E Tatou te Savavali i lo Tatou Faamaoni!

“A o aʻu, ou te savali i loʻu faamaoni.”—SALA. 26:11.

1, 2. O le ā le tala a Iopu e uiga i lona faamaoni, ma o le ā ua faaalia e faatatau iā te ia i le Iopu mataupu e 31?

I ASO anamua, sa masani ona fua mea i se fua faatautau. O lea fua, e faia i se uʻamea e faalava i le ogatotonu o se isi uʻamea e magalua. E tofu pito ma se ato e tautau ai. O le tasi ato e tuu ai le mea e fua, a o le isi e tuu ai le maa o le fua. Sa tatau i tagata o le Atua ona faaaogā fua faatautau saʻo.—Faata. 11:1.

² Na faapea mai Iopu o lē e mataʻu i le Atua, ina ua tofotofoina o ia e Satani: “E fuaina aʻu [e Ieova] i le fua [faatautau] saʻo ma o le a silafia foʻi e le Atua loʻu faamaoni.” (Iopu 31:6) Na taʻua i inei e Iopu nisi o tulaga e ono tofotofoina ai se tagata faamaoni. Ae e pei  ona faaalia i ana upu i le Iopu mataupu e 31, na taulau o ia i na tulaga uma. O lana faaaʻoaʻoga lelei, e tatau ona uunaʻia ai i tatou e fai e pei ona ia faia, ma taʻutino atu e pei o le faisalamo o Tavita: “A o aʻu, ou te savali i loʻu faamaoni.”—Sala. 26:11.

3. Aiseā e tāua ai le faamaoni i le Atua i mea tetele ma mea iti?

³ Sa tumau le faamaoni o Iopu i le Atua e ui ina ogaoga tofotofoga na oo iā te ia. O le mea moni, o le faamaoni o Iopu i na tofotofoga ogaoga, ua avea ai o ia ma faaaʻoaʻoga mataʻiina. Atonu e tatou te lē o mafatia e pei o Iopu. Ae, e tatau ona tatou faamaoni i le Atua i mea tetele ma mea iti, e faamalosia ai lo tatou lagolagoina o lana pule silisili ese ma faaalia ai lo tatou faamaoni.—Faitau le Luka 16:10.

E Tāua Tele le Faamaoni i Amioga

4, 5. O le ā le amio na ʻalofia e Iopu ona o le tumau i lona faamaoni?

⁴ Ina ia tumau lo tatou faamaoni iā Ieova, e ao ona tatou tausisi i ana tapulaa tau amio, e pei ona faia e Iopu. Na ia folafola mai: “Ua ou osia le feagaiga ma oʻu mata. E faapefea la ona ou manaʻonaʻo i se taupou? . . . Pe afai ua tosina loʻu loto i se fafine, ma ou taoto i le faitotoʻa e lamalama i laʻu uō, ia olo e laʻu avā saito mo se tasi tamāloa, ia tootutuli foʻi isi tamāloloa i ona luga.”—Iopu 31:1, 9, 10.

⁵ O le maumauaʻi o Iopu e tumau i le faamaoni i le Atua, na ia ʻalofia ai le vaai atu ma le manaʻonaʻo i se isi fafine. Ona o ia o se tane ua faaipoipo, e leʻi faatafai i se teine nofofua, pe tuutala ma le avā a se isi tagata. Na matuā faamanino mai e Iesu i lana Lauga i luga o le Mauga le tulaga e faatatau i amioga tatau, ma o se manatu e tatau ona tāmau i mafaufau o ē e tausisi i le faamaoni.—Faitau le Mataio 5:27, 28.

Aua Lava Neʻi Faapiʻopiʻo

6, 7. (a) E pei ona faia e le Atua iā Iopu, o le ā ua ia faaaogā e fua ai lo tatou faamaoni? (e) Aiseā e lē tatau ai ona tatou faapiʻopiʻo pe faaʻoleʻole?

