Fesili Mai i le ʻAufaitau

Na fetalai atu Iesu i lana ʻaufaalogologo: “Ia atoatoa ona lelei o la outou amio e pei foʻi o lo outou Tamā o i le lagi, e atoatoa ona lelei o ia.” E faapefea ona ‘atoatoa ona lelei o amio’ a tagata?—Mata. 5:48.

E maua le tali o lenei fesili pe a malamalama i le auala o loo faaaogā ai le upu “atoatoa ona lelei” i le Tusi Paia. E lē o mea uma e fai mai ai le Tusi Paia e “atoatoa ona lelei,” e atoatoa. Ua na o Ieova e atoatoa ona lelei. A o tagata ma mea, e atoatoa ona lelei i se fua faatatau. O le uiga o le upu Eperu ma le upu Eleni ua faaliliuina i le “atoatoa ona lelei,” e faatatau lea i le “atoatoa o se mea,” pe e “matua,” ma “lē ponā” e tusa ma faatulagaga ua fuafuaina. I faamatalaga e fai i aso fai soo, ua faaaogāina ai lea upu i se uiga faatatau. O se faataʻitaʻiga, o le faaupuga, “atoa le malosi.”

Na faia Atamu ma Eva e lelei atoatoa i le amio, le faaleagaga, ma o la tino. Na lelei atoatoa i laʻua e tusa ma le faatulagaga a Lē na faia i laʻua. Ae o lo la lē usiusitaʻi, na lē toe ausia ai e i laʻua lenei faatulagaga a Ieova, ma leiloa ai le tulaga lelei atoatoa mo i laʻua ma a la fanau. O lea, ua tuufaasolo mai ai i tagata le agasala, le lē lelei atoatoa, ma le oti.—Roma 5:12.

Peitaʻi, na faamanino mai e Iesu i lana Lauga i luga o le Mauga, e faapea, i se fua faatatau, e mafai e tagata e lē lelei atoatoa ona ausia le atoatoa ona lelei. I lenā lauga, na ia faatulaga mai ai le uiga o le alofa e atoatoa ona lelei. O le alofa lea e pei ona alofa ai le Atua i le fanau a tagata. Na fetalai Iesu: “Ia alolofa atu pea i o outou fili ma tatalo pea mo ē ua sauāina outou; ina ia avea ai outou ma atalii o lo outou Tamā o i le lagi, o lē na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.” (Mata. 5:44, 45) O le faaalia e soo o Iesu o lea alofa, ua latou mulimuli ai i le faaaʻoaʻoga e atoatoa ona lelei a le Atua.

I aso nei, ua taumafai Molimau a Ieova i le lalolagi aoao e faaalia pea lea alofa i isi. E latou te naunau e fesoasoani atu i tagata mai talaaga, lanu ma lotu eseese, ina ia maua le poto saʻo o le upu moni i le Tusi Paia. E silia ma le 7,000,000 suʻesuʻega faale-Tusi Paia ua faia e Molimau a Ieova ma tagata fiafia, i atunuu e 236.

Na fesili Iesu: “Auā o le ā se taui tou te maua pe afai tou te alolofa atu i ē o alolofa mai iā te outou? Pe e lē o le mea foʻi lenā o faia e le ʻauaolafoga? O le ā se mea e sili ua outou faia, pe afai tou te faafeiloaʻia na o o outou uso? Pe e lē o le mea foʻi lenā o faia e tagata o nuu ese?” (Mata. 5:46, 47) E lē faailoga tagata Kerisiano moni, e tusa po o ā o latou tulaga ma aʻoaʻoga, ma e lē alolofa foʻi na o ē e alolofa iā i latou. Ae e latou te fesoasoani i ē matitiva ma mamaʻi, o ē talavou ma ē matutua. O auala na e faaʻoaʻo ai Kerisiano i le alofa o Ieova, ma atoatoa ai ona lelei la latou amio i se uiga faatatau.

Pe e tatou te toe maua le lelei atoatoa lea na leiloa iā Atamu? Ioe, e ala i le faatuatua i le taulaga togiola a Iesu, e mafai ai e tagata usiusitaʻi ona maua le lelei atoatoa i le taimi o le Pulega a Keriso i le Afe Tausaga, pe a ‘faalēaogā e le Alo o le Atua galuega a le Tiapolo.’—1 Ioa. 3:8.