Faaaloalo i le Faaipoipoga o se Meaalofa Mai le Atua

“O le māfuaaga lea e tuua ai e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi.”—KENE. 2:24.

1. Aiseā e tatau ai ona tatou faaaloalo iā Ieova?

E TATAU ona tatou faaaloalo iā Ieova, o Lē na faavaeina faaipoipoga. Ona o ia o Lē na Foafoaina i tatou o le Pule Silisili Ese, ma o le Tamā faalelagi, ua talafeagai ai ona taʻua o ia o Lē foaʻi mai “meaalofa lelei uma ma mea uma e atoatoa ona lelei.” (Iako. 1:17; Faaa. 4:11) O le faailoaga lea o lona alofa tele. (1 Ioa. 4:8) O mea uma ua ia aʻoaʻo ai i tatou, o mea uma ua ia faafinagaloina mai iā i tatou, o mea uma ua ia aumai iā i tatou e mo lo tatou lelei ma e aogā.—Isa. 48:17.

2. O ā faatonuga na avatu e Ieova i le uluaʻi ulugalii faaipoipo?

² Ua faaalia i le Tusi Paia, o le faaipoipoga o se tasi o meaalofa “lelei” mai le Atua. (Ruta 1:9; 2:12) Ina ua ia faia le uluaʻi faaipoipoga, na avatu e Ieova i le ulugalii o Atamu ma Eva, ni faatonuga patino i le auala e taulau manuia ai. (Faitau le Mataio 19:4-6.) Pe ana fai e la te mulimulitaʻia taʻiala a le Atua, semanū e tumau lo la olioli. Ae peitaʻi, e la te leʻi amanaʻia le faatonuga a le Atua ma pagatia ai i āuga leaga.—Kene. 3:6-13, 16-19, 23.

3, 4. (a) Ua faapefea ona lē faaaloalo le toʻatele i aso nei, e lē gata i le faaipoipoga, ae faapea foʻi ma Ieova le Atua? (e) O ā ni faaaʻoaʻoga o le a tatou talanoaina i lenei mataupu?

³ E pei lava o lenā uluaʻi ulugalii, o le toʻatele o tagata i aso nei e faia filifiliga tau i le faaipoipoga, e aunoa ma le manatu mamafa i le taʻitaʻiga a Ieova. Ua teena e nisi faatulagaga saʻo faale-faaipoipoga, a ua taumafai isi e faafetaui le uiga o le upu, ma o latou faanaunauga. (Roma 1:24-32; 2 Timo. 3:1-5) Ua latou lē amanaʻia le mea moni o le faaipoipoga o se meaalofa mai le Atua, ma o le lē faaaloalo i lenā meaalofa, ua latou lē āva ai i Lē na aumaia lenā meaalofa, o Ieova le Atua.

⁴ E iai taimi, e oo lava i nisi o tagata o le Atua ua lē manatu i faaipoipoga e pei ona silasila i ai Ieova. Ua filifili nisi o ulugalii Kerisiano e teteʻa, pe tatala le faaipoipoga e aunoa ma se faavae faale-Tusi Paia. E faapefea ona ʻalofia lenei tulaga? E faapefea ona fesoasoani taʻiala a le Atua o loo i le Kenese 2:24 i Kerisiano faaipoipo, e faamalosia ai a latou faaipoipoga? Ma e faapefea iā i latou o loo mafaufau e faaipoipo ona sauniuni i ai? Seʻi o tatou tilofaʻia ni faaipoipoga se tolu i le taimi o le Tusi Paia na taulau manuia, e faamaonia ai, o le faaaloalo iā Ieova o le ki tāua lea e tumau ai se faaipoipoga.

Atiaʻe le Faamaoni

5, 6. O le ā se tulaga na ono tofotofoina ai Sakaria ma Elisapeta, ma sa faapefea ona tauia lo la faamaoni?

⁵ Sa faia e Sakaria ma Elisapeta mea tonu uma. Sa faaipoipo atu i se paaga e faamaoni iā Ieova. Sa faia ma le faamaoni e Sakaria ona tiute faaositaulaga, ma tausia e i laʻua uma tulafono a le Atua i le mea sili la te mafaia. E mautinoa e tele ni mea e la te lotofaafetai ai. Peitaʻi, pe a e asiasi atu i lo la aiga i Iuta, o le a e iloa ai, e leai sa laʻua fanau. Sa pā Elisapeta, ma ua matutua foʻi.—Luka 1:5-7.

