Aiga Kerisiano​—ʻIa Mataala’

“Ia tatou mataala ma faaauau ona mafaufau lelei.”​—1 TESA. 5:6.

1, 2. O le ā o loo manaʻomia, ina ia mataala faaleagaga se aiga?

I LE faasino atu i “le aso tele ma le mataʻutia o Ieova,” na tusi atu le aposetolo o Paulo i Kerisiano i Tesalonia e faapea: “Uso e, tou te lē o i le pōuliuli ina neʻi maua mai outou e lenā aso, e pei ona maua o tagata gāoi pe a malamalama, auā o outou uma o atalii o le malamalama ma atalii o le ao. E lē o i tatou o ni tagata o le pō, po o tagata o le pōuliuli.” Na toe faapea atu Paulo: “O le mea lea, aua neʻi o tatou momoe pea e faapei o isi, ae ia tatou mataala ma faaauau ona mafaufau lelei.”​—Ioe. 2:31; 1 Tesa. 5:4-6.

² O fautuaga a Paulo i le faapotopotoga i Tesalonia, e fetaui lelei foʻi i Kerisiano o loo ola i “le taimi o le iʻuga.” (Tani. 12:4) A o lata mai le iʻuga o lenei faiga amioleaga o mea, ua taumafai malosi Satani e liliu ese le tele o tagata tapuaʻi moni, mai le auauna atu i le Atua. O se tulaga atamai la lo tatou faatatauina o le timaʻiga a Paulo, ia mataala faaleagaga. Afai e mataala faaleagaga se aiga Kerisiano, e tāua i tagata taʻitoʻatasi o le aiga ona faataunuu lana matafaioi e pei ona taʻua i le Tusi Paia. O ā matafaioi e ao ona faataunuu e le tane, avā, ma fanau ina ia “mataala” ai le aiga?

Tane​—Faaaʻoaʻo i “le Leoleo Mamoe Lelei”

3. E tusa ai ma le 1 Timoteo 5:8, o le ā e aofia ai i le matafaioi a le ulu o se aiga?

³ Ua faapea mai le Tusi Paia: “O le ulu o le fafine o le tane.” (1 Kori. 11:3) O le ā e aofia ai i le matafaioi a le ulu o se aiga? Ua taʻua i le Tusi Paia se tasi o matafaioi a le ulu o le aiga: “Afai e lē tausi e se tasi i ē e tatau ona ia tausia, aemaise lava tagata o lona aiga, ua faafitia e ia le faatuatua, ma e sili lona leaga i lo le tagata e lē faatuatua.” (1 Timo. 5:8) O le mea moni, e ao ona saunia e le tane mea faaletino mo lona aiga. Ae ina ia fesoasoani i le mataala faaleagaga o lona aiga, e sili atu mea e manaʻomia nai lo le na o le faigaluega ina ia maua ai tupe mo le aiga. E manaʻomia ona ia atiaʻe lona aiga i le itu faaleagaga, ma fesoasoani atu i tagata uma o le aiga ia faamalosia la latou faiā ma le Atua. (Faata. 24:3, 4) E faapefea ona ia faia faapea?

4. O le ā e fesoasoani i se tane ina ia taulau ai i le atiaʻe faaleagaga o lona aiga?

⁴ Ona “o le tane o le ulu lea o le avā, e pei foʻi o Keriso o le ulu ia o le faapotopotoga,” e tatau la i se tane ua faaipoipo ona iloilo ma faataʻitaʻi i le auala ua faatino ai e Iesu lona tulaga ulu i le faapotopotoga. (Efe. 5:23) Mātau le faamatalaga a Iesu e uiga i la latou faiā ma ona soo. (Faitau le Ioane 10:14, 15.) O le ā le auala e taulau manuia ai se tane i le atiaʻe faaleagaga o lona aiga? O le auala lenei: Ia suʻesuʻe i gaoioiga ma fetalaiga uma a le “leoleo mamoe lelei” o Iesu, ma ia “mulimulituʻi ai i ona tulaga aao.”​—1 Pete. 2:21.

