O le ā le Silafaga a Ieova i Faamolemolega?

NA FAI atu le tamāloa: “O le fafine lea na e aumai iā te aʻu, o ia lenā na aumaia le fua o le laau, ona ou ʻai ai lea.” Na tali atu le fafine: “Na faasesē mai le gata iā te aʻu, ona ou ʻai ai lea.” O upu na a o tatou uluaʻi mātua o Atamu ma Eva na fai atu i le Atua, ma na amata mai ai le talaaga umi o le faia e tagata o faamolemolega.—Kene. 3:12, 13.

O le faasalaina e Ieova o Atamu ma Eva ona o lo la lē usiusitaʻi ma le loto iai, ua manino mai ai e leʻi talia e le Atua a la māfuaaga. (Kene. 3:16-19) Po o lona uiga la e manatu Ieova o taimi uma lava e tatou te taʻu atu ai ni māfuaaga tatau, ua tatou faia ni faamolemolega? Pe e na te taliaina nisi māfuaaga faapea e talafeagai? A o leʻi taliina na fesili, seʻi o tatou iloiloina muamua māfuaaga e faia ai e se tagata ni faamolemolega.

E masani lava, e fai e se tagata ni faamolemolega pe afai ua ia faia se mea sesē, ua lē faia se mea sa tatau ona ia faia, pe e iai foʻi se mea e lē manaʻo e na te faia. E ese lenei mai i se faamatalaga saʻo i le pogai ua lē faia ai se mea, po o se faatoesega moni ina ia faamagalo ai. E pei ona faia e Atamu ma Eva, o nisi e latou te faia faamolemolega ina ia natia ai le mea moni. Ma e iai foʻi i latou e faia faamolemolega ona e mananaʻo e ʻalofia iʻuga leaga o a latou gaoioiga.

O le mea moni e tatou te lē mananaʻo e fai ni faamolemolega e tusa ai o la tatou auaunaga i le Atua. E tatau ona tatou faaeteete ia aua neʻi ‘⁠faasesēina i tatou i o tatou lava manatu sesē.’ (Iako. 1:22) O lea la, seʻi o tatou iloiloina nisi o faaaʻoaʻoga ma taʻiala o le Tusi Paia, o le a aogā iā i tatou e “faamautinoa [ai] pea po o ā mea e fiafia i ai le Alii.”—Efe. 5:10.

Mea e Finagalo le Atua e Tatou te Faia

E tatou te maua i le Afioga a le Atua faatonuga maʻoti e ao iā i tatou o tagata o Ieova ona usitaʻia. O se faataʻitaʻiga, o le poloaʻiga a Keriso e “ō atu e fai tagata o nuu uma lava ma soo,” o se faatonuga o loo usitaʻia pea e soo moni uma o Keriso. (Mata. 28:19, 20) Talu ai e tāua tele le faataunuuina o lenā faatonuga, o lea na faapea mai ai le aposetolo o Paulo: “Oi talofa iā te aʻu pe a ou lē folafolaina atu le tala lelei!”—1 Kori. 9:16.

Ae ui i lea, o loo faigatā pea i nisi ua leva ona suʻesuʻeina le Tusi Paia ma i tatou, ona talaʻi atu le tala lelei o le Malo o le Atua. (Mata. 24:14) O isi sa talaʻi ae ua lē toe talaʻi. O ā māfuaaga e masani ona taʻua e i latou ua lē talaʻi? Na faapefea ona tali mai Ieova i ē na lē usiusitaʻi i ana faatonuga maʻoti i aso ua mavae?

Faamolemolega e Lē Talia e le Atua

“E faigatā tele.” O tagata e matamumuli, e foliga mai e faigatā tele iā i latou le galuega talaʻi. Ae seʻi manatu i le lesona e maua mai i le faaaʻoaʻoga a Iona. Na maua e ia se tofiga lea na manatu i ai e faigatā tele, auā na faatonu o ia e Ieova e folafola atu le iʻuga mataʻutia o le a oo iā Nineva. E faigofie ona iloa le māfuaaga na musu ai Iona e faataunuu lenā galuega. O Nineva o le laumua o tagata Asuria, ma sa lauiloa tagata Asuria i le sauā tele. Atonu sa taumānatu Iona: ‘O le a faapefea ona feagai nei tagata ma aʻu? O le  ā o le a latou faia iā te aʻu?’ O lea, e leʻi umi ae sola Iona. Peitaʻi, e leʻi talia e Ieova le faamolemolega a Iona, ae na Ia toe poloaʻia o ia e talaʻi atu i tagata Nineva. Ona lototele lea o Iona e faataunuu lona tofiga, ma na faamanuia Ieova i lana galuega ma lē faaoo ai le malaia i le aai.—Iona 1:1-3; 3:3, 4, 10.

