Mauaina o le Finagalo Malie o le Atua e Iʻu ai i le Ola e Faavavau

“O oe Ieova e, e te faamanuia i so o se tagata amiotonu, o lou finagalo malie, e te siʻosiʻomia ai i latou e pei o se talita tele.”—SALA. 5:12.

1, 2. O le ā na talosaga atu ai Elia i le fafine Sarefata ua oti lana tane, ma o le ā na faamautinoa atu iā te ia?

SA FIA aai le fafine Sarefata ua oti lana tane ma lana tama, ma na faapena foʻi le perofeta o Elia. A o sauni le fafine e fai sa la meaʻai, na talosaga atu le perofeta mo sina vai ma se falaoa. Sa lotomalie le fafine e avatu sina vai mo ia, ae na pau le mea na iā te ia e fai ai se meaʻai, “ua na o se luuga o falaoamata o loo i le fagu lapoʻa, ma sina suāuu o loo i le fagu laʻitiiti.” Sa ia iloa e lē o lava se meaʻai mo le perofeta ma na ia faailoa atu iā te ia.—1 Tu. 17:8-12.

² Ona fai atu lea o Elia: “Ia e faia se tamaʻi falaoa lapotopoto mo aʻu i mea o iai, ma aumai iā te aʻu, ae mulimuli ane ona e faia lea o se mea mo oe ma lau tama. Auā o le mea lenei ua fetalai mai ai Ieova le Atua o Isaraelu, ‘E lē uma le falaoamata i le fagu lapoʻa, e lē faaitiitia foʻi le suāuu i le fagu laʻitiiti.’”—1 Tu. 17:13, 14.

3. O le ā le mataupu tāua ua tulaʻi mai mo i tatou?

³ E sili atu ona tāua le mataupu lea ua feagai nei ma le fafine Sarefata, nai lo o le filifili pe avatu si meaʻai itiiti o loo totoe iā te ia. Po o le a faatuatua o ia iā Ieova e laveaʻiina o ia ma lana tama, pe faamuamua ona manaʻoga faaletino i lo o le maua o le finagalo malie ma le faauōga ma le Atua? E faapena foʻi se filifiliga tāua e tatau ona tatou faia. Pe e tatou te faatāua le mauaina o le faamaoniga a Ieova, nai lo o le saʻilia o manuia faaletino? Ua iā i tatou māfuaaga e faatuatua ai ma auauna i le Atua. E iai la mea e tatou te faia, ina ia saʻili ma maua ai lona finagalo malie.

‘E Tatau Lava ma Oe le Tapuaʻiga’

4. Aiseā e tatau ai ona tatou tapuaʻi atu iā Ieova?

⁴ E iā Ieova le aiā e faatalitalia ai tagata, e  auauna atu i le auala e finagalo malie ai o ia. Ua autasi se vaega o ana auauna faalelagi i le faamautinoa mai o lenā mea e faapea: “Ieova e, lo matou Atua, ua tatau lava oe ona e mauaina le viiga, ma le mamalu, ma le mana, auā na e foafoaina mea uma lava, ma o lou finagalo foʻi ua iai nei mea ma na foafoaina ai.” (Faaa. 4:11) Ona o Ieova na foafoaina mea uma, ua tatau ai ona tatou tapuaʻi atu iā te ia.

5. Aiseā ua uunaʻia ai i tatou e le alofa o le Atua e auauna atu iā te ia?

⁵ O le isi māfuaaga e tatou te auauna ai iā Ieova, ona o lona alofa tele iā i tatou. Ua faapea mai le Tusi Paia: “Ona faia lea e le Atua o le tagata i lona faatusa, ua ia faia o ia i le faatusa o le Atua, ua ia faia i laʻua o le tane ma le fafine.” (Kene. 1:27) Ua iai i le tagata le filifiliga saʻoloto mai le Atua, e mafaufau ai ma faia ana faaiʻuga. Ona o Ieova na foaʻi maia le ola iā i tatou, ua avea ai o ia ma Tamā o tagata uma. (Luka 3:38) Ona o ia o se tamā lelei, ua ia saunia ai mea e manaʻomia e lana fanau ina ia olioli ai i le ola. “Na te faaoso lona lā” ma “faatotō mai le timu,” ina ia fua mai i le laueleele le anoanoaʻi o meaʻai mo i tatou i se siʻomaga matagofie.—Mata. 5:45.