⁶ I Isaraelu anamua, sa tāua tele le iai o fanau, ma sa masani ona toʻatele se aiga. (1 Samu. 1:2, 6, 10; Sala. 128:3, 4) I na aso, sa  faatogafiti ona tatala e nisi tane Isaraelu le faaipoipoga pe a lē fanau lana avā. E ui i na tulaga ae sa faamaoni pea Sakaria iā Elisapeta. E leʻi saʻilia e ia se auala e faigofie ai ona la teteʻa, ma e faapena foʻi Elisapeta. E ui ina faanoanoa i le leai o sa la fanau, ae na faaauau pea ona la auauna faamaoni iā Ieova. Mulimuli ane na tauia i laʻua i se auala faavavega i le fanauina o sa la tama tama a ua matutua.—Luka 1:8-14.

7. O le ā le isi auala na faaalia ai le faamaoni o Elisapeta i lana tane?

⁷ Sa faaalia foʻi e Elisapeta le faamaoni i se isi auala. Ina ua fanau lana tama o Ioane, e leʻi mafai ona tautala Sakaria ona na gūgū i lona fesiligia o le agelu a le Atua. Ae atonu na iai se auala na taʻu atu ai e Sakaria i lana avā, na faailoa atu e le agelu a Ieova, o le igoa o le tama o “Ioane.” Na mananaʻo tuaoi ma o la tauaiga e faaigoa le tama i le igoa o lona tamā. Ae na lagolagoina ma le faamaoni e Elisapeta le faatonuga a lana tane. Na ia faapea atu: “E leai! e tatau ona faaigoa o ia iā Ioane.”—Luka 1:59-63.

8, 9. (a) E faapefea i le faamaoni ona faamalosia ai se faaipoipoga? (e) O ā nisi o auala patino e faaalia ai e le tane ma le avā le faamaoni?

⁸ E pei o Sakaria ma Elisapeta, ua fesagaʻi ulugalii faaipoipo i aso nei ma faanoanoaga ma isi luʻi. A aunoa ma le faamaoni i se faaipoipoga, e lē umi ona sologa lelei. O le faatafai solo, matamata i ata matagā faaleulugalii, mulilua, ma isi mea, e lamatia ai se faaipoipoga lelei, ma lē toe talitonuina ai e le tasi le isi. Ma a lē talitonu loa le tasi i le isi, ona amata loa lea ona mou mālie atu le alofa. O le faamaoni, ua pei o se pā e siʻomia ai le fale o se aiga mai i lamatiaga, ma lagona ai e le aiga atoa le saogalemu. O lea la, pe a faamaoni le tane i le avā ma le avā i le tane, e mafai ona la nonofo faatasi ma le saogalemu, ma faigofie ai ona fetalanoaaʻi ma faatuputeleina ai le alofa. Ioe, e tāua tele le faamaoni.

⁹ Na fetalai Ieova iā Atamu: “E tuua . . . e le tane lona tamā ma lona tinā, ma nonofo faatasi ma lana avā.” (Kene. 2:24) O le ā le uiga o lenā faaupuga? E tatau ona toe fetuunaʻi sootaga ma uō ma aiga. E ao i paaga taʻitoʻatasi ona ave le faamuamua i lana paaga i mea uma. E lē o toe faamuamua uō ma aiga, ma lē amanaʻia ai lo la aiga fou. E lē faatagaina foʻi mātua e aiā fua i a la filifiliga ma feeseeseaʻiga. Ua tatau nei ona tutū faatasi le ulugalii. O le faatonuga lenā a le Atua.

10. O le ā o le a fesoasoani i ulugalii faaipoipo e atiaʻe ai le faamaoni?

¹⁰ E oo lava i aiga e eseese tapuaʻiga, e taulau manuia ona o le faamaoni. Na taʻua e se tuafafine e lē talitonu lana paaga: “Ou te matuā faafetai iā Ieova ona ua ia aʻoaʻoina aʻu i auala e faaalia ai le gauaʻi, ma faaaloalo loloto i laʻu tane. O le tumau pea i le faamaoni, ua iʻu ai i se faaipoipoga e tumau pea le alofa ma le faaaloalo mo le 47 tausaga.” (1 Kori. 7:10, 11; 1 Pete. 3:1, 2) O lea, ia taumafai malosi ina ia maufaatuatuaina oe e lau paaga. Ia faamautinoa i lau paaga e ala i upu ma gaoioiga, e sili ona tāua o ia iā te oe i lo se isi lava tagata. O lea la, aua lava neʻi iai se tagata po o se mea e sili atu i lo lau paaga. (Faitau le Faataoto 5:15-20.) Ua faapea mai Ron ma Jeannette, ua silia i le 35 tausaga o tumau le fiafia o la laʻua faaipoipoga, “Ona e ma te faamaoni pea e fai mea o loo finagalo i ai Ieova, ua ma maua ai se faaipoipoga fiafia ma taulau manuia.”

