Ia Fai Filifiliga e Faamamaluina ai le Atua

“O le tagata e iai le utaga mamao, e na te iloilo lelei ona laasaga.”—FAATA. 14:15.

1, 2. (a) O le ā lo tatou faanaunauga autū i filifiliga uma e tatou te fai? (e) O ā fesili o le a iloiloina?

E TATOU te faia soo nei mea i aso taʻitasi. O nisi taimi tatou te manatu faatauvaa i ai. Ae i isi taimi, e telē se aafiaga i o tatou olaga. O ā nei mea? O filifiliga. O filifiliga uma e tatou te faia pe itiiti pe telē, o lo tatou faanaunauga autū ia faamamaluina ai le Atua.—Faitau le 1 Korinito 10:31.

² Pe e faigofie pe faigatā iā te oe le faia o filifiliga? Afai e tatou te mananaʻo ina ia taʻumatuaina faaleagaga, e ao la ona tatou iloa le mea saʻo ma le mea sesē, ona faia lea o a tatou filifiliga e tusa ma le mea ua tatou mautinoa e saʻo, ae lē o se manatu o se isi. (Roma 12:1, 2; Epe. 5:14) O ā ni māfuaaga tatau e ao ai ona faia filifiliga lelei? Aiseā e faigatā ai ona faia i nisi o taimi? Ma o ā laasaga e mafai ona tatou fai, ina ia faamamaluina ai le Atua i a tatou filifiliga?

Aiseā e Fai ai Fua Filifiliga?

3. O le ā e ono faalavelavea ai lo tatou faia o filifiliga?

³ Afai e tatou te lē mautonu i filifiliga e aafia ai tapulaa o le Tusi Paia, e ono manatu tagata tatou te aʻoʻoga ma faigaluega faatasi faapea, e faigofie ona taaʻina i tatou. Atonu e latou te tala pepelo, taufaaʻoleʻole, gāoi, ma tauanau foʻi i tatou ina ia “mulimuli i le toʻatele,” e ala i le aufaatasi ma i latou po o le nanā o a latou mea sesē. (Eso. 23:2) Ae peitaʻi, o se tasi ua na iloa fai filifiliga e faamamaluina ai le Atua, e lē faia se mea e  feteenaʻi ma lona lotofuatiaifo ua aʻoaʻoina i le Tusi Paia, ona o le fefe i tagata po o le manaʻo ina ia talia o ia e isi.—Roma 13:5.

4. Aiseā e mananaʻo ai isi e faia filifiliga mo i tatou?

⁴ E lē faapea o i latou uma e fautua mai i filifiliga tatou te faia e sesē o latou faanaunauga. E faapea mai uō o loo manatu mo lo tatou lelei, ia fai pea le mea ua latou fautuaina. Pe afai ua lē toe nonofo ma mātua, e ono popole pea le aiga mo lo tatou lelei, ma manatu e tatau pea ona fai sa latou leo i ni filifiliga tāua tatou te faia. O se faataʻitaʻiga, o mataupu tau i togafitiga faafomaʻi. E manino tapulaa a le Tusi Paia e faatatau i le toto. (Galu. 15:28, 29) Ae o isi mataupu tau i le soifua mālōlōina, e lē o iloa maʻoti le mea e tatau ona fai, ma e manaʻomia ai ona faia e le tagata lava ia lana faaiʻuga pe talia pe leai. * Atonu e malolosi manatu o o tatou aiga i nei mataupu. Ae peitaʻi, pe a oo i nei mataupu, e tatau i se Kerisiano ua papatiso, ona tauave ʻlana lava avega.’ (Kala. 6:4, 5) O lo tatou faanaunauga autū, o le mauaina pea o se lotofuatiaifo lelei i luma o le Atua, ae lē o tagata.—1 Timo. 1:5.