⁶ Afai e fia avea i tatou ma tagata faamaoni, e lē tatau ona tatou lolo atu i faiga faapiʻopiʻo pe faaʻoleʻole. (Faitau le Faataoto 3:31-33.) Na faapea mai Iopu: “Pe afai ua ou savali faatasi ma tagata e lē faamaoni, ma televave oʻu vae e faia mea faaʻoleʻole, e na te fuaina aʻu i le fua saʻo, ma o le a silafia foʻi e le Atua loʻu faamaoni.” (Iopu 31:5, 6) E fua e Ieova tagata uma i le “fua saʻo.” E pei ona faia e le Atua iā Iopu, e faaaogā e ia ana faatulagaga faafaamasinoga lelei atoatoa, e fua ai lo tatou faamaoni o ni auauna tuuina atu iā te ia.

⁷ Pe a tatou faapiʻopiʻo pe faaʻoleʻole, ua lē tumau la ona tatou faamaoni i le Atua. O ē e faamaoni, ua “lafoaʻia mea pepelo e māsiasi ai” ma e “lē savavali ma le faapiʻopiʻo.” (2 Kori. 4:1, 2) Ae faapefea pe a tatou tautatala pe faia mea faapiʻopiʻo, ma māfua ai ona tagi atu so tatou uso talitonu i le Atua mo se fesoasoani? E tatou te lē iʻu manuia! Na pese le faisalamo: “Na ou valaau atu iā Ieova i loʻu puapuaga, ona tali mai lea o ia iā te aʻu. Ieova e, ia e laveaʻi iā te aʻu mai i laugutu pepelo, mai i le laulaufaiva taufaasesē.” (Sala. 120:1, 2) E ao lava ona tatou manatua e ati le silafaga a le Atua iā i tatou, e  ‘suʻesuʻe e ia loto ma manatu’ ina ia iloa po o tatou faamaoni.—Sala. 7:8, 9.

Ia Fai Lelei Isi

8. Na faapefea ona faia e Iopu isi tagata?

⁸ Ina ia tumau lo tatou faamaoni, e tatau ona pei i tatou o Iopu, o lē na faimeatonu, lotomaulalo, ma magafagafa i isi. Na faapea mai Iopu: “Afai sa masani ona ou teena le faamasinoga o laʻu tane pologa, po o laʻu teine pologa i ni mea na latou molia ai aʻu i le tulafono, o le ā la se mea ou te faia pe a tulaʻi mai le Atua? Pe a valaau mai foʻi iā te aʻu mo se faamatalaga, o le ā laʻu tali e fai atu iā te ia? Pe e leʻi faia ea o ia e Lē na faia aʻu i le manava, ma pe e lē toʻatasi ea Lē na saunia i tatou i le manava?”—Iopu 31:13-15.

9. O ā uiga na faaalia e Iopu i le feagai ai ma ana auauna, ma e faapefea ona tatou gaoioi e tusa ai ma lenei mea?

⁹ E foliga mai e leʻi faigatā le faiga o faamasinoga i aso o Iopu. Sa faia i se auala maopoopo, ma sa maua foʻi e pologa avanoa e tagi atu ai i le faamasinoga. Sa faimeatonu ma alofa mutimutivale Iopu i le feagai ai ma ana auauna. E tatau ona faaalia na uiga pe afai o loo tatou savavali ma le faamaoni, aemaise lava toeaina i le faapotopotoga Kerisiano.

Ia Limafoaʻi ae Aua le Manaʻo Tele

10, 11. (a) E faapefea ona tatou iloa sa limafoaʻi ma loto fesoasoani Iopu? (e) O ā isi fautuaga i le Tusi Paia ua faamanatu mai i le Iopu 31:16-25?

¹⁰ Sa limafoaʻi ma loto fesoasoani Iopu, e leʻi manatu faapito pe manaʻo tele. Na fai mai o ia: “Afai . . . ua fole foʻi mata o le fafine ua oti lana tane talu aʻu, pe na masani foʻi ona ou ʻai na o aʻu i laʻu meaʻai, ae e leʻi ʻai ai le tama ua leai sona tamā . . . Pe afai sa masani ona ou vaai i le fano o se tasi ina ua leai sona ofu . . . Pe afai na lialiaʻi atu loʻu lima e faamataʻu i le tama ua leai se tamā, ma ina ua ou iloa mea e manaʻomia ai laʻu fesoasoani i le faitotoʻa, ia paʻū ese loʻu ivi tauʻau mai i le tauʻau, ia gauiesea foʻi loʻu lima mai i le ponaivi i luga.” Afai foʻi e fai atu Iopu i le auro: “O oe o loʻu faatuatuaga,” ua lē tumau la lona faamaoni.—Iopu 31:16-25.

