Le Auala e Tumau ai Ona Faamaoni i se Lalolagi Lē Faamaoni

UA IAI le lē faamaoni i mea uma, e pei o le ea e tatou te mānavaina. E tala pepelo tagata, soona sii tau o mea, gaoi, lē totogia aitalafu, ma le faia o pisinisi faapiʻopiʻo. O se siʻomaga faapea, e masani ona tofotofoina ai lo tatou faamaoni. E faapefea ona tatou teena le lē faamaoni? Seʻi o tatou tilofaʻia ni vala se tolu e fesoasoani e faia ai faapea. O le mataʻu iā Ieova, se lotofuatiaifo lelei, ma le lotomalie.

Se Mataʻu Tatau iā Ieova

Na tusia e le perofeta o Isaia: “O Ieova o lo tatou Faamasino, o Ieova o lo tatou Faitulafono, o Ieova o lo tatou Tupu.” (Isa. 33:22) O le iloaina o le tulaga pule o Ieova e tatou te matataʻu ai iā te ia, ma ua avea ma uunaʻiga malosi e teena ai le lē faamaoni. Ua faapea mai le Faataoto 16:6: “O le mataʻu iā Ieova e liliuese ai se tasi mai i le leaga.” O lea ituaiga o mataʻu, e lē o se fefevale i le oo mai o se faasalaga mai le Atua, ae o se mataʻu tatau, ina ia lē faatigā i le finagalo o lo tatou Tamā faalelagi, o Lē e naunau alofa mai.​—1 Pete. 3:12.

Ua faataʻitaʻi mai e se tala i se mea moni na tupu, le aogā o le iai o le mataʻu tatau. O Risati ma lona toʻalua o Renata, sa ō e tala mai se tupe pe tusa ma le fitu selau tālā Amerika mai le la tusi tupe. * Sa tuu saʻo lava e Renata le tupe i totonu o lana atotupe e aunoa ma le faitauina. Ina ua uma ona totogi nisi pili, ua la teteʻi ina ua faitau atu le tupe o totoe i le atotupe a Renata, e toetoe a tutusa ma le tupe lea sa tala mai. O lona uiga ua sili atu le tupe lea na tuu mai e le kesia o le faletupe. Muamua sa la mananaʻo e tuu le tupe, ona sa tele isi pili o loo manaʻomia ona totogi. Ua faapea mai Risati: “Sa ma tatalo iā Ieova ina ia mafai ona ma toe faafoʻi le tupe. Sa ma mananaʻo e faafiafiaina o Ia ma tali atu i lana talosaga o loo i le Faataoto 27:11, ona ma toe faafoʻi lea o le tupe.”

Se Lotofuatiaifo ua Aʻoaʻoina e le Tusi Paia

E mafai ona atiaʻe se lotofuatiaifo lelei, e ala i le suʻesuʻeina o le Tusi Paia ma faatatau mea ua aʻoaʻoina. Ona “o loo ola le afioga a le Atua ma e matuā malosi,” e mafai ai ona pāʻia o tatou mafaufau atoa ma loto. E uunaʻia ai i tatou ina ia “faia mea uma ma le faamaoni.”​—Epe. 4:12; 13:18.

Seʻi manatu i le mea na tupu iā Ioasa. Sa ia faia se aitalafu telē, e lima afe tālā Amerika. Ona ia sola ese lea i se isi aai, e aunoa ma le totogiina o lana aitalafu. Ina ua mavae le valu tausaga, ona aʻoaʻoina lea e Ioasa le upu moni, ma maua ai se lotofuatiaifo ua aʻoaʻoina e le Tusi Paia, lea na uunaʻia ai o ia e faia se fuafuaga e toe totogi atoa lana aitalafu! Ona e laʻitiiti lona totogi e tausia ai lona toʻalua ma le fanau e toʻafā, sa lotomalie lē sa ia nofo aitalafu ai, e totogi taʻi masina lana aitalafu.