5. E faapefea ona ʻalofia le faavaatuʻia o lo tatou faatuatua?

⁵ O le faalotolotolua e tatou te lamatia ai. Na tusi le soo o Iakopo, o le tagata e faalotolotolua e “faalētumau i ona ala uma.” (Iako. 1:8) O le a felafoaʻiina o ia ona o le fesuisuiaʻi o manatu o tagata, ma ua pei ai o ia o se tagata i se vaa ua leai se foeuli i luga o se sami sousou. Pagā le faigofie ona faavaatuʻia o le faatuatua o lea tagata, ma tuuaʻia ai isi ona o lona tulaga pagatia ua iai! (1 Timo. 1:19) E faapefea ona tatou ʻalofia lea tulaga? E tatau ona tatou “mausalī i le faatuatua.” (Faitau le Kolose 2:6, 7.) Ina ia mausalī, e manaʻomia ona tatou iloa fai filifiliga e atagia mai ai lo tatou faatuatua i le Afioga a le Atua. (2 Timo. 3:14-17) O le ā e ono faalavelavea ai le faia o filifiliga lelei?

Le Māfuaaga e Faigatā ai Ona Fai Filifiliga

6. E faapefea ona aafia i tatou i le fefe?

⁶ O le fefe e tatou te lē iloa ai fai ni filifiliga—fefe neʻi sesē se filifiliga e fai, fefe neʻi lē taulau, po o le fefe neʻi e foliga atu i isi e te valea. E malamalama lava i na popolega. E leai se tasi e manaʻo e fai ni filifiliga lē lelei, lea e iʻu ai i ni faigatā ma māsiasi ai. Ae ui i lea, o le alofa i le Atua ma lana Afioga, e aveesea ai lo tatou fefefe. I ā auala? O le alofa i le Atua, e uunaʻia ai i tatou e saʻili atu pea i lana Afioga, ma lomiga faale-Tusi Paia a o leʻi faia ni filifiliga tāua. O le faia faapea, e faaitiitia ai le faia o filifiliga sesē. Aiseā? Ona e mafai e le Tusi Paia ona ʻavatu i ē ua leai se poto masani le utaga mamao, ma avatu ai foʻi i le tauleʻaleʻa le poto ma le mafaufau lelei.’—Faata. 1:4.

7. O le ā e tatou te aʻoaʻoina mai i le faataʻitaʻiga a le tupu o Tavita?

⁷ Po o le a saʻo i taimi uma filifiliga tatou te fai? Leai. E faia e tagata uma mea sesē. (Roma 3:23) O se faataʻitaʻiga, o Tavita o se tupu na atamai ma faamaoni. Ae e iai taimi na ia faia ai ni filifiliga lē lelei, na māfua ai ona mafatia o ia faapea ma isi. (2 Samu. 12:9-12) E ui i lea, e leʻi avea mea sesē na fai e Tavita, ma mea na afāina ai lona tomai e fai ai filifiliga e ōgatusa ma le finagalo o le Atua. (1 Tu. 15:4, 5) E mafai ona tatou fai pea ni filifiliga, e ui i mea sesē na fai i le taimi ua mavae, pe a tatou pei o Tavita i le manatuaina e faamagalo e Ieova a tatou agasala. E faaauau pea ona ia lagolagoina i latou e alolofa ma usitaʻi iā te ia.—Sala. 51:1-4, 7-10.

8. O le ā e tatou te aʻoaʻoina mai le faamatalaga a Paulo e faatatau i le faaipoipo?

⁸ E mafai ona tatou faaitiitia popolega i le  faia o filifiliga. E faapefea? I le iloaina faapea, e tele auala saʻo e faia ai. Seʻi mafaufau i le auala na manatu ai Paulo e faatatau i le faaipoipo. Na faagaeeina o ia e tusi mai: “Afai ua manatu se tasi ua lē talafeagai lana amio ma lona tulaga muli, pe afai ua teʻa le malaulau o lona talavou, ma e tatau ona faia faapea, ia faia e ia le mea e manaʻo i ai; e lē agasala ai o ia. Ia faaipoipo i laʻua. Ae afai ua tonu i lona loto, ma e lē faigatā iā te ia, ae ua mafai ona ia pulea ona faalogona, ma ua fai lana lava filifiliga i lona loto ina ia tausia pea lona tulaga muli, e manuia ai o ia.” (1 Kori. 7:36, 37) Na fautua Paulo e sili atu pe a nofofua, ae e lē na o le pau lea o le filifiliga saʻo e mafai ona fai.