6, 7. (a) O ā tulaga leaga ua aumai e Atamu i ē uma na tupuga mai iā te ia? (e) E faapefea ona aogā le taulaga a Keriso i ē e saʻilia le finagalo malie o le Atua?

⁶ Ua laveaʻiina foʻi i tatou e Ieova mai āuga leaga o le agasala. Ona ua agasala, ua pei ai Atamu o se tagata taalo i taaloga faitupe, ua ia gaoia tupe a lona aiga e taalo ai. O lona fouvale iā Ieova, ua faoa ai e Atamu mai i lana fanau lo latou faamoemoe, o le ola fiafia e faavavau. O lona manatu faapito, ua nofo pologa ai tagata i le lē lelei atoatoa. Ua mamaʻi ai tagata uma, oo i ai faanoanoaga ma iʻu ai i le oti. Ina ia faasaʻoloto se pologa, e iai se tau e ao ona totogia, ma ua totogia e Ieova lenā tau e laveaʻi ai i tatou mai i na āuga mataʻutia. (Faitau le Roma 5:21.) O le gaoioi e ōgatusa ma le finagalo o lona Tamā, na foaʻi mai ai e Iesu Keriso “lona ola e fai ma togiola e sui ai tagata e toʻatele.” (Mata. 20:28) Ua lē o toe umi ona maua lea e i latou ua faamaonia e le Atua, aogā atoatoa o lenā togiola.

⁷ E sili atu mea ua faia e Ieova o Lē na faia i tatou, nai lo o se isi lava tagata, ina ia tatou maua ai se olaga fiafia e iai sona fuafuaga. O le mauaina o lona finagalo malie, o le a tatou vāai ai i le auala e na te tafiesea ai mea uma ua pagatia ai le fanau a tagata. O le a faaalia mai e Ieova iā i tatou taʻitoʻatasi le auala e avea ai o ia ma Lē e “tauia ē e matuā saʻili iā te ia.”—Epe. 11:6.

“E Ofo Atu ma le Lotomalie e Ou Tagata i Latou Lava”

8. O le ā e tatou te aʻoaʻoina mai iā Isaia e faatatau i le auaunaga i le Atua?

⁸ O le mauaina o le finagalo malie o Ieova, e aofia ai le faaaogā tatau o la tatou filifiliga saʻoloto, ona e lē faamalosia e Ieova se tasi e auauna iā te ia. I aso o Isaia, na fesili o Ia: “O ai ou te auina atu, ma o ai foʻi o le a alu atu mo i matou?” O le amanaʻia e Ieova o le aiā tatau a le perofeta e filifili ai, na Ia faamamaluina ai o ia. Sa tali atu ma le fiafia Isaia: “O aʻu lenei! Inā auina atu ia aʻu.”—Isa. 6:8.

9, 10. (a) O le ā le uiga e tatau ona iā i tatou a o auauna atu i le Atua? (e) Aiseā e tatau ai ona tatou auauna ma le lotoatoa iā Ieova?

⁹ E iai le saʻolotoga o le tagata e filifili ai pe auauna i le Atua pe leai. E finagalo Ieova e tatou te auauna atu iā te ia ma le lotomalie. (Faitau le Iosua 24:15.) O sē e tapuaʻi ma le musuā i le Atua, e lē fiafia i ai o Ia, e na te lē taliaina foʻi i latou e pau lo latou faanaunauga o le faamalieina o isi tagata. (Kolo. 3:22) Pe a “faatuai” ona avatu la tatou auaunaga paia ona ua faalavelavea i mea faalelalolagi, e lē maua ai le finagalo malie o le Atua. (Eso. 22:29) Ua silafia e Ieova e lelei mo i tatou le auauna iā te ia ma le lotoatoa. Na uunaʻia e Mose tagata Isaraelu ina ia filifili  i le ola ‘e ala i le alofa iā Ieova lo latou Atua, e ala i le faalogo i lona siʻufofoga ma pipii atu iā te ia.’—Teu. 30:19, 20.

