Ua Iai Māfuaaga E te Matuā Fiafia Ai

UA ILOA mai i le foafoaga e pei o se sela itiiti po o aniva tetele i le lagi, le maopoopo lelei o mea uma na faia e Ieova. E lē faateʻia ai auā o Lē na foafoaina mea o le Atua “e fai mea maopoopo.” (1 Kori. 14:33) E mataʻina foʻi le auala ua faamaopoopo ai e Ieova ona tagata mo le tapuaʻiga. Manatu i le mea ua faia e Ieova. Ua ia faamaopoopo i se faalapotopotoga aoao e tasi le faitau selau miliona o foafoaga atamamai, o tagata ma agelu, o ē ua iai le filifiliga saʻoloto ma autasi i le tapuaʻiga mamā. Maʻeu le ofoofogia!

I Isaraelu anamua, na faaāta mai le vaega i le lalolagi o le faalapotopotoga a le Atua e Ierusalema, le aai na iai le malumalu o Ieova ma nofo ai lona tupu tofia. O lagona nei o se tagata Isaraelu na ave faapagota i Papelonia, e uiga i le aai paia: “Ia pipii aʻe loʻu laulaufaiva i loʻu gutu, pe afai ou te lē manatuaina oe, pe afai foʻi ou te lē faasili Ierusalema i mea uma ou te matuā fiafia i ai.”—Sala. 137:6.

Po o lou lagona lenā i le faalapotopotoga a le Atua i aso nei? Pe e te matuā fiafia i lenā faalapotopotoga i lo se isi lava mea? Po o iloa e lau fanau le talafaasolopito ma galuega a le vaega i le lalolagi o le faalapotopotoga a le Atua? Po o latou talisapaia le avea o i latou ma vaega o se ʻauuso i le lalolagi aoao o Molimau a Ieova? (1 Pete. 2:17) Aiseā e lē iloilo ai i le afiafi o le Tapuaʻiga a lou Aiga fautuaga o mulimuli mai, ina ia atili ai ona latou talisapaia le faalapotopotoga a Ieova?

Faamatala “Aso Anamua”

Sa faapotopoto i tausaga taʻitasi aiga o Isaraelu ina ia faamanatu le Paseka. Ina ua faatulaga lenā tausamiga, na faatonu e Mose le nuu: “Pe a fesili atu mulimuli ane lou atalii iā te oe e faapea, ‘O le ā le uiga o lenei mea?’ ona e faapea atu lea iā te ia, ‘O le aao malosi o Ieova na aumaia ai i matou mai i Aikupito, le mea na matou nofo pologa ai.’” (Eso. 13:14) Sa lē tatau ona galo i tagata Isaraelu mea na faia e Ieova mo i latou. E mautinoa o le toʻatele o tamā Isaraelu na usitaʻia le faatonuga a Mose. Na tatalo i tausaga mulimuli ane se tagata Isaraelu: “Le Atua e, ua faalogo o matou taliga, ua faamatalatala mai e o matou augātamā iā i matou o galuega na e faia i o latou aso, i aso anamua.”—Sala. 44:1.

E ono manatu se tamaitiiti, o le talafaasolopito o Molimau a Ieova i le silia i le 100 tausaga ua mavae, e tai pei lava o ni mea na tutupu i “aso anamua.” E faapefea ona e faatupu le naunau o lau fanau ia iloa nei mea? Ua faaaogā e nisi mātua le tusi Jehovah’s Witnesses—Proclaimers of God’s Kingdom, le Tusi Tausaga, talaaga o soifuaga o tagata i a tatou lomiga, ma isi tala e uiga i le galuega a Molimau a Ieova, e aofia ai la tatou DVD fou e uiga i tagata o le Atua i aso nei. E aogā vitiō o loo faamatalaina ai le sauāina o uso i aso ua mavae, i atunuu o le Iuni faa-Sovieti ma le ʻau Nasi i Siamani, e aʻoaʻoina ai aiga ia faalagolago iā Ieova i taimi o sauāga. Ia faaaofia na mataupu i le Tapuaʻiga a le Aiga. Auā e faamalosia ai le faatuatua o lau fanau pe a luʻia lo latou faamaoni iā Ieova.