5. O ā mea o loo iloa e le Leoleo Mamoe Lelei e uiga i le faapotopotoga?

⁵ I se tulaga faafaatusa, e faavae le faiā a se leoleo mamoe ma ana mamoe, i le iloa ma le maufaatuatuaina. E iloa lelei e le leoleo mamoe lana lafu, ma e iloa ma maufaatuatuaina e le lafu le leoleo mamoe. E iloa ma e  usiusitaʻi mamoe i lona leo. Na fetalai Iesu: “Ua ou iloa aʻu mamoe, ma e iloa foʻi aʻu e aʻu mamoe.” E silafia lelei e Iesu mea uma i le faapotopotoga. O le upu Eleni ua faaliliuina “iloa,” o lona uiga o le “iloatino ma le masani lelei.” Ioe, e iloa e le Leoleo Mamoe Lelei ana mamoe taʻitoʻatasi. Ua ia iloa o latou manaʻoga taʻitoʻatasi, o o latou vaivaiga, ma mea e latou te lelei ai. E leai se mea e uiga i mamoe e lē silafia e lo tatou Faaaʻoaʻo o Iesu. Ma e matuā iloa ma maufaatuatuaina e mamoe le leoleo mamoe ma lana taʻitaʻiga.

6. E mafai faapefea ona pei tane o le Leoleo Mamoe Lelei?

⁶ Ina ia faatino e se tane lona tulaga ulu e pei o Keriso, e ao ona manatu iā te ia lava o se leoleo mamoe, a o lona aiga o mamoe. E tatau ona taumafai malosi ina ia iloa lelei lona aiga. Pe e mafai ona faia faapea e se tane? Ioe, pe afai e lelei le auala e feagai ai ma lona aiga, faalogo i o latou manatu, taulamua i mataupufai a le aiga, ma magafagafa i le faia o filifiliga lelei i mea e pei o le tapuaʻiga a le aiga, auai i sauniga, talaʻiga, tafaoga, ma faafiafiaga. Pe a faataatia e se tane Kerisiano se faaaʻoaʻoga lelei ua ia aʻoaʻoina mai le Tusi Paia, ma iloa lelei manaʻoga o lona aiga, o le a lagolagoina e tagata uma lona tulaga ulu, ma o le a fiafia i le iloa o loo autasi lona aiga i le tapuaʻiga moni.

7, 8. E faapefea ona faataʻitaʻi se tane i le Leoleo Mamoe Lelei, e ala i le alofa faapelepele iā i latou o loo ia tausia?

⁷ O se leoleo mamoe lelei e alofa faapelepele i ana mamoe. Pe a tatou suʻesuʻeina faamaumauga a le ʻau faievagelia i le soifuaga ma le auaunaga a Iesu, e pāʻia ai o tatou loto ona o le alofa faapelepele sa faaalia e Iesu i ona soo. Na oo lava ina ʻfoaʻiina atu lona ola mo mamoe.’ E ao i tane ona faataʻitaʻi iā Iesu e ala i le alofa faapelepele i ē o loo latou tausia. Nai lo o le pule sauā i lana avā, e tatau i se tane o loo naunau ina ia maua le finagalo malie o le Atua, ona faaauau ona alofa i lana avā, “e pei o le Keriso foʻi ona alofa i le faapotopotoga.” (Efe. 5:25) E manaʻomia ona faaalia e le tane le agalelei ma le magafagafa i ana upu, ona e tatau ona āva i lana avā.​—1 Pete. 3:7.

⁸ A o aʻoaʻoina le fanau, e tatau ona maumauaʻi le ulu o le aiga i mataupu silisili. Peitaʻi, e ao pea ona faapelepele i lana fanau. E tatau ona faatino aʻoaʻiga i se auala alofa. O nisi tamaiti e umi se taimi ona faatoʻā malamalama lea i le mea o loo manaʻomia ona latou fai, nai lo o isi tamaiti. I taimi faapena, e tatau i se tamā ona onosaʻi pea. Afai e mulimuli pea tane i le faaaʻoaʻoga a Iesu, e latou te faatupuina se siʻomaga saogalemu i le aiga. E maua ai e o latou aiga le ituaiga o saogalemu faaleagaga, lea sa pese i ai le faisalamo.​—Faitau le Salamo 23:1-6.

