E Faafofoga Ieova i le Alaga a Lē e Faatauvaa

NA TAʻUA e le tupu poto o Isaraelu anamua o Solomona, “e tutupu faafuaseʻi mea iā i [tatou] uma i le taimi e leʻi faatalitalia.” (Fai. 9:11) O le tupu faafuaseʻi o se faalavelave, e matuā afāina ai lou olaga. O se faataʻitaʻiga, o le maliu o se tauaiga pele, e oo ai iā te oe le mafatia. E lofitūina oe i le faanoanoa ma lagona ai e peiseaʻī ua leai sou faamoemoe. O faalogona lē mautonu o le tagata i lea taimi, e oo ai ina lē fia tatalo atu iā Ieova.

O taimi na e manaʻomia ai e se tasi upu faalaeiau ma upu alofa. Na pese Tavita i upu faamāfanafana e faapea: “E lagolago e Ieova i latou uma ua paʻuʻū, ma faatulaʻi i latou uma ua faanoʻunoʻu.” (Sala. 145:14) Ua taʻu mai i le Tusi Paia: “E silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.” (2 No. 16:9) E “mau foʻi [o Ia] ma lē ua nutimomoia ma faamaulalo, ina ia faafouina loto o ē ua faatauvaa ma faafouina loto o ē ua nutimomoia.” (Isa. 57:15) E faapefea ona lagolagoina e Ieova lē ua nutimomoia ma faatauvaa, ma faamāfanafanaina o ia?

‘O le Upu e Fai Atu i le Taimi Talafeagai’

O se tasi o auala ua fesoasoani mai ai Ieova i le taimi talafeagai, e ala lea i le ʻauuso. Ua fautuaina Kerisiano ina “ia faamāfanafana i ē mafatia.” (1 Tesa. 5:14) O upu faamāfanafana ma upu alofa a uso talitonu, e faalaeiauina ai lē o loo faanoanoa ma mafatia. E tusa pe puupuu se talanoaga, ae e aogā tele upu faamāfanafana e faafouina ai lē ua nutimomoia. Atonu o na upu, e fai atu e se tasi na oo i ai mafatiaga, pe fai atu e se uō e malamalama lelei i mea e tutupu i le olaga. O le auala lenā ua toe faafouina ai e Ieova le loto o lē ua nutimomoia.

Seʻi tagaʻi foʻi i le mea na tupu iā Aleki, o se toeaina e leʻi leva ona faaipoipo, ae faafuaseʻi ona maliu lona toʻalua ona o se maʻi tugā. Na faamāfanafana atu iā te ia se ovasia femalagaaʻi, ona ua maliu foʻi lona toʻalua, ae o lea ua toe faaipoipo. Na faamatala atu e le ovasia femalagaaʻi ona lagona faavauvau na iai. Pe a faatasitasi ma isi i le talaʻiga ma sauniga, e lagona lava lona fiafia. Ae a alu loa i le fale, ona ia lagona lea o le tuua toʻatasi. Na fai mai Aleki, “Na faamāfanafanaina aʻu i le iloa, o  lagona o loo iā te aʻu, o lagona foʻi na o isi.” Ioe, ‘⁠o le upu e fai atu i le taimi talafeagai,’ e matuā faamāfanafanaina ai i taimi faigatā.—Faata. 15:23.

Na uunaʻia foʻi se toeaina Kerisiano e masani i nisi ua maliliu a latou paaga faaipoipo, ia fai atu se upu faamāfanafana iā Aleki. Na fai atu o ia ma le alofa iā Aleki, o loo malamalama lelei Ieova i o tatou faalogona ma mea e tatou te manaʻomia. Na fautua atu o ia, “Afai ua e lagona ua e manaʻomia se paaga a o faagasolo le taimi, ua iai le fuafuaga alofa a Ieova, ia toe faaipoipo.” O le mea moni, e iai nisi ua maliliu o latou taʻitoʻalua ma ua toe fia faaipoipo, ae e lē o mafai ona faia faapea. Na mafaufau Aleki i upu a le uso ma faapea mai: “O le toe faamanatu mai o le fuafuaga alofa a Ieova, na teʻa ai lagona e peiseaʻī ua ou lē faamaoni iā Ieova ma loʻu toʻalua ua maliu, pe a ou toe faaipoipo.”—1 Kori. 7:8, 9, 39.