Pe afai e te manatu e faigatā tele ona e talaʻi atu le tala lelei, ia manatua “e mafaia e le Atua mea uma lava.” (Mareko 10:27) Ia e mautinoa o le a faamalosia oe e Ieova pe a e talosaga atu pea i lana fesoasoani, ma o le a ia faamanuia iā te oe pe a iā te oe le lototele e fai ai lau galuega talaʻi.—Luka 11:9-13.

“Ou te lē fia faia.” O le ā se mea e te faia pe a leai sou faanaunauga e fia talaʻi? Ia manatua e mafai ona galue Ieova i totonu iā te oe ma tutupu aʻe ai faanaunauga lelei. Ua faapea mai Paulo: “O le Atua, o lē o loo galue i totonu iā te outou, e tusa ma lona finagalo malie, ina ia outou lotomalilie ma galulue i ai.” (Fili. 2:13) O lea, e mafai ona e talosaga atu iā Ieova ia iai sou faanaunauga e fia faia lona finagalo. O le mea lenā na faia e le tupu o Tavita. Na ʻaiʻoi atu o ia iā Ieova: “Ia faia aʻu ina ia ou savali i lau upu moni.” (Sala. 25:4, 5) E mafai foʻi ona e faia faapea e ala i le tatalo faatauanau, ia uunaʻia oe e Ieova e fai le mea e fiafia ai lona finagalo.

Peitaʻi, pe a tatou lē lavavā pe lotovaivai, atonu o nisi taimi e tatou te faamalosia ai i tatou e auai i le sauniga i le Maota mo Sauniga pe alu i le talaʻiga. Pe afai o le tulaga lenā, pe e tatau la ona tatou manatu e tatou te lē o alolofa moni iā Ieova? E leai. Sa tatau foʻi ona taumafai malosi auauna faamaoni a le Atua i aso ua mavae, e fai le finagalo o le Atua. O se faaaʻoaʻoga, na taʻua e Paulo sa ia ‘tatuʻi lona tino,’ ina ia usiusitaʻi ai i poloaʻiga a le Atua. (1 Kori. 9:26, 27) E tusa lava foʻi la pe tatou te faamalosia i tatou e fai le talaʻiga, e mautinoa o le a faamanuia Ieova iā i tatou. Aiseā? Talu ai o loo tatou faamalosia i tatou e fai le finagalo o le Atua ona o se māfuaaga talafeagai, o le alofa iā Ieova. O le faia faapea, ua tatou faia ai se tali i le tuuaʻiga a Satani e faapea, o le a faafitia e tagata o le Atua o Ia pe a tofotofoina i latou.—Iopu 2:4.

“Ou te pisi tele.” Pe afai ua e lē auai i le talaʻiga ona e te manatu ua e pisi tele, e tāua la ona toe iloilo mea o loo e faatāuaina. Na fetalai Iesu: “O lea, ia faaauau pea ona outou saʻili muamua le malo.” (Mata. 6:33) Ina ia usitaʻia lenā taʻiala, atonu e ao ona faafaigofie lou olaga pe faaaogā nisi taimi o loo e faaalu i mea faafiafia, e auai ai i le galuega talaʻi. E moni e aogā faafiafiaga ma nisi mea e te fiafia e fai, ae e lē o se māfuaaga talafeagai lenā e lē auai ai i le galuega talaʻi. E faamuamua e se auauna a le Atua i lona olaga mea e fesootaʻi atu i le Malo.