9. O ā tiute tauave ua iai i tane Kerisiano e pei o le augātamā o Noa, ma o le ā e fesoasoani iā i latou e faatinoina ai?

⁹ Na soifua le augātamā o Noa i le taimi o le iʻuga o le lalolagi i ona aso. Ae na “laveaʻiina Noa . . . ma isi e toʻafitu, ina ua ia [Ieova] aumaia le lolo i le lalolagi o tagata faalēmataʻu.” (2 Pete. 2:5) Sa iā Noa le tiute tauave o le fesoasoani lea o lona aiga ina ia faasaoina mai le Lolo. Ua faapena foʻi ona iai i ulu o aiga Kerisiano lea tiute tauave i nei aso e gata ai. (Mata. 24:37) E tāua tele la lo latou suʻesuʻeina o le faaaʻoaʻoga a “le leoleo mamoe lelei” ma taumafai e faataʻitaʻi i ai!

Avā—ʻIa Atiaʻe Lou Aiga’

10. O le ā le uiga o le gauaʻi o se avā i lana tane?

¹⁰ Na tusi le aposetolo o Paulo: “O avā, ia gauaʻi atu i a latou lava tane e pei ona gauaʻi atu i le Alii.” (Efe. 5:22) E lē o le uiga o lenei faaupuga faapea ua latou iai i se tulaga faatauvaa. A o leʻi foafoaina le uluaʻi fafine o Eva, na folafola mai e le Atua moni: “E lē lelei mo le tagata ona ola na o ia. Ou te faia se  fesoasoani mo ia, o sē e talafeagai lelei mo ia.” (Kene. 2:18) O se tulaga e faamamaluina ai le avea ma “fesoasoani” ma “sē e talafeagai” e pei ona taʻua i le mau, a o ia lagolagosua i lana tane i le faataunuuina o ona tiute i le tausia o le aiga.

11. E faapefea e se avā lelei ona ʻatiaʻe lona aiga’?

¹¹ O se avā lelei e galue mo le lelei o lona aiga. (Faitau le Faataoto 14:1.) O le eseesega ma se fafine valea, e lē faaaloalo o ia i le tulaga ulu, ae o le fafine atamai e matuā faaaloalo i lenei faatulagaga. Nai lo le faaalia o uiga lē usiusitaʻi ma le fia tutoʻatasi e pei ona iai i le lalolagi, ae e gauaʻi atu o ia i lana paaga. (Efe. 2:2) O se avā valea, e lē popole i le faitioina o lana tane, ae o le avā atamai e taumafai ina ia matuā faaaloalogia lana tane e lana fanau faapea foʻi ma isi. O le avā faapea, e faaeteete ia lē taʻufaatauvaaina le tulaga ulu o lana tane, i le tomumu ma le tauupu soo ma lana tane. E tāua foʻi le fuafua lelei o mea tautupe. O se fafine valea e faamaʻimau tupe lea na tigāina nisi o le aiga e suʻe mai. E lē faapena se avā e lagolagosua i le aiga. E felagolagomaʻi ma lana tane i tulaga tautupe. O ana gaoioiga e matilatila mai ai lona faautauta ma le faasoa lelei o tupe. E na te lē tauanau lana tane e faigaluega ovataimi.

12. O le ā e mafai ona faia e se avā, ina ia “mataala” ai le aiga?

¹² O se avā lelei, e fesoasoani ina ia “mataala” le aiga e ala i le fesoasoani atu i lana tane, i le aʻoaʻoina o le fanau i mea faaleagaga. (Faata. 1:8) E na te lagolagoina le polokalame o le Tapuaʻiga a le Aiga. E lē gata i lea, e na te lagolagoina lana tane i taimi e fautuaina ma aʻoaʻia ai le fanau. Maʻeu le eseesega o ia ma se avā e lē felagolagomaʻi, lea e iʻu ina pagatia ai le fanau i le itu faaletino ma le faaleagaga!

