Fesoasoani i Fanau ia Iloa Lelei le Faalapotopotoga a Ieova

E FIA iloa e tamaiti mea. Seʻi manatu i fesili atonu sa fesili ai tamaiti Isaraelu i Aikupito, i le pō o le uluaʻi Paseka: ‘Aiseā ua tapē ai le tamaʻi mamoe?’ ‘Aiseā ua tuu ai e Dad le toto i luga o le pou faalava ma pou e lua o le faitotoʻa?’ ‘O fea e tatou te ō i ai?’ E tatou te iloa na talia e Ieova na ituaiga fesili ona o lana faatonuga na tuu atu i tamā o Isaraelu. Na fetalai Ieova iā i latou e tusa ai o faamanatuga o le Paseka i le lumanaʻi: “Pe a fesili mai o outou atalii iā te outou, ‘O le ā le uiga o lenei vala o le tapuaʻiga iā te outou?’ ona outou tali atu lea, ‘O le taulaga o le paseka iā Ieova, o lē na sopoloa i fale o tagata Isaraelu i Aikupito ina ua ia faaoo le malaia i tagata Aikupito, ae faasaoina o tatou aiga.’” (Eso. 12:24-27) Mulimuli ane na faamanatu atu e Ieova i mātua Isaraelu, le tāua o le taliina o fesili a a latou fanau e faatatau i “tuutuuga, ma iʻuga o faamasinoga” na poloaʻi mai ai Ieova.—Teu. 6:20-25.

 E manino mai, e finagalo Ieova ia maua e tamaiti tali faamalieloto i a latou fesili e faatatau i le tapuaʻiga moni, o tali e uunaʻia ai i latou e alolofa iā Ieova o lo latou Atua ma o le Faaola. O le mea foʻi lenā e finagalo i ai Ieova mo a tatou fanau i aso nei. O se tasi auala e mafai ai e mātua ona totō i loto o a latou fanau le alofa i le Atua ma ona tagata, o le fesoasoani lea iā i latou ia iloa lelei le faalapotopotoga a Ieova, ma malamalama i aogā e latou te maua mai i mea ua faia e le faalapotopotoga. Seʻi o tatou iloilo la nisi o auala e mafai ona fesoasoani ai i le fanau ma talavou, ia iloa lelei le faalapotopotoga a le Atua.

La Outou Faapotopotoga

E tatau ona iloa e le fanau le faapotopotoga o loo auai i ai lo outou aiga. Ina ia taulau lenei mea, e ao iā te outou o mātua ona ō faatasi ma a outou fanau i sauniga uma faa-Kerisiano. O lenā auala, ua outou mulimuli ai i le faaaʻoaʻoga na faataatia e Ieova mo Isaraelu, o ē na faatonuina: “Ia faapotopoto le nuu, o tane, o fafine, o fanau iti . . . , ina ia latou faalogo ma latou aʻoaʻo ai, auā e ao ona latou matataʻu iā Ieova lo outou Atua, ma ia toʻaʻaga e tausia upu uma o lenei tulafono. O o latou atalii o ē e leʻi iloa muamua ia aʻoaʻoga, e ao ona latou faalogo ma aʻoaʻoina ia matataʻu iā Ieova lo outou Atua.”—Teu. 31:12, 13.

E mafai ona amata aʻoaʻo tamaiti i le Afioga a Ieova a o laiti lava. Na taʻua e Paulo e uiga iā Timoteo: “Na e iloa foʻi tusitusiga paia talu ona e laʻitiiti.” (2 Timo. 3:15) E oo lava foʻi i tamaiti laiti e amata ona malamalama i faamatalaga o loo faia i sauniga i le Maota mo Sauniga, ma faamasani i pese o le  Malo. O i inā e latou te iloa ai faaaogā ma faatāua le Tusi Paia ma lomiga faale-Tusi Paia. E lē gata i lea, o le a latou lagona i a tatou sauniga le uiga lea e mātaulia ai soo moni o Keriso, o le alofa moni. Na fetalai Iesu: “Ua ou tuuina atu iā te outou le poloaʻiga fou, ina ia outou alolofa o le tasi i le isi; e pei ona ou alofa atu iā te outou, ia outou alolofa foʻi o le tasi i le isi. O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioa. 13:34, 35) O le a fiafia fanau i le alofa māfana ma le saogalemu moni lea e maua i le Maota mo Sauniga, ma o le a fesoasoani iā i latou e avea ai le auai i sauniga o se faiga tumau i o latou olaga.