Peitaʻi, e vave lava ona fiu tamaiti e faalogologo i se lauga umi e uiga i mea na tutupu i aso ua mavae. O lea ia tuu atu se isi vaega i le fanau. E te ono fai atu i lou alo e filifili se atunuu e fiafia i ai, ia fai ni ana  saʻiliʻiliga e uiga i le galuega a Molimau a Ieova i lenā atunuu, ma faamatala mai ni mea na ia aʻoaʻoina. E mafai ona valaaulia ni Kerisiano i la outou faapotopotoga ua leva ona auauna iā Ieova, e auai i se afiafi o la outou tapuaʻiga a le aiga. E mafai ona faatalanoa e lou alo i latou e faatatau i mea na tutupu i la latou auaunaga. Pe e tusi foʻi e lou alo ata o ni mea ua fai ma matatiʻa i le galuega a Molimau a Ieova, e pei o le fausiaina o se lālā, se tauaofiaga faavaomalo, po o le faaaogāina i le talaʻiga o se laau e tā ai ni lauga na puʻeina.

Le Auala e ‘Galulue ai Itutino Taʻitasi’

Na faatusa e Paulo le faapotopotoga Kerisiano i ‘le tino atoa, ma ua faia ina ia felagolagomaʻi sooga uma, e tusa ma galuega talafeagai a itutino taʻitasi, ina ia tupu aʻe ai le tino, ma atiina aʻe ai o ia lava i le alofa.’ (Efe. 4:16) O le iloaina o galuega a le tino o le tagata, e atili ai ona tatou talisapaia ma faaaloalo i Lē na faia i tatou. Pe a iloa foʻi galuega a le faapotopotoga i le lalolagi aoao, e tatou te ofo ai i “le uiga eseese o le atamai o le Atua.”—Efe. 3:10.

Ua faamatalaina e Ieova galuega a lana faalapotopotoga, e aofia ai le vaega i le lagi. O se faaaʻoaʻoga, ua ia taʻu mai iā i tatou na ia tuuina atu muamua se faaaliga iā Iesu Keriso, o lē na “auina mai . . . lana agelu e faailoa mai i faailoga e ala iā te ia i lana pologa o Ioane.” (Faaa. 1:1, 2) Pe afai ua faailoa mai e le Atua galuega a le vaega i le lagi o lana faalapotopotoga, e finagalo foʻi la o ia e tatou te iloa le auala ‘e galulue ai itutino taʻitasi’ i le lalolagi.

Pe afai ua lata le asiasiga a le ovasia matagaluega i la outou faapotopotoga, ia iloilo faatasi ma lou aiga tiute ma faaeaga o ovasia femalagaaʻi. E faapefea ona latou fesoasoani mai iā i tatou taʻitoʻatasi? O nisi nei o fesili e mafai ona talanoaina: Aiseā e tāua ai ona fai le lipoti o le talaʻiga? E faapefea ona faatupe galuega o le faalapotopotoga a le Atua? Ua faapefea ona faamaopoopo le Vaega Pule, ma latou saunia mai meaʻai faaleagaga?

A itiiti mai e tolu aogā o le iloaina o le auala ua faamaopoopo ai tagata o Ieova: E atili ai ona tatou talisapaia ē o loo galulue mamafa mo i tatou. (1 Tesa. 5:12, 13) E uunaʻia ai i tatou e lagolagosua i faatulagaga a Ieova. (Galu. 16:4, 5) E faamalosia ai lo tatou maufaatuatuaina o ē o loo taʻimua, a o tatou iloa e faavae i le Tusi Paia faaiʻuga ma faatulagaga ua faia.—Epe. 13:7.

‘Ia Iloilo Ona Maota’

“Inā faataamilo ia outou i Siona, ma ia soo ai, inā faitau foʻi ia ona ʻolo. Ia mafaufau lelei i ona pā puipui. Ia iloilo ona ʻolo [maota] e nonofo ai, ina ia mafai ona outou faamatalatala atu i tupulaga o loo fāi mai.” (Sala. 48:12, 13) Sa uunaʻia e le faisalamo tagata Isaraelu e ō e asiasi i Ierusalema. Seʻi mafaufau i mea mananaia na talanoa ai aiga Isaraelu, na malaga i le aai paia i tausaga uma mo tausamiga, ma vāai i le matagofie o le malumalu. E mautinoa na latou “faamatala atu i tupulaga o loo fāi mai” na mea.

