Faamalosia Ina ia Manumalo i so o se Puapuaga

“O mea uma lava, ua ou maua le malosi mai iā te ia o lē na foaʻi maia iā te aʻu le mana.”—FILI. 4:13.

1. Aiseā ua feagai ai tagata o Ieova ma le tele o faigatā?

UA MASANI ona feagai tagata o Ieova ma tulaga faigatā. O nisi puapuaga e māfua ona o lo tatou tino lē lelei atoatoa, pe ona o lenei faiga o mea o loo tatou soifua ai. O isi ua māfua ona o le feitagaʻi i le va o ē e auauna i le Atua, ma ē e lē o auauna iā te ia. (Kene. 3:15) Talu mai le amataga, ua fesoasoani le Atua i ana auauna faamaoni e lavātia sauāga ona o o latou talitonuga, teena omiga leaga mai i isi, ma onosaia isi faigatā uma. E mafai ona faamalosia i tatou e lona agaga paia e faia foʻi faapea.

Fesoasoani Ina ia Lavātia Sauāga Ona o Talitonuga

2. O le ā le sini o sauāga ona o talitonuga, ma e ala mai faapefea?

² O sauāga ona o talitonuga, o faaupuga faatigā po o manuʻaga ua faaoo i tagata ona o o latou faatuatuaga po o tapuaʻiga. O le sini, ia tineia na talitonuga, taofia le faasalalau atu, pe ia tuua e tagata a latou tapuaʻiga. E eseese auala e ala mai ai sauāga, o nisi e tuusaʻo, ae o nisi e lē iloagofie. Ua faatusa e le Tusi Paia osofaʻiga a Satani i osofaʻiga a se leona taanoa ma se asipi (gata feʻai).—Faitau le Salamo 91:13.

3. E ala mai faapefea sauāga ia ua faatusa i osofaʻiga a se leona ma se asipi?

 ³ I le pei o se leona taanoa, e masani ona tuusaʻo osofaʻiga a Satani e ala mai i sauāga, faafalepuipuiina, po o faasāsāga i le galuega talaʻi. (Sala. 94:20) Ua iai tala e uiga i mea faapena, i lipoti o gaoioiga a Molimau a Ieova o loo i le Yearbook. Ua tele atunuu ua faileagaina ai tagata o le Atua e vaega o tagata e lē ano i tulafono, e taʻitaʻia e faifeʻau po o ē e tautū i faiga faaupufai. O nei osofaʻiga e pei o osofaʻiga a se leona, ua faavaatuʻia ai nisi. I le pei o se asipi, ua osofaʻia foʻi e le Tiapolo tagata i se auala e lē iloagofie, ina ia faaluafesasi ai o latou mafaufau ma faasesēina ina ia fai le mea e manaʻo i ai. O le fuafuaga o nei osofaʻiga, ia faavaivaia pe faaleagaina ai lo tatou itu faaleagaga. Ae o le fesoasoani a le agaga paia o le Atua, e mafai ai ona tatou lavātia sauāga tuusaʻo ma lē iloagofie.

4, 5. O le ā le auala sili e nofosauni ai mo sauāga, ma aiseā? Aumai se faaaʻoaʻoga.

⁴ O le mafaufau i sauāga eseese e ono tutupu i le lumanaʻi, e lē o le auala sili lea e nofosauni ai e taulima na mea. E tatou te lē iloa po o ā sauāga o le a tatou fesagaʻia i le lumanaʻi, o lea la, e maʻimau fua le taimi e popole ai i mea atonu e lē taitai ona tutupu. Peitaʻi, e iai se mea e mafai ona tatou faia. Na mafai ona onosaia e le toʻatele sauāga, ona o le manatunatu loloto i faaaʻoaʻoga a auauna faamaoni a Ieova o loo i le Tusi Paia, faapea aʻoaʻoga ma le faaaʻoaʻoga a Iesu. O lenei mea, na atili ai ona malosi lo latou alofa mo Ieova, lea na aogā e teena ai so o se puapuaga na oo iā i latou.

