Aua le Faasesēina Oe i Ou Lava Manatu Sesē

“O LE ā lenei mea ua e faia?” O le fesili lenā a le Atua iā Eva ina ua uma ona ia ʻaina le fua o le laau na faasāina. Na tali atu Eva: “Na faasesē mai le gata iā te aʻu, ona ou ʻai ai lea.” (Kene. 3:13) Na mulimuli ane taʻua Satani le gata faitogafiti o lē na faapogaia Eva e lē usiusitaʻi i le Atua, “o le uluaʻi gata . . . o lē ua faasesēina le lalolagi atoa.”—Faaa. 12:9.

Ua faamatalaina Satani i le tala i le Kenese, o sē e faitogafiti ma fafau tala pepelo ina ia faasesē ai ē e lē mataala. Na faasesēina Eva, ae e lē tatau ona tatou manatu e na o Satani e mafai ona faasesēina i tatou. Ua lapataʻi mai le Tusi Paia i le mataʻutia o le ‘faasesēina o i tatou i o tatou lava manatu sesē.’—Iako. 1:22.

Atonu e faigatā ona talitonuina e mafai ona tatou faasesēina i tatou lava. Peitaʻi, e iai le māfuaaga na ala ai ona aumaia e le Atua lenā lapataʻiga. Seʻi iloilo le auala e tatou te ono faasesēina ai i tatou lava, ma manatu sesē e mafai ona faasesēina ai i tatou. E fesoasoani iā i tatou se tala mai i le Tusi Paia.

Ē na Faasesēina i Latou Lava

I le 537 T.L.M., na tuuina atu ai e Kuresa le Sili o Peresia se poloaʻiga i tagata Iutaia na faaaunuua i Papelonia, ia toe foʻi i Ierusalema ma toe fau le malumalu. (Esera 1:1, 2) E tusa ai ma le finagalo o Ieova, na faia e tagata Iutaia faavae o le malumalu fou i le tausaga na sosoo ai. Na fiafia ē na toe foʻi mai ma viia Ieova ona o lana faamanuia i le amataga o lenei galuega tāua. (Esera 3:8, 10, 11) Peitaʻi, e leʻi umi ae tetee nisi i le toe fausiaina o le malumalu ma lotovaivai ai tagata Iutaia. (Esera 4:4) I le 15 o tausaga talu ona latou toe foʻi mai, na faasā ai e le malo o Peresia galuega faufale uma lava i Ierusalema. Ina ia faamalosia le sā, na ō atu faipule o le itumalo i Ierusalema ma ‘taofia faamalosi tagata Iutaia.’—Esera 4:21-24.

Ona o lenei sā, na faasesēina ai e tagata Iutaia i latou lava i o latou manatu sesē. Na latou faapea ifo: “E leʻi oo mai le aso, o le aso e fausia ai le fale o Ieova.” (Ha. 1:2) Na latou manatu e leʻi finagalo le Atua e fausia le malumalu i le taimi lea. Nai lo le saʻilia o se auala e fai ai lona finagalo, na latou tuua lenei tofiga paia ae faalelei o latou lava fale. Na faapea atu Hakai le perofeta a le Atua iā i latou: “Po o le taimi ea lenei mo outou e nonofo ai i o outou fale ua faia i laupapa mananaia, a o lenei fale [le malumalu o Ieova] ua faatafunaina?”—Ha. 1:4.

Po o e mātau le lesona i lenei faaaʻoaʻoga? Pe a sesē le manatu e uiga i le taimi e faataunuu ai e le Atua lona finagalo, e iʻu ina galo iā i tatou le tāua o galuega faaleagaga ae pupū atu i o tatou lava faanaunauga. O se faataʻitaʻiga, seʻi faapea o loo faatali ni au mālō. Talu ai ua lata le taimi e taunuu mai ai, o lea e te pisi solo ai e fai tapenapenaga. Ae teʻi ane ua e maua le tala ua toe tuu i tua le aso e taunuu mai ai. Po o le a tuua ai au tapenapenaga?