9. Pe ao ona tatou popole i le auala e manatu ai isi i filifiliga e tatou te fai? Faamatala.

⁹ Pe ao ona tatou popole i le auala e manatu ai isi i filifiliga e tatou te fai? E iai taimi e talafeagai ai. Mātau mai le manatu o Paulo e faatatau i le ʻaina o meaʻai atonu sa faaaogā e fai ai taulaga i tupua. Na ia iloa e lē sesē le faia o se filifiliga faapea, ae atonu e afāina ai se tasi e vaivai lona lotofuatiaifo. O le ā le faaiʻuga na fai e Paulo? Na ia tusia: “Afai ua tausuai loʻu uso ona o meaʻai, ou te lē toe ʻai lava i aano o manu, ina neʻi tausuai loʻu uso ona o aʻu.” (1 Kori. 8:4-13) E tatau foʻi ona tatou manatu i le auala e aafia ai lotofuatiaifo o isi ona o filifiliga e tatou te fai. Ae ui i lea, o lo tatou faanaunauga autū, o aafiaga o a tatou filifiliga i la tatou faauōga ma Ieova. (Faitau le Roma 14:1-4.) O ā mataupu silisili faale-Tusi Paia e fesoasoani i le faia o filifiliga e faamamaluina ai le Atua?

Laasaga e Ono i le Faia o Filifiliga Lelei

10, 11. (a) E faapefea ona tatou ʻalofia le faamaualuga i totonu o le aiga? (e) O le ā e tatau ona faamautinoa e toeaina pe a faia filifiliga e aafia ai le faapotopotoga?

¹⁰ ʻAlofia le faamaualuga. A o leʻi faia se filifiliga, e ao ona tatou fesili ifo iā i tatou lava, ʻPo o iā te aʻu le pule e fai ai lea filifiliga?’ Na tusia e le tupu o Solomona: “Po ua oo mai ea le faamaualuga? Ona oo mai ai lea o le faalumaina; ae e iai le atamai i ē e faamaulalo.”—Faata. 11:2.

¹¹ Atonu e avatu e mātua i la la fanau se avanoa e fai ai ni filifiliga, ae e lē tatau ona manatu le fanau faapea, ua iā i latou le pule e fai ai a latou lava filifiliga. (Kolo. 3:20) E iai foʻi i se āva ma se tinā le avanoa e faatino ai lana pule i totonu o le aiga, ae e tatau lava ona ia amanaʻia le tulaga ulu o lana tane. (Faata. 1:8; 31:10-18; Efe. 5:23) E faapena foʻi i tane, e tatau ona manatua e tapulaa foʻi la latou pule ma e ao ona gauaʻi atu iā Keriso. (1 Kori. 11:3) E fai e toeaina filifiliga e aafia ai le faapotopotoga. Ae e latou te faamautinoa e latou te lē “faia mea e sili atu nai lo o mea ua tusia.” (1 Kori. 4:6) E latou te mulimulituʻi foʻi i taʻiala e maua mai i le pologa faamaoni. (Mata. 24:45-47) E tatou te ʻalofia foʻi le tele o popolega ma faanoanoaga, pe a tatou faia ma le lotomaulalo filifiliga ua iā i tatou le pule e fai ai.

12. (a) Aiseā e tatau ai ona faia saʻiliʻiliga loloto? (e) Faamatala le auala e fai ai saʻiliʻiliga loloto.

 ¹² Fai ni saʻiliʻiliga loloto. Na tusi Solomona: “O fuafuaga a le tagata toʻaga e manuia ai o ia, a o i latou e faataalise ona faia mea e iʻu ai i le mativa.” (Faata. 21:5) O se faataʻitaʻiga, po o e feagai ma le faia o se filifiliga i se mataupu tau pisinisi? Aua le faavavevave ona fai lau filifiliga ona o ou faalogona i le taimi lenā. Ia iloa mea uma e aafia ai, saʻili fautuaga mai iā i latou e malamalama lelei i na mataupu, ma mafaufau i mataupu silisili faale-Tusi Paia e faatatau i na mataupu. (Faata. 20:18) A o faia au saʻiliʻiliga loloto, fai ni lisi se lua—o le tasi e tusi ai aogā, a o le isi e tusi ai mea e ono lē taulau ai. A o leʻi faia se filifiliga, “faitau tupe o le a faaalu.” (Luka 14:28) Mafaufau i aafiaga e ono tulaʻi mai ona o lau filifiliga, e lē gata i le itu tautupe, ae faapea foʻi ma le itu faaleagaga. E manaʻomia le taimi ma taumafaiga e fai ai saʻiliʻiliga loloto. O le faia faapea, e te ʻalofia ai le faia faavavevave o ni faaiʻuga, lea e iʻu ai i popolega.