¹¹ O na upu faafatusolo, ua faamanatu mai ai iā i tatou upu a Iakopo: “O le tapuaʻiga lenei e mamā ma lē taʻuleagaina i le silafaga a le Atua lo tatou Tamā: ia tausi i tamaiti ua mātua oti ma fafine ua oti a latou tane i taimi o o latou puapuaga, ma ia puipuia le tagata lava ia neʻi pisia mai i le lalolagi.” (Iako. 1:27) E tatou te manatua ai foʻi le lapataʻiga a Iesu: “Ia outou mataala pea ma leoleo iā te outou i le manaʻo tele, aua e lē ola se tasi i le tele o ana mea ua iā te ia.” Ona faamatala lea e Iesu o se talafaatusa e uiga i se tagata mauʻoa e manaʻo tele, ae na oti e “lē mauʻoa i le silafaga a le Atua.” (Luka 12:15-21) Ina ia tumau i le faamaoni, aua neʻi o tatou lolo atu i le manaʻo tele ma le matapeʻapeʻa e agasala ai. O le manaʻo tele o le ifo i tupua lava lea, auā o le mea ua autū i ai le manaʻo o le tagata, ua avea ma ona tupua ma ua faaliliuese ai o ia mai i le tapuaʻi atu iā Ieova. (Kolo. 3:5) E lē mafai e se tagata ona faamaoni ma toe manaʻo tele i le taimi e tasi!

Ia Tumau i le Tapuaʻiga Moni

12, 13. O le ā le faaaʻoaʻoga na faia e Iopu i le ʻalofia o le ifo i tupua?

¹² O ē e tumau i le faamaoni, e lē liliuese mai i le tapuaʻiga moni. E faapena Iopu, ma na faapea mai o ia: “Afai sa masani ona ou vaaia le malamalama pe a pupula mai, po o le masina matagofie foʻi o loo alu ane, ma ua ʻolegia faalilolilo loʻu loto ma ua ou sogi i loʻu lima, o le mea sesē foʻi lenā sa tatau ona iloiloina e faamasino, auā ua ou faafitia [ai] le Atua moni i lugā.”—Iopu 31:26-28.

¹³ E leʻi tapuaʻi Iopu i mea e leai ni ola. Afai sa ʻolegia faalilolilo lona loto pe a vaai i mea i le lagi e pei o le masina, ma afai na “sogi i lona lima” ma tusi atu i le masina e peiseaʻī  ua ifo i ai, ua avea la o ia ma lē e ifo i tupua, ma faafitia ai le Atua. (Teu. 4:15, 19) E tatau ona tatou ʻalofia le ifo i tupua ma tumau ai lo tatou faamaoni i le Atua.—Faitau le 1 Ioane 5:21.

Aua le Ita Faamoemoe pe Faafiaamiotonu

14. E faapefea ona tatou iloa e leʻi ita faamoemoe Iopu?

¹⁴ E leʻi ita faamoemoe ma lē alofa Iopu, ona sa ia iloa o uiga na e faaalia ai lona lē faamaoni, auā fai mai lana faamatalaga: “Afai sa masani ona ou olioli i le faaumatiaga o se tasi na matuā ita iā te aʻu, pe na ou fiafia ona ua oo se mea leaga iā te ia, ou te leʻi faatagaina loʻu gutu e agasala ai, i le talosaga atu mo se tautoga e faasaga iā te ia,” pe ōle atu ia faamalaia o ia.—Iopu 31:29, 30.

15. Aiseā e leaga ai le fiafia pe a oo ni mala i se tasi e ita iā i tatou?

¹⁵ E leʻi fiafia le tagata faamaoni o Iopu pe a oo mala i se isi e ita iā te ia. Ua lapataʻi mai se faataoto: “Aua e te olioli pe a paʻū lou fili; aua foʻi neʻi fiafia lou loto pe a tausuai o ia, neʻi silasila i ai Ieova ma e leaga lea mea i lana silafaga ma liliuese ai lona toʻasā iā te ia.” (Faata. 24:17, 18) E ati le silafaga a Ieova i o tatou loto, ma e na te silafia po o tatou olioli faalilolilo pe a malaia se isi tagata. E lē fiafia o ia i lenā uiga. (Faata. 17:5) O le a tauia i tatou e le Atua pe a tatou faapena, auā ua fetalai mai o ia: “O aʻu e faia le tauimasui ma taui atu.”—Teu. 32:35.

