Pe E te Matuā Faatāua Ou Faamanuiaga?

INA ua laveaʻiina faavavega le fanauga a Isaraelu mai i le nofo pologa i Aikupito, sa matuā fiafia ona ua saʻoloto e tapuaʻi iā Ieova. (Eso. 14:29–15:1, 20, 21) Peitaʻi, e leʻi umi ae suia o latou lagona. Ua amata ona faitio e faatatau i lo latou tulaga. Aiseā? Talu ai na latou mafaufau i faigatā a o iai i le toafa, nai lo o mea ua faia e Ieova mo i latou. Na latou faapea atu iā Mose: “Aiseā ua oulua aumaia ai i matou mai i Aikupito ina ia feoti i le toafa? Auā ua leai ni meaʻai po o ni vai, ma ua matou ʻinoʻino i lenei meaʻai [manai] e lē manaia.”—Nu. 21:5.

Na mulimuli ane pese le tupu o Isaraelu, o Tavita: “A o aʻu nei, ou te faatuatua atu i lou alofa faamaoni; ia olioli foʻi loʻu loto i lau faaolataga. Ou te pese atu iā Ieova, auā ua ia agalelei mai iā te aʻu.” (Sala. 13:5, 6) E leʻi galo iā Tavita galuega alofa na faia e Ieova mo ia, ae na mafaufau pea i ai. (Sala. 103:2) E tele foʻi faamanuiaga ua tatou maua mai iā Ieova, ma e lē tatau ona manatu māmā i mea ua ia faia mo i tatou. O lea, seʻi o tatou iloilo nisi o faamanuiaga ua aumaia e le Atua mo i tatou i aso nei.

“Vavalalata iā Ieova”

Na pese le faisalamo: “E vavalalata iā Ieova i latou o ē e matataʻu iā te ia.” (Sala. 25:14) O se faaeaga mo tagata lē lelei atoatoa le mafuta vavalalata atu iā Ieova. Peitaʻi, ae ā pe afai ua tatou pisi tele i mea fai i aso fai soo o le olaga, ma ua itiiti ai le taimi e tatalo ai? Manatu i le mea e tupu i la tatou mafutaga lelei ma Ieova. Talu ai o Ieova o la tatou uō, ua ia faatalitalia i tatou e faatuatuaina o ia ma sasaa atu o tatou loto i le tatalo, ma faailoa atu o tatou popolega ma manaʻoga. (Faata. 3:5, 6; Fili. 4:6, 7) O lea  la, e tatau ona iloilo mea o loo tatou tatalo atu ai.

Ina ua mafaufau se Molimau talavou e igoa iā Paulo i ana tatalo, na ia iloa ai e manaʻomia ona faaleleia. * Na ia taʻua, “Sa masani ona ou tautū i aʻu faaupuga pe a tatalo iā Ieova.” Ina ua faia e Paulo se saʻiliʻiliga i le mataupu i le Watch Tower Publications Index, na ia iloa ai e tusa ma le 180 tatalo o loo tusia i le Tusi Paia. O nei tatalo sa faailoa atu ai faalogona o auauna a Ieova i aso ua mavae. Na taʻua e Paulo: “O le manatunatu loloto i na faaaʻoaʻoga i le Tusi Paia, na ou iloa ai e tatau ona patino aʻu tatalo. Ua fesoasoani lenei mea iā te aʻu e sasaa atu ai iā Ieova mea o loo i loʻu loto. O lea ua ou fiafia ai e mafuta vavalalata atu iā te ia i le tatalo.”

“Meaʻai i le Taimi Tatau”

O le isi faamanuiaga ua foaʻi mai e Ieova iā i tatou, o upu moni mai i le Tusi Paia. A o tatou taumamafa i le anoanoaʻi o meaʻai faaleagaga, ua iai māfuaaga e ‘alalaga ai i le fiafia ona o le lelei o o tatou loto.’ (Isa. 65:13, 14) Peitaʻi, e ao ona tatou faaeteete ina neʻi mou atu lo tatou maelega i le upu moni, ona o taaʻiga leaga. O se faaaʻoaʻoga, o le uaʻi atu i faamatalaga a ē ua fulitua i le upu moni, e mafai ona aafia ai o tatou mafaufauga ma manatu māmā ai i le tāua o “meaʻai [faaleagaga] i le taimi tatau,” lea ua saunia e Ieova e ala mai i le “pologa faamaoni ma le faautauta.”—Mata. 24:45-47.

Na leaga le mea na oo iā Aneterea, o lē na auauna iā Ieova mo le tele o tausaga, ona na faasesēina i manatu o ē ua fulitua i le upu moni. Na manatu o ia e lē afāina pe a autilo tasi i le Initaneti i faamatalaga a ē ua fulitua i le upu moni. Ua fai mai o ia: “Muamua, na ou fiafia tele i a latou aʻoaʻoga ia sa foliga mai e moni. O le tele na ou iloiloina ai a latou faamatalaga, o le tele foʻi lenā na ou manatu ai ua tonu ona ou tuua le faalapotopotoga a Ieova. Ae mulimuli ane, a o ou saʻiliʻili atili i faamatalaga a ē ua fulitua i le upu moni ia e taʻusesēina ai Molimau a Ieova, na ou iloa ai le faitogafiti o nei aʻoaʻo pepelo. E latou te leʻi sii maia faamatalaga atoa mai i a tatou lomiga, ae ua na o ni nai vaega, ina ia matuā taʻusesēina ai i tatou. Ona ou filifili lea e toe faitau a tatou lomiga ma auai i sauniga. E leʻi umi ae ou iloa na ou misia le tele o mea.” O le mea e fiafia ai, na toe foʻi Aneterea i le faapotopotoga.