Seʻi manatu i le tupu tamaʻitaʻi o le nuu o Seepa, o lē na masalosalo i tala e uiga i le pulega lelei a Solomona ma lona atamai tele. O le ā na faatalitonuina ai o ia e moni mea na faalogo i ai? Na ia taʻua: “Ou te leʻi talitonu i na upu seʻia ou sau ma vaai i ai oʻu mata.” (2 No. 9:6) Ioe, e telē se aafiaga o mea e vāai i ai o tatou “mata.”

E faapefea ona e fesoasoani i lau fanau ia iloa i o latou lava “mata,” mea matagofie o le faalapotopotoga a Ieova? Ia asiasi i se ofisa o le lālā o Molimau a Ieova e latalata ane i le mea e te nofo ai. E tusa ma le 900 maila (1,500 km) le mamao o le mea na feola aʻe ai Mandy ma Petania, mai i le Peteli i lo la atunuu. Peitaʻi, e tele taimi na asiasi atu ai ma o la mātua i le ofisa o le lālā, aemaise lava a o faasolo ina matutua teine. Ua la faapea mai:  “A o ma leʻi asiasi i le Peteli, na ma manatu o se nofoaga mo loomatutua ma toeaiina, ma e faasāsā naʻuā. Ae na ma feiloaʻi i talavou mata fiafia o loo galulue mamafa mo Ieova. Na ma iloa ai o le lalolagi aoao e oo iai le faalapotopotoga a Ieova, ma o taimi uma e asiasi ai i le Peteli na atili ai ona ma malolosi faaleagaga.” O le vāaitino i le faalapotopotoga a Ieova na uunaʻia ai Mandy ma Petania e paeonia, ma na valaaulia foʻi e galulue tauofo i le Peteli mo se taimi lē tumau.

Ua iai se isi auala e tatou te ‘vāai ai’ i le faalapotopotoga a Ieova, lea e leʻi maua i Isaraelu anamua. I tausaga talu ai nei, na maua ai e tagata o le Atua ni vitiō ma DVD i le faa-Peretania, o loo faaalia ai vala eseese o le faalapotopotoga a le Atua, e pei o le: Jehovah’s Witnesses—Organized to Share the Good News, Our Whole Association of Brothers, To the Ends of the Earth, ma le United by Divine Teaching. O le a outou talisapaia atili ma lou aiga, le ʻauuso i le lalolagi aoao pe a vāai i galuega fitā a tagata Peteli, le ʻautauofo e galulue fesoasoani, misionare, ma uso o loo sauniunia ma faamaopoopoina tauaofiaga.

Ua faia e faapotopotoga uma o tagata o le Atua se matafaioi tāua i le talaʻia o le tala lelei, ma le lagolagoina o Kerisiano i o latou vaipanoa. Peitaʻi, ia manatua e lou aiga “lo outou ʻauuso atoa i le lalolagi.” O le a fesoasoani lea iā te oe ma lau fanau e tumau ai ona ‘mausalī le faatuatua,’ i le iloaina ua iai māfuaaga e te matuā fiafia ai.—1 Pete. 5:9.

 [Pusa/Ata i le itulau 18]

E Tāua Ona Talanoa e Uiga i le Faalapotopotoga a le Atua

E anoanoaʻi sauniuniga ua tatou maua e aʻoaʻoina ai e tagata uma, mea e tele e uiga i le talafaasolopito ma galuega a le faalapotopotoga a Ieova. E ono fesoasoani fesili o mulimuli mai ina ia e faia ai faapea:

☞ Na faapefea ona amata le galuega a ovasia femalagaaʻi i aso nei?—Le Olomatamata, Novema 15, 1996, itulau e 10-15.

☞ O le ā e mataʻina ai le “Aso mo Tamaiti,” i le fonotaga a Molimau a Ieova i le 1941?—Le Olomatamata, Iulai 15, 2001, itulau e 8.

☞ E faapefea ona faamaopoopo le Vaega Pule?—Le Olomatamata, Me 15, 2008, itulau e 29.