⁵ Manatu i le faaaʻoaʻoga a ni tuafāfine se toʻalua i Malawi. Na sasa e ni tagata sauā, saei o la ofu ma faafefe o le a faamalosia i laʻua, ina ia la faatauina ai ni pepa e lagolagoina ai se vaega faaupufai. Na pepelo i ai na tagata na faatau foʻi e le ʻau Peteli nei pepa. O le ā le la tali? “E na o Ieova le Atua e ma te auauna i ai. Afai sa faatau e uso i le ofisa o le lālā na pepa, e lē suia ai o ma manatu. E lē taitai ona ma lolo atu, e tusa lava pe e tou te fasiotia i maʻua!” Ina ua uma ona tali atu ma le lototetele tuafāfine, ona faasaʻoloto loa lea o i laʻua.

6, 7. E faapefea ona faamalosia e Ieova ana auauna e feagai ma sauāga?

⁶ Na taʻua e Paulo na talia e Kerisiano i Tesalonia le feʻau o le upu moni, “ma le olioli ona o le agaga paia, e ui i le tele o puapuaga.” (1 Tesa. 1:6) Ua taʻua e le toʻatele o Kerisiano i aso ua mavae ma aso nei, o ē na feagai ma manumalo i sauāga, ina ua matuā sauāina i latou, na lagona le filemu o le loto, o se tasi o vala o le fua o le agaga paia o le Atua. (Kala. 5:22) Ua fesoasoani lenā filemu e leoleoina ai o latou loto ma mafaufau. Ioe, e faaaogā e Ieova lona mana galue e faamalosia ai ana auauna, e feagai ma puapuaga ma gaoioi ma le poto pe a oo mai faigatā. *

⁷ Ua ofo tagata i le maumauaʻi o auauna a le Atua e faamaoni pea, e ui lava i sauāga ogaoga. Sa pei na iai i Molimau se malosi e sili atu i le malosi o le tagata, ma o le mea moni lenā. Ua faamautinoa mai e Paulo: “Afai e faalumaina outou ona o le suafa o Keriso, ua outou fiafia, auā ua iā te outou le agaga mamalu, o le agaga lea o le Atua.” (1 Pete. 4:14) O le sauāina ona o le tausisia o tapulaa amiotonu, e faamaonia ai ua tatou maua le finagalo malie o le Atua. (Mata. 5:10-12; Ioa. 15:20) Maʻeu le olioli i le iloaina ua faamanuiaina i tatou e Ieova ona o le faia faapea!

Fesoasoani e Teena Omiga Mai i Isi

8. (a) Aiseā na mafai ai ona teena e Iosua ma Kalepo omiga mai i isi? (e) O le ā e tatou te aʻoaʻoina mai i le faaaʻoaʻoga a Iosua ma Kalepo?

⁸ O se isi osofaʻiga iloagatā e tatau ona  onosaia e Kerisiano, o omiga lē lelei mai i isi. Peitaʻi, talu ai e sili atu le malosi o le agaga o Ieova i lo o le agaga o le lalolagi, e mafai la ona tatou teena ē o loo ulagia ma faasalalau atu tala pepelo e uiga iā i tatou, po o ē e taumafai e faamalosi i tatou e fai mea o loo latou faia. O se faaaʻoaʻoga, aiseā na ese ai manatu o Iosua ma Kalepo mai i isi sipai e toʻasefulu, o ē na auina atu e mataʻi le atunuu o Kanana? Na la mulimuli i le taʻitaʻiga a le agaga o le Atua, o lea na ese ai le “agaga” po o le manatu na iā i laʻua.—Faitau le Numera 13:30; 14:6-10, 24.