“Le ʻAuuso Atoa”

O lo tatou ʻauuso alolofa ma autasi, o se faamanuiaga mai iā Ieova. (Sala. 133:1) O le pogai lea na tusi ai le aposetolo o Peteru: “Ia alolofa i le ʻauuso atoa.” (1 Pete. 2:17) O le avea o i tatou ma ʻauuso Kerisiano, ua tatou olioli ai ma maua aogā mai i le agalelei ma le fesoasoani a ē ua pei o ni tamā, tinā, uso, tuagane ma tuafāfine i le upu moni.—Mare. 10:29, 30.

 Peitaʻi, o mea e tutupu i nisi taimi e lē lelei ai lo tatou va ma o tatou uso ma tuafāfine. O se faaaʻoaʻoga, e faigofie ona lē fiafia i vaivaiga o se tasi ma faitio ai i lea tagata. Pe a tupu lenei mea, pe e lē o se mea lelei ea le manatuaina, e alofa Ieova i ana auauna e ui lava i o latou vaivaiga? E lē gata i lea, “afai tatou te faapea atu: ‘E leai sa tatou agasala,’ ua faasesēina ai i tatou lava ma e lē o i totonu iā i tatou le upu moni.” (1 Ioa. 1:8) Pe e lē tatau ea la ona “faaauau ona [tatou] onosaʻi le tasi i le isi, ma ia fefaamagaloaʻi ma le lotoatoa”?—Kolo. 3:13.

E ui sa tuua e se talavou e igoa iā Ana le faapotopotoga Kerisiano, ae sa ia toe iloa le tāua o le aufaatasi ma Kerisiano. Sa pei o ia o le atalii faamaumauʻoa i le faataoto a Iesu. Mulimuli ane, sa toe sagatonu lona mafaufau ma toe foʻi i le upu moni. (Luka 15:11-24) O le ā na aʻoaʻoina e Ana mai i lenei mea? Ua faapea mai o ia: “Talu ona ou toe foʻi i le faalapotopotoga a Ieova, ua tāua nei iā te aʻu uso ma tuafāfine uma, e ui i o latou vaivaiga. I le taimi ua mavae, sa vave lava ona ou faitio iā i latou. Ae ua ou maumauaʻi nei ia aua nei avea so o se mea, ma itu ou te lē toe mauaina ai faamanuiaga ua ou olioli ai faatasi ma uso talitonu. E leai se mea i le lalolagi e taʻutonuina ai le tuua o lo tatou parataiso faaleagaga.”

Ia Lotofaafetai Pea i Ou Faamanuiaga

O se ʻoa tautele e lē mafaatusalia lo tatou faamoemoe i le Malo o le Atua, o le vaifofō mo faafitauli uma o tagata. Ina ua tatou faatoʻā iloa lenei faamoemoe, sa tāua tele i o tatou loto! Sa pei o tatou lagona o le tagata faatauʻoa i le talafaatusa a Iesu, o lē na “faatau atu ana mea uma na iai,” ina ia faatau mai ai “se penina tautele.” (Mata. 13:45, 46) E leʻi fetalai Iesu e faapea na iai se taimi e leʻi tāua ai i le faatauʻoa le penina. Seʻi o tatou faatāua foʻi i taimi uma lo tatou faamoemoe matagofie.—1 Tesa. 5:8; Epe. 6:19.

Seʻi manatu i le faaaʻoaʻoga a Tini, o lē ua silia i le 60 tausaga o auauna iā Ieova. Ua faapea mai o ia: “O le talanoa atu i isi e uiga i le Malo o le Atua, ua fesoasoani iā te aʻu e mafaufau pea i ai. Pe a ou vaai atu i lo latou fiafia pe a malamalama e uiga i le Malo, e matuā faalaeiauina ai aʻu. Pe a mātauina suiga ua faia e le upu moni o le Malo i le olaga o se tagata suʻesuʻe o le Tusi Paia, ona ou tomānatu lea, ‘Maʻeu le matagofie o le upu moni lea ou te taʻu atu i isi!’”

Ua iā i tatou māfuaaga lelei e lotofaafetai ai mo le tele o faamanuiaga faaleagaga ua tatou maua. E ui lava e tatou te ono aafia i faigatā e pei o teteega, maʻi, tino matua, lagona mafatia, faavauvau ma faalētonu tau tamaoaiga, ae ua tatou iloa e lē tumau na mea. I le pulega o le Malo o le Atua, o le a faaopoopo faamanuiaga faaletino i faamanuiaga faaleagaga. O so o se puapuaga o loo tatou onosaia i aso nei, o le a aveesea i le lalolagi fou.—Faaa. 21:4.

O lea la, seʻi o tatou lotofaafetai mo o tatou faamanuiaga faaleagaga, e pei ona faia e le faisalamo, o lē na pese: “E tele lava mea ua e faia, Ieova e, loʻu Atua, e oo lava i au galuega ofoofogia ma ou manatunatuga iā i matou; e leai se isi e faatusaina iā te oe. O mea ia na ou fia taʻu atu ma tautala i ai, a ua matuā tele lava, ua lē mafaitaulia.”—Sala. 40:5.

[Faamatalaga pito i lalo]

[Ata i le itulau 18]

Ua faamanuiaina i tatou i le fesoasoani faaleagaga i taimi o faigatā