Pe E te Tausolomua e Faaaloalo i Uso Talitonu?

“Ia matuā alofa faapelepele le tasi i le isi i le alofa faaleuso. Ia tausolomua ona faaaloalo le tasi i le isi.”—ROMA 12:10.

1, 2. (a) O le ā le faatonuga a Paulo i lana tusi i Kerisiano i Roma? (e) O ā fesili o le a tatou talanoaina?

I LANA tusi i Kerisiano i Roma, ua faamatilatila ai e le aposetolo o Paulo e tāua iā i tatou o Kerisiano ona faaalia le alofa i totonu o le faapotopotoga. Ua ia faamanatu mai iā i tatou e lē tatau ona tatou “faatagā alofa.” Ua ia taʻua foʻi le “alofa faaleuso” ma e tatau ona tatou “matuā alofa faapelepele.”—Roma 12:9, 10a.

² Ioe, o le alofa faaleuso e sili atu mea e aofia ai i lo le tau ina iai o ni faalogona māfana i isi. E tatau ona faaalia na faalogona e ala i gaoioiga. Auā o le a lē iloa e tagata lo tatou alofa pe a lē faaalia i gaoioiga. O lea na faaopoopo mai ai e Paulo le faatonuga lenei: “Ia tausolomua ona faaaloalo le tasi i le isi.” (Roma 12:10e) O le ā e aofia ai i le faaalia o le faaaloalo? Aiseā e tāua ai ona tausolomua e faaaloalo i uso talitonu? E faapefea ona tatou faia faapea?

Mea e Aofia ai i le Faaaloalogia o Isi

3. O ā uiga o le upu “faaaloalo” i uluaʻi gagana na tusia ai le Tusi Paia?

³ O le upu Eperu autū mo le “faaaloalo” e uiga atu i le “mamafa.” O se tagata e faaaloalogia e manatu i ai o sē e mataʻina pe tāua. O le upu Eperu lava foʻi lea e masani ona faaliliuina i le Tusi Paia i le “mamalu,” lea e faaalia atili ai le matuā faaaloalo i lē o loo faaaloalogia. (Kene. 45:13) O le upu Eleni ua faaliliuina i le Tusi Paia i le “faaaloalo,” e aofia ai le faatāua, tautele ma le faapelepele. (Luka 14:10) Ioe, o i latou e tatou te faaaloalo i ai, e pele ma tautele iā i tatou.

4, 5. O le ā e aofia ai i le faaaloalogia o isi? Faataʻitaʻi mai.

⁴ O le ā e aofia ai i le faaaloalogia o isi? O le faaaloalo e amata mai i le auala e te vaai pe manatu ai i isi. O lau vaaiga po o lou manatu e mafai foʻi ona aafia ai le auala e te feagai ai ma isi. I nisi faaupuga, e tatau ona tatou faaaloalo muamua i lo tatou uso i la tatou vaaiga ma manatu, ona mafai lea ona tatou feagai ma ia i le faaaloalo.

⁵ E faapefea ona faaalia e se Kerisiano le faaaloalo moni i uso talitonu, pe afai e lē faaaloalo iā i latou i lona loto? (3 Ioa. 9, 10) E pei lava ona ola lauusiusi ma umi se laau pe afai e tupu aʻe i se eleele lelei, e faapea foʻi ona moni ma tumau le faaaloalo pe afai e pogai mai i le loto. Pe afai e tatou te lē faaaloalo i isi i o tatou loto, o le a iʻu ina mou atu lo tatou faaaloalo e pei ona vave pē se laau o loo ola i se eleele lē lelei. O lea la, a o leʻi aumaia e Paulo lana faatonuga ia faaalia le faaaloalo, na muamua ona ia faapea mai ma le manino: “Aua tou te faatagā alofa.”—Roma 12:9; faitau le 1 Peteru 1:22.

Faaaloalo i Ē ua Faia “i le Faatusa o le Atua”

6, 7. Aiseā e tatau ai ona tatou faaaloalo i isi?