9. Aiseā e lē tatau ai ona fefefe Kerisiano ia ese mai i isi?

⁹ O le agaga paia na faamalosia ai aposetolo o Iesu e usitaʻi i le Atua, nai lo o ē na manatu maualuga i ai tagata o ni aʻoaʻo o le lotu moni. (Galu. 4:21, 31; 5:29, 32) E mananaʻo le toʻatele o tagata e fai mea o loo fai e isi tagata, ina ia ʻalofia ai finauga ma feteenaʻiga. Ae e tatau ona ese mai ai Kerisiano moni, ona e latou te tausisi e fai le mea ua iloa e saʻo. Peitaʻi, ona o le malosi e maua mai i le mana galue o le Atua, e latou te lē fefefe ai ia ese mai i isi. (2 Timo. 1:7) Seʻi mātau se omiga e lē tatau ona tatou lolo atu i ai.

10. O le ā le filifiliga faigatā e ono feagai ma nisi Kerisiano?

¹⁰ E ono feagai nisi talavou ma se filifiliga faigatā pe a latou iloa, ua faia e se uō se amioga e lē tusa ai ma le Tusi Paia. Atonu e latou te manatu, o le talanoa atu i toeaina mo se fesoasoani i la latou uō o le a faaleagaina ai le faigāuō. O lea la, e latou te manatu o se lē alofa pe afai e latou te taʻuina le mea sesē na fai. Atonu foʻi e tauanau e lē sa faia le mea sesē ana uō e aua neʻi taʻuina lana mea sesē. Ae e lē na o talavou e tauivi ma lenei faafitauli. E faigatā foʻi i nisi tagata matutua ona talanoa atu i toeaina o le faapotopotoga, e uiga i se mea sesē a se uō po o se tauaiga. Ae o le ā le auala e tatau i Kerisiano moni ona taulima ai lenei omiga?

11, 12. O le ā le mea sili e te faia pe a tauanau oe e se tasi o le faapotopotoga, e aua neʻi taʻua lana mea sesē na fai, ma aiseā?

¹¹ Seʻi manatu i le tulaga lenei. Seʻi faapea ua iloa e se uso talavou e igoa iā Aleki, ua fai ma masani a lana uō i le faapotopotoga, o Sitivi, le matamata i ata o faiga matagā tau feusuaʻiga. Ua fai atu Aleki iā Sitivi e popole tele i lana mea o loo fai. Peitaʻi e lē amanaʻia e Sitivi ana upu. Ina ua fautuaina e Aleki lana uō e talanoa i toeaina, ae tali mai Sitivi, pe afai e moni o ia o lana uō, e na te lē taʻua o ia. Pe e tatau ona popole Aleki neʻi mea ane ua leaga le la faigāuō? Atonu e taumānatu o ia po o ai o i laʻua o le a talitonu i ai toeaina, pe afai ae faafiti Sitivi e na te leʻi faia na mea. Ae e lē foʻia le faafitauli pe afai e lē talanoa atu Aleki i toeaina. O le a iʻu ina lē toe iai se faiā a Sitivi ma Ieova. E ao foʻi ona manatua e Aleki, “o le fefe i tagata o le mailei  lea, a o lē e faatuatua iā Ieova e puipuia o ia.” (Faata. 29:25) O le ā se isi mea e ao ona fai e Aleki? E lelei pe a toe talanoa atu iā Sitivi e uiga i lana mea sesē, ma e manaʻomia ai le lototele. Atonu o le a fiafia Sitivi e talanoa i lenei taimi e uiga i le faafitauli. E tatau ona toe fautua atu Aleki iā Sitivi e talanoa i toeaina, ma fai i ai o le a tuu atu sina taimi iā te ia, ae afai e leai, o le a ia talanoa loa i toeaina.—Levi. 5:1.