E tele faigatā ma mafatiaga na oo i le faisalamo o Tavita, ma na faapea mai o ia: “O loo silasila mai fofoga o Ieova i ē e amiotonu, ma e faafofoga mai foʻi ona taliga i la latou alaga atu mo se fesoasoani.” (Sala. 34:15) Ioe, e tali mai Ieova i le alaga a lē faatauvaa i le taimi talafeagai, e ala i upu alofa a Kerisiano taʻumatuaina, e faaalia ai e malamalama i latou. O se sauniuniga e tāua tele ma aogā.

Fesoasoani e Ala i Sauniga

E oo ifo i se tasi o loo mafatia lagona lē mautonu, ma lē fia faatasitasi atu ai i isi. Ae ua lapataʻi mai le Faataoto 18:1: “O lē e na te faaesea o ia lava, e saʻili o ia i lona lava faanaunauga; o le a tetee o ia i le atamai aogā uma.” Na fai mai Aleki: “Ina ua maliu loʻu toʻalua, na tumu aʻu i le lē mautonu.” E na te manatua lona fesili ifo e faapea: “‘Pe na iai se isi mea sa tatau ona ou faia? Pe sa tatau ona ou faaali atu se alofa e sili atu ma le magafagafa mo ia?’ Ou te leʻi fia nofo na o aʻu, ma ou te lē fia nofofua  foʻi. E faigatā ona aveesea na mafaufauga, ona o aso uma lava, e te manatua ai, o lea ua na o oe.”

E sili atu ona manaʻomia e le tagata ua loto nutimomoia ma tuua toʻatasi ni uō lelei, ma e mafai ona maua i sauniga a le faapotopotoga. O i inā e tatou te ave ai i fale manatu lelei o le Atua e faalaeiauina ai.

E aogā sauniga iā i tatou e maua ai mafaufauga lelei e faasaʻo ai la tatou vaai. A o faalogologo ma manatunatu i mau o le Tusi Paia, o le a uaʻi atu ai o tatou mafaufau i mea e lua e sili ona tāua, o le faaeaina o le pule silisili ese a Ieova ma le faapaiaina o lona suafa, ae lē o o tatou mafatiaga. E lē gata i lea, a o aʻoaʻoina i tatou i mea faaleagaga, e faamāfanafanaina i tatou i le iloa o loo malamalama lelei Ieova i o tatou mafatiaga, e ui ina e lē o malamalama isi. E silafia e Ia, “o le lototigā e momomo ai le agaga.” (Faata. 15:13) E naunau o Ia e fesoasoani mai, ma o le mea lenā e tatou te faamalolosi ai ae lē faavaivai.—Sala. 27:14.

Ina ua mafatia Tavita ona o ona fili, na alaga o ia i le Atua: “Ua vaivai loʻu loto i totonu iā te aʻu; ua lē toe lagona foʻi e loʻu loto se mea.” (Sala. 143:4) E lagona le vaivai o le tino ma le mafaufau ona o mafatiaga, ma e vaivai ai foʻi le loto. E oo mai foʻi mafatiaga ona o maʻi po o le lē atoatoa o le malosi. Ae e mautinoa e fesoasoani mai Ieova ina ia tatou tutumau. (Sala. 41:1-3) I aso nei, e lē o toe faavavega ona faamālōlō i tatou e Ieova, ae ua ia foaʻi mai le tomai ma le malosi i lē ua mafatia, e onosaia ai ona faafitauli. Ia manatua, ina ua matuā mafatia Tavita, na liliu atu o ia iā Ieova. Na pese o ia e faapea: “Ou te manatua aso anamua; na ou mafaufau loloto ai i au galuega uma lava; na ou naunau foʻi e mafaufau pea i galuega a ou aao.”—Sala. 143:5.

