Pe E te ʻInoʻino i le Amioleaga?

“Ua e [Iesu] ʻinoʻino i le solitulafono.”—EPE. 1:9.

1. O le ā na aʻoaʻo e Iesu e uiga i le alofa?

NA FAAMATILATILA e Iesu le tāua o le alofa i le faapea atu i ona soo: “Ua ou tuuina atu iā te outou le poloaʻiga fou, ina ia outou alolofa o le tasi i le isi; e pei ona ou alofa atu iā te outou, ia outou alolofa foʻi o le tasi i le isi. O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioa. 13:34, 35) Na poloaʻi atu Iesu, ia faaalia le alofa lē manatu faapito o le tasi i le isi, ina ia mātaulia ai i latou. Na timaʻi atu foʻi: “Ia alolofa atu pea i o outou fili ma tatalo pea mo ē ua sauāina outou.”—Mata. 5:44.

2. O le ā le mea e tatau ona ʻinoʻino i ai soo o Keriso?

² E lē gata na aʻoaʻo e Iesu ona soo e faatatau i le alofa, ae na ia aʻoaʻoina foʻi i latou i mea e ao ona ʻinoʻino i ai. Ua faamatalaina faapea Iesu: “Ua e fiafia i le amiotonu a ua e ʻinoʻino i le solitulafono [amioleaga].” (Epe. 1:9; Sala. 45:7) Ioe, e lē gata e tatau ona tatou naunau i le amiotonu, ae ia ʻinoʻino foʻi i le agasala po o le solitulafono. E mataʻina le faamatalaga lenei a Ioane: “O i latou uma e faaauau ona agasala ua faaauau foʻi ona latou solitulafono, o lea la, o le agasala o le solitulafono lea.”—1 Ioa. 3:4.

3. O ā tulaga o le a iloiloina i lenei mataupu, e tusa ai o le ʻinoʻino i le amioleaga?

 ³ E lelei iā i tatou o Kerisiano ona fesili ifo, ‘Po o oʻu ʻinoʻino i le amioleaga?’ Seʻi o tatou iloiloina le auala e iloa ai lo tatou ʻinoʻino i le leaga, i tulaga nei e fā: (1) lo tatou manatu i le soona inu o le ʻava malosi, (2) la tatou vaaiga i faiga faataulāitu, (3) la tatou tali atu i amioga lē mamā tau feusuaʻiga, ma (4) lo tatou manatu i ē e fiafia i le amioleaga.

Aua Neʻi Pulea Oe i le ʻAva Malosi

4. Aiseā na mafai ai e Iesu ona lapataʻi atu e uiga i le inu tele?

⁴ Sa iai taimi na taumafa ai e Iesu le uaina, auā sa ia silafia o se meaalofa mai i le Atua. (Sala. 104:14, 15) Ae e na te leʻi faaaogā sesē lenei meaalofa e ala i le inu tele. (Faata. 23:29-33) O lea la, sa mafai ona fautua atu Iesu e uiga i aafiaga o le inu tele. (Faitau le Luka 21:34.) O le inu tele i le ʻava malosi e iʻu ai i le faia o isi agasala matuiā. O lea na tusi ai Paulo: “Aua foʻi tou te onanā i le uaina lea e iʻu ai i amioga valea, ae ia faaauau ona faatumulia i le agaga.” (Efe. 5:18) Sa ia apoapoaʻi atu foʻi i fafine matutua i le faapotopotoga ia aua neʻi “faapologaina i le inu tele i le uaina.”—Tito 2:3.

5. O ā fesili e ono fesili ai i latou e mananaʻo e inu le ʻava malosi?

⁵ Pe a e manaʻo e inu le ʻava malosi, e lelei ona e fesili ifo: ‘Po o tutusa o ma manatu ma Iesu e faatatau i le inu tele? Pe a ou fautua atu i isi i lenei mataupu, po o latou iloa o aʻu o sē e lē inu tele? Po o ou inu ina ia mapu ma faateʻa ai lagona popole ma mafatia? O le ā le tele o le ʻava malosi ou te inuina i vaiaso taʻitasi? E faapefea ona ou tali atu pe a faapea mai se tasi ua ova laʻu inu? Po ou te tetee pe ita?’ Pe afai e pulea i tatou i le ʻava malosi, e iʻu ina aafia ai lo tatou tomai e mafaufau lelei ai ma faia faaiʻuga atamai. E tauivi soo o Keriso e taofimau i lo latou tomai e mafaufau lelei ai.—Faata. 3:21, 22.

ʻAlofia Faiga Faataulāitu

6, 7. (a) O ā auala na feagai ai Iesu ma Satani faapea ma temoni? (e) Aiseā ua taatele ai faiga faataulāitu i aso nei?