“Ou te lē agavaa.” Atonu e te manatu e te lē agavaa e avea ma tagata talaʻi o le tala lelei. Sa manatu nisi auauna faamaoni a Ieova i taimi o le Tusi Paia, e latou te lē agavaa e taulima tofiga na tuuina mai e Ieova iā i latou. O se  faataʻitaʻiga o Mose. Ina ua maua e Mose se tofiga mai iā Ieova, na faapea atu o ia: “Faamolemole Ieova e, e lē o aʻu o se failauga agavaa, talu mai ananafi, po o tala atu o ananafi, talu mai foʻi ona e fetalai mai i lau auauna, auā e lē lelei saʻu failauga.” E ui na faamalosi mai Ieova iā te ia, ae na tali atu Mose: “Ieova e, ou te faamālūlū atu, faamolemole ia e auina atu se tasi o lē ua e finagalo i ai.” (Eso. 4:10-13) O le ā le tali mai a Ieova?

E leʻi tuua e Ieova Mose e aua neʻi faia lona tofiga. Peitaʻi na tofia e Ieova Arona e fesoasoani iā Mose i le faataunuuina o le galuega. (Eso. 4:14-17) E lē gata i lea, a o faagasolo tausaga, na lagolagoina e Ieova Mose ma saunia mea uma na ia manaʻomia ina ia taulau ai ona faataunuu ona tofiga mai i le Atua. I aso foʻi nei, e mautinoa o le a uunaʻia e Ieova uso talitonu ua iai le tomai, ina ia fesoasoani atu iā te oe i le faia o lau faiva. Ae sili ai, ua faamautinoa mai i le Afioga a le Atua o le a fesoasoani Ieova iā i tatou, ina ia agavaa e faia le galuega na ia faatonuina i tatou e fai.—2 Kori. 3:5; tagaʻi i le pusa  “Tausaga e Sili Ona Fiafia o Loʻu Olaga.”

“Ua tigā oʻu faalogona i se isi.” O nisi ua lē toe auai i le talaʻiga po o sauniga a le faapotopotoga ona ua tigā faalogona i se isi, ma ua manatu o le a talia e Ieova lenei faamolemolega mo le lē faia o ni a latou gaoioiga faaleagaga. E ui e moni e tatou te lē fiafia pe a faatigā e se tasi o tatou faalogona, ae po o se māfuaaga talafeagai lea e lē auai ai i gaoioiga faa-Kerisiano? Atonu sa tigā faalogona  o Paulo ma lona uso talitonu o Panapa ina ua uma se la feeseeseaʻiga, ma na iʻu ai ina “matuā feita i laʻua ma fefinauaʻi.” (Galu. 15:39) Ae pe na iai se tasi o i laʻua na lē toe talaʻi ona o lenā mea? E leai!

O lea la, pe afai ua tigā ou faalogona i se uso talitonu, ia manatua e lē o lou uso a Kerisiano o lou fili, ae o Satani o lē e manaʻo e ʻaina oe. Ae o le a lē manumalo le Tiapolo pe afai e te ‘⁠tetee atu iā te ia, ma ia mausalī lou faatuatua.’ (1 Pete. 5:8, 9; Kala. 5:15) Pe afai e faapena lou faatuatua, o le a e “lē faanoanoa” la.—Roma 9:33.

Pe a Itiiti Mea e Mafai Ona Tatou Faia

Ua manino mai ai i nai faaaʻoaʻoga nei, e leai ni māfuaaga talafeagai mai i le Tusi Paia e lē faataunuuina ai faatonuga maʻoti a Ieova, e aofia ai le poloaʻiga e talaʻi atu le tala lelei. Ae atonu e iai ni māfuaaga moni ua itiiti ai mea e mafai ona tatou faia i le talaʻiga. Atonu o isi tiute tauave faale-Tusi Paia ua itiiti ai lo tatou taimi e auai ai i le galuega talaʻi. Atonu foʻi o nisi taimi ua tatou matuā lē lavavā pe mamaʻi tele, ma ua itiiti ai mea e tatou te faia i le auaunaga iā Ieova. Peitaʻi ua taʻua manino i le Afioga a le Atua, e silafia e Ieova lo tatou faanaunauga moni ma manatua e tapulaa mea e mafai ona tatou faia.—Sala. 103:14; 2 Kori. 8:12.

