‘⁠Seʻi o Tatou Foaʻi Atu iā Ieova’

E FAAPEFEA ona faaalia lou talisapaia pe a agalelei mai se tasi iā te oe? Seʻi iloilo le auala na faaalia ai e alii sili o le vaegaau a Isaraelu lo latou talisapaia, ina ua manumalo i le taua ma Mitiana. Na tupu lenei taua ina ua agasala Isaraelu ona o Paala o Peoro. O le Atua na manumalo ai ona tagata, ma na vaevaeina le vete e fitafita e toʻa 12,000 atoa ma Isaraelu uma. Na ave e fitafita se vaega o a latou mea i faitaulaga e tusa ma le faatonuga a Ieova, ae ave e tagata Isaraelu se vaega i le ʻau sa Levī.—Nu. 31:1-5, 25-30.

Peitaʻi, na mananaʻo taʻitaʻiʻau e faasili mea e foaʻi atu. Na fai atu i latou iā Mose: “Ua faitauina e au auauna le aofaʻi o tamāloloa o le taua na i la matou vaavaaiga ma ua leai se isi o i matou na fasiotia.” Na latou filifili e foaʻi iā Ieova o teuga e fai i  auro ma mea eseese faapena. E silia ma le 500 pauna (190 kg) le mamafa o nei teuga.—Nu. 31:49-54.

Ua uunaʻia foʻi le toʻatele o tagata e faaalia le talisapaia o mea ua faia e Ieova mo i latou. E lē na o tagata o le Atua e iai na faalogona. O se faaaʻoaʻoga, o le ave pasi o le pasi na malaga ai sui usufono o le tauaofiaga itumalo na faia i Bologna, i Italia i le 2009. Ona o ia o se ave taavale lelei toe agamalu, na mananaʻo ai i latou na tiʻetiʻe i lana pasi e ave i ai se tusi faafetai ma se tupe, ma le lomiga O ā Aʻoaʻoga Moni a le Tusi Paia? O lea, na tali mai ai le alii ave pasi e faapea: “Ou te talia fiafia le tusi ma le lomiga, ae toe faafoʻi atu le tupe, ona ou te manaʻo e foaʻi atu ina ia faaauau ai pea ona faia o la outou galuega. E ui e lē o aʻu o se Molimau a Ieova, ae ou te manaʻo e foaʻi atu le tupe ona ua ou iloa, o le alofa e uunaʻia ai mea ua outou faia.”

Pe a e talisapaia mea ua faia e Ieova mo oe, e faaalia lou agaga faafetai i le faia o foaʻi i le galuega a Molimau a Ieova i le lalolagi aoao. (Mata. 24:14) O loo taʻua i le pusa auala ua filifili ai nisi e foaʻi.

[Pusa i le itulau 20]

AUALA UA FILIFILIA E NISI E FOAʻI AI

MEAALOFA MO LE GALUEGA I LE LALOLAGI AOAO

E toʻatele i latou ua faaagaga se vaega tupe e lafo i pusa o loo faailogaina, “Galuega i le Lalolagi Aoao.”

I masina taʻitasi, e avatu ai e faapotopotoga nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona auina atu meaalofa o tupe i le Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, po o le ofisa o le lālā o Molimau a Ieova o loo vaavaaia lou atunuu. (O foaʻi tauofo o loo taʻua i lalo, e mafai foʻi ona auina atu i le lālā o Molimau a Ieova o loo vaavaaia lou atunuu.) E ao ona tusia le igoa “Watchtower” i se siaki pe a fia faia se foaʻi i lenā auala. E mafai foʻi ona foaʻi atu mea tāua e iai filifili, tautaliga, taulima auro, ma mea faapena. E tatau ona auina atu faatasi ma na foaʻi se tusi puupuu e faailoa atu ai, o na mea ua foaʻi atu i le lālā.