⁶ Talu ai o le faaalia o le faaaloalo e amata mai i le loto, e lē tatau la ona galo iā i tatou māfuaaga mai i le Tusi Paia e tatau ai ona tatou faaaloalo i o tatou uso uma. O lea la, seʻi o tatou iloiloina ni māfuaaga se lua.

 ⁷ E ese mai i isi foafoaga uma i le lalolagi, ua faia tagata “i le faatusa o le Atua.” (Iako. 3:9) O lea ua tatou maua ai uiga o le Atua e pei o le alofa, atamai ma le faamasinotonu. Seʻi mātau se isi mea ua tatou maua mai i Lē na foafoaina i tatou. Ua faapea mai le faisalamo: “Ieova e . . . , ua taʻutaʻua foʻi lou mamalu e sili i luga o le lagi! . . . Ua e faamaulaloina teisi [le tagata] i lo o ē e pei o ni atua, ma ua e faapaleina foʻi o ia i le mamalu ma le matagofie [“faaaloalo” King James Version].” (Sala. 8:1, 4, 5; 104:1) * Ua faapaleina pe faamatagofie e le Atua tagata i le tuuina atu i ai o sina mamalu ma le faaaloalo. O lea la, pe a tatou faamamaluina se isi tagata, o lona uiga o loo tatou faailoa atu Lē ua pogai mai ai le mamalu o le tagata, o Ieova. Pe afai ua iai māfuaaga talafeagai e tatou te faaalia ai le faaaloalo i tagata lautele, ua sili atu ai la ona talafeagai ona tatou faaaloalo i o tatou uso talitonu!—Ioa. 3:16; Kala. 6:10.

O Tatou o le Aiga e Tasi

8, 9. O le ā le māfuaaga ua taʻua e Paulo e tatau ai ona faaaloalo i uso talitonu?

⁸ Ua taʻu mai e Paulo se isi māfuaaga e tatau ai iā i tatou ona faaaloalo le tasi i le isi. A o leʻi aumaia le faatonuga ia faaaloalo, ua ia faapea mai: “Ia matuā alofa faapelepele le tasi i le isi i le alofa faaleuso.” O le faaupuga Eleni ua faaliliuina i le “alofa faapelepele,” e faasino atu i le sootaga malosi lea e autasia ai se aiga alolofa ma felagolagomaʻi. O le faaaogāina la o lenā faaupuga, ua faamatilatila ai e Paulo e faapea e tatau ona malosi faiā a sui uma o le faapotopotoga, e pei ona māfana le faiā a se aiga alofa ma autasi. (Roma 12:5) E lē gata i lea, ia manatua na tusi atu e Paulo na upu i Kerisiano faauuina, o ē ua vaetamaina e avea ma fanau a le Tamā e tasi, o Ieova. O lona uiga la, ua avea i latou o se aiga vavalalata. Sa iai moni lava la i Kerisiano faauuina i aso o Paulo se māfuaaga malosi e faaaloalo ai le tasi i le isi. E faapena foʻi le ʻaufaauuina i aso nei.

⁹ Ae faapefea i latou o “isi mamoe”? (Ioa. 10:16) E ui lava e lē o vaetamaina i latou e avea ma fanau a le Atua, ae ua talafeagai mo i latou ona taʻu e le tasi le isi o le uso ma le tuafafine, auā ua latou faia aʻe se aiga faa-Kerisiano autasi i le lalolagi aoao. (1 Pete. 2:17; 5:9) O lea la, pe afai e malamalama lelei isi mamoe i le māfuaaga ua latou taʻua ai isi o le “uso” po o le “tuafafine,” ona iai foʻi lea iā i latou o se māfuaaga malosi e tatau ai ona latou faaaloalo i o latou uso talitonu mai i le loto.—Faitau le 1 Peteru 3:8.

Aiseā e Tāua Tele Ai?

10, 11. Aiseā e tāua tele ai ona iai le faaaloalo i le loto ma le faaalia o le faaaloalo?