Pe a fai ma au masani le vave taunuu i le Maota mo Sauniga ma lē vave alu ese pe a tuua sauniga, o le a maua e lau fanau le avanoa e fai ai ni uō. Nai lo o le tuu atu o i latou e faauō i na o isi tamaiti, e lelei pe a e faamasani atu i latou i uso ma tuafāfine e eseese lo latou matutua. Pe afai e masani lau fanau i tagata matutua, o le a latou iloa e tele mea mananaia na tutupu i tagata matutua ma e tele foʻi lo latou atamai. E pei ona lelei le taaʻiga a Sakaria anamua o lē ‘na aʻoaʻoina le mataʻu i le Atua moni’ i le talavou o Usia, o le tupu o Iuta, e faapea foʻi ona avea i latou o ē ua auauna ma le faamaoni iā Ieova i aso nei mo le tele o tausaga, o se taaʻiga lelei i fanau ma talavou. (2 No. 26:1, 4, 5) A o iai la i le Maota mo Sauniga, e mafai ona e faamatala atu i lau fanau le aogā o le potu tusi, laupapa mo faasilasilaga ma isi mea.

Le Faalapotopotoga i le Lalolagi Aoao

E tatau ona iloa e fanau, o la outou faapotopotoga o se vaega o le faalapotopotoga i le lalolagi aoao lea e iai le silia i le 100,000 faapotopotoga. Faamatala i ai vala o lenei faalapotopotoga, o le auala o loo faagaoioi ai, ma le vaega a fanau e lagolagosua ai i mea o loo faia. Taʻu i ai le māfuaaga e te tulimataʻia ai fonotaga matagaluega, tauaofiaga itumalo, ma asiasiga a le ovasia matagaluega.—Tagaʻi i le pusa  “Mataupu e Talanoaina i le Tapuaʻiga a le Aiga,” i le itulau e 28.

Pe a maua le avanoa, valaaulia ovasia femalagaaʻi, misionare, tagata o le aiga Peteli ma isi o loo iai i le auaunaga faataimi atoa, ina ia faiʻaiga faatasi ma lou aiga. Aua e te manatu e leai so latou taimi e avanoa mo fanau ma talavou. O loo taumafai nei auauna faataimi atoa e faaaʻoaʻo iā Iesu, o lē sa fiafia i tamaiti ma talanoa atu iā i latou. (Mare. 10:13-16) Pe a faalogo atu o faamatala mai e na auauna a Ieova mea na tutupu i la latou auaunaga, ma vaaia lo latou olioli i le auaunaga paia, atonu la o le a avea foʻi le auaunaga faataimi atoa ma sini o lau fanau.

O ā nisi mea e mafai ona fai e lou aiga ina ia fesoasoani ai i lau fanau ia iloa lelei le faalapotopotoga a Ieova? O nisi nei o fautuaga: Ia iloilo faatasi e le aiga le tusi Jehovah’s Witnesses—Proclaimers of God’s Kingdom. Faamatilatila le faamaoni, lotomaulalo ma le alofa na faaalia e auauna a Ieova. Faailoa i ai le auala na faaaogā ai e Ieova i latou e faasalalau atu le tala lelei i le lalolagi aoao. Faaaogā ata vitiō ua saunia e le faalapotopotoga a Ieova, e aʻoaʻo ai lesona mai i taimi ua teʻa ma le taimi nei. Pe afai e mafai, ia asiasi atu i le lālā ma le aiga Peteli i lou atunuu, po o isi atunuu. O na asiasiga o le a aogā e iloa ai e lau fanau le auala ua faamaopoopo ai le vaega i le lalolagi o le faalapotopotoga a Ieova, ina ia mafai ai e le vasega o le pologa faamaoni ona saunia meaʻai faaleagaga mo le ʻauuso i le lalolagi aoao, e pei ona sa faia i le uluaʻi senituri T.A.—Mata. 24:45-47; Galu. 15:22-31.

