoaʻo foʻi i taua.” (Mika 4:2, 3) O ē e tuua tapuaʻiga i atua e faia e tagata po o malo ae tapuaʻi iā Ieova, e olioli i latou i le autasi i le lalolagi aoao. E aʻoaʻoina i latou e le Atua i ala o le alofa.
19. O le ā ua faamaonia ona o le autasi o le faitau miliona o tagata i le tapuaʻiga moni?
19 Ua mataʻina le autasi o Kerisiano moni i le lalolagi aoao i aso nei, ma ua faamaonia mai ai o loo faaauau ona taʻitaʻia e Ieova ona tagata e ala i lona agaga. Ua sili ona toʻatele tagata mai i atunuu uma ua autasi i se tulaga e leʻi faapea ona iai muamua i le talafaasolopito o tagata. O se faataunuuga mataʻina lea o le Faaaliga 7:9, 14, ma ua faailoa mai ai, ua toeitiiti ona tatala mai lea e agelu a le Atua “matagi” e faaumatia ai lenei faiga leaga o mea. (Faitau le Faaaliga 7:1-4, 9, 10, 14.) Pe e lē o se faaeaga ea le autasi ma o tatou uso i le lalolagi aoao? O le ā so tatou sao e faia i lenā autasi? O le a maua tali o na fesili i le mataupu e sosoo mai.
O le ā Lau Tali?
• Ua faapefea ona autasia tagata e le tapuaʻiga moni?
• E faapefea ona puipuia lo tatou autasi mai i le faaleagaina e le matauʻa?
• Aiseā e lē mafai ai e le lotonuu ona lepeti le autasi o tagata tapuaʻi moni?
[Fesili mo le Suʻesuʻega]
[Ata i le itulau 13]
E eseese talaaga o Kerisiano i le uluaʻi senituri
[Ata i le itulau 15]
E faapefea ona fesoasoani i le autasi lou auai i galuega o Maota mo Sauniga?