⁶ Sa teena malosi e Iesu Satani ma temoni a o soifua i le lalolagi. Sa ia teena osofaʻiga tuusaʻo a Satani e lepetia ai lona faamaoni. (Luka 4:1-13) Sa ia silafia foʻi ma teena auala iloagatā sa ono taaʻina ai lona mafaufau ma gaoioiga. (Mata. 16:21-23) Sa fesoasoani Iesu i ē lotofaamaoni ina ia saʻoloto mai i le pule sauā a temoni.—Mare. 5:2, 8, 12-15; 9:20, 25-27.

⁷ Ina ua avea Iesu ma Tupu i le 1914, sa ia faamamā le lagi mai i taaʻiga leaga a Satani ma temoni. O lea ua matuā gaoioi ai Satani i aso nei e “faasesēina le lalolagi atoa.” (Faaa. 12:9, 10) E lē tatau la ona faateʻia i tatou, ona ua taatele ma faatuputeleina le fiafia o tagata i faiga faataulāitu. O ā mea e tatou te faia ina ia puipuia ai i tatou?

8. O le ā le iloiloga e ao ona fai e le tagata lava ia e tusa ai o faafiafiaga?

⁸ O loo lapataʻia ma le manino i le Tusi Paia lamatiaga o faiga faaagaga. (Faitau le Teuteronome 18:10-12.) Ua taaʻina e Satani  ma temoni mafaufauga o tagata, e ala i ata tifaga, tusi ma taaloga vitiō o loo faaalia ai faiga faataulāitu. O lea la, pe a filifilia ni faafiafiaga, ia fesili ifo iā i tatou lava: ‘I masina ua mavae, pe sa ou fiafia e matamata i ata tifaga, polokalame o le TV, taalo i taaloga vitiō ma faitau i tusi po o tusi komi ua faaalia ai faiga faatemoni? Po o ou iloa le tāua o le teena o aafiaga o faiga faataulāitu, po o ou lē ano i ai? Po o oʻu manatunatu i lagona o Ieova i faafiafiaga o loo oʻu filifilia? Pe a ou talia nei taaʻiga faa-Satani, po o le a uunaʻia aʻu e loʻu alofa mo Ieova ma ana taʻiala amiotonu e gaoioi ai loa e teena na mea?’—Galu. 19:19, 20.

Utagia le Lapataʻiga a Iesu i Amioga Lē Mamā

9. O le ā le auala o le a atili fiafia ai se tagata i le amioleaga?

⁹ Sa faatāua e Iesu tulafono a Ieova e uiga i amioga mamā tau feusuaʻiga. Na fetalai o ia: “Tou te leʻi faitaulia ea o lē na foafoaina i laʻua i le amataga, na ia faia i laʻua o le tane ma le fafine, ma na ia fetalai atu, ‘O le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi’? O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata.” (Mata. 19:4-6) Na silafia e Iesu e aafia o tatou loto i mea e tatou te vāai i ai. O lea na ia fetalai ai i lana Lauga i le Mauga: “Ua outou faalogo i nei upu, ‘Aua e te mulilua.’ Ae ou te fai atu iā te outou, ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” (Mata. 5:27, 28) O i latou e lē amanaʻia lenei lapataʻiga, o le a atili ai ona fiafia i le amioleaga.

10. Taʻu mai se mea na tupu e iloa ai e mafai e se tasi ona taofia le matamata i ata matagā tau feusuaʻiga.

¹⁰ Ua uunaʻia e Satani faiga lē mamā tau feusuaʻiga, e ala i ata ma faamatalaga matagā tau feusuaʻiga. Ua tumu lenei lalolagi i nei faiga. O ē e matamata i ata matagā tau feusuaʻiga, e faigatā ona galo iā i latou na vaaiga lē mamā. E iʻu foʻi ina fai ma a latou masani le matamata i na mea. O le mea lenei na tupu i se Kerisiano. Ua ia faapea mai: “Sa ou matamata nanā i ata matagā tau feusuaʻiga. Sa ou manatu e lē leaga auā o lea lava ou te auauna pea iā Ieova. Sa ou iloa e sesē, ae na ou faapea ifo o loo talia lava e le Atua laʻu auaunaga.” O le ā na suia ai le mafaufau o lenei uso? Ua ia taʻua: “E ui lava sa faigatā, ae na ou faailoa atu i le ʻautoeaina loʻu faafitauli.” Sa mulimuli ane taofia e lenei uso lea masaniga leaga. Ua ia taʻutino mai: “Ina ua faamamā loʻu olaga mai i lenei agasala, na ou maua se lotofuatiaifo mamā.” O ē e ʻinoʻino i le amioleaga, e tatau ona ʻinoʻino i ata ma faamatalaga matagā tau feusuaʻiga.

11, 12. E faapefea ona iloa e tatou te ʻinoʻino i le amioleaga pe a filifilia musika?