13. Aiseā e tāua ai ona lagolagosua le avā i lana tane, a o auai atu le tane i galuega faatiokarate?

¹³ O le ā le faalogona o se avā e lagolagosua i lana tane, pe a pisi lana tane i meafai a le faapotopotoga Kerisiano? E mautinoa lona olioli! E fiafia pe a maua e lana tane le faaeaga o le avea o se auauna o le faiva, po o se toeaina, po o se sui o le Komiti o Mataupu Tau Falemaʻi, po o se sui o le Komiti o Faugāfale o le Vaipanoa. E mautinoa le manaʻomia ona faataulaga nisi mea, ina ia lagolagosua i lana tane e ala i ana upu ma gaoioiga. Ae ua ia iloa o le auai atu o lana tane i nei galuega faatiokarate, e fesoasoani ina ia mataala faaleagaga le aiga atoa.

14. (a) Aiseā e mafai ona faigatā i se avā ona lagolagosua i lana tane, ma e faapefea ona foʻia lenā tulaga? (e) O le ā le vaega e faia e se avā mo le manuia o le aiga?

¹⁴ Atonu e faigatā ona lagolagosua se avā i lana tane, pe a faia e lana tane se faaiʻuga e lē ioe i ai le avā. Ae e faaalia e le avā le “agaga  agamalu ma le filemu,” ma e felagolagomaʻi ma lana tane ina ia faataunuu lana faaiʻuga. (1 Pete. 3:4) O se avā lelei, e taumafai e mulimuli i faaaʻoaʻoga lelei a fafine faatuatua e pei o Sara, Ruta, Apikaila, ma le tinā o Iesu o Maria. (1 Pete. 3:5, 6) E faataʻitaʻi foʻi o ia i tuafāfine matutua i aso nei, o ē ua “pei a latou amio o tagata paia.” (Tito 2:3, 4) E ala i le faaalia o le alofa ma le faaaloalo i lana tane, e faia ai e le avā se vaega telē i le taulau manuia o la laʻua faaipoipoga ma le aiga atoa. O lona aiga o se nofoaga e maua ai le toʻafilemu ma le saogalemu. Ae i se tane faaleagaga, o le iai o se avā e lagolagosua, e matuā tautele lea iā te ia!​—Faata. 18:22.

Talavou​—ʻTaulaʻi la Outou Vaai i Mea e Lē Vaaia’

15. E faapefea ona felagolagomaʻi talavou ma mātua ina ia “mataala” ai le aiga?

¹⁵ E faapefea ona felagolagomaʻi outou talavou ma o outou mātua ina ia “mataala” faaleagaga o outou aiga? Seʻi manatu i le taui ua tuu mai e Ieova i ou luma. Atonu ua leva ona faaali atu e ou mātua ata o le olaga i le Parataiso. A o e tuputupu aʻe, atonu sa latou faaaogāina le Tusi Paia ma lomiga faa-Kerisiano, e fesoasoani iā te oe e faaata i lou mafaufau le ola e faavavau i le lalolagi fou. O lau taulaʻi atu i le auaunaga iā Ieova, o le a fesoasoani iā te oe e “mataala” ai.

16, 17. O le ā e mafai ona faia e se talavou ina ia taulau manuia ai i le tuuga o le ola?

¹⁶ Ia teuloto upu a le aposetolo o Paulo o loo maua i le 1 Korinito 9:24. (Faitau.) Tamoʻe i le tuuga o le ola ma lou naunautaʻiga ina ia manumalo. Filifili le ala e iʻu ai i le taui o le ola e faavavau. Ua taʻitaʻisesēina le toʻatele ma lē taulaʻi atu i le taui, ona o le mananaʻo tele i meafaitino. Pagā le valea o le faia faapea! O le taulaʻi o lou olaga i le mauaina o ʻoa, e lē iʻu ai i le fiafia. E lē tumau mea e faatauina i tupe. A o oe, ia e taulaʻi i “mea e lē o vaaia.” Aiseā? Auā “o mea e lē o vaaia e faavavau ia.”​—2 Kori. 4:18.

