Ia Faaauau Pea Ona Saʻili Muamua “le Amiotonu a le Atua”

“O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.”—MATA. 6:33.

1, 2. O le ā le amiotonu a le Atua, ma o le ā e faavae ai?

“O LEA, ia faaauau pea ona outou saʻili muamua le malo.” (Mata. 6:33) Ua masani Molimau a Ieova i aso nei i le faatonuga lenei na fetalai ai Iesu Keriso i lana Lauga i le Mauga. E tatou te taumafai e faaalia i vala uma o o tatou olaga, e tatou te alolofa i lenā Malo ma mananaʻo e faamaoni i ai. Ae e lē tatau foʻi ona galo le vaega lona lua o lenei mau, lea e faapea mai “ma le amiotonu a le Atua.” O le ā le amiotonu a le Atua, ma o le ā le uiga ia saʻili muamua lea amiotonu?

² O upu o uluaʻi gagana o le Tusi Paia mo le “amiotonu,” e mafai foʻi ona faaliliuina i le “fai mea tonu” po o le “amio saʻo.” O lona uiga la, e saʻo le amiotonu a le Atua e tusa ma ana lava tapulaa ma mea e tāua iā te ia. Talu ai o ia na Foafoaina mea, ua iā Ieova la le aiā e faatulaga ai le mea saʻo ma le mea sesē, le mea e lelei ma le mea e leaga. (Faaa. 4:11) Peitaʻi, o le amiotonu a le Atua e lē o se  faasologa o ni tulafono pulepuletutū po o se lisi umi o ni faasāsāga ma aiāiga. Nai lo o lea, o loo faavae i le ituaiga Atua e iai o ia ma lona uiga autū o le faamasinotonu, faatasi ai ma isi ona uiga autū o le alofa, atamai ma le malosi. E fesootaʻi la le amiotonu a le Atua ma lona finagalo. E aofia ai mea e na te faatalitalia mai i ē e naunau e tapuaʻi atu iā te ia.

3. (a) O le ā le uiga ia saʻili muamua le amiotonu a le Atua? (e) Aiseā e tatou te tausisia ai tapulaa amiotonu a Ieova?

³ O le ā le uiga ia saʻili muamua le amiotonu a le Atua? O lona uiga ia fai le finagalo o le Atua ina ia faafiafia ai o ia. O le saʻilia o le amiotonu e aofia ai le taumafai e ola e tusa ai ma mea e tāua i le Atua ma ana tapulaa lelei atoatoa, ae e lē o a tatou lava tapulaa ma mea e faatāua. (Faitau le Roma 12:2.) O lenei ituaiga olaga e aofia ai la tatou faiā ma Ieova. E lē o le usiusitaʻi i ana tulafono ona o le fefe ina neʻi faasalaina. Ae o le alofa i le Atua e uunaʻia ai i tatou e faafiafia o ia, e ala i le tausisia o ana tapulaa ae e lē o le faia o a tatou lava tapulaa. Ua tatou iloa o le mea tonu lea e ao ona fai, auā ua faia i tatou ina ia faia faapea. E tatau ona tatou fiafia i le amiotonu e pei o Iesu Keriso, le Tupu o le Malo o le Atua.—Epe. 1:8, 9.

4. Aiseā e tāua tele ai ona saʻili le amiotonu a le Atua?

⁴ Aiseā e tāua ai ona saʻili le amiotonu a Ieova? Seʻi manatu i le mea moni lenei: Na faavae le uluaʻi tofotofoga i le faatoʻaga i Etena i le manatu, pe faamata o le a talia pe e lē talia e Atamu ma Eva le aiā a Ieova e faataatitia ai tapulaa. (Kene. 2:17; 3:5) Ona o lo la lē taliaina o le aiā a Ieova e faataatitia ai tapulaa, ua oo mai ai puapuaga ma le oti iā i tatou o ē na tupuga mai iā i laʻua. (Roma 5:12) Ae ua taʻua i le Afioga a le Atua: “O lē e na te tuliloaina le amiotonu ma le alofa faamaoni, e maua e ia le ola, o le amiotonu ma le mamalu.” (Faata. 21:21) Ioe, o le saʻilia muamua o le amiotonu a le Atua o le a maua ai se faiā lelei ma Ieova, ma iʻu ai i lo tatou faaolataga.—Roma 3:23, 24.