Ia manatua, na fesoasoani atu Hakai ma Sakaria i tagata Iutaia ia iloa, sa finagalo pea Ieova e faaauau le galuega o le toe fausiaina o le malumalu. Na faapea atu Hakai: “Ia faamalolosi outou o tagata uma o le atunuu, . . . ma ia galulue.” (Ha. 2:4) Sa tatau ona faaauau le galuega, i le mautinoa o le a  fesoasoani mai le agaga o le Atua. (Saka. 4:6, 7) E fesoasoani lenei faaaʻoaʻoga iā i tatou e ʻalofia ai le faia o ni faaiʻuga sesē e uiga i le aso o Ieova.—1 Kori. 10:11.

Suia Manatu Sesē i Mafaufauga Lelei

Na talanoaina e Peteru i lana tusi lona lua, le faasologa a Ieova mo le taimi e faatūina ai le “lagi fou ma le lalolagi fou.” (2 Pete. 3:13) Na ia taʻua o nisi tagata tauemu ua masalosalo po o le a faalaa mai le Atua i mataupufai a tagata. Ua latou finau mai ma le sesē e leai se mea o le a tupu, auā “e leai lava se mea [na] suia talu mai le foafoaga o le lalolagi.” (2 Pete. 3:4) Sa manaʻo Peteru e faasaʻo lenā manatu sesē. Na tusi o ia: ‘Ua ou faatupu lo outou mafaufau lelei i loʻu faamanatu atu.’ Sa ia faamanatu atu i uso Kerisiano e sesē manatu o ē tauemu. Na gaoioi muamua le Atua e tusa ai o mataupufai a tagata, i le aumaia lea o se lolo tele ma mataʻutia.—2 Pete. 3:1, 5-7.

Sa avatu foʻi e Hakai i le 520 T.L.M. se apoapoaʻiga faapena i tagata Iutaia na lotovaivai ma lē toe galulue. Na ia apoapoaʻi atu: “Ia outou manatunatu i o outou ala.” (Ha. 1:5) Ina ia latou toe mafaufau lelei, na ia faamanatu atu le finagalo ma folafolaga a le Atua e uiga i Ona tagata. (Ha. 1:8; 2:4, 5) E leʻi umi ona avatu lenā faalaeiauga, ae toe amata le galuega o le malumalu e ui na faasā e le malo. Na toe taumafai foʻi fili e taofia le galuega, ae e latou te leʻi taulau. Na faalēaogāina le sā, ma na māeʻa le malumalu i le lima tausaga.—Esera 6:14, 15; Ha. 1:14, 15.

Ia Manatunatu i o Tatou Ala

Pe e te manatu o le a tatou lotovaivai pe a oo mai faigatā, e pei o tagata Iutaia i aso o Hakai? Pe afai e tupu lenā tulaga, o le a mou atu lo tatou maelega i le talaʻia o le tala lelei. Ae o ā mea e ono faalotovaivaia ai i tatou? Atonu e tatou te mafatia ona o faiga lē tonu i lenei faiga o mea. Seʻi manatu i le fesili a Sapakuka: “O le ā le umi ou te alaga atu ai mo se fesoasoani ona faatoʻā e faafofoga mai lea, ma faatoʻā laveaʻi i matou mai i faiga sauā?” (Sapa. 1:2, Today’s English Version) Ona ua manatu nisi ua tuai ona oo mai le iʻuga, e ono faatuatuai ai se Kerisiano ma faamuamua le saʻilia o se olaga sologa lelei. Pe mafai ona tupu lenā mea iā te oe? Pe a iā i tatou lenei manatu, o le a tatou faasesēina i tatou lava. E tāua tele ai ona utagia le fautuaga a le Tusi Paia, ia ‘manatunatu i o tatou ala’ ma ‘faatupu lo tatou mafaufau lelei’! Tatou te ono fesili ifo, ‘Pe e tatau ona faateʻia aʻu i le umi ona iai o lenei faiga amioleaga o mea, i lo le mea na ou faatalitalia?’

Se Vaitaimi na Valoia i le Tusi Paia

Seʻi manatu i fetalaiga a Iesu e uiga i le taufaaiʻuiʻuga o lenei faiga o mea. Ua faaalia i le tala a Mareko e faatatau i le valoaga a Iesu e uiga i aso e gata ai, ua timaʻi mai pea Iesu iā i tatou ia faaauau ona mataala.  (Mare. 13:33-37) O loo iai foʻi se lapataʻiga faapena i le faamatalaga faavaloaga e uiga i le aso tele o Ieova iā Amaketo. (Faaa. 16:14-16) Aiseā ua saga lapataʻi mai ai? E tāua na faamanatuga, auā a umi ona faatalitali pea tagata, e faigofie ona mou atu lo latou lagona ua lata mai le taimi.