¹² Pe afai e te feagai ma se tulaga faapea, atonu o le taimi muamua e lē tali lelei mai lau uō. Ae e na te toe iloa ane, ua e faia ona o lou alofa. Pe afai e na te maua ma talia le fesoasoani, e ono lotofaafetai pea o ia ona o lou lototele ma le faamaoni. Ae pe afai e lē fiafia pea iā te oe, po o le ituaiga uō moni lenā e te manaʻo i ai? O le faafiafiaina o la tatou Uō sili o Ieova, o le mea tonu lea e tatau ona fai. Pe afai e tatou te faamuamua o ia, o le a faaaloalogia i tatou e isi o ē e alolofa iā Ieova, ona o lo tatou faamaoni, ma avea i latou o ni uō moni. E lē tatau ona tatou tuu se avanoa e mautū ai le Tiapolo i le faapotopotoga Kerisiano. Auā o le a tatou faatigā ai i le agaga paia o Ieova. Peitaʻi, e tatou te gaoioi e tusa ma le agaga paia, e ala i le tauivi e tausia pea le mamā o le faapotopotoga.—Efe. 4:27, 30.

Faamalosia e Onosaia so o se Faigatā

13. O ā faigatā ua feagai ma tagata o Ieova, ma aiseā ua taatele ai nei mea?

¹³ E lē tasi se auala e ala mai ai faigatā—o faalētonu i tulaga tau tupe, lē toe faigaluega, se mala faalenatura, le maliu o sē e pele, faalētonu le soifua mālōlōina ma isi lava mea. Talu ai ua tatou ola i “aso e sili ona faigatā,” e mautinoa la o i tatou uma e iai taimi e feagai ai ma tulaga faigatā. (2 Timo. 3:1) Pe a tutupu na mea, aua neʻi soona popolevale. E mafai ona faamalosia i tatou e le agaga paia e onosaia so o se faigatā.

14. O le ā na faamalosia ai Iopu e onosaia faigatā na oo iā te ia?

¹⁴ E tele faigatā na oo iā Iopu. Na aveesea ana mea na ola ai, lana fanau, ana uō, lona malosi, ma na mou atu le faatuatua o lana avā iā Ieova. (Iopu 1:13-19; 2:7-9) Ae na maua e Iopu sē e faamāfanafana moni iā te ia, o Eliu. O upu nei a Eliu ma le feʻau mai iā Ieova iā Iopu: “Inā e tu pea ia ma uaʻi atu i galuega ofoofogia a le Atua.” (Iopu 37:14) O le ā na fesoasoani iā Iopu e onosaia ai faigatā? Ma o le ā e fesoasoani iā i tatou e onosaia ai faigatā? O le manatuaina lea ma manatunatu i faamaoniga o le mana ma le agaga paia o Ieova. (Iopu 38:1-41; 42:1, 2) Atonu e tatou te manatua ni taimi o o tatou olaga, na tatou iloa ai faamaoniga o le naunau mai o Ieova, ma o loo naunau mai pea o ia.

15. O le ā na faamalosia ai Paulo e onosaia faigatā?

¹⁵ Sa onosaia e Paulo le tele o faigatā na lamatia ai lona ola ona o le faatuatua. (2 Kori. 11:23-28) Na faapefea ona tumau ma lē popolevale o ia, a o feagai ma na  tulaga e sili ona faigatā? E ala i le tatalo ma faalagolago atu iā Ieova. A o sauāina Paulo, lea e foliga mai na iʻu ai i lona maliu faamaturo, na tusi o ia: “Na latalata mai le Alii ma foaʻi mai le mana iā te aʻu, ina ia faia ma le māeʻaeʻa le talaʻiga e ala iā te aʻu ma ia faalogo ai nuu uma; ma na laveaʻiina aʻu mai i le gutu o le leona.” (2 Timo. 4:17) Ioe, o mea na tutupu iā Paulo, na ia faamautinoa atu ai i uso talitonu, e lē tatau ona latou “popole i se mea.”—Faitau le Filipi 4:6, 7, 13.

16, 17. Taʻu mai se faaaʻoaʻoga o le auala e faamalosia ai e Ieova ona tagata e feagai ma faigatā i aso nei.