¹⁰ Aiseā e tāua tele ai ona iai le faaaloalo i le loto ma le faaalia o le faaaloalo? O le māfuaaga lenei: O le faaalia o le faaaloalo i o tatou uso ma tuafāfine, ua tatou matuā saosaolaumea ai i le lelei ma le autasi o le faapotopotoga atoa.

¹¹ Ioe, ua tatou iloa o le iai o se mafutaga vavalalata ma Ieova ma le fesoasoani a lona agaga, o puna sili ia e faamalosia ai i tatou o ni Kerisiano moni. (Sala. 36:7; Ioa. 14:26) Ae i le taimi e tasi, e faamalosia foʻi i tatou pe a faaalia e uso talitonu lo latou talisapaia o i tatou. (Faata. 25:11) O se faaupuga faamaoni o le talisapaia ma le faaaloalo, e faalaeiauina ai i tatou. E aumaia ai iā i tatou le malosi faaopoopo e faaauau ai ona savavali ma le olioli ma le naunautaʻi i le ala i le ola e faavavau. E lē taumatea ua e tofo i na faalogona.

12. E faapefea ona tatou saosaolaumea i se siʻomaga māfana ma alofa i le faapotopotoga?

¹² Talu ai ua silafia e Ieova na tatou fananau mai ma le faanaunauga ia faaaloalogia e isi, o lea ua ia uunaʻia ai i tatou i lana Afioga “ia naunau e faaaloalo le tasi i le isi.”  (Roma 12:10, Today’s English Version; faitau le Mataio 7:12.) O Kerisiano uma lava la e utagiaina lenā fautuaga, ua latou saosaolaumea i se siʻomaga māfana ma alofa i le va o uso Kerisiano i le lalolagi aoao. O lea e tāua ai ona fesili ifo iā i tatou lava, ‘O fea le taimi mulimuli na ou faaalia atu ai i se uso po o se tuafafine i le faapotopotoga, loʻu faaaloalo mai i le loto e ala i aʻu upu ma gaoioiga?’—Roma 13:8.

O se Tofiga mo Tagata Uma

13. (a) O ai e tatau ona tausolomua i le faaalia o le faaaloalo? (e) O le ā ua faaalia mai i upu a Paulo o loo i le Roma 1:7?

¹³ O ai e tatau ona tausolomua i le faaalia o le faaaloalo? I lana tusi i Kerisiano Eperu, o loo faamatala ai e Paulo toeaina Kerisiano o “ē o taʻimua iā te outou.” (Epe. 13:17) Ioe, o toeaina e taʻimua i le tele o mea. Ae ona o i latou o leoleo mamoe o le lafu, e mautinoa e tatau foʻi ona latou tausolomua i le faaaloalo i uso talitonu, e aofia ai ma isi toeaina. O se faaaʻoaʻoga, pe a fono toeaina e talanoaina manaʻoga faaleagaga o le faapotopotoga, e latou te faaaloalo le tasi i le isi e ala i le faalogologo lelei i manatu o o latou uso a toeaina. E lē gata i lea, e latou te faaalia le faaaloalo e ala i le amanaʻia o manatu o toeaina uma pe a fai se faaiʻuga. (Galu. 15:6-15) Ae e tatau foʻi ona tatou manatua, sa taulaʻi atu le tusi a Paulo mo Kerisiano i Roma, e lē gata i toeaina ae o le faapotopotoga atoa. (Roma 1:7) O lea la, e mafai foʻi ona faatatau mai iā i tatou uma i aso nei le faatonuga, ia tausolomua i le faaalia o le faaaloalo.

14. (a) Faataʻitaʻi mai le eseesega o le faaalia o le faaaloalo ma le tausolomua ona faaaloalo. (e) O le ā le fesili e tatou te ono fesili ifo ai?