¹⁷ “O mea e lē o vaaia,” e aofia ai faamanuiaga o le Malo. Fuafua lou olaga i se auala e mafai ai ona e maua na faamanuiaga. O le fiafia moni e maua mai le faaaogā o lou olaga i le auaunaga iā Ieova. O le auauna i le Atua, e maua ai avanoa e aapa atu ai e ausia sini i aso taʻitasi, ma sini mo le lumanaʻi. * O le faataatitia o sini faaleagaga e talafeagai, e fesoasoani i lou taulaʻi atu pea i le auaunaga i le Atua, ma le faamoemoe ia maua le taui o le ola e faavavau.​—1 Ioa. 2:17.

18, 19. E faapefea ona iloa e se talavou ua iai sa la faiā ma Ieova?

¹⁸ Talavou e, o le laasaga muamua i le ala i le ola, o le atiaʻe o lau lava faiā ma Ieova. Po ua e faia lea laasaga? Fesili ifo iā te oe lava: ʻPo o aʻu o se tagata faaleagaga, pe ou te faalagolago i oʻu mātua pe a oo i mea faaleagaga? Po o oʻu atiaʻe uiga e fiafia i ai le Atua? Po o oʻu taumafai e faia pea soʻu sao i galuega e fesootaʻi atu i le tapuaʻiga moni, e pei o le tatalo e lē aunoa, suʻesuʻe, auai i sauniga, ma le galuega talaʻi? Po o oʻu faalatalata atu pea i le Atua e ala i le tausia o se faiā māfana ma ia?’​—Iako. 4:8.

¹⁹ Mafaufau i le faaaʻoaʻoga a Mose. E ui sa  ola aʻe o ia i se nuu e ese a latou aganuu, ae na manaʻo Mose ia iloa o ia o sē e tapuaʻi iā Ieova, nai lo le taʻua o ia o le tama a le afafine o Farao. (Faitau le Eperu 11:24-27.) Talavou Kerisiano e, e ao foʻi ona outou maumauaʻi e auauna ma le faamaoni iā Ieova. O lo outou faia faapea, tou te maua ai le fiafia moni, se olaga e sili ona lelei i le taimi nei, ma le faamoemoe ia “taofi mau i le ola moni.”​—1 Timo. 6:19.

20. I le tuuga mo le ola, o ai e mauaina le taui?

²⁰ O taaloga i aso anamua, e na o le tasi le tagata e manumalo i se tuuga. Ae e lē faapena le tuuga mo le ola. O le finagalo o le Atua, “ia faaolaina ituaiga uma o tagata, ma ia maua le poto saʻo i le upu moni.” (1 Timo. 2:3, 4) E toʻatele i latou ua manumalo i le tuuga, ma e toʻatele foʻi o loo tamomoʻe faatasi ma outou. (Epe. 12:1, 2) E maua e i latou uma e lē faavaivai i le tuuga le taui. O lea, ia e taumafai malosi ina ia e manumalo!

21. O le ā o le a iloiloina i le mataupu o sosoo mai?

²¹ E lē maʻalofia le ʻoo mai o le aso tele ma le mataʻutia o Ieova.’ (Mala. 4:5) E lē tatau ona faateʻia aiga Kerisiano pe a oo mai lenā aso. E tāua tele mo tagata uma i le aiga ona tauave a latou matafaioi faale-Tusi Paia. O ā isi mea e ao ona e faia ina ia mataala ai faaleagaga ma faamalosia lau faiā ma le Atua? O le a talanoaina i le mataupu o sosoo mai ni vala se tolu, e aafia ai le tulaga lelei faaleagaga o se aiga.

[Faaopoopoga i lalo]

O le ā na E Aʻoaʻoina?

• Aiseā e tāua ai ona “mataala” aiga Kerisiano?

• E faapefea ona faataʻitaʻi se tane i le Leoleo Mamoe Lelei?

• O le ā e faia e se avā lelei ina ia lagolagosua ai i lana tane?

• E faapefea ona fesoasoani talavou ina ia mataala le aiga?

[Fesili mo le Suʻesuʻega]

[Ata i le itulau 9]

O se avā e lagolagosua i lana tane, e matuā tautele i se tane faaleagaga