O lea la, e ao ona tatou faaeteete ia aua neʻi soona faamasinoina i tatou lava po o isi i nei mataupu. Na tusi Paulo: “O ai ea oe e te faamasinosino ai i le auauna a le tasi tagata? Auā e pule lona lava matai pe tū pe paʻū o ia.” (Roma 14:4) Nai lo o le faatusatusa o lo tatou tulaga i isi, e tatau ona tatou manatua “e taʻitasi . . . i tatou uma ma tala atu lana amio i le Atua.” (Roma 14:12; Kala. 6:4, 5) Pe a tatou tatalo atu iā Ieova ma taʻu atu māfuaaga ua tatou faia ai, lē faia pe itiiti foʻi mea ua tatou faia, e tatau la ona tatou faia faapea ma “se lotofuatiaifo lelei.”—Epe. 13:18.

Le Pogai e Tatou te Olioli ai i le Auauna iā Ieova

E mafai e i tatou uma ona auauna ma le olioli iā Ieova, auā o mea e na te faafinagaloina e talafeagai ma e mafai ona ausia, e tusa lava po o le ā lo tatou tulaga. Aiseā e tatou te fai atu ai faapea?

Ua taʻua i le Afioga a le Atua: “Aua e te taofia se mea lelei mai i ē ua tatau i ai, pe a mafai ona e faia.” (Faata. 3:27) O le ā ua e mātauina i lenei faataoto e tusa ai o mea e faafinagaloina e le Atua? E lē o faatonuina oe e Ieova e te taumafai e fai mea e mafai ona faia e lou uso talitonu, nai lo lea, ia auauna iā te Ia i le mea e “mafai ona e faia.” Ioe, e tusa po o le ā lo tatou vaivai po o le malolosi, ae e mafai e i tatou uma taʻitoʻatasi ona auauna ma le lotoatoa iā Ieova.—Luka 10:27; Kolo. 3:23.

 [Pusa/Ata i le itulau 14]

“Tausaga e Sili Ona Fiafia o Loʻu Olaga”

E tusa lava pe e iai ni o tatou faafitauli i le tino po o faalogona, ae e lē tatau ona vave manatu o le a lē mafai ona fai so tatou sao atoatoa i le talaʻiga ona o nei mea. Ina ia faataʻitaʻi, seʻi iloilo le mea na tupu iā Ernest, o se uso Kerisiano i Kanata.

Sa iai se faafitauli i le tautala a Ernest ma sa matuā matamuli. Ina ua aafia o ia i se manuʻa tugā i lona papatua, sa faamavae loa mai i lana galuega o se tagata faufale. E ui ina lē atoatoa le malosi o le tino, ae ua ia faaalu le tele o le taimi i le talaʻiga ona ua lē toe faigaluega. O faalaeiauga na faia i sauniga ia paeonia lagolago, na matuā manaʻo ai o ia e faia faapea. Peitaʻi na manatu o ia e lē agavaa e faia lenā galuega.

Ina ia faamaonia e lē lava lona malosi e paeonia lagolago ai, na talosaga ai o ia e paeonia lagolago mo se masina e tasi. Na matuā faateʻia o ia, ona na mafai ona fai lana paeonia lagolago. Ona manatu lea o ia, ‘Ou te iloa e lē mafai ona ou toe faia.’ Ina ia faamaonia lea manatu, sa ia talosaga mo se isi masina, ma na toe mafai foʻi ona ia paeonia lagolago ai.

Na galue Ernest o se paeonia lagolago mo le tausaga atoa, ae na ia taʻua, “Ou te mautinoa e lē mafai ona ou paeonia sauatoa.” Ina ia toe faamaonia lona manatu, na talosaga ai mo le paeonia sauatoa. Na faateʻia o ia ina ua taulau le uluaʻi tausaga o lana paeonia sauatoa. Na filifili e faaauau pea ma na faamanuiaina ma olioli i le paeonia sauatoa mo le lua tausaga, seʻia oo ina maliu ona o aafiaga mai i lona manuʻa. Peitaʻi a o leʻi maliu o ia, e masani ona tagi ma faapea ane i ē na asiasi atu iā te ia, “O na tausaga na ou auauna ai iā Ieova o se paeonia, o tausaga e sili ona fiafia o loʻu olaga.”

[Ata i le itulau 13]

E mafai ona tatou manumalo i so o se faigatā e ono tatou lē auai ai i le talaʻiga

[Ata i le itulau 15]

E fiafia Ieova pe a tatou auauna atu iā te ia ma le lotoatoa, i le faia o mea uma e tatou te mafaia