O le Autasi e Faamalosia ai Faaipoipoga

11, 12. Na faapefea ona felagolagomaʻi Akula ma Pisila (a) i le aiga, (e) i la la galuega totogi, ma (i) i le faiva faa-Kerisiano?

¹¹ Ina ua talanoa le aposetolo o Paulo e uiga i ana aumea mamae o Akula ma Pisila, e na te leʻi taʻua le tasi e aunoa ma le isi. O lenei ulugalii, o se faataʻitaʻiga lelei o le uiga o le fetalaiga a le Atua, e ao i le tane ma le avā ona avea ma “tino e tasi.” (Kene. 2:24) E galulue faatasi pea i laʻua i lo la aiga, i la la galuega  totogi, ma le faiva faa-Kerisiano. O se faataʻitaʻiga, ina ua muaʻi taunuu Paulo i Korinito, na valaaulia ma le agalelei o ia e Akula ma Pisila e latou te nonofo i lo la fale, lea e foliga mai na ia faaaogā mulimuli ane e avea ma nofoaga autū o ana galuega fai mo sina taimi. Mulimuli ane i Efeso, na faaaogā lo la fale e fai ai sauniga a le faapotopotoga, ma galulue faatasi e fesoasoani i tagata fou e pei o Apolo, ia tutupu aʻe faaleagaga. (Galu. 18:2, 18-26) Ona ō atu lea o lenei ulugalii maelega i Roma, ma na faaaogā foʻi lo la fale mo sauniga a le faapotopotoga. Mulimuli ane na la toe foʻi atu i Efeso, ma faamalosi i le ʻauuso.—Roma 16:3-5.

¹² Na iai se taimi na galulue ai Akula ma Pisila faatasi ma Paulo i la latou galuega o le faia o faleʻie. O lea foʻi ua toe taʻua le ulugalii, o loo galulue felagolagomaʻi e aunoa ma le tauvā pe e fefinauaʻi. (Galu. 18:3) E mautinoa, o le taimi na galulue faatasi ai lenei ulugalii i galuega faa-Kerisiano, na tumau ai ona malosi faaleagaga le la faaipoipoga. Pe na iai i Korinito, Efeso, po o Roma, ae na mātaulia i laʻua e tagata i lo la “galulue faatasi o ni soo o Keriso Iesu.” (Roma 16:3) Na la galulue faatasi e faalautele atu le galuega talaʻi o le Malo po o fea lava na la auauna ai.

13, 14. (a) O ā ni tulaga e lē mafai ai ona autasi se faaipoipoga? (e) O ā nisi o mea e mafai ona fai e paaga faaipoipo e faamalosia ai le sootaga o se “tino e tasi”?

¹³ O le mea moni, o le autasi i sini ma galuega e malosi ai se faaipoipoga. (Fai. 4:9, 10) Ae e faanoanoa, ona o le tele o ulugalii i aso nei ua itiiti lava se taimi e mafuta ai. E la te faaaluina se taimi umi i a la galuega totogi. O nisi e umi se taimi e faimalaga ai i galuega, pe e faigaluega foʻi i se isi atunuu ma lafo mai tupe i le aiga. E oo lava i totonu o le aiga, e lagona e le isi paaga ua tuua toʻatasi o ia, ona o le taimi e faaalu e matamata ai i le televise, mea e fiafia ai, taaloga, taaloga vitiō, po o le Initaneti. Po o le tulaga lenā o iai lou aiga? Afai o lea, pe mafai ona toe fetuunaʻi lou tulaga ina ia lava se taimi lua te faifaimea faatasi ai? Ae ā le fai faatasi o galuega masani, pei o le sauniunia o meaʻai, fufuluina o ipu, po o le galulue i le togālaau? Po o lua galulue faatasi pea a o tausia le fanau, ma mātua ua matutua?