Na faataʻitaʻia e Iesu le manaʻoga ia tatou mataala pea, a o faatalitali i le iʻuga o lenei faiga o mea. Sa ia faasino atu i se tagata na osofaʻia ma gaoia lona fale. Pe ana faapea e ala pea o ia i le pō atoa, semanū e lē gaoia lona fale. Na faaiʻu e Iesu lenei talafaatusa i le fautuaina o i tatou: “Ia outou nofosauni . . . , auā o le itula e tou te lē manatunatu ai, e sau ai le Atalii o le tagata.”—Mata. 24:43, 44.

Ua iloa mai ai i lenā talafaatusa, e manaʻomia ona faatalitali pea e tusa lava po o se taimi umi. E lē tatau ona tatou soona popole ua umi ona iai pea lenei faiga amioleaga o mea, i lo le mea na tatou faatalitalia. E lē tatau ona tatou faasesēina i tatou lava i le manatu e faapea, e leʻi tāitai ona oo mai le aso o Ieova. O lenā manatu e iʻu ina faavaivaia ai lo tatou faanaunauga e talaʻi atu le tala lelei o le Malo.—Roma 12:11.

Ia Liaʻi Ese Manatu Sesē

E tusa ai o manatu sesē, ua talafeagai ai le taʻiala o loo i le Kalatia 6:7: “Aua neʻi faasesēina outou . . . o le mea e lūlūina e le tagata, o le mea lava lea e na te seleseleina mai.” Pe afai e lē totōina ni mea i se eleele, e vave lava ona vaoa. Pe afai foʻi e tatou te lē faatupu ni mafaufauga lelei, o le a iʻu ina mauaa manatu sesē i o tatou mafaufau. O se faaaʻoaʻoga, e tatou te ono manatu, ‘E mautinoa e oo mai le aso o Ieova, peitaʻi e lē o le taimi lenei.’ Pe afai e suia o tatou faamoemoega i le oo mai o le aso o Ieova, e iʻu ina tatou faatalalē i gaoioiga faaleagaga. A o faagasolo taimi, o le a amata ona tatou faapalapala i le faia o mea faaleagaga. Ona oo mai lea o le aso o Ieova ae e tatou te lē o mataala.—2 Pete. 3:10.

Peitaʻi, o le a lē mauaa ni manatu sesē i o tatou mafaufau, pe afai e faamautinoa pea iā i tatou “le finagalo o le Atua, lea e lelei, e mālie, ma lelei atoatoa.” (Roma 12:2) O le faitauina e lē aunoa o le Afioga a le Atua, o se fesoasoani sili lea e faia ai faapea. E faamalosia e le Tusi Paia lo tatou talitonuga e faapea, e gaoioi Ieova i le taimi ua atofaina.—Sapa. 2:3.

O le a “tāmau i [o tatou] mafaufau le oo mai o le aso o Ieova,” pe a suʻesuʻe, tatalo, auai e lē aunoa i sauniga, talaʻi, ma faia galuega agalelei. (2 Pete. 3:11, 12) E silafia mai e Ieova lo tatou faia faapea i taimi uma. Ua faamanatu mai e Paulo: “Aua neʻi o tatou fiu e faia le mea lelei, auā e iai le taimi e tatou te selesele mai ai, pe a tatou lē faavaivai.”—Kala. 6:9.

E mautinoa e lē o se taimi lenei e faasesēina ai i tatou i le manatu sesē e faapea, ua toe tolopō le aso o Ieova. Peitaʻi, o le taimi lenei e faamalosia ai o tatou loto, auā ua lata tele mai le aso o Ieova.

[Ata i le itulau 4]

Na uunaʻia e Hakai ma Sakaria tagata Iutaia e faaauau le galuega

[Ata i le itulau 5]

Ae faapefea pe ana iloa e le tagata o le a sau le gaoi i lona fale?