¹⁰ Na pese atu iā Ieova Tavita le tupu o Isaraelu e faapea: “E ofo atu ma le lotomalie e ou tagata i latou lava i le aso o le malosi o lau vaegaau. I au mea paia matagofie mai le manava o le taeao, ua iā te oe tane talavou e pei o sau o le vaveao.” (Sala. 110:3) E toʻatele tagata i aso nei ua faamuamua i o latou olaga tupe ma mea faafiafia. A o ē e alolofa iā Ieova, e faamuamua la latou auaunaga paia. O lo latou maelega i le talaʻia o le tala lelei, ua atagia mai ai mea e latou te faamuamua. E faatuatua atoatoa iā Ieova, e na te tausia o latou manaʻoga i aso uma.—Mata. 6:33, 34.

Taulaga e Talileleia e le Atua

11. O ā aogā na faamoemoe tagata Isaraelu e maua i le ofoina atu o taulaga iā Ieova?

¹¹ I le feagaiga o le Tulafono, sa ofo atu ai e tagata o le Atua taulaga e sili ona lelei ina ia maua ai lona finagalo malie. Ua taʻua i le Levitiko 19:5: “Afai e tou te faia se taulaga iā Ieova, o se taulaga faifaatasi, e ao ona faia lea taulaga ina ia talileleia ai outou e le Atua.” I le tusi lava lea, ua tatou faitau ai e faapea: “Afai tou te avatu se taulaga, o se taulaga faafetai iā Ieova, e ao ona outou avatu le taulaga ina ia talileleia ai outou.” (Levi. 22:29) Pe a ofo atu e le nuu o Isaraelu manu lelei e fai ai taulaga i le fata faitaulaga o Ieova, o le asu e alu aʻe, ua pei “o se mea manogi e faamalieina ai” le Atua moni. (Levi. 1:9, 13) E na te lagona le fiafia ma le faamalieina i na faailoaga o le alofa mai ona tagata. (Kene. 8:21) I nei vala o le Tulafono, o loo maua ai se mataupu silisili e tatou te faatatauina i aso nei. O ē e ofoina atu taulaga e talileleia e Ieova, e maua lona finagalo malie. O ā taulaga e na te talia? Seʻi iloilo ni vala se lua o le olaga, o a tatou amio ma a tatou upu.

12. O ā masaniga e inosia ai e le Atua le ‘tuuina atu o o tatou tino o se taulaga’?

¹² Na tusi Paulo i Kerisiano i Roma e faapea: “Ia tuuina atu o outou tino o le taulaga ola, e paia, ma e mālie i le Atua, ia faia le auaunaga paia ma lo outou mafaufau lelei.” (Roma 12:1) O le mauaina o le finagalo malie o le Atua, e tatau ai i se tagata ona tausia lona tino i se tulaga e talileleia e le Atua. Afai e na te faaleaga lona tino i le tapaa, niu e ʻai e tagata uli (betel nut), fualaau faasāina, po o le faaaogā sesē o le ʻava malosi, e lē talia lana taulaga. (2 Kori. 7:1) E lē gata i lea, “o lē e faaauau ona faitaaga, ua agasala o ia i lona lava tino,” o so o se amioga lē mamā lava, e inosia ai e Ieova lana taulaga. (1 Kori. 6:18) Ina ia faafiafia le Atua, e tatau i se tagata ona ‘paia o ia i ana amio uma.’—1 Pete. 1:14-16.

13. Aiseā e tatau ai ona tatou vivii iā Ieova?

¹³ O le isi taulaga e fiafia i ai Ieova, o a tatou upu. O i latou e alolofa iā Ieova e vivii pea iā te ia i le lautele, ma i lona lava fale.  (Faitau le Salamo 34:1-3.) Faitau le Salamo 148-150, ma mātau pe faafia ona faalaeiau i tatou e nei salamo ina ia vivii atu iā Ieova. Ioe, “e ono ma tatau foʻi i ē e amio saʻo ona avatu le viiga.” (Sala. 33:1) Na faamamafa foʻi e lo tatou Faaaʻoaʻo o Iesu Keriso, le tāua o le vivii i le Atua e ala i le talaʻi atu o le tala lelei.—Luka 4:18, 43, 44.

14, 15. O ā taulaga na uunaʻia e Hosea tagata Isaraelu e ofo atu, ma na faapefea ona tali mai i ai Ieova?