13. (a) O le ā le faamautinoaga o loo taʻua i le Iakopo 1:5? (e) E faapefea ona aogā iā i tatou le ōle atu mo le atamai?

¹³ Tatalo mo le atamai. O le a faamamaluina le Atua, pe a tatou tuu atu iā te ia e fesoasoani mai i a tatou filifiliga. Na tusi le soo o Iakopo: “Pe afai ua leai se atamai i se tasi o outou, inā ōle atu pea ia i le Atua, auā o ia na te foaʻi tele mai ma le lē toe taʻutaʻua, ona foaʻiina mai lea iā te ia.” (Iako. 1:5) E lē leaga pe a tatou manatu, e manaʻomia le atamai mai le Atua mo le faia o filifiliga. (Faata. 3:5, 6) O le faalagolago atoatoa i lo tatou lava atamai, e faigofie ona faasesēina ai i tatou. Pe a tatou ōle atu mo le atamai ma saʻilia mataupu silisili i le Afioga a le Atua, e fesoasoani le agaga paia iā i tatou e iloa ai le māfuaaga moni, e tatou te faia ai se mea.—Epe. 4:12; faitau le Iakopo 1:22-25.

14. Aiseā e tatou te ʻalofia ai le faatuatuai?

¹⁴ Ia faia le filifiliga. Aua le vave uia lenei laasaga a o leʻi faia muamua ni saʻiliʻiliga loloto, ma ōle atu mo le atamai. O le tagata poto e “iloilo lelei ona laasaga.” (Faata. 14:15) Ae ia aua lava neʻi faatuatuai. O se tagata e faatuatuai, e masani ona fafau aʻe ni faamolemolega e taʻutonuina ai lona lē faia o se mea. (Faata. 22:13) O lona uiga o lana filifiliga ua fai, ua tuu atu e fai mai e isi tagata.

15, 16. O le ā e aofia ai i le faataunuuina o filifiliga?

¹⁵ Faataunuu le filifiliga. E maʻimau le taimi e fai ai ni filifiliga lelei, pe a lē faataunuuina. Na tusia e Solomona: “O mea uma ua e iloa e faia e ou lima, inā faia ia ma lou malosi.” (Fai. 9:10) Ina ia taulau manuia, e ao ona tatou faatulaga lelei o tatou olaga,  ina ia faataunuuina ai a tatou filifiliga. O se faataʻitaʻiga, e ono filifili se tagata talaʻi o se faapotopotoga e paeonia. Po o le a taulau manuia o ia? E mafai ona fai, pe a lē faaalu uma lona taimi ma le malosi i le tele o ana galuega totogi ma mea e fiafia ai, ma oo ai ina lē lavā e fai lana auaunaga.

¹⁶ O filifiliga e sili ona lelei e lē faigofie ona faataunuu. Aiseā? Ona “o le lalolagi atoa o loo nofo toʻilalo i le pule a lē o loo leaga.” (1 Ioa. 5:19) E tatau ona tatou tau faasaga i “taʻitaʻi o le lalolagi o loo pulea lenei lalolagi pogisa, ma agaga leaga uma i mea o i le lagi.” (Efe. 6:12) Ua faailoa mai e le aposetolo o Paulo ma le soo o Iuta e faapea, e oo luʻitau i ē o loo taumafai e faamamaluina le Atua.—1 Timo. 6:12; Iuta 3.

