“Ua Fesoasoani iā te Aʻu e Pāʻia ai Loto o Tagata”

NA FAIA i Porto Alegre, o se aai i le itu i saute o Pasili, se fono faavaomalo e uiga i mataupu fai a tagata. E faitau sefulu afe tagata mai i atunuu e 135 na auai. I taimi o mālōlōga, na ō atu ai nisi o Molimau a Ieova mai i se faapotopotoga i Porto Alegre, ma talanoa atu i le toʻatele o le ʻauusufono ina ia taʻu atu le feʻau o le Malo mai i le Tusi Paia. Na faapefea ona latou talanoa?

Ua fai mai Elizabete, o se paeonia: “Na matou faaaogā le tamaʻitusi Good News for People of All Nations.” Ua ia taʻua atili: “O le toʻatele o le ʻauusufono e leʻi faalogo muamua i le tala lelei o le Malo, ae na latou tali fiafia mai i la matou feʻau. Na matou talanoa ma tagata mai i Polivia, Saina, Falani, Initia, Isaraelu, ma Nigeria. O nisi ʻauusufono na matou tuu atu i ai lomiga faale-Tusi Paia i la latou lava gagana, ma na latou taliaina ma le fiafia.”

Na faaaogā foʻi e se paeonia i Mekisikō, e igoa iā Raúl, lenei tamaʻitusi ma maua ai ni iʻuga lelei. Na talanoa atu o ia i se tamāloa Arapi e 80 ona tausaga, e leʻi leva ona maliu lana avā. Ina ua uma ona faitau e le tamāloa le itulau o loo iai le feʻau o le Malo i le gagana Arapi, na tagi o ia ona o le fiafia. Aiseā? Na pāʻia lona loto ina ua ia faitauina i lana lava gagana, le folafolaga a le Atua o le a lē toe iai se oti, lea e taʻua i le Faaaliga 21:3, 4. A o talaʻi lē fuafuaina Raúl, na la feiloaʻi foʻi ma se tamāloa e tautala i le gagana Potukali. Ua maliu foʻi lona atalii pele. Na tuu atu e Raúl iā te ia e na te faitauina le itulau o le tamaʻitusi o loo iai le feʻau i le gagana Potukali. Ina ua uma, na faailoa mai e le tamāloa e fia iloa atili le Tusi Paia, ma talia se suʻesuʻega faale-Tusi Paia.

Na faaaogā e Raúl le Good News for People of All Nations, ina ia talaʻi atu ai i tagata e tautatala i le gagana Aminia, Saina, Peretania, Falani, Siamani, Hindi, Korea, Mixe, Peresia, Rusia, ma Zapotec. Ua ia taʻua: “Ua ou iloa le tāua o le faaaogā o lenei tamaʻitusi i laʻu talaʻiga. Ua fesoasoani iā te aʻu e pāʻia ai loto o tagata, e ui ou te lē tautala i a latou gagana.”

Talu ai e toʻatele tagata e malaga ma ō atu i isi atunuu e nonofo ai, e tele la avanoa e tatou te talanoa atu ai i ē e tautatala i isi gagana. E mafai ona tatou taʻu atu le feʻau o le Malo iā i latou, e ala i le faaaogāina o le tamaʻitusi Good News for People of All Nations. Pe e te alu ma ave lenā tusi?

[Ata i le itulau 32]

O Raúl ma le tamaʻitusi ua fesoasoani iā te ia e pāʻia ai loto o tagata