¹⁴ O le mea e sili ona tāua, ia lē aunoa ona lua galulue faatasi i galuega e fesootaʻi atu i le tapuaʻiga iā Ieova. O le talanoaina faatasi o le mau i aso taʻitasi ma auai i le tapuaʻiga a le aiga, o avanoa lelei ia e autasia ai lou aiga i manatu ma sini. Ia auai faatasi foʻi i le faiva. Pe afai e mafai, taumafai ia paeonia faatasi, e tusa lava pe na o le tasi le masina e fai ai, pe tasi foʻi le tausaga. (Faitau le 1 Korinito 15:58.) Ua faapea mai se tuafafine sa paeonia ma lana tane: “O le faiva, o se tasi lea o auala na mafai ai ona ma faifaimea faatasi ma talatalanoa. Ona e tutusa o ma sini o le fesoasoani faaleagaga atu i isi, na ou lagona ai o i maʻua o se ʻau e tasi. Na ou lagona le māfana atu iā te ia e lē gata o se tane, ae o se uō lelei foʻi.” A o lua galulue faatasi i le faia o galuega  aogā, o le a oo ina tutusa mea e te lua fiafia i ai, mea e tatau ona faamuamua, seʻia oo ina pei oulua o Akula ma Pisila, o le a faasolosolo ona lua mafaufau, lagona, ma gaoioi e pei o se “tino e tasi.”

Ia Faamuamua le Atua i le Faaipoipoga

15. O le ā le ki i se faaipoipoga e taulau manuia? Faamatala.

¹⁵ Na silafia e Iesu le tāua o le faamuamua o le Atua i le faaipoipoga. Na vaai o ia o faia e Ieova le uluaʻi faaipoipoga. Na ia mātauina ai le fiafia o Atamu ma Eva a o la mulimuli i le faatonuga a le Atua, ma na ia vaaitino foʻi i faafitauli na iʻu i ai, ina ua la lē amanaʻia lenā faatonuga. O lea, ina ua aʻoaʻoina e Iesu isi, na ia taʻu atu le faatonuga a lona Tamā o loo i le Kenese 2:24. Na ia faaopoopo foʻi i ai le manatu lenei: “O ē ua faatasia e le Atua, aua neʻi tuueseeseina e se tagata.” (Mata. 19:6) O lea la, o le ki i se faaipoipoga e fiafia ma taulau manuia, o le faaaloalo loloto lea iā Ieova. E tusa ai ma lenei mea, na faia e mātua faaletagata o Iesu, o Iosefa ma Maria se faaaʻoaʻoga mataʻina.

16. Na faapefea ona iloa le matutua faaleagaga o Iosefa ma Maria i lo la olaga faaleaiga?

¹⁶ Sa agalelei ma faaaloalo Iosefa iā Maria. Ina ua iloa e ia ua tō Maria, sa faaalia pea lona alofa i le auala na feagai ai ma ia, e ui e leʻi faamatalaina atu e le agelu a le Atua iā te ia le mea ua tupu. (Mata. 1:18-20) Na la usiusitaʻi i le poloaʻiga a Kaisara ma pipiimau foʻi i le Tulafono a Mose. (Luka 2:1-5, 21, 22) E ui lava e na o tane sa manaʻomia ona auai i tausamiga na faia i Ierusalema, ae i tausaga taʻitasi, na ō faatasi ai Iosefa ma Maria ma lo la aiga i na tausamiga. (Teu. 16:16; Luka 2:41) I na tulaga ma isi foʻi mea, na taumafai ai lenei ulugalii e faafiafia Ieova ma faaalia le faaaloalo loloto mo mea faaleagaga. E lētioa ona filifilia i laʻua e tausia lona Alo i uluaʻi tausaga o lona soifuaga i le lalolagi.

17, 18. (a) O ā auala e faamuamua ai e se ulugalii mea faaleagaga i lo la aiga? (e) E faapefea ona la maua aogā mai i lenei mea?