Lamatiaga o le Faafiaamiotonu

5. O le ā le lamatiaga e ao ona tatou ʻalofia?

⁵ Ina ua tusi atu le aposetolo o Paulo i Kerisiano i Roma, na ia faamatilatila se lamatiaga e ao iā i tatou uma ona ʻalofia ina ia taulau ai i le saʻilia muamua o le amiotonu a le Atua. Na taʻua e Paulo e uiga i tagata Iutaia: “Ua ou molimau iā i latou, ua latou maelega i le Atua; ae e lē tusa ai ma le poto saʻo; ona o lo latou lē iloaina o le amiotonu a le Atua a ua latou saʻili e faatū la latou lava amiotonu, ua latou lē gauaʻi ai i le amiotonu a le Atua.” (Roma 10:2, 3) E tusa ai o upu a Paulo, e leʻi malamalama na tagata tapuaʻi i le amiotonu a le Atua, ona sa latou matele e faatū la latou lava amiotonu. *

6. O le ā le uiga e tatau ona tatou ʻalofia, ma aiseā?

⁶ E mafai ona tatou aafia i lenei lamatiaga, pe a manatu i la tatou auaunaga i le Atua o se tauvaga, i le faatusatusa lea o la tatou auaunaga i le auaunaga a isi. O lenei uiga e mafai ona iʻu ai ina tatou soona mautinoa naʻuā i o tatou lava tomai. Peitaʻi, pe a tatou faia faapea, o le a galo ai iā i tatou le amiotonu a Ieova. (Kala. 6:3, 4) O le uunaʻiga saʻo mo le faia o le mea tonu, o lo tatou alolofa iā Ieova. O le taumafai e faamaonia la tatou lava amiotonu, e mafai ona faalēaogāina ai la tatou taʻutinoga e alolofa iā te ia.—Faitau le Luka 16:15.

7. Na faapefea ona taulaʻi atu Iesu i le faafitauli o le faafiaamiotonu?

⁷ Sa popole Iesu i “ē ua faatuatua iā i latou lava, o ni tagata faafiaamiotonu, o ē ua vaai maulalo i isi.” Na taulaʻi o ia i le faafitauli o le faafiaamiotonu e ala i le taʻua o le faataʻitaʻiga lenei: “E toʻalua ni tamāloloa ua ō atu i  le malumalu e tatalo ai, o le tasi o le Faresaio, a o le isi o le aolafoga. Ua tū le Faresaio ma tatalo e faapea, ‘Le Atua e, ou te faafetai atu iā te oe ona ua ou lē pei o isi tagata, o ē e faia mea faapiʻopiʻo, o ē e amiolētonu, o ē e mulilulua, ua ou lē pei foʻi o lenei aolafoga. E faalua ona ou anapogi i le vaiaso, ou te avatu le sefuluaʻi o mea uma ou te maua.’ A ua tū mamao mai le aolafoga, ma e leʻi mafai ona tepa aʻe ona mata i le lagi, a ua tuʻituʻi pea lona fatafata ma faapea atu, ‘Le Atua e, ia e alofa mai iā te aʻu le tagata agasala.’” Na faaiʻu e Iesu i le faapea atu: “Ou te fai atu iā te outou, Na alu lenei tagata i lona aiga, ua sili ona amiotonu o ia nai lo o lea tagata; auā o sē e faaeaina e ia o ia lava, e faamaulaloina lea, a o sē e faamaulaloina e ia o ia lava, e faaeaina lea.”—Luka 18:9-14.

O se Isi Lamatiaga, o le “Amiotonu Naʻuā”

8, 9. O le ā le uiga o le “amiotonu naʻuā,” ma o le ā e mafai ona iʻu i ai?