¹⁴ Seʻi mātau foʻi le vaega lenei o le fautuaga a Paulo. Sa ia uunaʻia ona uso talitonu i Roma e lē gata ia faaaloalo, ae e tatau foʻi ona tausolomua i le faaalia o le faaaloalo. Aiseā e eseese ai ia manatu? Manatu i le faataʻitaʻiga lenei. Po o le a uunaʻia e se faiaʻoga ni tamaiti aʻoga ua iloa faitau, ia aʻoaʻo la latou faitau? E leai. Ua latou iloa faitau. Peitaʻi o le a manaʻo le faiaʻoga e fesoasoani i tamaiti aʻoga ia lelei atili la latou faitau. I se tulaga tutusa, ua leva ona avea le alofa o le tasi i le isi, lea e uunaʻia ai i tatou e faaalia le faaaloalo, o se faailoga e mātaulia ai Kerisiano moni. (Ioa. 13:35) Peitaʻi, e pei lava ona mafai ona agaʻi i luma tamaiti aʻoga ua iloa faitau, e ala i le faaleleia o o latou tomai e faitau ai, e mafai foʻi ona tatou agaʻigaʻi i luma e ala i le tausolomua ona faaaloalo. (1 Tesa. 4:9,  10) O lenā tofiga ua tuuina mai mo i tatou uma taʻitoʻatasi. Tatou te ono fesili ifo, ‘Po o ou tausolomua e faaaloalo i isi i le faapotopotoga?’

Faaaloalo i “Ē ua Faatauvaa”

15, 16. (a) O ai e lē tatau ona galo iā i tatou pe a faaalia le faaaloalo, ma aiseā? (e) O le ā e faaalia ai o loo tatou faaaloalo mai i le loto i o tatou uso ma tuafāfine uma?

¹⁵ O ai i latou o le faapotopotoga e lē tatau ona galo iā i tatou ona faaaloalo i ai? Ua faapea mai le Afioga a le Atua: “O lē e faaalia le agalelei i lē e lē taualoa, ua nonō atu iā Ieova, ma o le a toe tauia o ia e Ia e tusa ma ana gaoioiga.” (Faata. 19:17) E faapefea i le taʻiala o loo i na upu ona aafia ai i tatou, a o taumafai e tausolomua e faaalia le faaaloalo?

¹⁶ E te ioe o le toʻatele o tagata e mafai ona faaaloalo i ē e maualuluga o latou tulaga, ae atonu e latou te tau lē faaaloalo pe matuā lē faaaloalo foʻi i ē e latou te manatu i ai e faatauvaa. Peitaʻi e lē faapena Ieova. Ua fetalai o ia: “Ou te faamamaluina o ē e faamamaluina aʻu.” (1 Samu. 2:30; Sala. 113:5-7) E faamamalu e Ieova i latou uma o ē e auauna ma faamamaluina o ia. E na te lē tuulafoaʻia “ē ua faatauvaa.” (Faitau le Isaia 57:15; 2 No. 16:9) O le mea moni e tatou te fia faaaʻoaʻo iā Ieova. O lea, pe afai e tatou te fia iloa pe faamata o tatou faaaloalo moni i isi, e lelei ona fesili ifo iā i tatou lava, ‘O faapefea ona ou feagai ma ē e leai ni o latou tofiga faapitoa po o ni tiute tauave i le faapotopotoga?’ (Ioa. 13:14, 15) O le tali i lenā fesili e faaalia ai po o le ā le tele o loo iai i o tatou loto le faaaloalo mo isi.—Faitau le Filipi 2:3, 4.

E Iloa le Faaaloalo i le Faaaogā o lo Tatou Taimi

17. O le ā se auala sili e tatou te tausolomua ai i le faaalia o le faaaloalo, ma aiseā?

¹⁷ O le ā se auala sili e tatou te tausolomua ai i le faaalia o le faaaloalo i tagata uma i le faapotopotoga? E ala i le faaaogā o lo tatou taimi mo isi. Aiseā e faia ai faapea? Talu ai e pisi tele o tatou olaga o ni Kerisiano, ma e tele le taimi e alu i le faataunuuina o a tatou galuega tāua i le faapotopotoga. E lē o se mea la e faateʻia ai lo tatou faatāuaina o le taimi. E tatou te iloa foʻi e lē tatau ona tatou mananaʻo i o tatou uso ma tuafāfine, e faaaogā le tele o lo latou taimi mo i tatou. E tatou te talisapaia foʻi pe a malamalama isi i le faapotopotoga e faapea, e lē tatau ona latou mananaʻo mai e faaaogā le tele o lo tatou taimi mo i latou.