¹⁶ O se tasi ua vaai i le auala e tausia ai e Ieova ona tagata, o se paeonia e igoa iā Rosana. Ina ua talosaga atu i lona pule mo ni ona aso mālōlō e auai ai i se tauaofiaga, sa tali mai ma le ita le pule, pe afai e alu o le a tuli o ia ma le galuega. Na alu lava Rosana, ae na tatalo faatauanau ia aua neʻi tulia o ia mai i lana galuega. Ina ua uma, sa toʻa pea o ia. Peitaʻi, i le Aso Gafua ina ua uma le tauaofiaga, na tuli o ia e le pule. Sa popole tele Rosana, ona e ui e laʻitiiti le totogi o lenā galuega, ae sa ia manaʻomia mo le tausiga o lona aiga. Sa toe tatalo ma tomānatu na tausia o ia e le Atua i le itu faaleagaga i le tauaofiaga, e na te tausia foʻi o ia i le itu faaletino. A o alu atu Rosana i le fale, sa ia vaaia se faailoilo o tusia e faapea, “Avanoa Faigaluega” mo ni tagata e popoto e suʻisuʻi, ma na ia talosaga atu mo se avanoa. E ui na iloa e le pule e leai sona poto masani i le galuega, ae na faafaigaluega lava o ia, ma na toetoe faaluaina lona totogi na maua. Sa iloa e Rosana ua tali mai ana tatalo. Ae o le faamanuiaga sili, na mafai ona ia taʻu atu le tala lelei i nisi na latou faigaluega faatasi. Na talia e le toʻalima o i latou, e aofia ai ma le pule le upu moni ma papatiso.

¹⁷ E iai taimi e foliga mai ai ua lē taliina a tatou tatalo, a lē i se taimi vave po o le auala na tatou faatalitalia. Pe afai o lea, e lē taumatea e iai se māfuaaga tatau. O loo silafia e Ieova, ae atonu faatoʻā tatou manino i ai i se taimi o i luma. Ae ia manatua, e lē tuulafoaʻia e le Atua ona tagata faamaoni.—Epe. 6:10.

Fesoasoani e Manumalo i Puapuaga ma Faaosoosoga

18, 19. (a) Aiseā e tatou te faatalitalia ai puapuaga ma faaosoosoga? (e) E faapefea ona e manumalo i puapuaga?

¹⁸ E lē faateʻia tagata o Ieova pe a feagai ma faaosoosoga, tulaga e faavaivaia ai, sauāga ma omiga mai i isi. Ua ʻinoʻino le lalolagi iā i tatou. (Ioa. 15:17-19) Ae e mafai ona fesoasoani le agaga paia e manumalo ai i so o se luʻi e tatou te fesagaʻia a o auauna i le Atua. E lē tuuina e Ieova i tatou i se faaosoosoga e sili atu nai lo o le mea e tatou te lavātia. (1 Kori. 10:13) E na te lē tuua pe tuulafoaʻia i tatou. (Epe. 13:5) E puipuia ma faamalosia i tatou pe a usiusitaʻi i lana Afioga paia. E mafai foʻi e le agaga o le Atua ona uunaʻia uso ma tuafāfine, e fesoasoani mai iā i tatou i taimi e sili ona manaʻomia ai.

¹⁹ Tau ina ia faaauau ona tatou saʻili i le agaga paia, e ala i le tatalo ma le suʻesuʻeina o le Tusi Paia. Tau ina ia ‘matuā faamalosia i tatou i le malosi uma e manaʻomia, ma mafai ai ona tutumau atoatoa ma ia faapalepale, atoa ma le olioli ona o le mana tele o le Atua.’—Kolo. 1:11.

[Faamatalaga pito i lalo]

O le ā Lau Tali?

• E faapefea ona e nofosauni e lavātia sauāga?

• O le ā e te faia pe a tauanau oe e se tasi e aua neʻi taʻua lana mea sesē na fai?

• O le ā e ao ona tatou manatua pe a feagai ma tulaga faigatā?

[Fesili mo le Suʻesuʻega]

[Ata i le itulau 28]

O le ā e tatou te aʻoaʻoina mai iā Iosua ma Kalepo?

[Ata i le itulau 29]

E faapefea ona e fesoasoani i se uō ua faia se mea sesē?