16. E tusa lava pe tatou te lē mauoloa, ae e faapefea ona faaalia le uiga talimālō?

¹⁶ Sa iā Iopu le uiga talimālō. (Iopu 31:31, 32) E ui atonu tatou te lē mauoloa, ae ia “faaalia le agaga talimālō.” (Roma 12:13) Ua lava sina ʻaiga itiiti e valaaulia ai isi, ma ia manatua: “E sili le iai o se ipu fualaau faisua ae o loo iai le alofa, nai lo o le povi poʻa peti ae o loo iai le ʻinoʻino.” (Faata. 15:17) O le aai faatasi ma se uso faamaoni i se siʻomaga e iai le alofa, e maua ai aogā faaleagaga ma tatou fiafia ai.

17. Aiseā e lē tatau ai ona tatou taumafai e natia se agasala matuiā?

¹⁷ E mautinoa, sa faalaeiauina faaleagaga sē na talimālō i ai Iopu, auā e lē o ia o se tagata e faafiaamiotonu. E leʻi pei Iopu o tagata e lē matataʻu i le Atua na ō atu faalēiloga i le faapotopotoga i le uluaʻi senituri, ma “faaviivii atu i tagata ina ia maua ai ni a latou mea.” (Iuta 3, 4, 16) E leʻi ufiufia foʻi e Iopu ana solitulafono, pe ‘⁠natia ana mea sesē i le taga o lona ofutino,’ ina neʻi inosia o ia e isi pe a latou iloa. Sa lotomalie e suʻesuʻeina o ia e le Atua, ma taʻutino atu i ai ana agasala. (Iopu 31:33-37) Pe a tatou faia se agasala matuiā, aua le taumafai e natia ina ia lē taʻuleagaina ai i tatou. E faapefea ona iloa o loo tatou taumafai e tumau i le faamaoni? E ala i le faailoa atu o o tatou sesē, faaalia le salamō, saʻili le fesoasoani faaleagaga, ma faia mea uma e toe faasaʻo ai le sesē.—Faata. 28:13; Iako. 5:13-15.

Ua Faamasinoina le Tagata Faamaoni

18, 19. (a) E faapefea ona iloa e leʻi faileagaina e Iopu se isi? (e) O le ā na malie Iopu e fai pe afai e faamaonia lona sesē?

¹⁸ O Iopu, o se tagata e tautala saʻo ma faimeatonu. O le ala lea na ia faapea mai ai: “Afai e alaga mai loʻu laueleele mo se fesoasoani ona o aʻu; e fetagisi faatasi foʻi ona atu puʻe; pe afai na ou ʻaina ona fua ae e lē faatauina, ma ua ou faapogaia le mapuitigā o ē e  pule ai, ia tupu mai le vao tuitui nai lo o le saito, ma le vao manogi leaga nai lo o le karite.” (Iopu 31:38-40) E leʻi faoa e Iopu fanua o isi pe faileagaina ana tagata faigaluega. O le mea lea, e tatau ona tatou faamaoni iā Ieova i mea tetele ma mea iti, e pei o Iopu.

¹⁹ I luma o ana uō ma luma o le tauleʻaleʻa o Eliu, na faamatala e Iopu lona olaga. E so o se tasi na tuuaʻia o ia i se mea sesē na ia faia, na fai i ai, ia molia o ia. Afai e faamaonia lona sesē, ua malie ia faasalaina o ia, ma e faatali i le faaiʻuga a le Atua i lona faamasinoga. “Ona faaiʻu ai lea o upu a Iopu.”—Iopu 31:35, 40.

E Mafai Ona E Tumau i le Faamaoni

20, 21. (a) Aiseā na tumau ai le faamaoni o Iopu? (e) E faapefea ona tatou atiaʻe le alofa i le Atua?