¹⁴ O le talaʻi atu ma le maelega, e faamaonia ai e tatou te alolofa iā Ieova, ma naunau e maua lona finagalo malie. O se faaaʻoaʻoga, seʻi manatu i le auala na apoapoaʻi atu ai le perofeta o Hosea i le nuu o Isaraelu, o ē ua faia tapuaʻiga sesē ma ua lē maua ai le finagalo malie o le Atua. (Ho. 13:1-3) Na fai atu Hosea iā i latou ina ia ōle atu: “Tau ina ia e [Ieova] faamagalo mea sesē; ma talia le mea lelei, ona matou faitaulaga atu lea i tamaʻi povi taanoa o o matou laugutu.”—Ho. 14:1, 2.

¹⁵ O le povi poʻa, o le manu lea e sili ona taugatā e ofoina atu e se tagata Isaraelu iā Ieova. O lea la, o “tamaʻi povi taanoa o o matou laugutu,” ua faasino atu i upu ua mafaufauina lelei e avatu ai le viiga i le Atua moni. Na faapefea ona tali atu Ieova iā i latou na faia na taulaga? Na fetalai o ia: “O loʻu lotomalie ou te alofa ai iā i latou.” (Ho. 14:4) O i latou o loo faia na taulaga o viiga, e maua lana faamagaloga, ma e talileleia e ia ma avea ma ana uō.

16, 17. Pe a uunaʻia se tagata e talaʻi le tala lelei ona o le faatuatua i le Atua, e faapefea ona talia e Ieova taulaga o viiga a lenā tagata?

¹⁶ O le viiaina o Ieova i le lautele, ua avea pea o se vala tāua o le tapuaʻiga moni. Sa tāua i le faisalamo le faamamaluina o le Atua moni, o lea na ia ōle atu ai: “Ieova e, ia e fiafia mai i taulaga tauofo a loʻu gutu.” (Sala. 119:108) Ae faapefea aso nei? Na valoia e Isaia se motu o tagata e toʻatele i o tatou aso: “E latou te tala atu viiga o Ieova. . . . O le a latou [e faatatau i meaalofa] ō aʻe i loʻu [Atua] fata faitaulaga, ma e taliaina ma le fiafia.” (Isa. 60:6, 7) I le faataunuuga, e faitau miliona i latou ua ofoina atu i le Atua “taulaga o viiga, o le fua o laugutu, o loo faafetai atu i lona suafa.”—Epe. 13:15.

¹⁷ Ae ā oe? Po o e ofoina atu taulaga e talileleia e le Atua? Afai e leai, po o le a e faia ea ni suiga e manaʻomia ma amata loa ona vivii atu iā Ieova i le lautele? Pe a uunaʻia oe e lou faatuatua e amata ona talaʻi le tala lelei, o le a avea lau taulaga ma mea ‘e sili atu ona fiafia i ai Ieova nai lo o le povi poʻa’ (Faitau le Salamo 69:30, 31.) Ma ia mautinoa, o le a oo atu iā Ieova “mea manogi e faamalieina ai” o a outou taulaga o viiga, ma maua ai lona finagalo malie. (Eseki. 20:41) E lē mafaatusalia le olioli e oo iā te oe.

‘E Faamanuia e Ieova so o se Tagata Amiotonu’

18, 19. (a) O le ā le manatu o le toʻatele o tagata i aso nei i le auaunaga i le Atua? (e) O le ā e iʻu i ai le lē maua o le finagalo malie o le Atua?

¹⁸ E tutusa faaiʻuga ua faia e le toʻatele o tagata i aso nei ma nisi i aso o Malaki, e faapea: “E lē aogā ona auauna i le Atua. O le ā le aogā tatou te tausia ai matafaioi iā te ia?” (Mala. 3:14) Ona o o latou faanaunauga matapeʻapeʻa, ua latou manatu ai e lē taunuu fuafuaga a le Atua ma ua lē toe aogā ana tulafono. Ua manatu i latou, e maʻimau le taimi  e talaʻi ai le tala lelei, ma ua avea ma mea e lē fiafia ai.