¹¹ E telē se aafiaga o musika ma o latou upu i o tatou faalogona ma loto. O musika o se meaalofa mai i le Atua, ma ua leva ona faaaogā i le tapuaʻiga moni. (Eso. 15:20, 21; Efe. 5:19) Peitaʻi ua uunaʻia e le lalolagi amioleaga a Satani musika o loo taʻuleleia ai amioga lē mamā. (1 Ioa. 5:19) E faapefea  ona iloa e lelei pe leaga musika o loo e faalogologo i ai?

¹² E lelei ona fesili ifo iā te oe: ‘Po o taʻuleleia i pese o loo ou faalogologo ai le fasioti tagata, mulilua, faitaaga ma upu leaga? Pe a ou faitau atu ni upu o se pese i se tasi, po o le a ia manatu ou te ʻinoʻino i le amioleaga, po ua faaalia ai ua faaleagaina loʻu loto?’ E lē mafai ona tatou faapea atu e ʻinoʻino i le amioleaga, ae fiafia e faalogologo i musika o loo taʻuleleia ai na mea. Na fetalai Iesu: “O mea e sau mai i le gutu e sau lea mai i le loto, ma o mea na e leaga ai le tagata. Auā e sau mai i le loto o mafaufauga leaga, o le fasioti tagata, mulilua, faitaaga, gaoi, molimau pepelo, ma upuleaga.”—Mata. 15:18, 19; faatusatusa i le Iakopo 3:10, 11.

Ia Maua le Manatu o Iesu e Uiga i Ē e Fiafia i le Amioleaga

13. O le ā le manatu o Iesu i ē na faia pea ma le lē salamō le agasala?

¹³ Na fetalai Iesu na sau ina ia valaau i ē agasala po o ē solitulafono, ina ia salamō. (Luka 5:30-32) O le ā la lona manatu i ē na faia pea ma le lē salamō le agasala? Na lapataʻi malosi mai Iesu, ina neʻi taaʻina i tatou e tagata faapena. (Mata. 23:15, 23-26) Na fetalai o ia: “E lē ulu atu i le malo o le lagi i latou uma o ē fai mai iā te aʻu, ‘Le Alii e, le Alii e,’ ae e na o lē na te faia le finagalo o loʻu Tamā o i le lagi. E toʻatele e fai mai iā te aʻu i lea aso [pe a faaoo mai e le Atua le faasalaga], ‘Le Alii e, le Alii e, pe matou te leʻi faia ea ni valoaga ma tutuli temoni, ma faia le tele o galuega mamana i lou suafa?’” Peitaʻi, o le a ia teena i latou e faia le amioleaga ma le lē salamō, e ala i le faapea atu: “Inā ō ese ia iā te aʻu.” (Mata. 7:21-23) Aiseā o le a maua ai e nei tagata lenei faasalaga? Talu ai e latou te lē faamamaluina le Atua, ma ua mafatia fua isi ona o a latou amioga leaga.

14. Aiseā e aveesea ai mai i le faapotopotoga tagata faimea sesē ae lē salamō?

¹⁴ Ua poloaʻia i le Afioga a le Atua, e tatau ona aveesea mai i le faapotopotoga tagata faimea sesē ae lē salamō. (Faitau le 1 Korinito 5:9-13.) Pe ā ma le tolu māfuaaga e tatau ai ona faia faapea: (1) ina ia lē faalumaina le suafa o Ieova, (2) ina ia puipuia le mamā o le faapotopotoga, ma (3) ina ia fesoasoani i le tagata faimea sesē e salamō.

15. O ā fesili e ao ona tatou fesili ifo ai pe a mananaʻo e faamaoni pea iā Ieova?

¹⁵ Po o tutusa o tatou manatu ma Iesu e uiga i ē e faia pea ma le lotomaaa mea leaga? Ia manatunatu i fesili nei: ‘Po o le a ma faifaimea i taimi uma ma se tasi ua faateʻaina, po o sē ua vavaeese o ia lava mai i le faapotopotoga? Ae ā pe afai o lenā tagata o se tauaiga vavalalata ae ua lē o toe nofo i le aiga?’ O lenā tulaga e matuā tofotofoina ai lo tatou naunau i le amiotonu ma le faamaoni atu i le Atua. *

16, 17. O le ā le faafitauli na feagai ma se tinā Kerisiano, ae na mafai faapefea ona ia tausia le faatulagaga i le faateʻaina o ē fai mea sesē ae lē salamō?

¹⁶ Seʻi manatu i le mea na tupu i se tuafafine. Sa alofa muamua lana tama tama iā  Ieova, ae mulimuli ane na ia faia ma le lē salamō le amioleaga ma faateʻaina ai. E alofa lo tatou tuafafine iā Ieova, toe alofa foʻi i lana tama. Sa matuā faigatā ai iā te ia ona usitaʻia le poloaʻiga a le Tusi Paia, ia aua neʻi faifaimea faatasi ma ia.