²⁰ Na mafai ona tumau Iopu i le faamaoni ona o lona alofa i le Atua, ma na alofa foʻi Ieova iā te ia ma fesoasoani i ai. Na faapea mai Iopu: “Ua e [Ieova] foaʻiina mai le ola ma ua e alofa faamaoni mai foʻi iā te aʻu; ma o lau tausiga ua leoleoina ai loʻu agaga.” (Iopu 10:12) Na alofa foʻi Iopu i isi i lona iloa, o sē e lē alofa faamaoni i ona uso a tagata, e lē mataʻu o ia i Lē e ona le malosi uma lava. (Iopu 6:14) O ē e faamaoni, e alolofa i le Atua ma tuaoi.—Mata. 22:37-40.

²¹ O le faitau i le Afioga a le Atua i aso taʻitasi ma manatunatu i mea ua faaalia ai e uiga iā te ia, e atiaʻe ai lo tatou alofa i le Atua. Ia tatou vivii ma faafetai atu iā Ieova e ala i le tatalo, ona o lona agalelei iā i tatou. (Fili. 4:6, 7) Ia tatou pepese atu iā Ieova ma faatasitasi e lē aunoa ma ona tagata, e maua ai aogā. (Epe. 10:23-25) E tupu atili foʻi lo tatou alofa i le Atua, pe a auai i le faiva ma folafola atu “le tala lelei o le faaolataga mai iā te ia.” (Sala. 96:1-3) O auala ia e tumau ai lo tatou faamaoni e pei o le faisalamo o lē na pese: “Ou te faalatalata atu i le Atua ou te lelei ai. Ou te sulufaʻi atu i le Alii Pule Silisili Ese o Ieova.”—Sala. 73:28.

22, 23. I le lagolagoina o le pule silisili ese a Ieova, e faapefea ona faatusatusa a tatou gaoioiga ma gaoioiga a ē na uluaʻi tumau i le faamaoni?

²² I le faagasologa mai o senituri, na tuu mai ai e Ieova i ē e faamaoni tofiga eseese. Na fausia e Noa le vaa ma “talaʻi le amiotonu.” (2 Pete. 2:5) Na taʻitaʻia e Iosua Isaraelu i le Nuu Folafolaina, ma na taulau manuia ona sa ia faitau i le “tusi o le tulafono . . . i le ao ma le pō” ma faia e tusa ma mea uma ua tusia ai. (Iosua 1:7, 8) Sa faia e uluaʻi Kerisiano tagata ma soo, ma faatasitasi e lē aunoa e suʻesuʻe i Tusitusiga Paia.—Mata. 28:19, 20.

²³ E tatou te lagolagoina le pule silisili ese a Ieova ma tumau ai lo tatou faamaoni, e ala i le talaʻia o le amiotonu, faia isi ma soo, faatatauina fautuaga a le Tusi Paia, ma faapotopoto faatasi ma uso talitonu i sauniga, fonotaga, ma tauaofiaga. Ua fesoasoani iā i tatou na faatasiga e lototetele ma malolosi ai faaleagaga, ma taulau ai i le faia o le finagalo o le Atua. E lē faigatā naʻuā lenei mea, auā o loo lagolagoina i tatou e lo tatou Tamā o i le lagi ma lona Alo. (Teu. 30:11-14; 1 Tu. 8:57) E lē gata i lea, ua lagolagoina i tatou e le “ʻauuso atoa” o ē o loo savavali i le faamaoni ma faamamaluina Ieova, o ia o lo latou Alii Pule Silisili Ese.—1 Pete. 2:17.

O le ā Lau Tali?

• O le ā le vaaiga e tatau ona iā i tatou i tapulaa tau amio a Ieova?

• O ā uiga o Iopu e sili ona e fiafia i ai?

• E pei ona faaalia i le Iopu 31:29-37, o le ā le auala na ola ai Iopu?

• Aiseā e mafai ai ona tumau lo tatou faamaoni i le Atua?

[Fesili mo le Suʻesuʻega]

[Ata i le itulau 29]

Na tumau le faamaoni o Iopu iā Ieova. E mafai foʻi ona tatou faia faapea!

[Ata i le itulau 32]

E mafai ona tumau lo tatou faamaoni!