Ia Maua le Lotomalie

Na tusia e le aposetolo o Paulo: “E tele mea e maua mai le faamaoni i le Atua ma le lotomalie. . . . Afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.” (1 Timo. 6:6-8) O le faatatauina o lenei fautuaga, o le a fesoasoani iā i tatou e ʻalofia ai faiga faapisinisi matapeʻapeʻa  ma le faapiʻopiʻo, po o ni galuega e ofo mai e vave maua ai se tupe telē. (Faata. 28:20) O le mulimuli i le fautuaga a Paulo, o le a mafai ai foʻi ona tatou faamuamua le Malo o le Atua, ma mautinoa ai e maua mea tatou te manaʻomia.​—Mata. 6:25-34.

Peitaʻi, ona o “le malosi taufaasesē o le ʻoa,” e ao ai ona tatou mataala pea i le maileia i le matapeʻapeʻa ma le manaʻo tele. (Mata. 13:22) Seʻi manatu i le mea na tupu iā Akana. Sa ia molimauina le sopoʻia faavavega e le nuu o Isaraelu o le vaitafe o Ioritana. Ae ui i lea, ona ua malo tuʻinanauga matapeʻapeʻa iā te ia, na ia gaoia ai ni siliva ma auro, atoa ma se ofu matagofie taugatā mai le vete o le aai o Ieriko. O le mea na ia faia, na maumau ai lona ola. (Iosua 7:1, 20-26) E lētioa ona lapataʻi mai Iesu: “Ia outou mataala pea ma leoleo iā te outou i le manaʻo tele”!​—Luka 12:15.

Ia Faamaoni i le Mea e Faigaluega Ai

Seʻi o tatou iloiloina nisi o tulaga e ono tofotofoina ai lo tatou maumauaʻi e faamaoni i mea uma. O le faamaoni i mea tatou te faigaluega ai, e aofia ai le ʻlē gaoi,’ e ui lava o loo faia faapea e isi. (Tito 2:9, 10) E faigaluega Ionatana i se ofisa o le malo, ma sa ia faamaoni i le lipotia o ana tupe faaalu mo malaga a le ofisa. Ae o le masani a isi tagata faigaluega i le ofisa, e latou te lipotia se aofaʻi e sili atu i lo tupe sa faaalu. Sa latou faia faapea, ona sa nanā e le pule o le matagaluega a latou faiga lē faamaoni. Na otegia e lenā pule Ionatana ona o lona faamaoni, ma lē toe auina atu o ia i malaga a le ofisa. Mulimuli ane, sa faia se suʻegā tusi a le ofisa, ma sa viiviia Ionatana ma siitia lona tulaga i le galuega, ona o lona faamaoni.

Sa faatonuina Aneterea e lona pule ia faaluaina le aofaʻi o le tau e totogiina e tagata, mo le galuega sa ia faia. Sa tatalo lo tatou uso iā Ieova mo le lototele, ina ia mulimuli ai pea i mataupu silisili o le Tusi Paia. (Sala. 145:18-20) Sa ia taumafai e faamatala i lona pule le māfuaaga e na te leʻi usitaʻia ai lana faatonuga, ae e leʻi talia e lona pule. O lea na faamavae ai Aneterea mai lana galuega e ui e lelei le totogi. Ae pe ā ma se tausaga mulimuli ane, sa toe manaʻo le pule e toe faafaigaluega o ia, ma sa ia faamautinoa iā Aneterea faapea, e lē o toe faaluaina le tau o galuega. Sa siitia foʻi le tulaga o Aneterea e avea ma pule o le galuega.

Ia Totogi Aitalafu

Sa fautuaina Kerisiano e Paulo: “Aua neʻi o outou nofo aitalafu i se tagata.” (Roma 13:8)  Atonu tatou te manatu e lē tau manaʻomia ona totogi se aitalafu, ona e tele tupe a le tagata lea sa nonō mai ai le tupe. Ae ua lapataʻi mai le Tusi Paia: “E aitalafu e le tagata amioleaga mea, ae e lē toe totogiina atu.”​—Sala. 37:21.