17. O le ā o loo faatalitalia e Ieova e tusa ai ma filifiliga tatou te faia?

¹⁷ Toe autalu filifiliga ma fetuutuunaʻi pe a manaʻomia. E lē o filifiliga uma e faataunuu i le auala na fuafuaina ai. “E tutupu faafuaseʻi mea . . . e leʻi faatalitalia” iā i tatou. (Fai. 9:11) E ui i lea, e finagalo Ieova ia tatou tumau pea i nisi o filifiliga, e ui ina feagai ma faigatā. O le filifiliga a se tagata e tuuina atu lona ola iā Ieova, po o le faia o se tautoga o le faaipoipoga, e lē mafai ona fai i ai ni fetuutuunaʻiga. O le finagalo o le Atua ia tatou ola e tusa ai ma na filifiliga. (Faitau le Salamo 15:1, 2, 4.) O le tele lava o filifiliga, e itiiti ifo le tāua. E toe autalu e se tagata atamai ana filifiliga ua uma ona fai. E lē avea le faamaualuga ma le lotomaaa e taofia ai lona faia o ni fetuutuunaʻiga, po o le suia foʻi o se filifiliga. (Faata. 16:18) O lona faanaunauga autū, ia faamamaluina le Atua i lona olaga.

Ia Aʻoaʻo Isi e Fai Filifiliga e Faamamaluina ai le Atua

18. E faapefea ona aʻoaʻo e mātua fanau e fai ni filifiliga lelei?

¹⁸ E telē se vaega a mātua i le aʻoaʻoina o a latou fanau, ia iloa fai filifiliga e faamamaluina ai le Atua. O faaaʻoaʻoga lelei a mātua, o le faiaʻoga sili lea mo fanau. (Luka 6:40) Pe a manaʻomia, e mafai e mātua ona faamatala atu i le fanau laasaga na la faia, ina ia fai ai se filifiliga patino. Atonu e la te tuu atu i fanau e fai ni a latou lava filifiliga, ona la faamālō atu lea pe a manuia. Ae faapefea pe a faia e se tamaitiiti se filifiliga lē lelei? E masani ona taumafai se matua, e puipuia se tamaitiiti mai āuga leaga o lenā filifiliga, ae e lē lelei mo le tamaitiiti le faia faapea e se matua i taimi uma. O se faataʻitaʻiga, e ono faataga e se matua lona alo ina ia maua sona laisene avetaavale. Ma seʻi faapea ua soli e ia se tulafono o le auala ma sala ai. E mafai e mātua ona totogia le sala. Ae afai e faafaigaluega lo la alo ina ia totogi ai le sala, e na te aʻoaʻoina ai e feagai lava o ia ma āuga o ana gaoioiga.—Roma 13:4.

19. O le ā e tatau ona tatou aʻoaʻo i tagata o loo suʻesuʻe le Tusi Paia, ma e faapefea ona tatou faia?

¹⁹ Na faatonu e Iesu ona soo ina ia aʻoaʻo atu i isi. (Mata. 28:20) O se tasi lesona tāua e ao ona aʻoaʻo atu i tagata o loo suʻesuʻe le Tusi Paia, o le auala e fai ai filifiliga lelei. Ina ia faia faapea, e tatau ona tatou ʻalofia le taʻu atu iā i latou o le mea e ao ona fai. E lelei pe a aʻoaʻoina i latou ina ia fefulifulisaʻi i mataupu silisili faale-Tusi Paia, ma faia a latou lava filifiliga. Ona “e taʻitasi . . . i tatou uma ma tala atu lana amio i le Atua.” (Roma 14:12) Ua iā i tatou la māfuaaga tatau, e fai ai filifiliga e faamamaluina ai le Atua.

[Faaopoopoga i lalo]

E Faapefea Ona E Tali?

• Aiseā e manaʻomia ai ona tatou iloa fai filifiliga?

• E faapefea ona aafia i tatou ona o le fefefe, ma e faapefea ona tatou manumalo mai ai?

• O ā laasaga e ono, e tatou te faamamaluina ai le Atua i a tatou filifiliga?

[Fesili mo le Suʻesuʻega]

[Pusa/Ata i le itulau 16]

Laasaga i le Faia o Filifiliga Lelei

1 ʻAlofia le Faamaualuga

2 Fai ni Saʻiliʻiliga Loloto

3 Tatalo mo le Atamai

4 Ia Faia le Filifiliga

5 Faataunuu le Filifiliga

6 Toe Autalu ma Fetuutuunaʻi

[Ata i le itulau 15]

O le tagata faalotolotolua, ua pei o se vaa ua leai se foeuli i luga o se sami sousou