¹⁹ O le uunaʻiga malosi o loo i tua o nei manatu, na amata mai lava i Etena. Na oole e Satani Eva ina ia aua neʻi amanaʻia le tāua o le olaga matagofie na tuuina atu e Ieova iā te ia, ma teena Lona finagalo malie. I aso nei, ua taumafai Satani e oole tagata, e leai se mea e maua i le faia o le finagalo o le Atua. Ae peitaʻi, na oo ina iloa e Eva ma lana tane, o le lē maua o le finagalo malie o le Atua, o lona uiga, ua leiloa ai o la ola. O i latou o loo mulimuli i a la faaaʻoaʻoga leaga, ua toeitiiti ona iloa lea, o le lē maua o le finagalo malie o le Atua, e leiloa ai foʻi o latou ola.—Kene. 3:1-7, 17-19.

20, 21. (a) O le ā le mea na faia e le fafine Sarefata, ma o le ā na iʻu i ai? (e) E faapefea ma aiseā e ao ai ona tatou faaaʻoaʻo i le fafine Sarefata?

²⁰ Ia mafaufau i le eseesega o le iʻuga faanoanoa na oo iā Atamu ma Eva, ma le iʻuga o mea na tutupu iā Elia ma le fafine Sarefata ua oti lana tane. Ina ua faalogo le fafine i upu faalaeiau a Elia, ona ia saunia lea o sina falaoa ma avatu muamua i le perofeta. Ona faataunuu lea e Ieova o lana folafolaga e ala iā Elia. E faapea le tala: “Ua aai pea o ia faatasi ma Elia, ma lona aiga, mo aso e tele. E leʻi uma lava le falaoamata i le fagu lapoʻa, e leʻi faaitiitia foʻi le suāuu i le fagu laʻitiiti, e tusa ai ma le afioga a Ieova na ia fetalai atu ai e ala iā Elia.”—1 Tu. 17:15, 16.

²¹ Na faia e le fafine Sarefata se mea e matuā faigatā ona fai e le toʻatele o tagata o loo soifua i aso nei. Sa faatuatua atoatoa o ia i le Atua o le faaolataga, ma na fesoasoani le Atua iā te ia. Ua faamautinoa i lenei tala ma isi foʻi tala o loo i le Tusi Paia, e tatau ona tatou faatuatuaina Ieova. (Faitau le Iosua 21:43-45; 23:14.) Ua faamaonia atili i olaga o Molimau a Ieova i aso nei, e lē tuulafoaʻia e le Atua ē ua ia finagalo malie i ai.—Sala. 34:6, 7, 17-19. *

22. Aiseā ua matuā faanatinati ai ona saʻilia le finagalo malie o le Atua?

²² Ua matuā lalata mai lava le aso o le faamasinoga a le Atua “iā i latou uma o ē o nonofo i le lalolagi atoa.” (Luka 21:34, 35) E lē mafai ona sosola ese ai. E leai ni ʻoa po o ni mea faitino e tutusa lo latou tāua ma le tāua o le faalogo atu o fetalai mai le Faamasino tofia a le Atua e faapea: “Ō mai ia outou o ē ua faamanuiaina e loʻu Tamā, ia fai mo outou tofi le malo ua saunia mo outou.” (Mata. 25:34) Ioe, ‘E faamanuia e Ieova so o se tagata amiotonu, o lona finagalo malie e siʻosiʻomia ai i latou e pei o se talita tele.’ (Sala. 5:12) Pe e lē tatau ea la ona tatou saʻilia le finagalo malie o le Atua?

[Faamatalaga pito i lalo]

Pe E te Manatua?

• Aiseā e tatau ai ona tatou tapuaʻi atu iā Ieova ma le lotoatoa?

• O ā taulaga e talia e Ieova i aso nei?

• O le ā e faasino i ai le faaupuga, “tamaʻi povi taanoa o o matou laugutu,” ma aiseā e tatou te ofo atu ai na mea iā Ieova?

• Aiseā e tatou te saʻilia ai le finagalo malie o le Atua?

[Fesili mo le Suʻesuʻega]

[Ata i le itulau 13]

O le ā le mataupu tāua na folasia atu e le perofeta a le Atua i se fafine mativa?

[Ata i le itulau 15]

O ā aogā e tatou te maua i le ofoina atu o taulaga o viiga iā Ieova?

[Ata i le itulau 17]

O lou faatuatuaina atoatoa o Ieova e lē taitai ona e salamō ai