Ae faapefea pe a “tutupu faafuaseʻi mea,” ma lē mafai ai ona tatou totogia aitalafu? (Fai. 9:11) Sa nonōina e Falani le fitu afe tālā Amerika mai iā Feleti ina ia totogi ai lana mokesi. Ae ona o ni faigatā i lana pisinisi, ua lē mafai ai ona totogi le tupe iā Feleti i le aso sa tatau ona totogi ai. Na talanoa atu Falani iā Feleti i le mea ua tupu, ma sa malie Feleti e fai se fuafuaga ina ia totogi auauaʻi atu le tupe.

Aua le Faatagā Faamaoni

Manatua le faaaʻoaʻoga leaga a Anania ma Safaira, o se ulugalii sa i le faapotopotoga Kerisiano i le uluaʻi senituri. Ina ua faatau atu so la fanua, sa la aveina i le ʻauaposetolo na o se vaega o le tau, ma faapea atu o le tau atoa lea. Na la mananaʻo e viiviia i laʻua ona o le telē o le la foaʻi. Peitaʻi, e ala i le agaga paia o le Atua, sa faaalia e le aposetolo o Peteru lo la lē faamaoni, ma na faaumatia i laʻua e Ieova.​—Galu. 5:1-11.

I le lē pei o Anania ma Safaira, e faamaoni ma saʻo faamatalaga a tusitala o le Tusi Paia. Sa taʻu saʻo mai e Mose le taimi na ita ai, ma na māfua ai ona lē faatagaina o ia e ulu atu i le Nuu o le Folafolaga. (Nu. 20:7-13) E faapena foʻi Iona, e na te leʻi natia ona vaivaiga ia sa faaalia a o leʻi talaʻi atu i tagata Nineva, ma mulimuli ane ai, ae na ia tusia i lana tusi.​—Iona 1:1-3; 4:1-3.

E manaʻomia le lototele ina ia taʻu atu le mea moni, e ui e ono oo ai i se iʻuga lē manuia, e pei o le mea na tupu iā Natalia, o se teineitiiti aʻoga e 14 ona tausaga. I lona toe autiloina o le pepa o lana suʻega sa fai, na ia iloa ai ua togi faasaʻo e lona faiaʻoga se tasi o ana tali, ae e sesē. Sa ia faailoa atu i lona faiaʻoga, e ui lava e ono paʻū ai ona maka mo le suʻega. Ua faapea mai Natalia: “Sa aʻoaʻoina aʻu e oʻu mātua ia faamaoni, ina ia faafiafiaina Ieova. E ōia loʻu lotofuatiaifo pe a lē taʻu atu i loʻu faiaʻoga.” Sa talisapaia e le faiaʻoga le faamaoni o Natalia.

Faamaoni​—O se Uiga e Faamamaluina ai Ieova

O Kisela o se teine e 17 ona tausaga, sa ia mauaina se atotupe o loo iai le 35 tālā Amerika ma isi pepa tāua. Sa ia avatu le ato i le pule o le aʻoga, ina ia toe faafoʻi i lē e ana le ato. Ina ua mavae se masina, sa faitau atu e le pule lua o le aʻoga se tusi e viia ai Kisela ona o lona faamaoni, ma faamālō i lona aiga mo le aʻoaʻoina lelei ma le tausia aʻe o ia i le Tusi Paia. O ana “galuega lelei,” ua viia ai Ieova.​—Mata. 5:14-16.

Talu ai ua siʻomia i tatou e tagata e ʻalolofa iā i latou lava, o ē e mananaʻo tele i tupe, o ē e fia tagata, o ē e faamaualuluga ma ē e lē faamaoni,’ e manaʻomia ai la ni taumafaiga ina ia faamaoni. (2 Timo. 3:2) Ae ui i lea, o le iai o se mataʻu tatau iā Ieova, se lotofuatiaifo ua aʻoaʻoina i le Tusi Paia, ma le lotomalie e tatou te tumau ai i le faamaoni, i se lalolagi lē faamaoni. E tatou te mauaina foʻi se mafutaga māfana ma Ieova, o lē ʻe amiotonu ma e fiafia i gaoioiga amiotonu.’​—Sala. 11:7.

[Faaopoopoga i lalo]

[Ata i le itulau 7]

O se mataʻu tatau iā Ieova, e faamalosia ai lo tatou faamaoni

[Ata i le itulau 8]

O gaoioiga faamaoni e faamamaluina ai Ieova