FUAFUAGA O FOAʻI E IAI TUUTUUGA

E mafai ona foaʻi atu se tupe mo le galuega i le lalolagi aoao, e teuina i se āiāiga faapitoa ma le Watch Tower Bible and Tract Society of Pennsylvania. Ae e mafai ona toe faafoʻi atu lenā foaʻi i lē e ana le tupe pe a ia talosagaina. Mo nisi faamatalaga, faamolemole faafesootaʻi le Treasurer’s Office (Ofisa o le Teutupe), i le tusi atu i le tuatusi o loo taʻua i luga pe telefoni foʻi i ai i le (718) 560-7500.

FUAFUAGA O FOAʻI FAAMEAALOFA

E lē gata i foaʻi tautupe, ae e iai isi auala e faia ai foaʻi mo le galuega o le Malo i le lalolagi aoao. E aofia ai mea nei:

Inisiua: E mafai ona tusia le Watch Tower Bible and Tract Society of Pennsylvania, e uili i ai le inisiua o le ola o se tasi, po o tupe e maua pe a litaea, po o penisione.

Teugātupe i le Faletupe: O teugātupe i le faletupe, pepa o teugātupe, po o tupe e maua e le tagata pe a litaea, e mafai ona tuu faamavaega mo le Watch Tower Bible and Tract Society of Pennsylvania, ma ia faia e tusa o faatulagaga a le faletupe o le atunuu.

Tupe Faafaigaluega ma Pepa Faamaonia mo Tupe: O nei mea e mafai ona foaʻi faameaalofa tuusaʻo atu i le Watch Tower Bible and Tract Society of Pennsylvania, pe tusi i lalo le Watch Tower Bible and Tract Society of Pennsylvania, o lē e mauaina mea pe a maliu se tasi.

Fanua ma Fale: E mafai ona foaʻi atu au meatotino e pei o fanua po o fale, pe tuu le fale po o le fanua e nofo ai pea lē e ana seʻia oo ina maliu, ona faatoʻā maua lea e le lālā. Ia faafesootaʻi le ofisa o le lālā i lou atunuu, a o leʻi faia pepa e foaʻi atu se fanua.

Tupe Faameaalofa e Iai Tuutuuga: O nei tupe, o se meaalofa ua faatulaga e avatu i se faalapotopotoga faaletulafono o loo faaaogāina e Molimau a Ieova. Ae e maua e lē e ana le foaʻi po o se tasi ua ia tofia, se tino i tupe i tausaga taʻitasi a o soifua pea o ia. O le a faaitiitia le lafoga e totogi e le tagata na faia le foaʻi, i le tausaga na faamautūina ai lea fuafuaga.

Uili ma Mavaega: E mafai ona foaʻi atu meatotino po o se vaega tupe i le Watch Tower Bible and Tract Society of Pennsylvania, e ala i se uili ua faia e tusa ai ma le tulafono, pe avea foʻi le Watch Tower Bible and Tract Society of Pennsylvania ma lē e mauaina le taui o se teugātupe ua tuu faamavaega. O se teugātupe ua tuu faamavaega mo se faalapotopotoga faalelotu, e mafai ona faaitiitia ai lafoga e totogi.

E pei ona faailoa mai i le faaupuga “foaʻi faameaalofa,” o nei foaʻi, e manaʻomia ona fuafua lelei e lē a ana le foaʻi. Ina ia fesoasoani i ē o loo fia faia ni meaalofa tauofo i le galuega a Molimau a Ieova i le lalolagi aoao, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Ua saunia i le polosiua faamatalaga i auala eseese e faia ai foaʻi faameaalofa i le taimi nei, ma pe a maliu lē e ana le foaʻi. Ina ua uma ona faitau le toʻatele o le ʻauuso i le polosiua ma talanoa ma a latou lōia po o tagata faufautua e faatatau i lafoga, ua mafai loa ona latou lagolagoina le galuega a Molimau a Ieova i le lalolagi aoao, ma maua ai foʻi le fesoasoani i le faaitiitia o lafoga e totogi. E maua se kopi o lenei polosiua mai le Charitable Planning Office.

Mo nisi faamatalaga, faafesootaʻi le Charitable Planning Office, e ala i lou tusi atu i le tuatusi pe telefoni atu foʻi i le numera o loo taʻua i lalo, pe faafesootaʻi le ofisa o le lālā o Molimau a Ieova i lou atunuu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefoni: (845) 306-0707