O le tusia o nei upu i le Afioga a le Atua, ua faaalia ai, e malamalama Ieova i o tatou faalogona. O na upu ua faamautinoa ai, o loo faafofoga mai o Ia i a tatou ōlega. Afai e tatou te talia Lana fesoasoani, “o Ia lava e na te tausia i tatou.”—Sala. 55:22.

“Ia Tatalo e Lē Aunoa”

Ua tusia i le Iakopo 4:8: “Ia outou mafuta vavalalata atu i le Atua, ona mafuta vavalalata mai lea o ia iā te outou.” O se tasi o auala e mafuta atu ai i le Atua, o le tatalo. Ua timaʻi mai le aposetolo o Paulo, “ia tatalo e lē aunoa.” (1 Tesa. 5:17) E ui ina faigatā ona faamatala atu o tatou lagona, ae “ua ʻaiʻoi atu le agaga mo i tatou ma le ōi e lē mafai ona faamatalaina.” (Roma 8:26, 27) Ioe, e malamalama lelei Ieova i o tatou faalogona.

Ua taʻua e Monika, o sē e mafuta vavalalata atu iā Ieova e faapea: “E ala i le tatalo, faitau le Tusi Paia ma faia aʻu suʻesuʻega, ua ou lagona ai le avea o Ieova ma aʻu Uō e sili ona māfana. Ua moni o ia iā te aʻu, ma ua ou vaaia i taimi uma lana fesoasoani i loʻu olaga. O se faamāfanafanaga le iloa, e ui ina lē lava upu e faamatala atu ai oʻu faalogona, ae e malamalama o ia. Ua ou iloa, e tumau e faavavau lona agalelei ma ana faamanuiaga.”

O lea, ia talia upu faamāfanafana a o tatou uso Kerisiano, ia faaaogā fautuaga alofa ma faalaeiauga ua maua i sauniga, ma sasaa atu o tatou loto iā Ieova e ala i le tatalo. O nei sauniuniga e talafeagai ma le taimi, ua faaalia ai le naunau mai o Ieova. Ua fai mai Aleki e tusa ma mea na oo iā te ia, “Afai e faia la tatou vaega e faaaogā sauniuniga uma a Ieova le Atua e malolosi ai faaleagaga, o le a tatou maua ‘le mana lea e sili atu i le malosi o tagata’ e feagai ai ma so o se faafitauli e oo mai.”—2 Kori. 4:7.

[Pusa/Ata i le itulau 18]

Faamāfanafanaga mo Lē e Faatauvaa

O loo faamatalaina i salamo lagona eseese faaletagata, faatasi ma faamaoniga e mautinoa ai, o loo faafofoga mai Ieova i le alaga a lē e faatauvaa, pe a lofitūina i popolega. Seʻi iloilo mau o loo i lalo:

“Ona ou valaau atu lea iā Ieova i loʻu puapuaga, na ou valaau atu pea i loʻu Atua mo se fesoasoani. Na faafofoga mai o ia i loʻu leo mai i lona malumalu, na faafofoga mai foʻi o ia i laʻu alaga i ona luma mo se fesoasoani.”—Sala. 18:6.

‘E latalata mai Ieova i ē e loto momomo; ma e faaola e ia ē ua loto nutimomoia.’—Sala. 34:18.

“Ua faamālōlō [e Ieova] o ē ua loto momomo, ma fusifusia o latou manuʻa tigā.”—Sala. 147:3.

[Ata i le itulau 17]

I le taimi o puapuaga, o ‘upu e fai atu i le taimi talafeagai,’ e faamāfanafanaina ai!