⁸ O se isi lamatiaga e ao ona tatou ʻalofia o loo faamatalaina i le Failauga 7:16: “Aua e te amiotonu naʻuā pe faaalialia le tele o lou atamai. Aiseā e te faapogaia ai le faafanoina o oe lava?” Ona taʻua lea e le tusitala o le Tusi Paia i le fuaiupu e 20, le māfuaaga e tatou te ʻalofia ai lenā uiga: “Auā e leai se tagata e amiotonu i le lalolagi e na te faia pea le mea lelei ma e lē agasala.” O le tagata e “amiotonu naʻuā,” e faia e ia ana lava tapulaa o le amiotonu ma faamasinoina isi e tusa ma na tapulaa. Ae e na te lē o iloa o le faia faapea, ua ia faasili ai ana tapulaa i lo o tapulaa a le Atua, ma faaalia ai lona lē amiotonu i le silafaga a le Atua.

⁹ O le “amiotonu naʻuā” po o le “soona amiotonu” e pei ona faaliliuina ai i nisi Tusi Paia, e mafai foʻi ona tatou fesiligia ai le auala e taulima ai e Ieova mataupu. Ae e ao ona manatua, pe afai e tatou te fesiligia le tonu ma le saʻo o faaiʻuga a Ieova, e tusa lenā ua tatou faasilisilia a tatou tapulaa o le amiotonu i lo o tapulaa a Ieova. E pei ua tatou faamasinoina Ieova e tusa ma a tatou lava tapulaa o le mea e saʻo ma le mea e sesē. Peitaʻi, ua iā Ieova le aiā e faataatitia ai tapulaa o le amiotonu, ae e lē o i tatou!—Roma 14:10.

10. E pei o Iopu, o le ā e ono faapogaia ai i tatou e faamasinoina le Atua?

¹⁰ E ui e leai se isi o i tatou e manaʻo e faamasino le Atua, ae e mafai ona tupu lenei mea ona o lo tatou tino agasala. E faigofie lava ona tupu lenei mea pe a tatou iloa se mea e manatu i ai e lē saʻo, pe aafia foʻi i ni tulaga faigatā. E oo lava i le tane faatuatua o Iopu sa iai lenā manatu sesē. Na taʻua Iopu i le amataga o lē “e leʻi taʻuleagaina ma na amio saʻo . . . , na mataʻu i le Atua ma ʻaloʻalo ese i mea leaga.” (Iopu 1:1) Ona oo lea iā Iopu o ni mala mataʻutia, lea na ia manatu i ai e lē tonu. O lenei mea na iʻu ai ina “taʻuamiotonuina [e Iopu] o ia lava nai lo o le Atua.” (Iopu 32:1, 2) Sa toe faasaʻoina le manatu o Iopu. E lē tatau la ona faateʻia i tatou, pe afai e iai ni taimi e tatou te ono aafia ai foʻi i se tulaga faapena. Pe a tupu lenā tulaga, o le ā e fesoasoani iā i tatou ina ia toe faasaʻo ai o tatou manatu?

 E Lē o Taimi Uma e Tatou te Iloa ai le Mea Atoa

11, 12. (a) O le ā e ao ona tatou manatua pe a manatu i se mea e lē tonu? (e) Aiseā e ono manatu ai se tasi o loo faaalia i le talafaatusa a Iesu i le ʻaufaigaluega i le togāvine, se faiga e lē tonu?

¹¹ O le mea muamua ia manatua, e lē o taimi uma e tatou te iloa ai le mea atoa. O le mea moni lenā i le tulaga o Iopu. E na te leʻi iloa faatasiga a atalii agelu o le Atua i le lagi, lea na tuuaʻia sesē ai o ia e Satani. (Iopu 1:7-12; 2:1-6) E leʻi iloa e Iopu o Satani na māfua ai ona faafitauli. O le mea moni, e tatou te lē mautinoa pe na iloa e Iopu po o ai Satani! O lea na sesē ai lona manatu e faapea o le Atua ua māfua ai ona faafitauli. Ioe, e faigofie ona tatou faia se faaiʻuga sesē pe afai e tatou te lē iloaina le mea atoa.