¹⁷ O le ā le fautuaga e te avatu i lenei tuafafine pe ana e iai? Sa fesoasoani atu iā te ia se toeaina ia iloa o loo silafia e Ieova lona tigā. Sa faamanatu atu e le toeaina ia mafaufau i le tigā na oo iā Ieova ina ua fouvale nisi o ona atalii agelu. Sa ia toe faapea atu, e ui lava e silafia e Ieova le tigā ona o lenā tulaga, ae e finagalo o ia e faateʻaina ē e faia le agasala ae lē salamō. Sa ia talia na faamanatu ma tausia ma le faamaoni le faatulagaga i le faateʻaina o se tasi. * E matuā faafiafiaina le finagalo o Ieova pe afai e faamaoni faapena.—Faata. 27:11.

18, 19. (a) O le motusia o fesootaʻiga ma sē na faia le amioleaga, ua faamaonia ai e tatou te ʻinoʻino i le ā? (e) O le ā e ono iʻu i ai pe a tatou faamaoni i le Atua ma lana faatulagaga?

¹⁸ Pe a e fesagaʻi ma se tulaga faapea, ia manatua e malamalama ma alofa Ieova iā te oe. O le motusia o fesootaʻiga ma lē ua faateʻaina po ua vavaeese, ua faaalia ai e te ʻinoʻino i amioga ma gaoioiga na māfua ai ona oo i lenā tulaga. Ua faaalia ai foʻi e te alofa i lē ua faimea sesē, ma e te manaʻo i le mea e lelei mo ia. O lou faamaoni iā Ieova, e ono salamō ai lē ua aʻoaʻia ma toe foʻi mai iā Ieova.

¹⁹ Na tusi se tasi na faateʻaina ae ua toe faaaʻe mai: “Ua ou fiafia ona o le alofa o Ieova i ona tagata, e na te faamautinoa o loo tumau ona mamā lana faalapotopotoga. Atonu e manatu tagata o le lalolagi o se lē alofa lea faiga, ae o se mea ua tatau ona fai ma o se gaoioiga alofa.” Faamata e mafai ona toe foʻi mai lenei tagata i le upu moni, pe ana fesootaʻi pea ma tagata o le faapotopotoga, e aofia ai ma lona aiga, a o faateʻaina? O lo tatou lagolagoina o le faatulagaga a le Tusi Paia i le faateʻaina, ua faamaonia ai lo tatou naunau i le amiotonu, ma iloa le aiā a Ieova e faatulaga ai tulafono i amioga tatau.

“Ia Outou ʻInoʻino i le Leaga”

20, 21. Aiseā e tāua ai ona iloa ʻinoʻino i le amioleaga?

²⁰ Ua lapataʻi mai le aposetolo o Peteru: “Ia faaauau ona outou mafaufau lelei ma ia mataala.” Aiseā? Talu ai “o loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.” (1 Pete. 5:8) Po o oe o se tasi o i latou na? E faalagolago lava i lou iloa ʻinoʻino i le amioleaga.

²¹ E lē faigofie ona ʻinoʻino i le amioleaga. Ua tatou fananau mai ma le agasala, ma o loo tatou soifua i se lalolagi o loo uunaʻia ai le faamalieina o tuʻinanauga faaletino. (1 Ioa. 2:15-17) Peitaʻi, e mafai ona tatou taulau e ʻinoʻino i le amioleaga, pe afai e faaaʻoaʻo iā Iesu Keriso ma alolofa atoatoa iā Ieova le Atua. O lea la, seʻi o tatou maumauaʻi e “ʻinoʻino i le leaga,” ma matuā mautinoa o loo “leoleoina [e Ieova] ona tagata faamaoni; e na te laveaʻiina i latou mai i lima o ē e amioleaga.”—Sala. 97:10.

[Faamatalaga pito i lalo]

O le ā Lau Tali?

• O le ā e fesoasoani e iloiloina ai lo tatou manatu i le ʻava malosi?

• O ā auala e puipuia ai i tatou mai le aafia i faiga faataulāitu?

• Aiseā e mataʻutia ai ata ma faamatalaga matagā tau feusuaʻiga?

• E faapefea ona faaalia lo tatou ʻinoʻino i le amioleaga pe a faateʻaina se tasi e pele iā i tatou?

[Fesili mo le Suʻesuʻega]

[Ata i le itulau 29]

O le ā e ao ona iloiloina pe a e manaʻo e inu le ʻava malosi?

[Ata i le itulau 30]

Ia faaeteete i taaʻiga faa-Satani i faafiafiaga

[Ata i le itulau 31]

O ā iʻuga leaga pe a matamata i ata matagā tau feusuaʻiga?