‘O Mea na Ia Faia e Mulimuli Atu iā te Ia’

I LE taeao o le Aso Lulu, Iuni 9, 2010, na faaiʻuina ai le soifuaga i le lalolagi o Theodore Jaracz, o se sui o le Vaega Pule o Molimau a Ieova. E 84 ona tausaga ina ua maliu, ma o loo soifua pea lona faletua o Melita, ua 53 tausaga talu ona la faaipoipo. O isi o loo soifua pea o lona aiga, o lona tuafafine matua ma lana fanau e toʻatolu, o le tama ma teine e toʻalua.

Na fanau le uso o Jaracz iā Setema 28, 1925, i Pike County i Kentucky i Amerika, ma na faailogaina lona tuuina atu iā Ieova iā Aokuso 10, 1941, ina ua 15 ona tausaga. Na amata ona paeonia sauatoa o ia ina ua 17 ona tausaga, ma o le amataga lenā o lana auaunaga faataimi atoa ua toetoe nei 67 tausaga.

I le 1946, ina ua 20 ona tausaga, na auai ai le uso o Jaracz i le vasega lona fitu o le Aʻoga Faale-Tusi Paia a le Olomatamata o Kiliata. Ina ua faauu le uso o Jaracz, na tofia o ia e auauna o se ovasia femalagaaʻi i Cleveland, Ohio, o se oganuu o Amerika. I le 1951, na tofia ai o ia e galue i le lālā i Ausetalia, ma avea ai ma ovasia o le lālā. Ua lipotia mai i le tusi tausaga, 1983 Yearbook of Jehovah’s Witnesses, e faatatau i le uso o Jaracz e faapea, “o lona maelega i faatulagaga faatiokarate, faapea lana taʻitaʻiga lelei i le galuega talaʻi, na matuā faalaeiauina ai le ʻauuso i le atunuu atoa.”

Ina ua toe taliu atu i Amerika, na faaipoipo ai le uso o Jaracz ma Melita Lasko iā Tesema 10, 1956. Na amata la laʻua auaunaga o se ulugalii faaipoipo i le galuega femalagaaʻi, ma galulue ma le filigā i matagaluega ma itumalo, i le asia o se vaega tele o Amerika. I le faaiʻuga o le 1974, na valaaulia ai le uso o Jaracz e avea ma sui o le Vaega Pule o Molimau a Ieova.

O le a manatuaina pea le uso o Jaracz o se auauna tuutoina atu ma faamaoni a Ieova, o sē e uaʻi atoatoa i galuega faatiokarate. O ia o se tane e alofa ma agalelei, ma o se tagata faaleagaga o lē e faamuamua manaʻoga o isi. (1 Kori. 13:4, 5) O lona faanaunauga, ia tutusa le faiga o tagata uma ma faaalia i ai le alofa. E lē gata i lenā, na faaalia lona alofa ma le manatu mamafa i tagata e ala i lona maelega i le galuega talaʻi.

E ui e matuā faanoanoa ona o le maliu o se sui e galue mamafa ma pele i le aiga Peteli ma le ʻauuso i le lalolagi aoao, a ua tatou olioli ona o le auaunaga faamaoni a le uso o Jaracz mo le tele o tausaga. E tatou te mautinoa ua ‘⁠faamaoni o ia seʻia oo i le oti, ma ua ia maua le pale o le ola.’ (Faaa. 2:10) E tatou te mautinoa foʻi, ‘⁠o mea na ia faia e mulimuli atu iā te ia.’—Faaa. 14:13.