¹² O se faataʻitaʻiga, seʻi manatu i le talafaatusa a Iesu i le ʻaufaigaluega i le togāvine. (Faitau le Mataio 20:8-16.) Ua taʻua e Iesu se tagata e ana le togāvine, e tutusa le totogi ua ia totogiina ai lana ʻaufaigaluega uma, e tusa pe na latou galulue i le aso atoa pe e na o le tasi le itula. O le ā sou manatu i lenā mea? Pe e tonu lenā faiga? Atonu e vave ona e mafaufau i ē na faigaluega i le aso atoa i le aasa o le lā. E mautinoa e tatau ona sili atu lo latou totogi! Pe a fua i lenā manatu, e mafai ona vaai i lē e ana le togāvine o sē e lē alofa ma e lē amiotonu. E oo lava foʻi i lana tali na fai atu i le ʻaufaigaluega na faitio atu, e aliali mai ai na ia faaaogā sesē le pule. Ae po o tatou iloa le mea atoa?

13. O le ā le isi manatu e mafai ona tatou maua, pe a toe iloilo le talafaatusa a Iesu e uiga i le ʻaufaigaluega i le togāvine?

¹³ Seʻi o tatou toe iloiloina lenei talafaatusa. E mautinoa sa iloa e lē e ana le togāvine i le talafaatusa, e manaʻomia e nei tane uma ona fafaga o latou aiga. I aso o Iesu, o tagata e faigaluega i le fanua e totogi i le aso. Sa faalagolago o latou aiga i o latou totogi e maua i aso taʻitasi. Ona o lenei mea, seʻi manatu i le tulaga o i latou na maua e lē e ana le togāvine, ua lata ina uma le aso ma galulue ai mo le itula e tasi. Atonu e lē lava le totogi o le itula e tasi e fafaga ai o latou aiga; peitaʻi na latou fia galulue ma faatalitali i le aso atoa e maua se galuega. (Mata. 20:1-7) E lē o i latou na māfua ai ona latou lē galulue mo le aso atoa. E leai se faamaoniga e faaalia ai na latou mumusu e galulue. Seʻi faapea ua e faatalitali i le aso atoa, ae ua e iloa o loo faalagolago isi i lou totogi e maua i lenā aso. Maʻeu lou lotofaafetai pe a maua se galuega, ma e matuā faateʻia oe pe a lava le totogi e fafaga ai lou aiga!

14. O le ā le lesona tāua ua tatou aʻoaʻoina mai i le talafaatusa i le togāvine?

¹⁴ Seʻi o tatou toe tilofaʻia gaoioiga a lē e ana le togāvine. E na te leʻi faaitiitia le totogi o se tasi. Ae na feagai o ia ma le ʻaufaigaluega uma, o ē o loo iai le aiā e maua ni tupe e tausia ai i latou ma o latou aiga. Ona o le toʻatele o tagata na fia faigaluega, sa mafai la e lē e ana le togāvine ona faafaigaluega tagata mo ni totogi laiti. Peitaʻi e na te leʻi faia faapea. Na toe foʻi lana ʻaufaigaluega uma ua lava a latou tupe e fafaga ai o latou aiga. O le iloiloina  o nei faamatalaga faaopoopo, e ono suia ai o tatou manatu i ana gaoioiga. O se gaoioiga alofa lana faaiʻuga ma e na te leʻi faaaogā sesē le pule. O le ā le lesona tatou te aʻoaʻoina mai ai? Pe a tatou iloiloina na o ni nai manatu, e vave lava ona tatou faia se faaiʻuga sesē. O lea la, ua faamatilatila mai ai i lenei talafaatusa le silisili o le amiotonu a le Atua, lea e lē na o ni tulafono ma agavaa o se tagata e faavae ai.

Atonu e Sesē pe Gata Mai o Tatou Manatu

15. Aiseā e ono sesē ai pe gata mai o tatou manatu e faatatau i mea e tonu?

¹⁵ O le mea lona lua ia manatua pe a tatou feagai ma se tulaga e foliga mai e lē tonu, atonu e sesē pe gata mai o tatou manatu. E mafai ona sesē ona o le tino agasala, faaituʻau, po o aganuu na ola aʻe ai. E gata mai ona e tatou te lē iloa uunaʻiga ma mea o loo i loto o tagata. Ae o Ieova ma Iesu, e lē gata mai lo la silafia.—Faata. 24:12; Mata. 9:4; Luka 5:22.

