Auauna i le Atua e ui ua Afu le Soifua

Iā Tesema 19, 2009, na papatiso ai i Málaga, i le itu i saute o Sepania, se tinā ma lana tama teine o o la igoa o Ana. Na aofia i laʻua i le 2,352 o ē na papatiso i Sepania i le 2009. Ae o le mea mataʻina i lenei tinā ma lana tama teine, o o la tausaga. O le tinā e 107 ona tausaga a o lana tama teine e 83 tausaga!

Aiseā na la papatiso ai e faailoga ai lo la tuuina atu iā Ieova? I se vaimea o le 1970 i le 1975, sa masani ai ona valaaulia e se tuaoi Ana laʻitiiti e auai i le Suʻesuʻega Tautusi a le Faapotopotoga, sa fai i le fale o le Molimau. Sa iai taimi na auai ai Ana, ae ona o lana galuega, e leʻi agaʻigaʻi ai i luma faaleagaga.

I le sefulu tausaga mulimuli ane, na suʻesuʻe ai e nisi o le fanau a Ana le Tusi Paia ma iʻu ina avea ma auauna a Ieova. Na toe faaolaola e se tasi o i latou, o Mari Carmen, le fiafia o lona tinā i le upu moni, ma fesoasoani iā te ia e fai sana suʻesuʻega faale-Tusi Paia. Ona amata foʻi lea ona fiafia le tinā o le tinā o Mari Carmen, o Ana matua, i le Tusi Paia. O le iʻuga, e toʻasefulu tagata o lenei aiga na papatiso.

Na matuā fiafia i laʻua i le aso o lo la papatisoga. Na faapea mai Ana matua o lē ua 107 ona tausaga: “E ese le lelei o Ieova iā te aʻu, auā ua ou maua le avanoa ou te iloa ai o ia.” Na faapea mai foʻi Ana laʻitiiti: “Ou te manaʻo e auauna iā Ieova a o leʻi oo mai le Parataiso, e fai lona finagalo ma talaʻi atu le tala lelei i le tele ou te mafai ai.”

E sili ona olioli nei tinā ua maliliu a la tane, i le auai i sauniga. Ua taʻua e se toeaina o le faapotopotoga: “E lē taitai ona la misia se sauniga. E la te sauni i taimi uma e fai se tali i le Suʻesuʻega o le Olomatamata.”

O le la faaaʻoaʻoga faamaoni e manatua ai Ana, o se fafine ua oti lana tane, o lē sa “iai pea . . . i le malumalu e fai le auaunaga paia i le pō ma le ao, faatasi ma anapogi ma tatalo faatauanau.” O lea na iʻu ai ina ia maua le faaeaga e vaai i le pepe o Iesu. (Luka 2:36-38) Sa auauna pea Ana iā Ieova e ui ua 84 ona tausaga, ma e faapena foʻi nei tinā e toʻalua e igoa iā Ana, ua auauna pea iā Ieova e ui ua afu o la soifua.

Po o iai ni ou tauaiga o loo fia faalogo i le feʻau o le Tusi Paia? Po ua e feiloaʻi i se tagata matua e fia faalogo mai a o e talaʻi atu iā te ia i lona fale? E mafai ona pei na tagata o Ana e toʻalua ia e taʻua i inei, auā e mafai e ē ua afu o latou soifua ona amata ona auauna i le Atua moni o Ieova.

[Faamatalaga faaopoopo i le itulau 25]

“E ese le lelei o Ieova iā te aʻu”

[Faamatalaga faaopoopo i le itulau 25]

“Ou te manaʻo e auauna iā Ieova a o leʻi oo mai le Parataiso”