¹⁷ Po o faapena ona taʻitaʻia lou olaga faaleaiga i mea faaleagaga? O se faataʻitaʻiga, pe a faia ni au filifiliga tāua, pe e te muaʻi faia ni saʻiliʻiliga loloto i mataupu silisili o le Tusi Paia, tatalo e faatatau i le mataupu, ma saʻili se fautuaga mai i se Kerisiano taʻumatuaina? Nai lo o lenā, po o e manaʻo e foʻia ou faafitauli i le mulimuli i ou lava faalogona, po o nisi o lou aiga ma uō? Po o e taumafai e faatino le tele o fautuaga aogā mai i a tatou lomiga ua saunia e le pologa faamaoni ma le faautauta, e faatatau i faaipoipoga ma le olaga faaleaiga? Po o le mea o e mulimuli i tū masani a le atunuu po o fautuaga masani a tagata? Pe e masani ona lua tatalo e lē aunoa ma suʻesuʻe faatasi, faatutū ni sini faaleagaga, ma talanoa i mea e tatau ona faamuamua e lo oulua aiga?

¹⁸ Ua faapea mai Rei e faatatau i le 50 tausaga o fiafia la laʻua faaipoipoga: “E leʻi iai lava so ma faafitauli e ma te leʻi mafai ona foʻia, auā sa avea pea Ieova o se vaega o le ‘maea sautuatolu.’” (Faitau le Failauga 4:12.) E ioe foʻi i ai Teni ma Terina. Ua faapea mai i laʻua: “A o ma auauna faatasi i le Atua, na oo ina malosi la ma faaipoipoga.” Ua sili atu i le 34 tausaga o fiafia pea la laʻua faaipoipoga. Afai e faamuamua pea Ieova i la oulua faaipoipoga, o le a fesoasoani o ia ina ia  taulau ma maua le tele o faamanuiaga.—Sala. 127:1.

Ia Faaaloalo Pea i le Meaalofa a le Atua

19. Aiseā na saunia ai e le Atua le meaalofa o le faaipoipoga?

¹⁹ E pau lava le mea e popole i ai le toʻatele i aso nei, ia maua lo latou fiafia. Ae e ese le vaaiga a se auauna a Ieova i mea. Ua ia iloa ua saunia e le Atua le faaipoipoga o se meaalofa ina ia faalautele ai Lana fuafuaga. (Kene. 1:26-28) Pe ana faaaloalo Atamu ma Eva i lenā meaalofa, semanū e avea le lalolagi atoa ma parataiso e tumu i auauna fiafia ma amiotonu a le Atua.

20, 21. (a) Aiseā e tatau ai ona tatou manatu e paia le faaipoipoga? (e) O le ā le meaalofa o le a tatou suʻesuʻeina i le vaiaso o sosoo mai?

²⁰ E laualuga i mea uma, e vaai auauna a le Atua i le faaipoipoga o se avanoa e avatu ai le viiga iā Ieova. (Faitau le 1 Korinito 10:31.) Ua tatou iloa, o le faamaoni, autasi, ma le faamuamua o le Atua, o uiga faale-Atua na e faamalosia ai se faaipoipoga. O lea, pe e tatou te sauniuni e faamalosia, pe taumafai e faasao le faaipoipoga, e tatau ona tatou vaai muamua i le uiga moni o le faaipoipoga: o se faatulagaga mai i le Atua ma e paia. O le manatua o lenā mea moni, e uunaʻia ai i tatou e fai le mea sili ina ia faia filifiliga tau i le faaipoipoga, e faavae i le Afioga a le Atua. O le auala lenei e faailoa atu ai lo tatou faaaloalo, e lē gata i le meaalofa o le faaipoipoga, ae faapea foʻi i Lē na Foaʻi maia lenā meaalofa, o Ieova le Atua.

²¹ O le mea moni, o le faaipoipoga e lē na o le pau lenā o se meaalofa ua foaʻi mai e Ieova iā i tatou. E lē na pau foʻi lenā o se auala e maua ai le fiafia i le olaga. I le mataupu o sosoo mai, o le a tatou suʻesuʻeina ai le isi meaalofa tautele mai le Atua—o le nofofua.

O le ā Lau Tali?

• E faapefea i le faamaoni ona taaʻina ai ulugalii Kerisiano ua faaipoipo?

• Aiseā e faamalosia ai le faaipoipoga pe a galulue autasi?

• O ā nisi o auala e mafai ona taʻitaʻia ai ulugalii faaipoipo e mea faaleagaga?

• E faapefea ona faaalia lo tatou faaaloalo iā Ieova, o Lē na faavaeina faaipoipoga?

[Fesili mo le Suʻesuʻega]

[Ata i le itulau 15]

O le galulue faatasi e fesoasoani i ulugalii e tumau ai i le autasi