16, 17. Aiseā na ono lē faataunuuina ai e Ieova lana tulafono o le mulilua ina ua agasala Tavita ma Patesepa?

¹⁶ Seʻi o tatou iloiloina le tala e uiga i le mulilua a Tavita ma Patesepa. (2 Samu. 11:2-5) E tusa ai o le Tulafono a Mose, sa tatau ona fasiotia i laʻua. (Levi. 20:10; Teu. 22:22) E ui lava na faasalaina i laʻua e Ieova, ae e na te leʻi faataunuuina lana tulafono. Pe sa lē tonu le mea na faia e Ieova? Pe sa ia faaʻauʻau iā Tavita ma solia ai Ana tapulaa amiotonu? O le manatu lenā o nisi tagata faitau o le Tusi Paia.

¹⁷ Peitaʻi, o le tulafono lenei e uiga i le mulilua, na tuu atu e Ieova i faamasino lē lelei atoatoa, o ē e lē mafai ona iloaina loto o tagata. E ui e gata mai lo latou iloa, ae sa aogā lenei tulafono ina ia talafeagai ai faaiʻuga o a latou faamasinoga. Peitaʻi e silafia e Ieova loto o tagata. (Kene. 18:25; 1 No. 29:17) E lē tatau la ona tatou faatalitalia o le a gauaʻi atu Ieova i se tulafono na ia saunia mo faamasino lē lelei atoatoa. Afai o le tulaga lenā, ua tutusa lea ma le faamalosia o se tagata e lelei lana vaai e faaaogā matatioata na faia mo ē e lē lelei la latou vaai. Sa silafia e Ieova loto o Tavita ma Patesepa ma silasila i lo la salamō moni. Ona o lea, na ia faamasinoina ai i laʻua i se auala alofa mutimutivale.

Ia Faaauau Ona Saʻili le Amiotonu a Ieova

18, 19. O le ā e fesoasoani iā i tatou ina ia lē faamasinoina ai Ieova e tusa ma a tatou lava tapulaa o le amiotonu?

¹⁸ Pe a iai ni taimi e tatou te mātauina ai se mea e tatou te manatu ua lē tonu ona tauaao e Ieova, pe tatou te faitau ai i se tala i le Tusi Paia pe tupu iā i tatou, seʻi aua lava neʻi o tatou faamasinoina le Atua e tusa ma a tatou lava tapulaa o le amiotonu. Ia manatua, e lē o taimi uma e tatou te iloa ai le mea atoa ma atonu e sesē pe gata mai o tatou manatu. Ia aua neʻi galo, “o le ita o le tagata e lē tupu mai ai le amiotonu mai le Atua.” (Iako. 1:19, 20) O lenei auala o le a lē ‘matuā ita ai o tatou loto iā Ieova.’—Faata. 19:3.

¹⁹ Seʻi o tatou pei o Iesu, ia iloa i taimi uma ua na o Ieova e iai le aiā e faataatitia ai tapulaa mo le mea e tonu ma lelei. (Mare. 10:17, 18) Taumafai ia maua le “poto saʻo” pe malamalama i ana tapulaa. (Roma 10:2; 2 Timo. 3:7) O le taliaina o nei tapulaa ma ola e tusa ai ma le finagalo o Ieova, e faaalia ai o loo tatou saʻili muamua “le amiotonu a le Atua.”—Mata. 6:33.

[Faaopoopoga i lalo]

Pe E te Manatua?

• Aiseā e tāua ai ona saʻili le amiotonu a Ieova?

• O ā lamatiaga e lua e tatau ona tatou ʻalofia?

• E faapefea ona tatou saʻili muamua le amiotonu a le Atua?

[Fesili mo le Suʻesuʻega]

[Ata i le itulau 9]

O le ā le lesona tatou te aʻoaʻoina mai i le talafaatusa a Iesu i tamāloloa e toʻalua na tatalo i le malumalu?

[Ata i le itulau 10]

Pe sa lē tonu ona tutusa le totogi o tagata na galulue mo le itula e tasi ma i latou na galulue i le aso atoa?