18. E pei ona faaalia i le ata i le itulau e 18, e faapefea ona faaalia lo tatou lotomalilie e faaaogā se taimi mo uso talitonu?

¹⁸ Ae ua tatou iloa foʻi, (aemaise lava i tatou o loo avea ma leoleo mamoe i le faapotopotoga) o lo tatou lotomalilie e tuu a tatou mea o loo fai ae faaaogā se taimi mo o tatou uso talitonu, e faaalia ai o loo tatou faaaloalo iā i latou. I le ā le auala? O le tuu o a tatou mea o loo fai ae faaaogā sina taimi mo o tatou uso, ua pei o loo tatou faapea atu iā i latou, ‘Talu ai e tāua tele outou iā te aʻu, e sili atu la ona faaaogā loʻu taimi mo outou, nai lo o le faaauau o laʻu mea o loo fai.’ (Mare. 6:30-34) Ae seʻi manatu i le isi itu. Pe afai e tatou te mumusu e tuu a tatou mea o loo fai ae faaaogā se taimi mo lo tatou uso, atonu o le a manatu o ia e lē tāua tele o ia iā i tatou. E moni e iai taimi e lē mafai ai ona tuu se mea  tāua o loo fai. Ae o lo tatou lotomalilie po o le mumusu e faaaogā lo tatou taimi mo isi, e faaalia ai po o le ā le loloto o lo tatou faaaloalo mai i le loto mo o tatou uso ma tuafāfine.—1 Kori. 10:24.

Ia Maumauaʻi e Tausolomua

19. E ese mai i le faaaogā o lo tatou taimi, o le ā le isi auala e faaalia ai le faaaloalo i uso talitonu?

¹⁹ E iai isi auala tāua e mafai ona tatou faaalia ai le faaaloalo i uso talitonu. O se faaaʻoaʻoga, pe a faaaogā lo tatou taimi mo i latou, e tatau foʻi ona tatou uaʻi atu iā i latou. Ua faataatia foʻi e Ieova le faaaʻoaʻoga i lenei vala. Ua faapea mai le faisalamo o Tavita: “O loo silasila mai fofoga o Ieova i ē e amiotonu, ma e faafofoga mai foʻi ona taliga i la latou alaga atu mo se fesoasoani.” (Sala. 34:15) E tatou te faaaʻoaʻo iā Ieova e ala i le vaai ma faalogo atu, pe uaʻi atoatoa atu i o tatou uso, aemaise i latou ua talosaga mai iā i tatou mo se fesoasoani. O le faia faapea, ua tatou faaaloalo ai iā i latou.

20. O ā manatu e uiga i le faaalia o le faaaloalo e ao ona tatou manatua?

²⁰ E pei ona tatou talanoaina, e ao ona tatou manatua le māfuaaga e tatau ai ona tatou faaaloalo mai i le loto i uso talitonu. E lē gata i lea, e tatou te saʻili avanoa e tausolomua ai ona faaaloalo i tagata uma, e aofia ai ma ē e faatauvaa. O le faia o nei laasaga, o le a tatou faamalosia ai le alofa faaleuso ma le autasi i le faapotopotoga. O lea la, tau ina ia faaauau ona tatou faaalia le faaaloalo, ae sili ai ia tausolomua ona faaaloalo le tasi i le isi. Po o e maumauaʻi e faia faapea?

[Faaopoopoga i lalo]

Pe E te Manatua?

• O le ā e aofia ai i le faaaloalogia o isi?

• O ā māfuaaga e tatou te faaaloalo ai i o tatou uso talitonu?

• Aiseā e tāua tele ai ona faaalia le faaaloalo o le tasi i le isi?

• O ā auala e faaalia ai lo tatou faaaloalo i uso talitonu?

[Fesili mo le Suʻesuʻega]

[Ata i le itulau 18]

E faapefea ona faaalia lo tatou faaaloalo i uso talitonu?