Manatunatu i Mea ua Faia e Ieova mo Oe

A O LEʻI leva ona toetū Iesu, ae savavali mai ona soo e toʻalua i Ierusalema agaʻi i Emau. Ua taʻua i le tala i le Evagelia a Luka: “A o felafolafoaʻi ma talatalanoa i laʻua, ona faalatalata atu lea o Iesu ma savavali faatasi ma i laʻua; ae e leʻi mafai ona la iloa o ia.” Ona fetalai atu lea o Iesu iā i laʻua: “‘O ā ea mea o lua talatalanoa i ai a o lua savavali?’ Ona tutū lea ma o la mata ua faanoanoa.” Aiseā? Na talitonu soo o le taimi lenā o le a laveaʻi ai e Iesu Isaraelu mai i le pulega a Nuu Ese, peitaʻi e leʻi tupu lenā laveaʻiga. Nai lo o lea, na fasiotia Iesu. O lea na la faanoanoa ai.—Luka 24:15-21; Galu. 1:6.

Sa talanoa atu Iesu i ona soo. “Ona ia faamatala atu lea o mea o i Tusitusiga Paia e faatatau iā te ia, e amata mai i tusi a Mose ma le ʻau Perofeta.” Ioe, e tele mea mataʻina ma mea e faamalosia ai le faatuatua, na tutupu a o fai le faiva a Iesu! A o faalogologo atu soo i faamatalaga a Iesu, na suia o la mata faanoanoa i le fiafia. Mulimuli ane i lenā afiafi, na la faapea ane: “Pe e leʻi mū ea o ta loto a o fetalai mai o ia iā i taʻua i le auala, ma faamatala mai Tusitusiga Paia?” (Luka 24:27, 32) O le ā e tatou te aʻoaʻoina mai i le tali atu a nei soo?

O ā Aafiaga iā i Tatou o Faamoemoega e Lē Taunuu?

Na faanoanoa soo e toʻalua i le auala e agaʻi atu i Emau, ona e leʻi taunuu mea na la faamoemoe i ai. Na la tofo i le lagona o loo taʻua i le Faataoto 13:12: “O le faamoemoe ua tuai ona taunuu e maʻi ai le loto.” Ua manatu foʻi nisi o i tatou na auauna faamaoni iā Ieova mo le tele o tausaga, ua leva ona tatau ona oo mai le “puapuaga tele.” (Mata. 24:21; Faaa. 7:14) I aso nei, e faigofie ona ioe e tatou te ono faanoanoa ona ua lē taunuu lenā faamoemoe.

Ae ia manatua, na toe olioli na soo e toʻalua ina ua fesoasoani atu Iesu iā i laʻua, ia taulaʻi i valoaga ua uma ona faataunuu, ma o nisi valoaga na faataunuuina i o la aso. O le auala foʻi lenā e mafai ona tumau ai lo tatou fiafia ma manumalo i lagona lē fiafia. Ua faapea mai Mikaele, o se toeaina  Kerisiano: “Aua e te mafaufau i mea e leʻi faia e Ieova. Ae ia manatunatu i mea ua uma ona ia faia.” Manaia tele lenei fautuaga!

Mea ua Faia e Ieova

Seʻi manatu i nisi o mea matagofie ua uma ona faia e Ieova. Na fetalai Iesu: “O lē e faatuatua mai iā te aʻu; e na te faia galuega na ou faia, ma na te faia foʻi galuega e sili atu.” (Ioa. 14:12) Ua faataunuuina nei e auauna a le Atua galuega silisili e leʻi faia muamua e Kerisiano. E silia i le fitu miliona tagata o loo faamoemoe e faasaoina atu i le puapuaga tele. Seʻi manatu i ai, ua sili atu ona toʻatele auauna faamaoni a Ieova o loo galulue i aso nei i le tele o atunuu i le lalolagi aoao, i lo o aso ua mavae! Ua faataunuuina e Ieova upu na valoia e Iesu e uiga i “galuega e sili atu.”

O ā isi mea ua faia e Ieova mo i tatou? I se auala faafaatusa, o ia ua mafai ai ona ō ese tagata lotofaamaoni mai i le lalolagi amioleaga, ae ulu atu i le parataiso faaleagaga lea ua ia faia. (2 Kori. 12:1-4) Ia manatunatu i nisi o vala o lenā parataiso ua faigofie ona tatou maua. O se faaaʻoaʻoga, tagaʻi i lau fata tusi po o le fata tusi i le Maota mo Sauniga. Suʻe i le Watch Tower Publications Index, pe tagaʻi i le Watchtower Library. Faalogologo i se lipine o se tala faale-Tusi Paia ua puʻeina. Toe mafaufau i mea na e faalogo ma vaai i ai i se tauaofiaga e leʻi leva tele atu. Ia mafaufau foʻi i le aufaatasiga manaia o loo tatou olioli ai, faatasi ma o tatou uso ma tuafāfine Kerisiano. Maʻeu le agalelei o Ieova i le saunia mai mo i tatou o le anoanoaʻi o meaʻai faaleagaga ma se ʻauuso alolofa, ioe, o se parataiso faaleagaga!

Na taʻua e le faisalamo o Tavita: “E tele lava mea ua e faia, Ieova e, loʻu Atua, e oo lava i au galuega ofoofogia ma ou manatunatuga iā i matou.” (Sala. 40:5) Ioe, o le manatunatu i mea matagofie ua faia e Ieova ma mafaufau i ona manatunatuga alofa iā i tatou, o le a faafouina ai lo tatou malosi e tumau ai ona faamaoni i le auaunaga ma le lotoatoa iā Ieova lo tatou Tamā i le lagi.—Mata. 24:13.

[Ata i le itulau 31]

Sa fesoasoani Iesu i ona soo ia manatunatu i mea ua faia e Ieova mo i laʻua

[Ata i le itulau 32]

Toe mafaufau i mea na e faalogo ma vaai i ai i se tauaofiaga e leʻi leva tele atu