Pe E te Manatua?

Pe na e fiafia i le faitauina o lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

• Aiseā e tatou te talitonu ai sa iai moni le faatoʻaga i Etena?

Ua faailoa mai e le Tusi Paia faapea, sa iai lea nofoaga ma ua taʻua patino mai le vaipanoa na iai. O loo iai vaitafe e lua o vaitafe o loo taʻua i le tala. E lē faapena ona faamatalaina ni talafatu. Sa taʻua e le molimau e sili ona maufaatuatuaina o Iesu lea, sa iai moni lava Atamu ma Eva.—1/1, itulau 5-6, 9.

• Pe na silafia e le Atua o le a agasala Atamu ma Eva?

Leai. Sa tuu atu e Ieova iā i laʻua le atamai ma le filifiliga saʻoloto ina ia filifili pe e usiusitaʻi i le Atua pe leai. E ui ua iā te ia le tomai e muaʻi silafia ai mea, ae na te filifili ma le tonu le taimi e faaaogā ai lenā tomai.—1/1, itulau 13-15.

• Pe e faaaogā e Kerisiano moni le suafa o le Atua e fai ma tapui?

O nisi tagata e faaaogā se mea po o se faailoga e fai ma tapui e puipuia ai i latou, ae e lē o le manatu lea a tagata o le Atua i lona suafa. E latou te faatuatua iā Ieova ma saʻilia lona finagalo, ma avea lona suafa ma sulufaʻiga. (Sefa. 3:12, 13)—1/15, itulau 5-6.

• O ai i Isaraelu sa mauaina aogā mai le tū masani o le aoina o mea i le seleselega?

O le nuu atoa. Sa faalaeiauina le toʻaʻaga o ē matitiva ona sa manaʻomia ona aoina mea. Sa aogā foʻi i isi ina ia limafoaʻi ma ia faalagolago i faamanuiaga a le Atua.—2/1, itulau 15.

• Aiseā na teena ai e Ieova le Tupu o Saulo?

Sa tatau ona faatali Saulo mo le perofeta a le Atua ina ia osi le taulaga, ae sa ia lē usitaʻi, ma osi lava e ia le taulaga. Mulimuli ane, sa ia lē usitaʻi foʻi i le faatonuga e faaumatia se tasi nuu sa avea ma fili.—2/15, itulau 22-23.

• E faapefea ona ʻinoʻino i le amioleaga?

E tatou te pulea le faaaogāina o le ʻava malosi, ʻalofia faiga faataulāitu, ma utagia le lapataʻiga a Iesu e uiga i amioga lē mamā. O se faataʻitaʻiga, tatou te ʻalofia ata matagā tau i feusuaʻiga ma tuʻinanauga sesē e māfua mai ai. (Mata. 5:27, 28) Ma e tatou te lē auaufaatasi ma ē ua faateʻaina.—2/15, itulau 29-32.

• Aiseā e mataʻina ai le mauaina e le ʻau eli eleele i Isaraelu i aso nei, o faamoega o lagomeli mai aso anamua?

Na maua e le ʻau eli eleele faamoega lagomeli e sili atu ma le 30, ma ua manatu ai ē popoto faapea, e mafai ona ao mai pe tusa ma le ʻafa tone o meli i tausaga taʻitasi. Ua faamaonia mai e lenei mea, sa tausia e tagata lagomeli i le nuu lea sa folafolaina e le Atua e “tafe ai le suāsusu ma le meli.” (Eso. 3:8)—3/1, itulau 15.

• Sa faapefea ona pei Ieremia o se laau ua “totō i tafatafa o vai, e sosolo atu ona aa”? (Iere. 17:7, 8)

Sa galue pea o ia ina ia fua mai; ma e leʻi faavaivai o ia ona o tagata tauemu. Nai lo lea, sa ia piiama i le Puna o vai o le ola, ma ave i fale fetalaiga a le Atua.—3/15, itulau 14.

• O le ā le uiga o le tala a Iesu iā Mareta, e itiiti lava ni mea e manaʻomia pe e na o le tasi foʻi? (Luka 10:41, 42)

E leʻi manatu Iesu o Mareta o se tagata e pupū tele i meafaitino, ona sa ia sauniunia ni meaʻai se tele, ma e lē faapea sa ia manatu faatauvaa i ana galuega mamafa. Nai lo lea, sa ia faamatilatila mea e tatau ona ia faamuamua. E leʻi faaaogāina e Mareta lenei avanoa lē laumaua, ina ia faamalosia ai lona faatuatua.—4/1, itulau 12-13.

• O ā nisi o mea sesē sa fai i le faamasinoga o Iesu?

E leʻi iai ni faamatalaga e faamaonia ai le leai o se sala a Iesu. Sa faaaogā molimau pepelo. Sa faia le faamasinoga i le pō. Sa faatotope ona fai i le aso e tasi.—4/1, itulau 20.