Faasolosolo Ona Aʻoaʻo le Tamaitiiti

Pe a aʻoaʻo lau fanau, ia manatua le auala na aoao ai e Iesu ona aposetolo. Na fetalai atu o ia iā i latou: “E tele mea ou te fia taʻu  atu iā te outou, ae e lē mafai ona outou malamalama i na mea uma i le taimi nei.” (Ioa. 16:12) E leʻi lofitūina e Iesu ona soo i le tele o faamatalaga. Ae na faasolosolo ona ia aʻoaʻo atu iā i latou upu moni tāua, ina ia mafai ona latou malamalama lelei i ai. Ia aua foʻi neʻi e lofitūina lau fanau. Pe a e aʻoaʻoina i latou e lē aunoa ma faasolosolo e uiga i le faalapotopotoga a Ieova, o le a latou fiafia pea ma avea le aʻoaʻoina e uiga i le faapotopotoga Kerisiano, o se mea e fiafia i ai. A o suia mea e ao ona iloa e lau fanau, e mafai ona e toe taʻu atu ma faalautele lo latou iloa e uiga i mea ua uma ona latou aʻoaʻoina.

O le faapotopotoga Kerisiano o se puna tāua o le malosi faaleagaga, ma o fanau e maelega e fai se sao i mea fai a le faapotopotoga, ua lava saunia e tetee atu i taaʻiga o le lalolagi a Satani. (Roma 12:2) E matou te mautinoa o le a e olioli i le fesoasoani atu i lau fanau ia iloa lelei le faalapotopotoga a Ieova. E ala i lana faamanuia, tau ina ia latou pipii atu ma le faamaoni i lana faalapotopotoga, ma le Atua alofa o loo tatou auauna i ai.

 [Pusa/Ata i le itulau 28]

Mataupu e Talanoaina i le Tapuaʻiga a le Aiga

O nisi nei o mataupu e fesootaʻi atu i le faalapotopotoga a Ieova, e mafai ona outou talanoaina a o fai le Tapuaʻiga a lou Aiga.

▪ Faamatala le talaaga o la outou faapotopotoga. O anafea ma na faapefea ona amata? O ā Maota mo Sauniga eseese na faaaogā e le faapotopotoga? Pe a talanoa i lenei mataupu, atonu e manaia pe a valaaulia se tagata ua leva o le faapotopotoga, e sau i le tou fale ina ia tali fesili a lau fanau.

▪ Faamatala le fuafuaga o sauniga taʻitasi a le faapotopotoga ma faatasiga tetele, ma aogā e mafai ona maua e le fanau mai i nei sauniga ma faatasiga.

▪ Iloilo aogā o aʻoga eseese ua faatulaga e le faalapotopotoga a Ieova. Faamatala ni mea na tutupu e faaalia ai iʻuga lelei ua fua mai e i latou na auai i nei aʻoga.

▪ Fesoasoani i le fanau ia iloa le tāua o le avea ma tagata talaʻi e lē aunoa o le tala lelei. Faailoa iā i latou le auala e mafai ai ona fai sa latou vaega i le lipoti o le lalolagi aoao, lea e i le Yearbook of Jehovah’s Witnesses.

▪ Talanoa i galuega eseese o le auaunaga faataimi atoa e avanoa mo talavou o loo i le faalapotopotoga a Ieova. O loo iai faamatalaga aogā i le mataupu e 10 o le tusi Ia Faamaopoopo Ina ia Faia le Finagalo o Ieova.

▪ Fesoasoani i fanau ma talavou ia iloa le māfuaaga ua mulimuli ai le faapotopotoga i ni faatulagaga maʻoti. Taʻu i ai le pogai e lē tatau ai ona latou fia tutoʻatasi ese mai i le faalapotopotoga a Ieova, e oo lava i nai mea iti. Taʻu i ai e latou te saosaolaumea i le sologa lelei o le faapotopotoga, pe a mulimuli i le taʻitaʻiga a toeaina.

[Ata]

O le ā aogā i lau fanau le faauō atu i ē ua loa ona auauna iā Ieova

[Ata i le itulau 26]

E pei o Isaraelu anamua, e taumafai mātua i aso nei e avatu tali faamalieloto pe a fesiligia e uiga i le faalapotopotoga a Ieova